Andama ang Imong Kaugalingong Presentasyon sa Magasin
1 Atong gipabilhan ang Bantayanang Torre ug Pagmata! nga mga magasin sa tukma sa panahon ug impormatibong mga artikulo niini, nga nagakobre sa tanang butang gikan sa mga isyu sa kalibotan ngadto sa “ang lawom nga mga butang sa Diyos.” (1 Cor. 2:10) Kitang tanan makahinumdom sa daghang bag-o ug makapalig-ong mga butang nga atong mabasa niining mga mantalaana, nga gigamit ni Jehova sa mauswagong pagpadayag sa kamatuoran. (Prov. 4:18) Buot natong magmaikagon sa pag-apod-apod niini sa mas lapad nga paaging posible.
2 Analisaha ang Imong Teritoryo: Unsang matanga sa katawhan ang nanimuyo sa imong lugar? Kon kanunay silang nagdali, mahimong kinahanglang mangandam kag presentasyon nga mubo ug laktod. Kon aduna ka ing teritoryo nga ang mga tawo dili kaayo puliki, hayan makasulti ka pag dugang. Kon ang kasagarang mga tagbalay nagatrabaho sa adlaw, basin magmalamposon kag dugang kon moduaw sa ilang mga balay sa magabii. O makontak nimo ang pipila sa adlawan pa pinaagig pagsangyaw sa kadalanan o sa pagkobre sa katindahanan. Pipila ka magmamantala nakakuhag maayong mga resulta pinaagig pagduol sa mga tawo sa mga paradahan ug mga parke.
3 Sinatia ang Imong Kaugalingon sa mga Magasin: Basaha dayon ang matag isyu sa imong pagdawat niana. Pilia ang mga artikulo nga imong gibating makadani sa katawhan sa imong teritoryo. Unsang mga ulohana ang angayan kanila? Tan-awa ang tinong punto nga imong makutlo gikan sa artikulo nga imong giplanong ipasiugda. Paghunahunag pangutana nga imong ikapatungha nga makapukaw ug interes. Pagpilig usa ka kasulatan nga mabasa ngadto sa tagbalay kon aduna ka ing kahigayonan sa pagbuhat niana. Paghunahuna kon sa unsang paagi ikaw makapahilunag pasukaranan alang sa balikduaw.
4 Andama ang Imong Pasiunang mga Pulong: Piliang maampingon ang mga pulong nga imong gamiton sa pagsugod ug panaghisgot. Ang pipila milampos pinaagi niining pasiunang komento: “Nakabasa akog makapahinam nga artikulo niining magasina, ug buot nakong ipakig-ambit kini ngadto sa uban.” Daghan ang mosugod pinaagig usa ka pangutana nga nagapunting sa igsusulting mga puntos nga ilang giplanong gamiton. Pananglitan:
5 Kon nagapasiugdag artikulo bahin sa kasubsob sa krimen, makasukna ka:
◼ “Unsay gikinahanglan aron posible kitang makatulog sa kagabhion nga walay kahadlok nga tulison o dagmalan?” Ipatin-aw nga aduna ka ing pipila ka impormasyon bahin sa kasulbaran niining sulirana. Ang sulbad sa di-madugay magahanaw usab sa tanang matang sa sosyal nga kagubot. Ipunting ngadto sa bahin sa magasin nga nagatanyag sa maong paglaom. Sa imong pagbalik, imong mabutad ang pagtagad sa tagbalay ngadto sa kapitulo 1 sa basahong Kahibalo.
6 Sa dihang magatanyag sa artikulo sa pamilyahanong kinabuhi, ikaw hayan makaingon niini:
◼ “Nakaplagan sa kadaghanang ginikanan nga usa gayod ka hagit ang pag-atiman ug pamilya niining mga adlawa. Daghang basahon ang nasulat na niining ulohana, apan bisan ang mga eksperto wala magkasinabot. Aduna bay usa nga makataganag kasaligang giya?” Ipaambit ang tinong komento gikan sa magasin nga nagapasundayag sa maalamong tambag nga makaplagan sa Bibliya. Sa dihang ikaw mobalikduaw, hisgoti ang Kasulatanhong mga puntos bahin sa pagmatuto sa kabataan nga gikobrehan sa basahong Kahibalo, mga panid 145-8.
7 Sa pagpasundayag sa artikulo bahin sa sosyal nga suliran, ikaw makaingon:
◼ “Daghang tawo mibating gipig-otan tungod sa mapig-otong mga panahon nga kita nagakinabuhi. Gihunahuna ba nimong gimbut-an sa Diyos nga kita magkinabuhing ingon niini?” Ipunting ang artikulo nga nagapakita kon unsaon sa pagsagubang sa mga suliran karong mga adlawa o nianang naghatag ug mga katarongan nga molantaw sa umaabot nga wala ing kabalaka. Sa imong sunod duaw, hisgoti ang ilustrasyon ug kapsiyon sa mga panid 4-5 sa basahong Kahibalo, ug dayon dad-a ngadto sa pagtuon sa Bibliya sa balay.
8 Pahiuyon sa Tagbalay: Mahibalag nimo ang katawhan nga adunay lainlaing mga interes ug kagikanan. Andama ang tinong presentasyon nga imong mapasibo sa matag tagbalay. Magmaandam sa pagpasibo kon unsay imong isulti ngadto sa usa ka lalaki, sa babaye, sa hamtong, o sa usa ka batan-on. Walay pig-ot nga mga lagda kon unsay angay nimong isulti. Gamita ang bisan unsay sayon alang kanimo ug batoni ang mga resulta. Bisan pa niana, magmainiton, sulting kinasingkasing, ug mahimong maayong tigpatalinghog. Kadtong “sa husto nahimutang” makamatikod sa imong katim-os ug mosanong nga mauyonon.—Buh. 13:48.
9 Magtinabangay sa Usag Usa: Pinaagig pagpaambit sa mga ideya sa usag usa, makakat-on kitag bag-ong mga paagi sa pagpahayag sa atong mga kaugalingon. Ang pagbansay sa atong mga presentasyon nga tingob maghatag kanatog pagsalig. (Prov. 27:17) Kon mag-ensayo ka kon unsay imong isulti, mas mobati kang hayahay diha sa pultahan. Hinungdanon nga gahinag panahon sa mga ginikanan ang ilang mga anak sa pagpangandam, maminaw samtang ilang bansayon ang ilang presentasyon, ug motanyag ug mga sugyot sa pagpauswag. Ang mga bag-ohan makabenepisyo pinaagig pagkuyog sa mas sinating mga magmamantala.
10 Ang pagpangandam sa imong kaugalingong presentasyon sa magasin di-kinahanglang lisod. Pagbutang lamang kinig tinong butang sa hunahuna aron isulti ug unya ipahayag kana sa makapadaning paagi. Uban ang abanteng panghunahuna, makapangandam kag maayong presentasyon nga makakuhag maayong sanong.
11 Ang pagpanagtag ug magasin maoy usa sa pangunang mga paagi nga atong ikapakaylap ang mensahe sa Gingharian sa tibuok yuta. Kon imong mapahiluna ang Ang Bantayanang Torre ug Pagmata! ngadto sa mga kamot sa sinserong katawhan, ang mga magasin mao na ang mosulti. Hinumdomi kanunay ang bili niini ug kon sa unsang paagi ang mensahe niini makaluwas ug mga kinabuhi. Kining matanga sa ‘pagbuhat sa maayo ug pagpakig-ambitay sa mga butang sa uban’ maoy makapahimuot pag-ayo kang Jehova!—Heb. 13:16.