Hatagig Kanunayng Pagtagad ang Imong Pagpanudlo

“Hatagig kanunayng pagtagad ang imong kaugalingon ug ang imong pagpanudlo. Pabilin niining mga butanga, kay pinaagi sa pagbuhat niini imong maluwas ang imong kaugalingon ug kadtong kinsa mamati kanimo.”​—1 TIMOTEO 4:16.

1, 2. Nganong ang masibotong mga magtutudlo gikinahanglan gayod karon?

PANGLAKAW kamo ug paghimog mga tinun-an sa katawhan sa tanang kanasoran, . . . nga magatudlo kanila sa pagsunod sa tanang butang nga akong gisugo kaninyo.” (Mateo 28:19, 20) Tungod niining sugoa ni Jesu-Kristo, ang tanang Kristohanon kinahanglang maningkamot nga mahimong mga magtutudlo. Ang masibotong mga magtutudlo gikinahanglan sa pagtabang sa matinud-anog-kasingkasing nga mga tawo nga makadangat sa kahibalo sa Diyos sa dili pa ulahi kaayo. (Roma 13:11) Miawhag si apostol Pablo: “Iwali ang pulong, magmadalion niini sa paborableng panahon, sa masamokong panahon.” (2 Timoteo 4:2) Nagkinahanglan kini ug pagtudlo sa sulod ug gawas sa kongregasyon. Sa pagkatinuod, ang sugo sa pagsangyaw mismo naglangkit ug labaw pa kay sa yanong pagmantala sa mensahe sa Diyos. Ang epektibong pagpanudlo gikinahanglan aron mahimong mga tinun-an ang mga interesado.

² Nagkinabuhi kita sa “makuyaw nga mga panahong lisod sagubangon.” (2 Timoteo 3:1) Naimpluwensiyahan ang hunahuna sa mga tawo sa sekular nga mga pilosopiya ug bakak nga mga pagtulon-an. Daghan ang “anaa sa kangitngit sa kaisipan” ug “nawad-an na sa tanang moral nga pagbati.” (Efeso 4:18, 19) Ang uban dunay masakit nga emosyonal nga mga samad. Oo, ang mga tawo tinuod nga “pinanitan ug binalibag samag mga karnero nga walay pastol.” (Mateo 9:36) Bisan pa niana, pinaagi sa paggamit sa arte sa pagpanudlo, makatabang kita sa mga matinud-anog-kasingkasing sa paghimog gikinahanglang mga kausaban.

Mga Magtutudlo Sulod sa Kongregasyon

3. (a) Unsay nalakip sa sugo ni Jesus nga manudlo? (b) Kinsa ang dunay pangunang responsabilidad sa pagtudlo sulod sa kongregasyon?

³ Pinaagi sa kahikayan sa pagtuon sa Bibliya sa balay, minilyon ang nakadawat ug personal nga instruksiyon. Apan, human sa ilang bawtismo ang mga bag-ohan nagkinahanglan ug dugang tabang aron mahimong “makagamot ug matukod ibabaw sa patukoranan.” (Efeso 3:17) Samtang nagatuman kita sa sugo ni Jesus nga natala sa Mateo 28:19, 20 ug nagatultol sa mga bag-ohan ngadto sa organisasyon ni Jehova, sila makabenepisyo gikan sa pagkanatudloan diha sulod sa kongregasyon mismo. Sumala sa Efeso 4:11-13, ang mga lalaki gitudlo aron mag-alagad “ingong mga pastol ug mga magtutudlo, alang sa pagpasibo ug balik sa mga balaan, alang sa ministeryal nga buluhaton, alang sa pagpalig-on sa lawas sa Kristo.” Usahay, ang ilang arte sa pagpanudlo naglakip sa panginahanglan sa ‘pagpamadlong, pagsaway, pagtambag nga maawhagon, uban sa tanang hataas-nga-pailob.’ (2 Timoteo 4:2) Ang buluhaton sa mga magtutudlo hinungdanon kaayo nga, sa pagsulat sa mga taga-Corinto, si Pablo naglista sa mga magtutudlo human sa mga apostol ug mga propeta.​—1 Corinto 12:28.

