Ang Atong Dakong Maglalalang Nagatagad Kanato!
1 Sa iyang paglugot nga mangatarongan sa di-masinugtanong Israel, si Jehova nangutana: “Wala ba ikaw makaila o wala ba ikaw makadungog? Si Jehova, ang Maglalalang sa mga kinatumyan sa yuta, maoy Diyos ngadto sa panahong walay tino.” (Isa. 40:28) Kita nakaila sa atong Dakong Maglalalang, ug atong nakita ang iyang mahigugmaong pagtagad kanato. Bisan pa niana, minilyon sa katawhan ang nagduhaduha sa iyang paglungtad o adunay ideya bahin kaniya nga dili mosibo sa kon unsay anaa sa Bibliya. Sa unsang paagi atong matabangan sila?
2 Ang bag-ong libro nga Is There a Creator Who Cares About You? gidisenyo sa pagtabang nianang mga tawhana. Kini nagdapit sa mahunahunaong mga tawo nga mangatarongan diha sa mga kamatuoran. Ang makapatuhop nga materyal ug makapadaning mga argumento niining libroha angayng magpabihag niadtong mobasa niana.
3 Sinatia ang Librong Creator: Ibutang sa hunahuna ang paninugdang laraw sa mga kaundan niini. Ang mga kapitulo 2 hangtod sa 5 naghisgot kon sa unsang paagi ang uniberso, kinabuhi, ug ang tawo milungtad ug kon unsang hinungdan niini. Ang mga kapitulo 6 hangtod sa 9 nagsuhid sa Bibliya ug sa Awtor niini ug, sa partikular, kon ang rekord ba sa Genesis sa paglalang kasaligan. Ang kapitulo 10 naghatag ug makapatagbaw nga tubag ngadto sa usa sa labing makapalibog nga mga pangutana nga gisukna sa tawo: “Kon ang Maglalalang nagatagad, nganong hilabihan kaayong pag-antos?”
4 Sulayi ang Pagpangatarongan Kanilang Nagaduhaduha: Ang mga panid 78-9 sa librong Creator nagpresentar ug argumento nga imong magamit sa pagtabang sa uban sa pagkab-ot sa hustong konklusyon bahin sa Diyos. Pangutan-a sila: “Ang uniberso ba may sinugdanan?” Ang kadaghanan mouyon nga aduna. Kon mao, pangutan-a: “Kadto ba nga sinugdanan walay bisan unsang nagpahinabo o kadto ba gipahinabo?” Ang kadaghanan moila nga kadto gipahinabo. Kini motultol sa kataposang pangutana: “Ang sinugdanan ba sa uniberso gipahinabo sa usa ka butang nga walay kataposan o sa Usa nga walay kataposan?” Kini nga paagi mahimong motultol sa daghan sa pagkasabot nga aduna gayoy usa ka Maglalalang.
5 Ang librong Creator mao gayod ang gikinahanglan sa daghang tawo. Ipakig-ambit kini sa imong mga paryente, mga kaubanan sa trabaho, mga eskolmet, ug ubang mga kaila. Pagdala niini diha sa ministeryo aron makapahimutang ka niini niadtong imong mahibalag nga adunay mga pagduhaduha bahin sa paglungtad sa Diyos. Kon mas sinati kita niining libroha, mahimong mas lig-on ang atong gugma sa atong Maglalalang, nga magtukmod kanato sa pagpadayon nga nagalakaw sumala sa iyang hataas nga mga sukdanan.—Efe. 5:1; Pin. 4:11.