Repaso sa Teokratikanhong Tunghaan sa Ministeryo
Ang mosunod nga mga pangutana pagatagdon nga binaba panahon sa Teokratikanhong Tunghaan sa Ministeryo sa semana nga magsugod sa Hunyo 27, 2005. Dumalahon sa magtatan-aw sa tunghaan ang 30-minutos nga repaso pinasukad sa materyal nga gikobrehan diha sa mga asaynment alang sa mga semana sa Mayo 2 hangtod sa Hunyo 27, 2005. [Matikdi: Kon walay mga reperensiya human sa pangutana, kinahanglang mohimo kag kinaugalingong panukiduki aron makaplagan ang mga tubag.—Tan-awa ang Tunghaan sa Ministeryo, pp. 36-7.]
MGA HIYAS SA PAGPANULTI
1. Nganong ang mga simile ug metapora puwersadong mga tabang sa pagpanudlo? (Gen. 22:17; Sal. 1:3; Sant. 3:6) [be p. 240 mga par. 2-4, kahon] Ang mga simile ug metapora magpatungha ug tin-awng mga hulagway diha sa hunahuna pinaagi sa pipila lang ka pulong. Sa dihang gamiton sa hustong paagi, kini makatandog sa kasingkasing sa atong mga mamiminaw ug makatabang kanila nga mas mahinumdom sa atong gisulti kay sa yanong pagpahayag lamang nato sa mga kamatuoran.
2. Asa nato makaplagi ang matulon-anong mga pananglitan, apan unsay angay natong bantayan bahin niini? [be p. 242 mga par. 1-2] Ang inspiradong Pulong sa Diyos adunay daghang buhing mga pananglitan. Si Jesus naghisgot bahin sa “asawa ni Lot” ug sa “mga adlaw ni Noe.” (Luc. 17:32; Mat. 24:37-39) Sa dihang masinati kita sa Bibliya, magamit nato ang maong mga pananglitan. Kon gusto natong gamiton ang usa ka modernong kasinatian, angay natong tinoon nga kini tinuod, paneguroon nga kini mapuslanon, ug dili kini tugotan nga makapaliso sa pagtagad gikan sa tumong sa atong presentasyon.
3. Unsay angay natong hinumdoman sa dihang mopilig epektibo kaayong mga ilustrasyon? [be p. 244 mga par. 1-2] Ang atong mga ilustrasyon kinahanglang mohaom sa atong mamiminaw. Kini nagkinahanglan nga kita mapaniiron sa kinabuhi sa atong palibot ug maghunahuna pag-ayo sa mga kalihokan ug kultural nga kagikan sa atong mga mamiminaw. (Mar. 2:22; 4:2-9; Juan 10:1-5)
4. Nganong angay natong gamiton ang makitang mga tabang diha sa atong pagpanudlo, ug giunsa kini paggamit ni Jehova? [be p. 247 mga par. 1-2, kahon] Ang makitang mga tabang makakuha sa pagtagad sa mamiminaw. Kini makahatag ug mas tin-aw ug mas malungtarong epekto kay sa pagtudlo lamang sa binaba nga paagi. Si Jehova naggamit ug nagkalainlaing makitang mga tabang, sama sa mga bituon, usa ka buhatan sa magkukulon, usa ka tabayag, ug sa tabernakulo. (Gen. 15:5; Jer. 18:1-6; Jon. 4:6-11; Heb. 9:9, 23, 24)
5. Sa unsang paagi atong magamit ang makitang mga tabang diha sa ministeryo sa kanataran? [be p. 248 par. 1–p. 249 par. 2] Ikapakita nato ang mga hulagway, mapa, kronolohikal nga mga tsart, ug matematikal nga mga kalkulasyon nga makita diha sa atong mga publikasyon, nga hangyoon ang atong kaestorya sa paghubit sa iyang nakita. (Amos 7:7, 8; 8:1, 2) Magamit usab nato ang atong mga video sa pagtudlo ug hinungdanong mga kamatuoran.