4. Sa unsang paagi ang katakos sa pagtudlo motabang kanato sa pagtuman sa tambag ni Pablo nga nasulat sa Hebreohanon 10:24, 25?

⁴ Tinuod, dili tanang Kristohanon ang nag-alagad ingong mga ansiyano, o mga magtatan-aw. Bisan pa niana, ang tanan gidasig sa pagpasibot sa usag usa “sa paghigugma ug sa maayong mga buhat.” (Hebreohanon 10:24, 25) Ang pagbuhat niana diha sa mga tigom naglangkit sa maayong-pagkaandam, kinasingkasing nga mga komento nga makapalig-on ug makapadasig sa uban. Ang batid nga mga magmamantala sa Gingharian mahimo usab nga ‘magpasibot sa maayong mga buhat’ pinaagi sa pagpakig-ambit sa ilang kahibalo ug kasinatian uban sa mga bag-ohan sa dihang nagtrabaho uban kanila diha sa ministeryo sa kanataran. Nianang mga panahona ug sa di-pormal nga mga okasyon, ang bililhong instruksiyon mahimong ikahatag. Pananglitan, ang hamtong nga mga babaye giawhag nga mahimong “mga magtutudlo sa unsay maayo.”​—Tito 2:3.

Nakombinsir sa Pagtuo

5, 6. (a) Sa unsang paagi ang tinuod nga Kristiyanidad kasukwahi sa bakak nga pagsimba? (b) Sa unsang paagi ang mga ansiyano makatabang sa mga bag-ohan sa paghimog maalamong mga desisyon?

⁵ Ang tinuod nga Kristiyanidad sa ingon kasukwahi kaayo sa bakak nga mga relihiyon, nga daghan kanila nagtinguha sa pagkontrolar sa panghunahuna sa ilang mga membro. Sa dihang dinhi pa si Jesus sa yuta, ang relihiyosong mga lider naningkamot sa pagkontrolar sa halos tanang bahin sa kinabuhi sa mga tawo pinaagi sa madaogdaogong hinimog-tawo nga mga tradisyon. (Lucas 11:46) Ang klero sa Kakristiyanohan kasagarang naghimo sa susama.

⁶ Apan, ang matuod nga pagsimba maoy “balaang pag-alagad” nga atong itanyag uban sa atong “gahom sa pagpangatarungan.” (Roma 12:1) Ang mga alagad ni Jehova ‘nakombinsir sa pagtuo.’ (2 Timoteo 3:14) Usahay, kadtong nanguna kinahanglan tingaling mosugod sa pipila ka lagda ug mga pamaagi alang sa hapsay nga paglihok sa kongregasyon. Apan, inay magtinguha sa paghimog mga desisyon alang sa kaubang mga Kristohanon, ang mga ansiyano magtudlo kanila “nga mailhan ang husto ug ang sayop.” (Hebreohanon 5:14) Ang mga ansiyano sa panguna naghimo niini pinaagi sa pag-amoma sa kongregasyon “sa mga pulong sa pagtuo ug sa maayong pagtulon-an.”​—1 Timoteo 4:6.

Paghatag ug Pagtagad sa Imong Pagtudlo

7, 8. (a) Sa unsang paagi ang mga tawo nga dunay kasarangang mga katakos makaalagad ingong mga magtutudlo? (b) Unsay nagpakita nga ang personal nga paningkamot gikinahanglan aron mahimong epektibong magtutudlo?

