Pangutana

◼ Unsang mga pag-amping ang gikinahanglan sa dihang kita makig-uban sa kaatbang nga sekso diha sa atong ministeryo?

May katarongan kitang magdahom nga ang atong mga igsoong lalaki ug babaye buot nga maghupot sa labing taas nga sukdanan sa moral diha sa ilang personal nga panggawi. Bisan pa niana, nagkinabuhi kita sa di-hinlo nga kalibotan nga wala kaayoy pagpugong sa moral. Bisag maayo kaayo tingali ang atong intensiyon, kita kinahanglang magbantay kanunay aron dili makapahinabog kaulawan o malangkit sa butang nga di-maayo. Maglakip kini sa pag-amping samtang nakigbahin diha sa ministeryo.

Sa pag-alagad sa kanataran kita kasagarang makasugat ug mga tawo sa kaatbang nga sekso nga maorag may sinserong interes sa kamatuoran. Kon kita nag-inusarang miduaw ug walay laing tawo sa balay, kasagaran nga labing maayong mopamatuod na lamang diha sa pultahan inay nga mosulod pa. Kon may interes, tingali himoon ang mga kahikayan nga mobalik sa dihang kita kuyogan ug laing magmamantala o sa dihang ang uban sa panimalay anaa usab. Kon kini dili posible, maalamon nga ipabalik na lamang sa usa ka magmamantala nga samag sekso sa tagbalay. Mapadapat usab kini sa pagdumalag mga pagtuon sa Bibliya uban sa usa nga kaatbang sa sekso.​—Mat. 10:16.

Kinahanglang mag-amping kita sa pagpilig usa nga mokuyog kanato diha sa ministeryo. Bisan tuod ang mga magmamantala sa kaatbang nga sekso magkakuyog usahay, labing maayong buhaton kini uban sa grupo. Kasagaran, bisan diha sa ministeryo, dili maalamon nga kita mogugol ug panahon nga mag-inusara kauban sa kaatbang nga sekso nga dili nato kapikas sa kaminyoon. Busa, ang igsoong lalaki nga gitugyanan sa grupo sa pag-alagad angayng mogamit ug maayong paghukom sa dihang magtudlo ug mga magmamantala, lakip ang mga tin-edyer, nga magkauban.

Pinaagig paggamit kanunay ug maayong paghukom, makalikay kita nga “magahatag ug unsa mang hinungdan sa pagkapandol,” sa atong kaugalingon o sa uban.​—2 Cor. 6:3.