ASAYNMENT NUM. 1
6. Unsang lagda ang anaa sa Pulong sa Diyos bahin sa pag-edukar sa kabataan? [w03 3/15 p. 12 par. 2; p. 14 par. 3] Si Jesus makamaong mobasa ug mosulat, kay bisan sa edad nga 12, siya may makahuloganong panaghisgot uban sa edukadong mga hamtong. (Luc. 2:42, 46, 47) Nakakat-on usab siyag trabaho gikan sa iyang amaama nga si Jose. Ang mga ginikanan gihatagan ug responsabilidad sa pagmatuto sa ilang mga anak “sa disiplina ug sa pagdumala-sa-kaisipan ni Jehova,” nga tabangan sila nga mahimong ‘mahigugmaon sa kahibalo.’ (Efe. 6:4; Prov. 12:1)
7. Sa unsang paagi si Jehova nagpakitag interes kang David sa batan-on pa siya, ug sa unsang paagi si David nagpakitag interes kang Jehova? [w03 4/15 p. 29 par. 4; p. 30 par. 3] Gipili ni Jehova si David, ang kinamanghorang anak lalaki ni Jese, ingong umaabot nga hari sa Israel, tungod kay Iyang namatikdan ang iyang katakos. (1 Sam. 16:7) Ug kanunayng gihunahuna ni David ang iyang relasyon kang Jehova ug gipangayo ang iyang giya. (Sal. 25:4, 5)
8. Nganong gikahimut-an man ni Jehova ang halad ni Abel, ug unsay gipasalig niini kanato? (Gen. 4:4) [w03 5/1 p. 28 par. 4–p. 29 par. 1] Bisan tuod ang halad ni Abel mahimong isipon nga ordinaryo lang, kini gikuha gikan sa kinamaayohang mga mananap sa iyang panon. Kini naghawas sa kinamaayohan nga iyang ikahalad. Lagmit nga gihunahuna pag-ayo ni Abel kon unsay iyang ihalad, tungod kay gibanaag niini ang iyang pagtuo. (Heb. 11:4) Kini nagpasalig kanato nga kahimut-an ni Jehova ang atong ‘mga halad sa pagdayeg’ sa dihang kini himoon pinasukad gayod sa pagtuo ug uban sa kinasingkasing nga kombiksiyon. (Heb. 13:15)
9. Unsa “ang disiplina ni Jehova” nga giawhag sa Proverbio 3:11 kanato nga dili isalikway? [w03 10/1 p. 20 mga par. 2-4] Kining mga pulonga nagtumong, dili sa disiplina sa katibuk-an, kondili sa disiplina nga pinasukad sa hataas nga mga prinsipyo sa Diyos. Ang maong disiplina adunay daghang bahin—paggiya, pagtudlo, pagbansay, pagbadlong, pagtul-id, ug bisan pagsilot. Kini dili angayng isalikway, tungod kay kini tinukmod sa gugma nga ang tumong mao ang pagtudlo, paglunsay, ug paghatag kanato ug kaayohan. (Heb. 12:11)
10. Unsay kahulogan sa “pagkakontento” sumala sa pagkagamit niini diha sa 1 Timoteo 6:6-8? [w03 6/1 p. 9 mga par. 1-2; p. 10 par. 1] Kini nagkahulogan nga magmakontento sa paninugdang mga butang, bisag unsa pay atong mga kahimtang, samtang kita nagasalig kang Jehova ug nagaalagad kaniya. Ang pagkakontento magdalag katagbawan nga maggikan sa atong pag-una kanunay sa atong pag-alagad sa Diyos, kabos man kita o adunahan.
