Usa ka Buluhaton nga Nanginahanglag Pagkamapainubsanon
1 Ang Pulong sa Diyos nag-awhag kanato nga “magmapainubsanon sa hunahuna, nga dili magabalos ug kadaot sa kadaot . . . kondili, sa kasukwahi, manghinaot ug kaayohan.” (1 Ped. 3:8, 9) Ang maong tambag mapadapat gayod sa buluhatong pagsangyaw. Sa pagkatinuod, ang Kristohanong ministeryo mahimong usa ka pagsulay sa atong pagkamapainubsanon.
2 Ang pagkamapainubsanon maoy usa ka hiyas nga motabang kanato sa paglahutay sa di-maayong mga kahimtang. Sa dihang magsangyaw, kita moduol sa mga di-kaila nga wala magdapit kanato, nga nahibalo nga ang uban mosanong sa di-malulotong paagi. Nanginahanglan ug pagkamapainubsanon aron makapadayon sa pagsangyaw bisan pa sa maong pagtratar. Diha sa usa ka lisod kaayong teritoryo, duha ka payunir nga mga igsoong babaye ang namalaybalay matag adlaw sulod sa duha ka tuig nga walay bisan usang misanong! Bisan pa niana, sila milahutay, ug karon duna nay duha ka kongregasyon sa maong lugar.
3 Pagdumala sa Pagkawalay-Batasan: Ang pagkamapainubsanon motabang kanato sa pagsundog kang Jesus sa dihang ang uban di-maluloton o walay batasan. (1 Ped. 2:21-23) Diha sa usa ka balay nakasugamak ug mapasipalahong sulti ang usa ka igsoong babaye, una sa asawa ug dayon sa bana, nga nagpapahawa kaniya sa ilang tugkaran. Mipahiyom lang ang igsoong babaye nga nanghinaot nga makapakigsulti ra kanila sa sunod higayon. Nakadayeg kaayo niana ang magtiayon nga sila namati sa sunod nga Saksi nga miduaw ug midawat sa pagdapit nga motambong sa tigom sa Kingdom Hall. Ang igsoong babaye nga ilang gihinginlan sa miagi atua didto aron sa pag-abiabi kanila ug paghatag kanila ug dugang pamatuod. Kita usab makalukmay sa mga tawong di-madinawaton pinaagi sa pagpasundayag sa “kalumo sa buot ug halawom nga pagtahod.”—1 Ped. 3:15; Prov. 25:15.
4 Likayi ang Pagkamapahitas-on: Ang atong kahibalo sa Bibliya wala maghatag kanatog katarongan nga pakamenoson ang uban o panghimaraoton sila. (Juan 7:49) Hinunoa, ang Pulong sa Diyos nagtambag kanato nga “dili magsultig daotan mahitungod kang bisan kinsa.” (Tito 3:2) Kon kita mapainubsanon sa kasingkasing, sama kang Jesus, mapalagsik nato ang uban. (Mat. 11:28, 29) Ang mapainubsanong paagi makadugang ug kamadanihon sa atong mensahe.
5 Oo, ang pagkamapainubsanon motabang kanato sa paglahutay diha sa lisod nga teritoryo. Kini makalukmay sa di-madinawaton nga mga tawo, ug makadani sa uban nga maminaw sa mensahe sa Gingharian. Labaw sa tanan, kini makapahimuot kang Jehova, kinsa “magahatag [ug] dili-takos nga kalulot sa mga mapainubsanon.”—1 Ped. 5:5.