Malig-on sa Espirituwal nga mga Pamilya—Unsaon?

¹ Dalayegon ang Kristohanong mga pamilya tungod sa “pagpakita sa diyosnong pagkamahinalaron diha sa ilang kaugalingong panimalay.” (1 Tim. 5:4) Apan, tungod sa daghan kaayong daotang mga impluwensiya sa atong palibot nga mahimong makapahuyang sa atong pagtuo, hinungdanon nga ang mga pamilya manlimbasog nga magpabiling malig-on sa espirituwal. Unsaon man kini pagpalampos?

² Ipasundayag ang Samag-Kristong Pagkaulo: Ang mga ulo sa pamilya kinahanglang mosundog kang Jesu-Kristo diha sa paagi sa ilang pag-abaga sa ilang mga kaakohan sa pagpalig-on sa ilang mga panimalay. Dugang pa sa pagpasundayag ug usa ka buhat sa iyang gugma alang kanato pinaagi sa iyang haladnong kamatayon, si Jesus padayong “nagapakaon ug nagapangga” sa kongregasyon. (Efe. 5:25-29) Ang mahigugmaong mga ginikanan nagasunod niini nga panig-ingnan sa malumong pag-atiman pinaagi sa pagtagana sa adlaw-adlawng espirituwal nga mga panginahanglan sa ilang mga pamilya. Naglakip kini sa pagdumalag pagtuon sa Bibliya kada semana, nga batonan ang dulot ug dagayang espirituwal nga mga panaghisgot kon posible, ug tagdon ang mga problema sa dihang motungha kini.​—Deut. 6:​6, 7.

³ Diha sa Ministeryo sa Kanataran: Angayng masabtan sa tanang membro sa pamilya nga ang pagsangyaw ngadto sa uban maylabot kang Jehova ug sa iyang mga katuyoan maoy hinungdanong bahin sa ilang pagsimba. (Isa. 43:10-12) Kon buot ninyong mga ginikanan nga mahimong matinumanong mga Saksi ni Jehova ang inyong mga anak, kinahanglan kamong magsugod ug sayo kaayo sa pag-andam sa ilang kasingkasing alang sa ministeryo. Hisgoti ang mga rason kon nganong adunay panginahanglan sa pagsakripisyo sa kaugalingon diha sa pag-alagad ug sa pagpakig-ambit diha niana kada semana. (Mat. 22:37-39) Dayon paghimog mga kahikayan alang kanila sa regular nga pagpakig-ambit uban kaninyo diha sa ministeryo sa kanataran.

⁴ Tukora ang pagpabili alang sa buluhatong pagsangyaw pinaagi sa paggahin ug panahon sulod sa senemanang pagtuon sa pamilya sa pag-andam ug pag-ensayo ug epektibong presentasyon. Hatagi ang inyong mga anak ug linaing pagbansay diha sa ministeryo, nga magtabang kanila nga mouswag sumala sa ilang edad ug katakos. Human makagugol ug panahon nga magkauban diha sa pag-alagad, hisgoti kon sa unsang paagi ilang nakita ang pagkamaayo ni Jehova mismo. Iasoy ang makapalig-on-sa-pagtuo nga mga kasinatian. Kon mas ‘matilawan sa mga pamilya nga ang Ginoo maluloton,’ mas masuod sila kang Jehova, nga magpalig-on kanila sa pagsukol sa “tanang pagkadaotan.”​—1 Ped. 2:1-3.

⁵ Diha sa mga Tigom: Pagkaanindot kon ang mga membro sa pamilya magtinabangay sa usag usa sa pagtambong sa tanang tigom sa kongregasyon, ilabina kon ang usa kanila mobatig kakapoy, kaluya, o hilabihang kabug-at! “Sa dihang mopauli ang akong amahan gikan sa trabaho, kapoy na siya,” matod sa usa ka batan-ong igsoong babaye. “Apan ipaambit ko kaniya ang usa ka maanindot nga punto nga pagahisgotan sa tigom nianang gabhiona, ug kini magdasig kaniya nga motambong. Ug sa dihang ako ang mobatig kaluya, siya modasig kanakong motambong.”​—Heb. 10:​24, 25.

⁶ Ang Duyog nga Pagbuhat sa mga Butang: Ang mga pamilya angayng duyog nga magbuhat sa mga butang, sama sa pagtabang diha sa mga buluhaton sa panimalay. Angayng gahinan usab ug panahon ang maayong pagkapili nga kalingawan. Ang pagpiknik, pagbaktas, pagdula, ug pagbiyahe aron duawon ang mga paryente o mga higala makahatag ug malipayong mga yugto ug gikahinangpang mga handomanan nga hinumdoman.​—Eccl. 3:4.

⁷ Mabuntog sa malig-ong Kristohanong mga pamilya ang adlaw-adlawng mga babag sa ilang espirituwalidad. Pinaagi sa mas pang pagpakigsuod kang Jehova, ilang masinati ang gahom nga iyang itagana.​—Efe. 6:10.