Tudloi ang mga Maaghop sa Paglakaw Diha sa Dalan sa Diyos
1. Unsay nalangkit sa paghimog mga tinun-an?
1 Ang mga tinun-an ni Kristo sa unang siglo gitawag nga sakop sa “Dalan.” (Buh. 9:2) Ang matuod nga Kristiyanidad naglangkit sa bug-os nga pagkinabuhi sa usa ka tawo. (Prov. 3:5, 6) Busa, sa dihang magdumalag mga pagtuon sa Bibliya, dili igo nga kita magtudlo lamang ug tukmang kahibalo bahin sa doktrina sa Bibliya. Kinahanglan tabangan usab nato ang mga ginatun-an sa Bibliya sa paglakaw diha sa dalan ni Jehova.—Sal. 25:8, 9.
2. Unsay makatukmod sa usa ka ginatun-an sa Bibliya sa pagtuman sa mga sugo sa Diyos?
2 Gugma Alang Kang Jehova ug Kang Jesus: Malisod gayod nga ipahiuyon sa dili-hingpit nga mga tawo ang ilang panghunahuna, tinamdan, sinultihan, ug panggawi ngadto sa kabubut-on sa Diyos! (Roma 7:21-23; Efe. 4:22-24) Hinuon, ang gugma alang sa Diyos ug sa iyang Anak magpalihok sa mga maaghop sa paghimo niining malisod nga tulumanon. (Juan 14:15; 1 Juan 5:3) Sa unsang paagi makatabang kita sa atong mga ginatun-an sa Bibliya sa pag-ugmad niining gugmaha?
3. Sa unsang paagi matabangan nato ang mga ginatun-an sa pag-ugmad ug gugma alang kang Jehova ug kang Jesus?
3 Tabangi ang imong ginatun-an nga makaila kon unsang matanga sa persona si Jehova. Usa ka brader miingon, “Ang mga tawo dili mahimong mahigugma sa usa ka tawo nga dili nila kaila, busa sa pagsugod gayod sa pagtuon, tudloan ko sila sa ngalan sa Diyos gikan sa Bibliya, ug mangita akog mga kahigayonan nga mapasiugda ang mga hiyas ni Jehova.” Ang pagpasiugda sa panig-ingnan ni Jesus maoy maayo kaayong paagi sa paghimo niini. (Juan 1:14; 14:9) Dugang pa, gamita ang kahon sa repaso sa kataposan sa matag kapitulo sa librong Gitudlo sa Bibliya aron matabangan ang ginatun-an sa pagpamalandong sa kahibulongang mga hiyas sa Diyos ug sa iyang Anak.
4. (a) Nganong daghang ginatun-an ang malisdan sa pagsangyaw? (b) Sa unsang paagi matabangan nato ang atong mga ginatun-an sa pagsugod sa pagpakigbahin diha sa Kristohanong ministeryo?
4 Pagtudlo Pinaagig Panig-ingnan: Ingong mga magtutudlo ug tiggiya, ipakita nato sa uban pinaagi sa atong mga lihok kon unsay kahulogan sa paglakaw diha sa dalan sa Diyos. (1 Cor. 11:1) Pananglitan, kadaghanan sa mga ginatun-an sa Bibliya wala maanad sa pagduol sa mga dili-kaila aron sa pagpaambit sa ilang mga gituohan. Busa, nagkinahanglan tingalig pailob ug kahanas ang pagtabang kanila sa pag-ugmad sa gugma, pagtuo, ug kaisog nga gikinahanglan sa pagpakigbahin diha sa buluhatong pagsangyaw ug paghimog mga tinun-an. (2 Cor. 4:13; 1 Tes. 2:2) Ang atong tinguha sa paggiya sa atong mga ginatun-an magtukmod kanato sa pag-uban ug pagpaluyo kanila kon sila mosugod na sa pagpakigbahin diha sa Kristohanong ministeryo.
5. Sa unsang paagi ang maayong panig-ingnan makatabang sa mga ginatun-an sa pagtuman kon unsay nalangkit sa pagsunod sa mga sugo sa Diyos?
5 Ang imong panig-ingnan makatudlo sa mga ginatun-an diha sa ubang hinungdanong mga bahin sa Kristohanong pagkinabuhi. Sa dihang imong duawon ang mga masakiton o mainitong timbayahon ang uban diha sa mga tigom sa kongregasyon, sila makakita sa gugma nga gipadayag sa buhat. (Juan 15:12) Sa dihang motabang ka sa pagpanglimpiyo sa Kingdom Hall o mohimog mga butang sa pagtabang sa uban, ikaw nagtudlo kanila kon unsaon pag-alagad. (Juan 13:12-15) Kon ilang mamatikdan nga ikaw simpleng nagkinabuhi, sila makasabot kon unsay kahulogan sa ‘padayong pagpangita pag-una sa gingharian.’—Mat. 6:33.
6. Unsay mga resulta sa pagtabang sa mga maaghop nga makaalagad kang Jehova?
6 Ang pagpanudlo sa uban pinasukad sa Pulong sa Diyos ug ang paghimog mga tinun-an nagkinahanglag dakong paningkamot. Apan pagkamakalilipay ang pagkakita sa mga maaghop nga “nagpadayon sa paglakaw diha sa kamatuoran”!—3 Juan 4.