Pangutana
◼ Haom ba ang paghikay nianang gitawag ug “mga esponsor” o “pinasidunggang mga dinapit” diha sa Kristohanong mga kasal?
Ang ideya sa pagbaton ug “mga esponsor” naggikan sa relihiyosong kostumbre nga magbaton ug “mga padrino-madrina” (“maninoy” o “maninay”), kinsa maoy magsilbing “mga esponsor” sa bunyag sa usa ka bag-ong-natawo nga bata. Dinhi sa Pilipinas, kining ideyaha gipadapat usab nganha sa mga kasal, ug sumala sa kalibotanong kostumbre, ang “mga esponsor” usab magsilbing legal nga mga saksi. Apan, ang katawhan ni Jehova wala magiyahi sa kalibotanong kostumbre ug busa kita aduna lamang ing duha ka legal nga mga saksi diha sa atong mga kasal. Gitin-aw kini diha sa “Pangutana” sa Atong Ministeryo sa Gingharian sa Disyembre 1992.
Diha sa daghang Kristohanong mga kasal, ang kostumbre sa pagbaton nianang gitawag ug “mga esponsor” o “pinasidunggang mga dinapit” gisunod gihapon. Maylabot niini ang gihisgotan sa ibabaw nga “Pangutana” sa 1992 nagsukna: “Kita kaha nagasunod sa usa ka kalibotanong kostumbre? Kita ba anaa sa kapeligrohan nga mapasiatabon sa atubangan sa uban?” Kon tagdon nato ang uban ingong “espesyal” o “pinasidunggan” nga mga dinapit, o tawgon ang uban nga “primero” o “segundaryo” nga mga esponsor, wala ba kita magdasig ug “pagpihig” sa atong taliwala?—1 Juan 2:15, 16; Sant. 2:1-4.
Diha sa pipila ka kahimtang, ang gitawag ug “mga esponsor” gidahom nga mohatag ug materyal nga tabang sa duha nga kaslonon. Bisan tuod ang maong paghatag maoy personal nga butang, kini dayag nga dili kinahanglang ibutyag. Hinumdomi ang giingon ni Jesus diha sa Mateo 6:3, 4: “Sa dihang magahimog mga gasa sa kaluoy, ayaw pahibaloa ang imong wala nga kamot kon unsay ginabuhat sa imong tuo, aron matago ang imong mga gasa sa kaluoy; unya ang imong Amahan nga nagatan-aw sa tago magabalos kanimo.”
Mahitungod sa gidak-on sa mga sumasalmot sa kasal, Ang Bantayanang Torre sa Abril 15, 1997, panid 26, nag-ingon: “Ang mga sumasalmot sa kasal (ang mga higala sa [pamanhonon] ug ang babayeng mga kauban sa pangasaw-onon) dili kinahanglang daghan. Sila usab dili buot nga makahatag ug dili-angayng pagtagad sa ilang kaugalingon pinaagi sa ilang mga sinina ug mga lihok.” Mahitungod sa pagpili kon kinsay patambongon sa mga sumasalmot sa kasal, Ang Bantayanang Torre sa Oktubre 15, 1984, panid 14, parapo 18 (Abril 15, 1984, panid 15, parapo 18 sa Iningles), nag-ingon: “Inay pilion ang mga tawong prominente o mga tawong makahatag ug mahalong mga regalo, daghang Kristohanong mga kaslonon (ug mga mamumulong) mas mopili sa mga tawong suod kanila sa pag-alagad kang Jehova.”
Ang Abril 15, 1997 nga Bantayanang Torre, sa panid 24, nagpasiugda niini: “Ang Kristohanong kasal maoy usa ka maayong higayon nga ipakita nga kita ‘dili bahin sa kalibotan.’” Busa hinaot klarohon natong tanan, diha man sa pinatik nga imbitasyon ug sa kasal mismo, nga kita lahi sa kalibotan pinaagi sa pagsunod gayod sa mga prinsipyo nga gilaraw diha sa Pulong sa Diyos.