Mga Ginikanan—Bansaya ang Inyong mga Anak sa Pagsangyaw
1 Ang atong mga kongregasyon gipanalanginan sa daghang kabataang may sinserong tinguha sa pag-alagad sa Diyos. (Eccl. 12:1) Lakip sila niadtong gidapit ni Jehova sa pagdayeg kaniya. (Sal. 148:12-14) Busa, ang adlaw-adlaw nga pagbansay nga ginahatag sa mga ginikanan sa ilang mga anak angayng maglakip sa instruksiyon kon unsaon pagpaambit sa ilang pagtuo ngadto sa uban diha sa buluhatong pagsangyaw sa Gingharian.—Deut. 6:6, 7.
2 Bansaya ang Kabataan sa Progresibong mga Tikang: Ang mga bata takos nga bansayon sa linghod pa kaayong edad sa pagkuyog sa ilang mga ginikanan diha sa ministeryo. Sa dili pa moadto sa kanataran, andama ang inyong mga anak sa pagpakig-ambit sa makahuloganong paagi. Tinoang abante kon unsay inyong gidahom nga ilang buhaton diha sa pultahan. Ang mga bata pa kaayo makahatag ug tracts ug handbills ug makadapit sa mga tawo ngadto sa Kingdom Hall. Ang mga bata nga maayong mobasa madapit sa pagbasa ug kasulatan diha sa pultahan. Makatanyag silag mga magasin, ginamit ang mubong presentasyon. Samtang magdako ang ilang kasinatian, bansaya sila sa paggamit ug Bibliya diha sa ilang presentasyon. Daghang batan-ong magmamantala nakasugod ug ilang kaugalingong ruta sa magasin ug regular nga nagahimog mga balikduaw. Labing maayong ang usa ka bata makig-uban ug hamtong kay sa laing batan-on. Ang hamtong makasaysay sa tagbalay nga ang bata ginabansay diha sa ministeryo.
3 Usa ka batang babaye mihangyog tabang sa mga ansiyano aron siya mahimong takos ingong magmamantala sa Gingharian. Bisag siya singko anyos pa lamang niadto ug dili makamaong mobasa, epektibo siyang makapresentar sa mensahe sa Gingharian diha sa mga pultahan. Gisag-ulo niya ang luna sa kasulatan, mitan-aw kanila, mihangyo sa tagbalay sa pagbasa niana, ug dayon iyang gihimo ang pagpatin-aw.
4 Ang mga bata kinahanglang katudloan usab pinaagig ginikananong panig-ingnan sa bili sa pagbaton ug maayong eskedyul sa regular nga pagpakig-ambit sa ministeryo. Ang mga ginikanan angayng magtukod ug masubayon nga senemanang rutina sa pag-alagad ug sundon kana, aron ang mga bata masayod kon unsang adlawa sa semana ang kanunayng gigahin alang sa buluhatong pagsangyaw.
5 Sa dihang ang mga bata mabansay gikan sa linghod nga edad sa paghigugma ug pagtagamtam sa ministeryo, matukmod silang mangab-ot sa mas dakong mga pribilehiyo sa umaabot, tingali lakip ang payunir nga pag-alagad. (1 Cor. 15:58) Kitang tanan kinahanglang magdasig sa mga bata sa atong taliwala nga mouswag gayod ingong mga magdadayeg ni Jehova.