⁷ Apan, mobalik kita sa atong katibuk-ang sugo nga manudlo. Nagkinahanglan ba ug partikular nga mga kahanas, edukasyon, o mga katakos aron makapakig-ambit niining buluhatona? Dili na kinahanglan. Sa kinadak-ang bahin, kining tibuok-kalibotang buluhaton nga pagpanudlo ginahimo sa ordinaryong mga indibiduwal nga dunay kasarangang mga katakos. (1 Corinto 1:26-29) Si Pablo misaysay: “Kami nagbaton niini nga bahandi [ang ministeryo] diha sa mga kulonong sudlanan [dili-hingpit nga mga lawas], aron ang gahom nga labaw sa kasarangan mamahimong iya sa Diyos ug dili gikan sa among kaugalingon.” (2 Corinto 4:7) Ang dakong kalamposan nga napahimuslan sa tibuok-kalibotang buluhaton nga pagsangyaw sa Gingharian maoy pamatuod sa gahom sa espiritu ni Jehova!

⁸ Bisan pa niana, nagkinahanglag sinserong personal nga paningkamot aron mahimong “usa ka mamumuo nga walay angay ikaulaw, nga sa husto nagagamit sa pulong sa kamatuoran.” (2 Timoteo 2:15) Giawhag ni Pablo si Timoteo: “Hatagig kanunayng pagtagad ang imong kaugalingon ug ang imong pagpanudlo. Pabilin niining mga butanga, kay pinaagi sa pagbuhat niini imong maluwas ang imong kaugalingon ug kadtong kinsa mamati kanimo.” (1 Timoteo 4:16) Sa unsa bang paagi ang usa maghatag ug pagtagad sa iyang pagpanudlo, sa sulod o gawas sa kongregasyon? Ang paghimo ba niana kinahanglang maglangkit sa pagkahimong batid sa pipila ka kahanas o mga pamaagi sa pagpanudlo?

9. Unsay labi pang hinungdanon kay sa kinaiyanhong mga katakos?

⁹ Tinong nagpasundayag si Jesus ug talagsaong pagsabot sa mga paagi sa pagtudlo sa iyang nabantog nga Wali sa Bukid. Sa dihang nahuman siyag sulti, “nahingangha ang mga panon sa katawhan sa iyang paagi sa pagpanudlo.” (Mateo 7:28) Siyempre, walay mausa kanato ang makatudlo nga sama kang Jesus. Bisan pa niana, dili kita kinahanglang mahimong larinong mga mamumulong aron mahimong epektibong mga magtutudlo. Aw, sumala sa Job 12:7, bisan ang “gianad nga mga mananap” ug ang “pak-ang mga linalang” makatudlo sa hilom! Duyog sa bisan unsang kinaiyanhong mga katakos o mga kahanas nga ato tingaling nabatonan, ang ilabinang hinungdanon mao ang ‘kon unsang matanga sa mga tawo’ kita​—unsang mga hiyas ang atong nabatonan ug unsang espirituwal nga mga batasan ang atong naugmad nga mahimong sundogon sa mga estudyante.​—2 Pedro 3:11; Lucas 6:40.

Mga Estudyante sa Pulong sa Diyos

10. Sa unsang paagi si Jesus nagpakita ug maayong panig-ingnan ingong estudyante sa Pulong sa Diyos?

¹⁰ Ang epektibong magtutudlo sa Kasulatanhong mga kamatuoran kinahanglang mahimong usa ka estudyante sa Pulong sa Diyos. (Roma 2:21) Si Jesu-Kristo nagpakita ug talagsaong panig-ingnan niining bahina. Panahon sa iyang ministeryo, si Jesus naghisgot o nagpahayag ug mga hunahuna nga katumbas sa mga teksto diha sa mga katunga sa mga basahon sa Hebreohanong Kasulatan.a Ang iyang pagkasinati sa Pulong sa Diyos nadayag sa edad nga 12, sa dihang nakaplagan siyang “naglingkod taliwala sa mga magtutudlo ug nagapamati kanila ug nagapangutana kanila.” (Lucas 2:46) Ingong hamtong, kostumbre ni Jesus ang pag-adto sa sinagoga, diin ang Pulong sa Diyos gibasa.​—Lucas 4:16.

