Repaso sa Teokratikanhong Tunghaan sa Ministeryo
Ang mosunod nga mga pangutana pagatagdon nga binaba panahon sa Teokratikanhong Tunghaan sa Ministeryo sa semana nga magsugod sa Abril 25, 2005. Dumalahon sa magtatan-aw sa tunghaan ang 30-minutos nga repaso pinasukad sa materyal nga gikobrehan diha sa mga asaynment alang sa mga semana sa Marso 7 hangtod sa Abril 25, 2005. [Matikdi: Kon walay mga reperensiya human sa pangutana, kinahanglang mohimo kag kinaugalingong panukiduki aron makaplagan ang mga tubag.—Tan-awa ang Tunghaan sa Ministeryo, pp. 36-7.]
HIYAS SA PAGPANULTI
1. Sa dihang mag-andam ug pakigpulong, sa unsang paagi atong magamit pag-ayo ang materyal nga giasayn kanato, ug nganong hinungdanon kini? [be p. 234 mga par. 1-3, mga kahon] Atong magamit pag-ayo ang materyal nga giasayn kanato pinaagi sa paghan-ay sa atong pakigpulong binase sa ulohang giasayn, mga teksto, ug pangunang mga punto. Kon atong himoon kini, kita magpakitag pagtahod sa espirituwal nga programa sa pagpakaon nga hinikay sa matinumanon ug maalamong ulipon nga matang. (Mat. 24:45)
2. Unsa ka daghan sa giasayn nga materyal ang atong hisgotan sa usa ka pakigpulong? [be p. 234 par. 4–p. 235 par. 1] Angay natong hisgotan kon unsa lamay ikapahayag nato nga epektibo sulod sa gitagal nga panahon, nga isentro ang pagtagad sa mga bahin nga makatabang kanato sa pagkab-ot sa tumong sa pakigpulong. Dili nato angayng isakripisyo ang maayong mga metodo sa pagtudlo ug ang paghisgot sa hinungdanong mga punto aron lang makahatag ug lakbit nga sumaryo sa daghan kaayong impormasyon.
3. Sa unsang paagi atong gamiton ang mga pangutana aron sa pagdasig sa panagkabildo diha sa ministeryo sa kanataran? (Buh. 8:30) [be p. 236 mga par. 2-5] Gidasig sa daghang Saksi ang mga tawo sa pagpahayag sa ilang hunahuna pinaagi sa pagpilig usa ka topiko nga gikaikagan sa mga tawo ug mangutana, “Nahibulong ka ba sukad . . . ?” o “Unsay imong hunahuna . . . ?” Sa dihang mahatagan silag kahigayonan sa pagpahayag sa ilang kaugalingong mga hunahuna, daghang tawo ang mas makiling sa pagpamati kanato.
4. Sa unsang paagi atong gamiton ang mga pangutana sa pagtabang sa ginatun-an sa Bibliya sa paggamit sa ilang “gahom sa pagpangatarongan?” (Roma 12:1) [be p. 238 par. 2] Sa dihang hisgotan ang pangunang mga punto, kita makagamit ug suplementong mga pangutana aron matabangan ang ginatun-an sa pagtubag ginamit ang kaugalingong mga pulong inay basahon lamang ang pinatik nga mga tubag. Kita makasukna: “Sa unsang paagi ang atong gihisgotan karon nalangkit niining punto nga ato nang natun-an? Nganong hinungdanon man kini? Unsay angay nga epekto niini sa atong mga kinabuhi?” Pinaagi sa pagsuknag mga pangutana imbes ipahayag ang kaugalingon natong mga opinyon, kita nagatabang sa atong ginatun-an sa paggamit sa kaugalingon nilang “gahom sa pagpangatarongan.”
5. Unsay epekto sa mga pangutana nga gisukna diha sa Roma 8:31, 32 ug Isaias 14:27? [be p. 239 mga par. 1-2] Nianang duha ka teksto ang inspiradong mga magsusulat sa Bibliya naggamit ug mga pangutana aron ipahayag ang kombiksiyon. Ang mga pangutana niining mga bersikuloha nagpaila nga ang mga ideya nga gipahayag dili ikapangulipas. Kita makagamit sa maong mga pangutana aron dugang mapasiugda ang atong gipamulong.
