Hupti ang Kangaya sa Imong Sagradong Pag-alagad
1 Sila namalik “uban ang kangaya.” Ang asoy sa Bibliya nagbutyag kon unsay gibati sa 70 ka tinun-an sa dihang sila mibalik sa pagtaho kang Jesus, human ang gilugwayang panaw sa pagsangyaw. Ilang nasinati ang kalipay sa kahiladman tungod sa pagbuhat sa kabubut-on sa Diyos. (Luc. 10:17) Unsay makatabang nimo sa pagkaplag sa susamang kangaya diha sa sagradong pag-alagad?
2 Usa ka Positibong Tinamdan: Aduna ka ing hinatag-sa-Diyos nga pribilehiyo sa pagpasinati sa mga tawo sa dakong katuyoan ni Jehova. Pinaagi sa imong pagsangyaw, mahimong makatabang ka nga mahigawas ang usa ka indibiduwal gikan sa salawayong mga kalihokan niining kalibotana ug sa mga gapos sa bakak nga relihiyon. Ikatanyag mo sa mga tawo ang paglaom sa kinabuhi diha sa usa ka kalibotan nga walay kasamok nga karon naglibot kanato. Hunahunaa ang kangaya nga iya ni Jehova sa dihang molampos ka sa pagtisok sa mga binhi sa kamatuoran diha sa madinawatong kasingkasing. Magmapositibo sa pag-ampo sa espiritu sa Diyos aron ipatungha diha kanimo ang bunga sa kangaya samtang ikaw mopadayon sa ministeryo uban sa tibuok nimong kasingkasing.
3 Praktikal nga Pagbansay: Ang sesyon sa instruksiyon nga gidumala ni Jesus uban sa 70 ka tinun-an gipakasama sa modernong-adlaw nga Tigom sa Pag-alagad. Iyang gitagana ang pagbansay aron sila epektibong molampos sa ilang ministeryo. (Luc. 10:1-16) Karong adlawa ang Tigom sa Pag-alagad nagabansay kanimo sa mga paagi sa pagduol sa mga tawo, kon unsaon pagsugod ug mga panaghisgot, ug kon unsaon pagsugod ug pagdumalag mga pagtuon sa Bibliya sa balay. Pinaagi sa imong pagpaningkamot ug pagpalambo sa imong mga katakos sa pagsangyaw, imong makaplagan nga ang bisan unsang mga pagbati sa pagkabakikaw o pagkadi-takos nga anaa tingali kanimo kaniadto mahanaw ug malabwan sa pagsalig ug kangaya.
4 Pagpunting sa Umaabot: Si Jesus nakakaplag ug kangaya sa iyang sagradong pag-alagad bisan pa sa mga pag-antos nga iyang gisagubang. Ngano? Tungod kay iyang gitutok pag-ayo ang iyang mata diha sa mga panalangin ug mga pribilehiyo nga anaa sa iyang unahan. (Heb. 12:2) Mao man ang imong mahimo pinaagig padayong pagpunting sa imong hunahuna ug kasingkasing maylabot sa ngalan ni Jehova ug sa mga panalangin nga modangat sa bag-ong kalibotan sa Diyos. Kini magdugang sa kangaya ug kahulogan sa imong ministeryo.
5 Ang paghimog sagradong pag-alagad ngadto kang Jehova mao ang labing dakong pribilehiyo nga maangkon mo karong adlawa. Busa, hinaot nga moingon ka: “Ang pagbuhat sa imong kabubut-on, Oh Diyos ko, akong gikahimut-an.”—Sal. 40:8.