Pagpauswag sa Atong mga Mapahimutang nga Magasin

¹ Sulod sa 124 ka tuig Ang Bantayanang Torre nag-alagad na ingong manlalaban sa kamatuoran sa Gingharian ug karon kapin sa 25 ka milyon ka kopya matag gula ang gipatik sa 147 ka pinulongan. Ang Pagmata! usab dugay nang nagpaluyo sa Pulong sa Diyos ug kapin sa 22 ka milyon ka kopya matag gula ang gipatik sa 85 ka pinulongan.​—Itandi ang Colosas 1:23.

² Mga Magasin nga Magtagbaw sa Espirituwal nga Panginahanglan: Ang atong mga magasin nag-alagad aron pabilin kitang magmaalisto sa espirituwal ug aktibo diha sa pag-alagad kang Jehova. Naundan usab kinig praktikal nga mga artikulo bahin sa diyosnong panggawi ug Kristohanong pamatasan. Tungod niana napahimuslan nato ang labing maayong kalidad sa kinabuhi karon samtang nagpaabot kita sa mas maayong mga butang nga gisaad ni Jehova.​—Isa. 48:17; 1 Tim. 6:19.

³ Apan ang atong mga magasin wala patika alang sa mga Saksi ni Jehova lamang. Ingon sa gipaila sa mga gidaghanon sa parapo 1, minilyong katawhan nga dili mga Saksi ang nalingaw sa pagbasa sa atong mga publikasyon ug daghan ang nakakat-on sa kamatuoran niining paagiha.

⁴ Magmahinatagon sa Pagtanyag sa Atong mga Magasin: Sa 1 Timoteo 6:​18, gidasig kita nga “magmahinatagon, andam sa pagpaambit,” ug naglakip kini sa atong pagpanagtag ug magasin. Kasagaran ang mga magmamantala magpanuko sa pagbilin ug mga magasin kon ang tagbalay dili moamot alang sa tibuok-kalibotang buluhaton. Apan, di ba mas maayo nga “magmahinatagon” aron ang tanang buot mobasa sa mga magasin makahigayon sa pagbasa niana? Siyempre, dili nato gustong ibilin ang mga magasin kon ang mga tawo wala magpakitag interes ug dili basahon kana, apan sa laing bahin, kon dunay tinuod nga interes nga gipakita, dili kita angayng magpanuko sa pagbilin sa mga magasin tungod kay walay kontribusyon.

⁵ Hinunoa, aron makapahimutang ug dugang mga magasin, kita kinahanglang magbaton ug igong suplay. Gisugyot nga ang matag magmamantala ug payunir magtakda ug regular nga order uban sa alagad sa magasin aron duna silay igoigong suplay nga ikapahimutang. Aduna ka bay personal nga order? Angayng hikayon sa mga alagad sa magasin ang pagdawat ug personal nga mga order human mabasa kining artikuloha ug unya, kon kulang ang suplay sa kongregasyon, mahimong ipadala ang order ngadto sa sangang buhatan aron madugangan ang suplay sa magasin.

⁶ Ang Ecclesiastes 11:6 nag-ingon: “Sa buntag ipugas ang imong binhi ug hangtod sa gabii ayaw papahulaya ang imong kamot; kay ikaw wala masayod kon diin kini magmalamposon.” Ang buluhatong pagpanagtag ug magasin maoy sama sa pagpugas ug binhi. Busa ipugas kana nga madagayaon ug salig kang Jehova sa pagpalampos niana sa nahiangayng panahon.​—1 Cor. 3:6.