11. Unsang maayong mga batasan sa pagtuon ang angayng ugmaron sa usa ka magtutudlo?

¹¹ Ikaw ba madasigong tigbasa sa Pulong sa Diyos? Ang pagkalot niana mao ang paagi nga “ikaw makasabot sa pagkahadlok kang Jehova, ug ikaw makakaplag sa kahibalo sa Diyos.” (Proverbio 2:4, 5) Busa ugmara ang maayong mga batasan sa pagtuon. Sulayi ang pagbasa ug bahin sa Pulong sa Diyos kada adlaw. (Salmo 1:2) Himoang batasan ang pagbasa sa matag gula sa Ang Bantayanang Torre ug Pagmata! dihadiha sa pagkadawat niini. Paminaw pag-ayo diha sa mga tigom sa kongregasyon. Pagtuon sa paghimog mainampingong panukiduki. Pinaagi sa pagtuon sa ‘pagsubay sa tanang butang uban ang katukma,’ malikayan nimo ang mga paghinobra ug mga sayop sa dihang ikaw magatudlo.​—Lucas 1:3.

Gugma ug Pagtahod Alang Niadtong Ginatudloan

12. Unsay tinamdan ni Jesus ngadto sa iyang mga tinun-an?

¹² Ang laing hinungdanong hiyas mao ang tukmang tinamdan ngadto saimong ginatudloan. Ang mga Pariseo mibatig kayugot niadtong namati kang Jesus. “Kining panon sa katawhan nga wala mahibalo sa Balaod maoy tinunglong katawhan,” sila miingon. (Juan 7:49) Apan si Jesus dunay lalom nga gugma ug pagtahod sa iyang mga tinun-an. Siya miingon: “Wala na ako magatawag kaninyo nga mga ulipon, tungod kay ang usa ka ulipon wala mahibalo kon unsay ginabuhat sa iyang agalon. Apan ginatawag ko kamong mga higala, tungod kay ang tanang butang nga akong nadungog gikan sa akong Amahan akong gipahibalo kaninyo.” (Juan 15:15) Kini nagpakita kon sa unsang paagi ang mga tinun-an ni Jesus magpadayon sa ilang kalihokan sa pagsangyaw.

13. Unsay gibati ni Pablo bahin niadtong iyang gitudloan?

¹³ Pananglitan, wala hupti ni Pablo ang bugnaw, hilabihan ka pormal nga relasyon uban sa iyang mga estudyante. Giingnan niya ang mga taga-Corinto: “Bisan pag kamo tingali may napulo ka libong magtutudlo diha kang Kristo, tino nga kamo walay daghang amahan; kay diha kang Kristo Jesus ako nahimong inyong amahan pinaagi sa maayong balita.” (1 Corinto 4:15) Usahay, si Pablo mihilak gani samtang nagtambag niadtong iyang gitudloan! (Buhat 20:31) Nagpasundayag usab siya ug talagsaong pailob ug kalulot. Busa makaingon siya sa mga taga-Tesalonica: “Kami nagmalumo taliwala kaninyo, sama sa usa ka nagapasusong inahan nga nagapangga sa iyang kaugalingong mga anak.”​—1 Tesalonica 2:7.

14. Nganong ang personal nga kaikag sa atong mga estudyante sa Bibliya hinungdanon kaayo? Iilustrar.

¹⁴ Gisundog ba nimo si Jesus ug Pablo? Ang sinserong gugma alang sa atong mga estudyante dagayang makapuli sa bisan unsang mga kakulangan sa kinaiyanhong mga katakos nga ato tingaling nabatonan. Nakamatikod ba ang atong mga estudyante sa Bibliya nga kita dunay sinserong kaikag kanila sa personal? Mogahin ba kita ug panahon sa pagsinati kanila? Sa dihang ang usa ka Kristohanong babaye nalisdan sa pagtabang sa usa ka estudyante sa pag-uswag sa espirituwal, siya malulotong nangutana: “Duna bay nakapabalaka kanimo?” Ang babaye misugod sa pagpahayag sa iyang gibati, nga miasoy ug daghang mga kabalaka ug mga kahingawa. Kadtong mahigugmaong kabildohay nahimong hinungdanong kausaban alang sa maong babaye. Sa maong mga kaso haom ang Kasulatanhong mga hunahuna ug mga pulong sa paghupay ug pagdasig. (Roma 15:4) Apan, usa ka pasidaan: Ang usa ka estudyante sa Bibliya kusog tingaling nag-uswag apan duna pa tingaliy pipila ka dili-kristohanong mga paagi nga buntogonon. Busa hayang dili maalamon nga makigsuod pag-ayo sa maong indibiduwal. Ang tukmang Kristohanong mga utlanan kinahanglang huptan.​—1 Corinto 15:33.

