Abota ang Di-Magtutuong mga Kapikas
1 Maoy hinungdan sa dakong kalipay sa dihang ang minyong mga magtiayon nahiusa diha sa tinuod nga pagsimba. Bisan pa niana, sa daghang pamilya usa lamang sa kapikas sa kaminyoon ang midawat sa dalan sa kamatuoran. Sa unsang paagi atong maabot kining di-magtutuong mga kapikas ug magdasig kanila sa pagsimba kang Jehova uban kanato?—1 Tim. 2:1-4.
2 Sabta ang Ilang Panghunahuna: Bisan tuod ang pipila ka di-magtutuong mga kapikas tingali misupak, sagad nga ang suliran mao ang kawalay-pagtagad o di-pagkasinabot. Ang usa ka tawo hayan mobating biniyaan o mangabugho tungod sa bag-ong nakaplagang espirituwal nga interes sa iyang kapikas. “Nag-inusara sa balay, ako mibating biniyaan,” usa ka bana nahinumdom. “Ako mibati nga maorag ang akong asawa ug mga anak nag-abandono kanako,” miingon ang lain. Ang pipila ka lalaki hayan maghunahuna nga sila mawad-an sa ilang pamilya tungod sa relihiyon. (Tan-awa ang Agosto 15, 1990, Bantayanang Torre, mga panid 20-3.) Mao kanay hinungdan kon nganong labing maayo, kon posible, nga ang bana maapil uban sa iyang asawa sa kahikayan sa pagtuon sa Bibliya sa balay gikan sa sinugdan.
3 Pagbuhat Ingong Usa ka Tem: Usa ka magtiayong Saksi epektibong nagduyog pagbuhat sa pagtabang sa minyong mga tawo diha sa kamatuoran. Human nga ang sister nakatukod sa usa ka pagtuon uban sa asawa, ang igsoong lalaki moduaw sa bana ug sagad nga makahimo sa pagsugod ug usa ka pagtuon.
4 Magmahigalaon ug Maabiabihon: Ang mga pamilya diha sa kongregasyon makatabang pinaagi sa pagpakitag interes sa mga pamilya nga wala pa mahiusa diha sa tinuod nga pagsimba. Ang pipila ka mahigalaong mga duaw hayan makatabang sa di-magtutuong kapikas sa pagkakita sa mga Saksi ni Jehova ingong mainiton, nagaamoma nga mga Kristohanon kinsa mabalak-on bahin sa kaayohan sa usag usa.
5 Sa popanahon, sublion sa mga ansiyano kon unsa ang di pa dugayng mga paningkamot ang gihimo sa pag-abot sa di-magtutuong mga kapikas ug kon unsa pay dugang mahimo diha sa kalaoman nga madaog sila ngadto kang Jehova.—1 Ped. 3:1, potnot.