ASAYNMENT NUM. 1
6. Sa unsang paagi atong ‘ikapahiluna si Kristo ingong patukoranan’ diha sa atong buluhatong paghimog tinun-an? (1 Cor. 3:11) [be p. 278 mga par. 1-2] Aron ‘ikapahiluna si Kristo ingong patukoranan,’ kinahanglan natong tabangan ang mga tawo nga magpasundayag ug pagtuo sa halad lukat ni Jesus ingong basehanan sa kaluwasan. Kinahanglang matudloan ang ginatun-an sa pag-isip kang Jesus ingong ilang modelo ug isipon ang mga Ebanghelyo ingong sumbanan nga pagasundon gayod. (1 Ped. 2:21) Angay natong dasigon ang atong ginatun-an sa pagsukna sa ilang kaugalingon sa dihang mohimog mga desisyon: ‘Unsa kahay buhaton ni Jesus niining kahimtanga? Ang ako bang buhaton magpakitag hustong apresasyon sa iyang nahimo alang kanako?’ (Juan 14:15, 21)
7. Sanglit gitugyan na ni Jehova ang bug-os nga awtoridad sa pagmando ngadto sa iyang Anak niadtong 1914, unsay atong katuyoan sa dihang moampo, “Paanhia ang imong gingharian”? (Mat. 6:9, 10) [be p. 279 par. 4] Sa dihang kita moampo, “Paanhia ang imong gingharian,” kini uban sa ideya nga ang nagamando nang Gingharian sa Diyos molihok sa mahukmanong paagi aron tumanon ang mga tagna nga sama sa Daniel 2:44 ug Pinadayag 21:2-4. Kita gisugo sa pagmantala sa mga panalangin nga ipahinabo sa dili madugay nianang nagamando nang Gingharian sa Diyos. (Mat. 24:14)
8. Nganong ang tanang Kristohanon angayng magmainteresado nga makamaong mobasa, ug sa unsang paagi naghatag ug panig-ingnan si Jesus niining bahina? [w03 3/15 p. 10 par. 5; p. 12 par. 2] Sanglit gipasulat man sa Diyos ang iyang Pulong, iyang gidahom nga ang iyang mga magsisimba makamao gayong mobasa ug mosulat. Ang pagbasa sa Kasulatan ug sa binase-sa-Bibliyang mga tabang sa pagtuon uban ang pagsabot mas makapasayon sa pagpadapat sa tambag sa Diyos ug sa ‘paggamit sa pulong sa kamatuoran sa hustong paagi.’ (2 Tim. 2:15) Si Jesus makamaong mobasa ug mosulat, tungod kay bisan sa edad nga 12 anyos, siya nakaarang sa paghimog mapuslanong mga panaghisgot uban sa edukadong mga tawo sa templo. (Luc. 2:46, 47)
9. Sa unsang paagi ang mga panig-ingnan ni Josias ug ni Jesus makatabang sa mga batan-on sa pag-uswag sa espirituwal? [w03 4/1 p. 8 mga par. 3-4; p. 10 par. 3] Gipabasa sa batan-on nga Haring Josias ang Pulong sa Diyos ngadto kaniya. Ang iyang nadunggan midulot sa iyang kasingkasing ug nagtukmod kaniya sa pag-alagad kang Jehova ug pagpalambo sa matuod nga pagsimba nga mas bug-os pa. (2 Cron. 34:14-21, 33) Giisip ni Jesus ang pag-alagad kang Jehova nga dili lamang usa ka tumong kondili usa ka sugo nga kinahanglang tumanon. Gibati niya ang kalipay ug katagbawan sa pagbuhat sa kabubut-on sa Diyos. (Juan 4:34) Aron makahimog espirituwal nga pag-uswag, kinahanglang ugmaron sa mga batan-on ang hustong panukmod nga naggikan sa kahibalo bahin sa Maglalalang.
