Usa ka Pribilehiyo nga Mabatonan sa mga Batan-on

¹ Daghan nga nahimo na karong mga ginikanan mahimuot sa paghinumdom sa pribilehiyo nga ilang natagamtam ingong mga bata nga nagtubo diha sa kamatuoran​—ang Adlaw sa Magasin nga buluhaton. Kanang buluhatona giorganisar diha sa tanang kongregasyon sa 1949. Usa ka adlaw sa usa ka semana, ang matag usa nagsentro sa pagtagad sa pagpanagtag sa Ang Bantayanang Torre ug Pagmata! diha sa kadalanan, sa balaybalay, sa mga tindahan, ug sa ubang mga paagi. Ang batan-ong mga magmamantala ilabinang naghinamhinam sa pagpakig-ambit niining buluhatona kay naghatag kini nila ug kahigayonan sa pagduyog sa samang kalihokan sa mga hamtong diha sa kongregasyon. Mao ba kini ang imong naagian sa bata ka pa?

² Iapil ang Imong mga Anak: Ang bata pa kaayong mga anak nga dili pa andam sa pagsugod ug Kasulatanhong panaghisgot diha sa pultahan makatanyag gihapon ug mga magasin. Kinahanglan lamang niini ang pagkat-on ug yanong presentasyon diha sa pipila ka mugbong mga tudlingpulong. Ang mubong komento, tingali bahin sa ilustrasyon sa hapin, basin igo na. Daghang tagbalay modawat dayon ug mga basahon gikan sa atong mga anak, nga sagad mokomento nga paborable bahin sa katim-os ug maayong paggawi niining mga bataa. Pinaagig diyutayng tabang, kining buluhatona maarangan man gayod sa mga bata, nga makadugag maayo sa pagpakaylap sa mensahe sa Gingharian. Siyempre, samtang magakahamtong ang mga anak, ang ilang mga ginikanan buot motabang kanila sa paghimog padayong pag-uswag sa pag-ugmad sa ilang mga katakos sa pagsangyaw.

³ Si Manuel misugod sa pamalaybalay nga pagsangyaw sa tres anyos pa ang iyang edad. Ang iyang mga ginikanan nagtudlo kaniya sa pagsag-ulo ug mubong presentasyon. Siya masibotong nagsangyaw uban kanila, nagpahilunag daghang magasin, mga brosyur, ug mga tract. Nagsangyaw usab siya sa di-pormal nga paagi. Sa usa ka okasyon sa dihang ang iyang mga ginikanan nagdala kaniya ngadto sa parke sa paglulinghayaw, nagmaomao siya sa pagpahilunag pipila ka tract ngadto sa ubang mga tawo nga atua didto. Bisag bata pa kaayo siya, ang kasibot ni Manuel sa ministeryo maoy tinubdan sa tinuod nga pagdasig ngadto sa iyang mga ginikanan ug sa tibuok nga kongregasyon.​—Prov. 22:6.

⁴ Ang matag Sabado gitudlo ingon nga “Adlaw sa Magasin” diha sa 2000 Calendar of Jehovah’s Witnesses. Mga ginikanan, among irekomendar nga magbaton kamo ug nabag-ong interes niining buluhatona, nga magtabang sa inyong mga anak sa pagpakig-ambit nga regular kutob sa maarangan niining pribilehiyoa sa pag-alagad.