“Padayong Buhata Kini sa Paghandom Kanako”
1 May hilig ang mga tawo nga kalimtan ang kahinungdanon sa bililhong mga butang sa paglabay sa panahon. Usa kini sa rason kon nganong, sa dihang gisugdan ang “panihapon sa Ginoo,” gisugo ni Jesus ang iyang mga tinun-an: “Padayong buhata kini sa paghandom kanako.” Sukad niadto, sa anibersaryo sa kamatayon ni Jesus, ang mga Kristohanon matinumanong nagtuman sa ‘pagsangyaw sa kamatayon sa Ginoo, hangtod nga siya moabot.’—1 Cor. 11:20, 23-26.
2 Dili na gayod madugay karon, dawaton ni Jesus ngadto sa iyang langitnong pinuy-anan ang kataposang mga membro sa nagakunhod nga “gamayng panon.” (Luc. 12:32; Juan 14:2, 3) Niining tuiga ang nanghibilin sa mga dinihogan duyog sa kanunayng-nagauswag nga dakong panon sa “ubang mga karnero” makapribilehiyo na usab sa pagsaulog sa Panihapon sa Ginoo, sa Abril 11. (Juan 10:16; Pin. 7:9, 10) Mapalig-on ang pagpabili sa dakong gugma ni Jehova sa pagpadala sa iyang bugtong Anak alang sa katawhan. Ipasiugda mao ang panig-ingnan ni Jesus, ang iyang gugma, ang iyang pagkamatinumanon hangtod sa kamatayon sa pagtagana sa lukat, ug ang iyang pagmando karon ingong Hari sa natukod nga Gingharian sa Diyos, maingon man ang mga panalangin nga dad-on sa Gingharian alang sa katawhan. Usa gayod ka okasyon sa paghandom!
3 Panganbam Karon: Kitang tanan maningkamot sa paghimo niining panahona sa Memoryal nga usa sa dakong kalipay ug pagkamapasalamaton alang sa atong kaugalingon ug alang niadtong tanan kinsa makig-uban kanato. Atong maandam ang atong mga kasingkasing pinaagig pagbasa pag-usab sa mga asoy sa Bibliya maylabot sa kataposang pipila ka adlaw sa ministeryo ni Jesus ug sa mga panghitabo nga mitultol sa iyang kamatayon. Ang atong pagtuon sa pamilya sa pipila ka semana una pa ang Memoryal tingali igahin sa pagsubli sa mga kapitulo 112-16 sa Labing Bantogang Tawo nga libro.
4 Pila ang imong nasayran nga tingali motambong sa Memoryal kon ikaw manguna sa pagtukod sa ilang apresasyon alang niining okasyona, magdapit kanila, ug pabation silang giabiabi? Paghimog listahan karon, ug buhata kon unsay imong mahimo sa pagtabang kanila sa pagtambong. Human niana, tabangi sila nga makapadayon sa pagtubo sa espirituwal pinaagig pagdasig kanila sa pagtambong sa mga tigom nga makanunayon.
5 Sulod sa panahon sa Memoryal, ang linaing mga kahikayan himoon aron pauswagon ang mga kahigayonan sa pagsangyaw sa matag usa. Uban ang maayong pag-eskedyul, makaoksilyare payunir ka ba sa Abril? sa Mayo? Ang usa sa labing maayong mga paagi aron ipakita nga kita mapabilhong nagahinumdom sa kahulogan gayod sa halad ni Jesus nganhi kanato mao ang pagpakigsulti bahin sa atong Diyos, si Jehova, ug ang mga panalangin nga ipatungha sa pagmando sa Gingharian pinaagi sa iyang Anak.—Sal. 79:13; 147:1.