Pagtanyag sa Maayong Balita Uban ang Positibong Tinamdan
1 Kitang tanan buot nga makakaplag ug kalipay sa atong ginabuhat, ilabina sa paghimog-tinun-an nga buluhaton. Unsay maghatag kanato sa maong katagbawan? Magsugod kini sa atong paghupot ug positibong tinamdan sa hunahuna sa dihang magatabang sa uban. (Prov. 11:25) Ang atong paagi sa pagtanyag sa maayong balita kinahanglang magpasundayag nga kita gayod nagatuo sa atong ginasulti. Kon kita mosulting kinasingkasing, nan ang atong kasinsero ug personal nga kombiksiyon mosidlak. (Luc. 6:45) Pinaagi sa pag-ensayo sa atong presentasyon, kita mas masaligon sa dihang mosulti sa mga tawo. Magtabang kini kanato ilabina sulod sa Pebrero sa dihang magtanyag sa librong Life—How Did It Get Here? By Evolution or by Creation? Hayan makaplagan mong makatabang ang mosunod nga mga sugyot.
2 Sa dihang magatanyag sa “Creation” nga libro, makaingon ka niini sa unang duaw:
◼ “Sa pagpakigsulti sa atong mga silingan, among nakaplagan nga ang pipila adunay pagsalig sa Diyos. Ang uban nalisdan sa pagtuo kaniya. Unsay imong pagbati? [Tugoting motubag.] Matikdi kon sa unsang paagi ang Bibliya nangatarongan niining butanga. [Basaha ang Roma 1:20.] Atong makita ang pamatuod sa ‘dayong gahom ug pagka-Diyos’ sa Diyos pinaagi sa pagmatikod sa mga butang nga iyang gilalang.” Basaha ang kataposang parapo sa panid 48 sa Creation nga libro, ug dad-a ang pagtagad ngadto sa pagkakomplikado sa buhing selula. O gamita ang parapo 18 sa panid 147 aron ipakita kon sa unsang paagi ang kahibulongang circulatory system sa kahoy nagapasiugda sa buhat sa usa ka Maglalalang. Itanyag ang libro ug hikaya ang pagbalik.
3 Sa dihang mobalikduaw niadtong kinsa imong nahisgotan sa pagka-Maglalalang sa Diyos, hayan buot mong isulti kini:
◼ “Sa akong miaging duaw, atong gihisgotan ang bahin sa ebidensiya sa paglungtad sa Diyos—ang iyang kahibulongang kalalangan. Nalisdan ka ba sa pagtuo nga ang Usa kinsa naglalang sa uniberso interesado usab sa atong umaabot? [Tugoting motubag.] Makapainteres ang pagmatikod nga ang umaabot gitino nang daan sa Maglalalang.” Basaha ang Isaias 46:9, 10. Nag-agad sa kaikag sa indibiduwal, gamita ang mga hulagway ug mga kapsiyon sa kapitulo 19 sa Creation nga libro aron ipasiugda ang hamiling mga kahimtang nga gisaad sa Diyos. Basaha ang parapo 1 sa kapitulo 20, ug tanyagi ug pagtuon sa Bibliya. Kon dawaton, sugdi ang pagtuon diha sa Kahibalo nga libro.
4 Mahimong imong sulayan kining presentasyona sa dihang magatanyag sa “Creation” nga libro:
◼ “Sa pagpakigsulti sa imong mga silingan, akong namatikdan nga ang kadaghanan nangandoy sa usa ka hilwas nga katilingban ug malinawong kalibotan. Sa imong hunahuna nganong napakyas ang tawo sa pagkab-ot sa maong mga kahimtang? [Tugoting motubag.] Mahimong sinsero ang ubang mga pangulo ug nagabuhat ug pipila ka kaayohan, apan matikdi kon unsay ginatambag sa Bibliya.” Basaha ang Salmo 146:3, 4; dayon suknaa: “Duna bay usa nga makatagbaw sa mga panginahanglan sa tawo?” Basaha ang mga bersikulo 5 ug 6. Ipakita ang hulagway sa panid 251 sa Creation nga libro, ug dad-a ang pagtagad sa mga kaayohan sa pagmando sa Diyos. Itanyag ang libro.
5 Kon ang pagmando sa Diyos gihisgotan sa sinugdan, masulayan mo kining sugyota sa pagbalikduaw:
◼ “Sa dinhi ako pipila ka adlaw na ang miagi, atong nahisgotan ang kapakyasan sa tawo sa pagpatunghag pakigdait sa yuta. Hayan imong mahinumdoman ang rason nga gihatag sa Bibliya sa maong kapakyasan. [Basaha pag-usab ang Salmo 146:3.] Namatikdan ba nimo kon nganong ang Diyos nagatambag kanato sa dili pagbutang sa atong mga paglaom diha sa mga tawo? [Tugoting motubag.] Tingali mouyon ka nga ang bisan unsang paglaom alang sa dumalayong sulbad kinahanglang magagikan sa Diyos. Ang katarongan nga atong mabatonan kining paglaoma gisaysay sa Salmo 146:10. [Basaha.] Kon buot natong mahimong sakop sa Gingharian sa Diyos, unsay angay natong buhaton?” Paklia sa panid 250 sa Creation nga libro, basaha ang parapo 13, ug ipasiugda ang Juan 17:3. Tanyagi nga ipasundayag kon unsaon pagbaton ang kahibalo nga motultol sa kinabuhing dayon. Kon tugotan, ipaila ang Kahibalo nga libro ug sugdi ang pagtuon.
6 Sa pagkobre sa katindahanan, hayan magamit mo kining mubong paagi uban ang “Creation” nga libro:
◼ “Among ginahatag karon ang usa ka linaing serbisyo ngadto sa mga negosyante sa katilingban. Kitang tanan nabalaka sa pagsulbong sa krimen ug kapintasan sa atong dapit. Mibati ka ba nga si bisan kinsa adunay tinuod nga sulbad sa suliran? [Tugoting motubag.] Ang Diyos adunay sulbad.” Paklia sa panid 196 sa Creation nga libro; basaha ug komentohi ang Proverbio 2:21, 22 sa parapo 19. Ipakita ang ulohan sa kapitulo 16, ug itanyag ang libro.
7 Sa dihang mobalikduaw sa usa ka negosyante nga imong napahilunaan ug “Creation” nga libro, hayan imong ikasulti kini:
◼ “Sa akong ulahing duaw, akong gihisgotan nga ang Diyos mao lamang ang usa kinsa adunay dumalayong sulbad sa krimen ug kapintasan. Sumala sa iyang saad, kita makasalig nga ang malinawong yuta mamatuman. Matikdi ang kapilian nga gipahiluna atubangan sa matag usa kanato.” Basaha ang parapo 11 sa panid 250 sa Creation nga libro, lakip ang Salmo 37:37, 38. Komentohi ang hulagway sa panid 251, ug basaha ang unang tudlingpulong sa parapo 14. Itanyag ang libreng pagtuon sa Bibliya sa balay, nga mahimong dumalahon sa ilang dapit sa negosyo o sa ilang balay.
8 Ingong “mga isigkamagbubuhat sa Diyos,” aduna kita ing tanang katarongan nga magmapositibo sa pagtanyag sa maayong balita. (1 Cor. 3:9) Ang atong paghupot kanunay niini nga tinamdan moresulta sa dagayang panalangin ni Jehova.