Tudloi ang Uban sa Putli nga Pinulongan
1 Bisan pag naggikan sa daghang ‘kanasoran, tribo, katawhan ug mga pinulongan,’ ang mga Saksi ni Jehova maoy nahiusang katawhan, usa ka tinuod nga internasyonal nga panag-igsoonay. (Pin. 7:9) Talagsaon gayod kana niining nabahin nga kalibotan karon. Sa unsang paagi naposible kana? Tungod kay gihatag kanato “ang kausaban ngadto sa putli nga pinulongan.”—Sof. 3:9.
2 Kahibulongang mga Epekto: Unsa man kining putli nga pinulongan? Kini mao ang hustong pagsabot sa kamatuoran nga makaplagan diha sa Pulong sa Diyos bahin kang Jehova ug sa iyang mga katuyoan, ilabina ang kamatuoran bahin sa Gingharian sa Diyos. Sumala sa gitagna ni Jesus, kining maong kamatuoran gisabwag pinaagi sa makita nga yutan-ong galamiton, ang “matinumanon ug maalamong ulipon,” nga tungod niana ang mga tawo nga “gikan sa tanang pinulongan sa mga nasod” midawat sa matuod nga pagsimba.—Mat. 24:45; Zac. 8:23.
3 Sa dihang makat-onan sa mga tawo ang putli nga pinulongan, sila matukmod sa pagpahiuyon sa ilang kinabuhi sumala sa mga sukdanan ni Jehova. Sila makakat-on nga mahimong “bug-os nga magkahiusa sa samang kaisipan ug sa samang panghunahuna.” (1 Cor. 1:10) Ang diyosnong pagtulon-an magpatungha usab diha kanila ug matul-id nga panggawi ug ang maayo, matinud-anon nga sinultihan, ilabina may kalabotan sa pagsulti sa uban bahin sa maayong balita. (Tito 2:7, 8; Heb. 13:15) Kining kahibulongang mga kausaban nagapasidungog kang Jehova.
4 Pananglitan, dihay usa ka tawo nga nasangyawan sa maayong balita nga daghag pangutana, nga tanan niana natubag pinaagi sa Bibliya. Kay natukmod sa iyang nadunggan, siya misugod sa pagtuon kaduha sa usa ka semana ug mitambong sa mga tigom. Natingala siya sa mainitong pag-abiabi kaniya diha sa Kingdom Hall, sanglit daghan sa mga nanambong maoy lainlain ug rasa. Sa mubong panahon, siya ug ang iyang asawa nagbag-o sa ilang kinabuhi ug nabawtismohan. Sukad niadto siya nakatabang na ug mga 40 ka tawo nga mialagad kang Jehova, lakip na sa ubay-ubayng membro sa pamilya. Bisan pag may giantos nga balatian, misugod siya sa pagpayunir di pa dugay.
5 Pagtudlo sa Uban: Tungod sa mga panghitabo sa kalibotan, daghang matinud-anong mga tawo ang misusi pag-usab sa ilang panghunahuna ug sa ilang kinabuhi. Sama kang Jesus, buot natong tabangan sila. Ang epektibong mga pagbalikduaw ug mga pagtuon sa Bibliya hinungdanon sa pagtabang sa sinserong mga tawo nga makakat-on sa putli nga pinulongan.
6 Usa ka paagi nga napamatud-ang epektibo diha sa puliking mga tawo mao ang pagdumalag mubo nga pagtuon sa Bibliya diha mismo sa ilang pultahan. (km 5/02 p. 1) Nasulayan na ba nimo kini? Sa dihang mangandam ka nga mobalikduaw, pagpili ug usa ka presentasyon diha sa pasukip sa Mayo 2002 nga Atong Ministeryo sa Gingharian nga mohaom sa tagbalay. Daghan sa mga presentasyon niini nga pasukip ang gidisenyo aron motultol ngadto sa panaghisgot sa brosyur nga Gikinahanglan o sa librong Kahibalo. Bansaya ang presentasyon aron hanoy ang imong pagsulti sugod sa introduksiyon hangtod sa panaghisgot sa usa sa mga parapo. Pagpilig usa o duha ka teksto gikan sa parapo aron basahon ug hisgotan, ug pag-andam ug pangutana agig paniklop. Makatabang kana nga motultol ngadto sa parapo nga gihunahuna nimong kobrehan sa sunod duaw.
7 Ang katawhan ni Jehova nakasinatig daghang panalangin tungod sa pagkakat-on sa putli nga pinulongan. Hinaot makugihon natong tabangan ang uban nga moduyog kanato sa ‘pagtawag sa ngalan ni Jehova’ ug sa ‘pag-alagad kaniya abaga sa abaga.’—Sof. 3:9.