“Si Jehova ang Akong Magtatabang”
1 Sa dihang gisugo ni Jesus ang iyang unang mga tinun-an, iyang giingnan sila: “Tan-awa! Nagapadala ako kaninyo ingong mga karnero taliwala sa mga lobo.” (Mat. 10:16) Nakapahadlok ba kana kanila ug midumili? Wala. Ilang gisagop ang tinamdan nga gipahayag sa ulahi ni apostol Pablo sa dihang iyang giingnan ang kaubang mga Kristohanon: “Magmaisogon ug makaingon: ‘Si Jehova ang akong magtatabang; dili ako mahadlok. Unsay arang mahimo sa tawo kanako?’” (Heb. 13:6) Ilang gikalipay nga isipong takos nga pakaulawan tungod ug alang sa ngalan ni Jesus, ug sila nagpadayon nga walay hunong sa pagpanudlo ug pagpahayag sa maayong balita.—Buh. 5:41, 42.
2 Karon ang tibuok kalibotang buluhaton sa pagsangyaw anaa na sa hinapos nga mga hugna niini. Ingon sa gitagna ni Jesus, kita nahimong tumong sa pagdumot sa tanang kanasoran. (Mat. 24:9) Ang atong buluhatong pagsangyaw gisupak ug gitamay, ug sa pipila ka bahin sa yuta, kini gani ginadili. Kon kita makulangag pagtuo, kita mobating mahadlok. Bisan pa niana, ang pagkasayod nga si Jehova mao ang atong Magtatabang magpalagsik kanato ug magpalig-on kanato sa paglahutay.
3 Ang kaisog maoy hiyas sa pagkalig-on, walay kahadlok, walay katalaw. Kaatbang kini sa kahadlok, kaulaw, katalaw. Ang mga tinun-an ni Jesus kanunayng nagkinahanglan ug kaisog aron makalahutay. Hinungdanon kini kon buot natong dili maluya tungod sa mga tinamdan ug mga buhat sa usa ka kalibotan nga nagapakig-away sa Diyos. Pagkamakapadasig niini alang kanato nga maghunahuna sa dalisay nga panig-ingnan ni Jesus, ang mananaog sa kalibotan! (Juan 16:33) Hinumdomi, usab, ang mga apostol kinsa sa atubangan sa grabeng mga pagsulay maisogong mipahayag: “Kinahanglang among sugton ang Diyos ingong magmamando inay kay sa mga tawo.”—Buh. 5:29.
4 Kita Dili ang Matang nga Nagapanibog: Kita kinahanglang maningkamot sa paghupot kanunay ug positibong tinamdan sa atong buluhaton. (Heb. 10:39) Hinumdomi kanunay nga kita gipadala ni Jehova ingong kapahayagan sa iyang gugma ug kaluoy ngadto sa tanang katawhan. Siya dili gayod mopabuhat sa iyang mga alagad ug bisan unsa nga dili magsilbi ug mapuslanong katuyoan. Ang tanang butang nga kita gitudlo sa pagbuhat sa kataposan maoy alang sa ikaayo niadtong kinsa mahigugma sa Diyos.—Roma 8:28.
5 Ang positibong tinamdan motabang kanato sa pagpadayon sa pagpangita sa mga karnerohon diha sa atong teritoryo. Mahimong atong isipon ang kawalay-pagtagad nga gipakita sa mga tawo ingong kapahayagan sa ilang kapakyasan ug kawalay-paglaom. Tugoting palihokon kita sa atong gugma nga magmabination ug magmapailobon. Sa matag panahon nga kita makapahiluna ug literatura o sa laing paagi makamatikod ug kidlap sa interes, ang atong tumong angay nga mao ang pagbalikduaw gilayon ug halingon ang dugang interes. Kinahanglang dili gayod kita magduhaduha sa atong katakos sa pagsugod ug pagtuon sa Bibliya o sa pagkahimong epektibo sa pagdumala niana. Hinunoa, kita kinahanglan nga sa makanunayon ug sa mainampoong paagi mangayo sa tabang ug pagtultol ni Jehova, nga masaligong siya motabang kanato.
6 Kita hugot nga nagtuo nga tinoon ni Jehova nga mahuman gayod ang buluhaton. (Itandi ang Filipos 1:6.) Ang atong bug-os nga pagsalig kaniya ingon nga atong Magtatabang magpalig-on kanato, aron kita “dili moundang sa pagbuhat kon unsay maayo.”—Gal. 6:9.