10. Nganong kita makasalig sa Diyos? (Prov. 3:5, 6) [w03 11/1 p. 4 mga par. 6-7] Kita makasalig kang Jehova nga Diyos tungod kay siya balaan ug dili gayod mahimong daotan o maabusohon. (Isa. 6:3) Dugang pa, ang gugma sa Diyos maoy mag-impluwensiya sa tanang butang nga iyang himoon. (1 Juan 4:8) Lain pa, siya nakasabot kanato nga labaw pa kay kang bisan kinsa. (Sal. 139:1, 6)
SENEMANANG PAGBASA SA BIBLIYA
11. Nganong miampo si Ana nga si Jehova ‘mohatag ug kusog sa iyang hari’ nga niadtong tungora wala pa may tawhanong hari sa Israel? (1 Sam. 2:10) Tungod kay gitagna diha sa Moisesnong Balaod nga ang mga Israelinhon makabaton ug tawhanong hari. (Deut. 17:14-18) Sa iyang tagna sa hapit na siyang mamatay, si Jacob miingon: “Ang setro [usa ka simbolo sa harianong awtoridad] dili mobiya gikan kang Juda.” (Gen. 49:10) Dugang pa, maylabot kang Sara—ang katigulangan sa mga Israelinhon—si Jehova nag-ingon: “[Ang] mga hari sa mga katawhan magagikan kaniya.” (Gen. 17:16) Busa, si Ana nag-ampo mahitungod sa umaabot nga hari. [1, w05 3/15 “Ang Pulong ni Jehova Buhi—Mga Haylayt Gikan sa Basahon sa Unang Samuel”]
12. Unsay atong makat-onan gikan sa kamatuoran nga ang Israel napildi bisan pag ang arka sa pakigsaad anaa sa ilang taliwala? (1 Sam. 4:3, 4, 10) Ang paghunahuna nga ang materyal nga mga butang adunay labaw-tawhanong gahom magpahinabog malaglagong mga resulta. Bisan ang butang nga sama ka balaan sa “arka sa pakigsaad ni Jehova” dili diay usa ka anting-anting nga makahatag ug proteksiyon. Kita kinahanglang ‘magbantay gikan sa mga idolo.’ (1 Juan 5:21) [1, w05 3/15 “Ang Pulong ni Jehova Buhi—Mga Haylayt Gikan sa Basahon sa Unang Samuel”; w02 7/1 p. 6-8]
13. Nganong ang 1 Cronicas 2:13-15 naghisgot kang David ingong ikapitong anak ni Jese, samtang ang 1 Samuel 16:10, 11 nagpaila nga siya mao ang ikawalong anak? Ang Kasulatan nag-ingon nga si Jese “may walo ka anak nga lalaki.” (1 Sam. 17:12) Ang usa sa iyang mga anak nga lalaki dayag nga batan-on pang namatay ug sa ingon wala makaminyo ug makabaton ug mga anak. Kay walay kaliwat, siya walay bahin sa tribonhong panulondon ni ang iyang ngalan mapuslanon sa talaan sa mga kaliwat ni Jese. [5, w02 9/15 p. 31]
14. Unsang “daotang espiritu” ang naglisang kang Saul? (1 Sam. 16:14) Ang daotang espiritu nga naghasol sa hunahuna ni Saul mao ang daotang kiling sa iyang hunahuna ug kasingkasing—ang iyang pangsulod nga agda sa pagbuhat ug daotan. Sa dihang gikuha ni Jehova ang iyang balaang espiritu, si Saul nawad-an sa panalipod niini ug gidominar sa kaugalingon niyang daotang espiritu. Sanglit gitugotan sa Diyos ang maong espiritu nga mopuli sa iyang balaang espiritu, kining daotang espiritu gitawag nga “usa ka daotang espiritu gikan kang Jehova.” [5, w05 3/15 “Ang Pulong ni Jehova Buhi—Mga Haylayt Gikan sa Basahon sa Unang Samuel”]
15. Tukma ba ang panagna nga gihimo ni “Samuel” pinaagi sa espiritista sa En-dor? (1 Sam. 28:16-19) Dili. Si Saul grabeng nasamdan diha sa gubat batok sa mga Filistehanon, apan siya namatay tungod sa paghikog. (1 Sam. 31:1-4) Ug sukwahi sa panagna nga nag-ingon nga ang tanang anak nga lalaki ni Saul mamatay uban kaniya, ang iyang anak nga lalaki nga si Is-boset wala mamatay. [8, w88 1/15 p. 3 mga par. 3-4]