Ipahibalo ang Ngalan ni Jehova sa Tibuok Yuta
1 Sa dihang gisugo ni Jesus ang iyang mga tinun-an nga mahimong mga saksi “ngadto sa kinalay-ang bahin sa yuta,” siya nakapahiluna na ug panig-ingnan alang kanila aron sundon. (Buh. 1:8) Bisan kanus-a ug bisan asa nga iyang nakaplagan ang mga tawo, siya nakigsulti bahin sa katuyoan sa Diyos alang sa katawhan. Sa pagsundog kang Jesus, ang matinumanong ulipon nga matang nagagamit ug lainlain gayong mga paagi sa paghimo sa ngalan ni Jehova nga “ginapahibalo sa tibuok nga yuta.”—Isa. 12:4, 5.
2 Kon Unsay Gihimo sa Kanhing mga Adlaw: Sa nangaging katuigan, ang mga sermon gipatik diha sa mga mantalaan; ang “Photo-Drama of Creation” gimugna ug gipasalida sa milyonmilyon; ug sa malukopong paagi gigamit ang ponograpo ug, sa usa ka panahon, ang radyo—ang tanan alang sa pagsangyaw sa maayong balita. Siyempre, ang pangunang pagpasiugda kanunayng gibutang diha sa pagpakigkontak sa personal sa mga tawo aron ang interes nga makaplagan mahimong ugmaron. Ingong resulta, ang pamalaybalay nga ministeryo napamatud-ang usa ka epektibo kaayong paagi sa pagpahibalo sa ngalan ni Jehova bisan asa.—Buh. 5:42.
3 Kon Unsay Ginahimo sa Atong Adlaw: Tungod sa nagakausab nga mga panahon ang kalibotan nagalihok nga puliki, ug sa daghang dapit ang mga tawo talagsa rang makaplagan sa balay. Gamay lamang ang mahiligon sa paggugol ug panahon sa pagbasa ug pagpamalandong sa espirituwal nga mga butang. Busa kinahanglang atong ipahiangay ang atong ministeryo sumala niana. Dugang pa sa padayong pagkobre sa teritoryo sa kabalayan, kita gidasig sa pag-adto diin atua ang mga tawo ug sa pagkahimong “kanunay andam” sa paghimog depensa alang sa paglaom nga anaa kanato. (1 Ped. 3:15) Kini nagkahulogan sa pagpaningkamot sa pagsangyaw ngadto sa mga kauban sa trabaho, sa mga eskolmet, mga tawong anaa sa dalan ug diha sa parke o paradahan, sa katindahanan, ug bisan asa nga hayan makaplagan ang mga tawo. Kay nabatonan ang pagpaluyo ni Jehova, ang atong mga paningkamot malamposon kaayo. Ikaw ba nakig-ambit sa pag-abot sa mga tawo bisan asa sila makita?
4 Hinaot nga kita sa tagsatagsa manlimbasog sa tanang posibleng paagi maylabot sa pagpahibalo sa ngalan ni Jehova sa atong teritoryo. Atong maangkon ang dakong katagbawan sa bug-os nga pagtuman sa atong ministeryo, samtang kita mosalig kang Jehova sa pagdani sa matarog-kasingkasing nga mga tawo.—Juan 6:44.