SENEMANANG PAGBASA SA BIBLIYA
11. Unsay gilandongan sa nagahiusang bugkos sa gugma tali kang Jonatan ug David? (2 Sam. 1:26) [w89 1/1 p. 26 par. 13] Ang kinamaayohang bugkos sa gugma nga naglungtad tali kang Jonatan ug David maoy sama sa panaghiusa nga naglungtad tali sa “ubang mga karnero” ug sa nanghibilin sa dinihogang mga karnero ingong “usa ka panon” ilalom sa “usa ka magbalantay,” si Jesus. (Juan 10:16)
12. Unsay atong makat-onan gikan sa unang pagsulay ni David sa pagdala sa arka sa pakigsaad ngadto sa Jerusalem? (2 Sam. 6:2-9) (1) Ang dili pagpanumbaling sa mga instruksiyon sa Diyos magdalag katalagman. (2) Bisan kadtong adunay maayong relasyon uban kang Jehova usahay dili maayog reaksiyon sa malisod nga mga kahimtang. (3) Angay natong itugyan kanunay ang atong palas-anon kang Jehova ug dili gayod siya basolon tungod sa mga suliran nga mosangpot tungod kay wala kita manumbaling sa iyang mga instruksiyon. [2, w05 5/15 “Ang Pulong ni Jehova Buhi—Mga Haylayt Gikan sa Basahon sa Ikaduhang Samuel”; w96 4/1 p. 28 par. 5–p. 29 par. 1]
13. Human makasala si David ug Bat-seba, nganong kinahanglan mang mamatay ang ilang anak, nga nag-ingon man ang Deuteronomio 24:16 ug ang Ezequiel 18:20 nga ang anak dili pagapatyon tungod sa kasaypanan sa iyang amahan? (2 Sam. 12:14; 22:31) Kon mga tawhanong maghuhukom pa ang nagdumala sa maong kaso, pagapatyon unta ang mga ginikanan ug ang anak nga anaa sa tagoangkan. (Deut. 22:22) Ang pagkamatay sa maong anak lagmit nakatabang kang David nga mas pang nakaamgo nga wala gayod mahimuot si Jehova sa iyang sala. Gawas pa, wala kita mahibalo bahin sa panglawas sa bag-ong natawo nga bata. Apan makaseguro kita nga gidumala ni Jehova ang maong butang sa matarong nga paagi. [3, w05 5/15 “Mga Pangutana Gikan sa mga Magbabasa”; w86 3/15 p. 31]
14. Sa unsang paagi kita nahibalo nga bakak ang gipanulti ni Ziba mahitungod kang Mepiboset? (2 Sam. 16:1-4) Ang usa ka ambisyosong laraw dili gayod kinaiyanhon sa panggawi sa usa ka mapabilhon, mapaubsanon nga tawo sama kang Mepiboset. Sa walay duhaduha nasinati siya pag-ayo sa pagkamatinumanon sa iyang amahan nga si Jonatan. Bisan tuod ug anak ni Haring Saul, si Jonatan mapaubsanong miila kang David ingong pinili ni Jehova nga maghari ibabaw sa Israel. (1 Sam. 20:12-17) Ingong maunongon nga higala ni David, lagmit nga wala gayod tudloi ni Jonatan ang iyang bata pang anak sa pagtinguha sa harianong gahom. [5, w02 2/15 p. 15 potnot.]
15. Nganong ang reaksiyon ni Mepiboset sa iyang kahimtang labot kang Ziba maoy usa ka maayong panig-ingnan alang kanato? (2 Sam. 19:24-30) Sa dihang nahibaloan nga gibutangbutangan ra diay ni Ziba si Mepiboset, gitul-id lamang ni David ang maong sayop sa usa ka bahin. Bisan pa niana, si Mepiboset wala motutol sa desisyon ni David. Gihatagan niyag pagtagad ang positibong bahin, nga nagmaya nga ang angayang hari sa Israel nakapauli nga luwas. Si Mepiboset naghatag gayod ug maayo kaayong panig-ingnan pinaagi sa pag-antos sa pagkabakol, pagbutangbutang, ug kahigawad. [6, w02 2/15 p. 15 par. 12]