Makadesisyon ba ang Imong Anak Sama sa Usa ka Hamtong?
1. Unsay baroganan sa mga batan-ong Saksi bahin sa paggamit sa dugo? Paghatag ug pananglitan.
1 Makadesisyon bahin sa unsa? Bahin sa pag-abonog dugo. Sumala sa gihisgotan sa artikulong “Maglakaw Ingon sa Gitudlo ni Jehova” sa Hunyo 15, 1991, nga gula sa Ang Bantayanang Torre, ang mga anak sa mga Saksi ni Jehova kinahanglang mohimog klaro ug lig-ong desisyon sa pagpamatuod nga hinungdanon kanila ang ilang tinguha sa pagtuman sa balaod sa Diyos bahin sa dugo maingon nga kini hinungdanon alang sa ilang mga ginikanan. Gikinahanglan ba usab kana sa inyong menor-de-edad nga mga anak?
2. Unsang legal nga sukdanan ang gihatag sa usa ka korte ngadto sa usa ka menor-de-edad nga wala magpaabonog dugo, ug unsay makat-onan sa Kristohanong mga ginikanan ug sa ilang menor-de-edad nga mga anak gikan niini?
2 Unsay Giingon sa Balaod? Sa pagsusi sa kaso sa usa ka 17-anyos nga sister kinsa wala magpaabonog dugo, ang Korte Suprema sa Illinois, Tinipong Bansa mimando: “Kon tin-aw ug makapakombinsir ang ebidensiya nga ang menor-de-edad aduna nay kabuot sa pagsabot sa mga sangpotanan sa iyang mga lihok [ug] sa paghimog desisyon sama sa usa ka hamtong, nan ang balaod naghatag sa maong menor-de-edad sa katungod sa pagdawat o pagdumili sa medikal nga pagtambal.” Busa, sa pagtino kon ang usa ka bata makadesisyon na ba sa iyang kaugalingon, lagmit interbiyohon siya sa mga doktor o mga opisyal aron madunggan ang iya mismong pagdumili sa pagpaabonog dugo. Ang maong batan-on kinahanglang makasabot gayod sa pagkaseryoso sa iyang medikal nga kahimtang ug sa mga sangpotanan sa iyang mga desisyon alang sa pagtambal ug tin-aw ug lig-ong makapahayag sa iyang relihiyosong pagtuo bahin sa balaod sa Diyos maylabot sa dugo.
3. Unsang mga pangutana ang angay nga seryosong pagatagdon sa mga ginikanan, ug ngano?
3 Unsay Angayng Isulti sa Imong Anak? Makahimo na ba gayod ang imong mga anak sa pagsulti sa ilang kaugalingong baroganan bahin sa balaod sa Diyos sa dugo? Kinasingkasing ba gayod silang nagtuo nga ang ‘pag-ayad sa dugo’ maoy balaod sa Diyos? (Buh. 15:29; 21:25) Makapatin-aw ba sila sa ilang pagtuo pinasukad sa Kasulatan? Maisogon ba nilang madepensahan ang ilang lig-ong desisyon nga dili magpaabonog dugo kon moingon ang mga doktor nga nameligro ang ilang kinabuhi, bisag wala diha ang ilang mga ginikanan? Sanglit “ang panahon ug ang wala damhang panghitabo modangat [kanatong] tanan,” sa unsang paagi imong maandam ang imong mga anak alang sa bisan unsang wala-damhang mga pagsulay sa ilang integridad?—Eccl. 9:11; Efe. 6:4.
4, 5. (a) Unsay kaakohan sa mga ginikanan, ug sa unsang paagi ilang matuman kini? (b) Unsang mga tagana ang mabatonan aron matabangan ang mga ginikanan?
4 Mga Ginikanan, Unsay Inyong Mahimo? Kamo may kaakohan sa pagtudlo sa inyong mga anak sa hunahuna sa Diyos bahin sa dugo. (2 Tim. 3:14, 15) Ang klarong katin-awan makita diha sa librong Nangatarongan, panid 153-57. Tun-i kini pag-ayo uban sa inyong pamilya. Ginamit ang ulohan nga “Kon Adunay Moingon—” diha sa panid 157-59, pagbansaybansay uban sa inyong mga anak aron matabangan sila sa pagsaysay sa ilang gituohan ug kon nganong ilang gituohan kana. (1 Ped. 3:15) Ang lain pang mga tabang sa pag-edukar kanato bahin sa isyu sa dugo mao ang brosyur nga Sa Unsang Paagi ang Dugo Makaluwas sa Imong Kinabuhi? ug Ang Bantayanang Torre sa Hunyo 15, 2004, panid 14-24. Dugang pa, ang mga video nga Transfusion-Alternative Health Care—Meeting Patient Needs and Rights ug ang No Blood—Medicine Meets the Challenge, nga mabatonan na karon sa DVD nga nag-ulohang Transfusion Alternatives—Documentary Series, naghatag ug makapakombinsir nga impormasyon bahin sa pagkamakataronganon ug pagkaepektibo sa pagtambal ug pag-opera nga dili mogamit ug dugo. Natan-aw ug nahisgotan na ba sa inyong pamilya kini nga mga video?
5 Tabangi ang inyong mga anak nga ‘pamatud-an sa ilang kaugalingon ang maayo, dalawaton, ug hingpit nga kabubut-on sa Diyos’ bahin sa dugo. Pinaagi niana sila makahimog hinamtong nga desisyon nga panalanginan ni Jehova.—Roma 12:2.