Baldado​—Apan Mabungahon

¹ Kon ikaw usa sa daghang Saksi ni Jehova nga baldado, makabaton ka gihapon ug usa ka mabungahong ministeryo. Gani, ang imong mga kahimtang mahimong maghatag ug linaing mga kahigayonan alang kanimo nga makapamatuod ug makadasig sa uban.

² Kahigayonan sa Pagpamatuod: Daghan niadtong kinahanglang makigbisog sa pagkabaldado ang nakig-ambit sa bug-os diha sa ministeryo. Pananglitan, nakaplagan sa usa ka igsoong babaye kansang paglihoklihok ug pagsulti grabeng naapektahan tungod sa operasyon nga siya makapakig-ambit sa pagpanagtag ug magasin kon iparking sa iyang bana ang awto duol sa aseras nga daghag tawo. Sa usa ka higayon, nakapahimutang siyag 80 ka magasin sulod lang sa duha ka oras! Tungod sa imong linaing mga kahimtang mahimong mahibalag nimo ang mga tawo nga lisod makontak. Kon mao, lantawa kana nga linain nimong teritoryo.

³ Ang imong pagsangyaw mahimong epektibo gayod! Samtang mamatikdan sa uban ang imong determinasyon ug ang maayong epekto sa kamatuoran sa Bibliya diha sa imong kinabuhi, sila hayan madani sa mensahe sa Gingharian. Dugang pa, sa dihang imong mahibalag ang mga tawo nga nag-antos sa kalisdanan, ang imong kasinatian sa kinabuhi mahimong magsangkap kanimo sa paghatag kanilag kahupayan gikan sa Pulong sa Diyos.​—2 Cor. 1:4.

⁴ Palig-ona ang Uban: Wala ka ba madasig sa sugilanon sa kinabuhi ni Laurel Nisbet, kinsa anaa ra sa usa ka iron lung sulod sa 37 ka tuig apan nakatabang ug 17 ka tawo nga makabaton ug tukmang kahibalo sa kamatuoran sa Bibliya? Sa samang paagi, ang imong panig-ingnan makadasig sa mga isigkamagtutuo nga manlimbasog sa ilang kaugalingon diha sa pag-alagad kang Jehova.​—g93 1/22 pp. 18-21.

⁵ Bisan pa kon ang imong mga kahimtang dili magtugot kanimo sa paggawas diha sa ministeryo sumala sa imong gusto, mapalig-on gihapon nimo ang uban. Usa ka igsoong lalaki miingon: “Akong nahibaloan nga bisan ang baldado kaayong tawo makaalagad ug dako sa uban. Ang akong asawa ug ako nahimong usa ka matang sa angkla alang sa nagkalainlaing tawo sa kongregasyon. Tungod sa among kahimtang kami kanunayng ania dinhi, nga kanunayng andam.” Hinunoa, tungod sa imong kabaldahan, masabot nga dili ka na tingali kanunayng makaarang sa paglihok nga nahiuyon sa imong kasibot. Bisan pa niana, uban sa pipila ka tabang makaarang ka tingali sa pagbaton ug aktibong pagpakig-ambit diha sa ministeryo. Busa, kon nagkinahanglan kag tabang, ayaw pagpanuko sa pagpahibalo niini ngadto sa mga ansiyano o sa uban diha sa kongregasyon nga makatabang kanimo.

⁶ Si Jehova makakita sa tanang butang nga imong himoon aron sa pag-alagad kaniya, ug siya malipay sa imong tibuok-kalag nga pag-alagad. (Sal. 139:1-4) Samtang mosalig ka kaniya, siya makapalig-on kanimo aron makabaton ug mabungahon ug makahuloganon nga ministeryo.​—2 Cor. 12:7-10.