Atong Mahinatagong Pagpaluyo sa Buluhaton sa Gingharian
1 Ang Enero, 2000 magtimaan sa usa ka dakong kausaban alang kanatong tanan samtang kita magpasibo ngadto sa usa ka bag-ong paagi sa pagdawat sa atong mga suplay ug sa pagpresentar sa atong mga literatura ngadto sa mga tawo nga magpakitag interes sa atong buluhaton. Sanglit dili na kita mangayo o modawat ug espesipikong kontribusyon alang sa literatura nga atong itanyag, sa unsang paagi ang atong buluhaton pagasuportahan?
2 Sa pagtubag maayong tagdon ang pangutana sa Salmista diha sa Salmo 116:12 diin atong mabasa: “Unsa man ang akong igabayad kang Jehova tungod sa tanan niyang mga kaayohan kanako?” Tagda ang pipila ka kaayohan nga atong nadawat gikan kang Jehova. Nabatonan nato ang bililhong gasa sa kaluwasan gikan kang Jehova pinaagi sa lukat. Nabatonan nato ang gasa sa iyang Pulong nga naghatag kanatog talagsaong paglaom. Nabatonan nato ang Iyang balaang espiritu nga nagtabang kanato sa pagsabot sa lalom nga mga butang bahin sa Diyos. Dugang pa atong nadawat ang giya ni Jehova pinaagi sa Matinumanon ug Maalamong Ulipon. Usa ka paagi sa pagpakita sa atong pagpabili alang niining tanang maayong mga butang maoy pinaagi sa atong mahinatagong pagpaluyo sa buluhaton sa Gingharian.
3 Tagda ang panig-ingnan sa Israel: Sa dihang si Jehova naghikay sa pagtukod sa Tabernakulo sa kamingawan, wala niya basta na lang itagana kana sa milagrosong paagi apan hinunoa iyang gihatagan ang mga Israelinhon sa kahigayonan sa paghatag nga madagayaon sa ilang materyal nga mga kabtangan aron sila makasuportar sa buluhatong pagtukod nga taliabot. Unsay ilang sanong? Ang mga Pangulo ug “ang matag usa kansang kasingkasing nagtukmod kaniya” misanong gayod sa pagpaluyo sa matuod nga pagsimba.—Ex. 35:21, 22, 27, 29.
4 Komosta karong adlawa? Karong adlawa maoy atong pribilehiyo ug responsabilidad ang paghimog mahinatagong pagpaluyo sa buluhaton sa Gingharian. Ang dinaliang buluhaton sa pagsangyaw ug paghimog tinun-an ginabuhat karon diha sa gilapdon nga wala pa sukad kanhi makasinati ang kalibotan. Kining ika-20ng siglo nakasaksi sa pagpanigom sa labing dakong gidaghanon sa dedikado, matinumanong mga alagad ni Jehova ug libolibo karon ang nagpabawtismo matag semana.
5 Unsay atong mahimo sa personal? Padayon sa pagbaton ug “daghang buhaton diha sa buluhaton sa Ginoo.” (1 Cor. 15:58) Dawata, sama sa gibuhat sa mga ginikanan ni Jesus, nga si Jehova nagkinahanglan nga kita mohatag sa materyal nga paagi sumala sa atong personal nga mga kahimtang. (Luc. 2:22-24) Ang bug-os nga pagsangyaw ug paghimog-tinun-ang buluhaton karong adlawa gipapadayon pinaagi sa donasyon nga kahikayan. Kita nagapaluyo sa buluhaton pinaagi sa paghulog sa atong mga donasyon diha sa mga kahon nga gimarkahag “Contributions for the Society’s Worldwide Work—Matthew 24:14.” Kon kanus-a nato buhaton kini anaa na sa matag indibiduwal ang pagpaigo sumala sa iyang mga kahimtang.
6 Karong adlawa maoy atong pribilehiyo ang pagpaluyo sa buluhaton sa Gingharian. Ang atong pagbuhat kutob sa atong maarangan niining bahina moresulta sa mga panalangin ug kalipay karon, ug kinabuhing walay kataposan diha sa Bag-ong Kalibotan.—Mat. 25:46b; Luc. 6:38.