Ang mga Manulonda Nagatabang Kanato
1 “Tan-awa! ako magauban kaninyo sa tanang adlaw hangtod sa kataposan sa sistema sa mga butang.” Pagkamakapadasig nianang mga pulonga alang sa tanang motuman sa sugo ni Jesus: “Panglakaw kamo ug paghimog mga tinun-an”! (Mat. 28:18-20) Ang usa ka talagsaong paagi nga si Jesus nagauban sa matuod nga mga Kristohanon maoy pinaagi sa iyang mga manulonda. (Mat. 13:36-43) Pagkamakalilipay ang pagmantala sa “walay kataposang maayong balita” nga nahiusa uban niining matinumanong espirituhanon nga mga linalang!—Pin. 14:6, 7.
2 Diha sa Atong Ministeryo: Gibutyag sa Bibliya nga ang mga manulonda gipadala “aron mag-alagad niadtong magapanunod sa kaluwasan.” (Heb. 1:14) Sa unang siglo, ang mga manulonda mitabang sa mga sumusunod ni Jesus sa pagpangita sa takos nga mga tawo. (Buh. 8:26) Karon, ang mga alagad sa Diyos padayong nakakita sa ebidensiya sa pagtultol sa mga manulonda. Sa daghang okasyon, ang mga tagbalay miingon nga sila nag-ampo alang sa tabang sa dihang may Saksi nga miduaw kanila. Pagkadako sa atong kalipay, duyog sa mga manulonda, sa dihang mosanong ang maong mga tawo sa mensahe sa Gingharian!—Luc. 15:10.
3 Pag-atubang sa Pagsupak: Si Daniel, ang tulo niya ka kaubang batan-on nga mga Hebreohanon, ang apostol nga si Pedro, ug daghang uban pa nga nakasugamak ug dagkong mga pagsulay nakasinati sa panalipod ni Jehova pinaagi sa mga manulonda, nga “gamhanan sa kusog.” (Sal. 103:20; Dan. 3:28; 6:21, 22; Buh. 12:11) Bisan tuod usahay mobati kita nga walay mahimo atubangan sa pagsupak, kita madasig sa kasinatian sa alagad ni Eliseo sa dihang iyang nakat-onan nga “mas daghan sila nga uban kanato kay kanila nga uban kanila.” (2 Hari 6:15-17) Bisan pag ibulag kita gikan sa atong Kristohanong mga igsoon sa pinugos nga paagi, kita dili angayng mawad-ag paglaom. Ang Pulong sa Diyos nagpasalig kanato: “Ang manulonda ni Jehova nagkampo libot niadtong nangahadlok kaniya.”—Sal. 34:7.
4 Sa dili madugay ang mga panon sa manulonda moasdang aron wagtangon ang tanang magsusupak sa pagkahari ni Kristo. (Pin. 19:11, 14, 15) Samtang magpaabot kita nianang adlawa, hinaot maisogon kitang mopadayon sa pagdayeg kang Jehova, nga bug-os masaligon sa gamhanang pagpaluyo sa langitnong kasundalohan nga ubos sa pagpanguna ni Kristo.—1 Ped. 3:22.