15. Sa unsang paagi kita makapakita ug pagtahod sa atong mga estudyante sa Bibliya?

¹⁵ Ang pagtahod sa atong mga estudyante naglakip nga dili nato sulayan sa pagkontrolar ang ilang personal nga mga kinabuhi. (1 Tesalonica 4:11) Pananglitan, hayan nagtuon kita uban sa usa ka babaye nga nakigpuyo sa usa ka lalaki. Tingali duna na silay mga anak. Sanglit nakadangat sa tukmang kahibalo sa Diyos, buot husayon sa maong babaye ang mga butang uban kang Jehova. (Hebreohanon 13:4) Angay ba niyang pakaslan ang lalaki o bulagan siya? Tingali kusganong gibati nato nga ang pagpakigminyo sa usa ka lalaki nga diyutay ra o walay espirituwal nga interes magpugong sa iyang pag-uswag sa umaabot. Sa laing bahin, basin mahadlok kita sa kaayohan sa iyang mga anak ug maghunahuna nga mas maayong magpakasal siya kaniya. Bisan unsay mahitabo, dili-matinahuron ug dili-mahigugmaon ang pagpanghilabot sa kinabuhi sa estudyante ug sulayan nga ipugos ang atong kaugalingong mga hunahuna sa maong mga butang. Kon buot sabton, siya mao ang kinahanglang magkinabuhi uban sa mga sangpotanan sa desisyon. Nan, dili ba labing maayo nga bansayon ang maong estudyante sa paggamit sa iyang kaugalingong “kagahom sa pag-ila” ug mohukom alang sa iyang kaugalingon kon unsay angay niyang buhaton?​—Hebreohanon 5:14.

16. Sa unsang paagi ang mga ansiyano magpakita ug gugma ug pagtahod sa panon sa Diyos?

¹⁶ Ilabinang hinungdanon alang sa mga ansiyano sa kongregasyon nga atimanon ang panon uban ang gugma ug pagtahod. Sa pagsulat ngadto kang Filemon, si Pablo miingon: “Bisan tuod ako may dakong kagawasnon sa pagsulti may kalabotan kang Kristo sa pagmando kanimo nga buhaton ang husto, ako hinuon magahangyo kanimo pinasukad sa gugma.” (Filemon 8, 9) Usahay, ang makapahigawad nga mga kahimtang mahimong motungha diha sa kongregasyon. Ang kalig-on basin kinahanglanon. Giawhag ni Pablo si Tito nga ‘padayong badlongon [ang mga nakasala] sa kamapig-oton, aron sila mamahimsog sa pagtuo.’ (Tito 1:13) Bisan pa niana, ang mga magtatan-aw kinahanglang mag-amping nga dili gayod mosulti nga dili-maluloton sa kongregasyon. “Ang ulipon sa Ginoo dili kinahanglan nga makig-away,” misulat si Pablo, “kundili gikinahanglan nga magmalumo sa tanan, kuwalipikado sa pagpanudlo, padayong nakapugong sa kaugalingon ilalom sa daotan.”​—2 Timoteo 2:24; Salmo 141:3.

17. Unsang sayop ang nahimo ni Moises, ug unsay makat-onan sa mga ansiyano gikan niana?

¹⁷ Ang mga magtatan-aw kinahanglang magpadayon sa pagpahinumdom sa ilang kaugalingon nga sila nakiglabot “sa panon sa Diyos.” (1 Pedro 5:2) Si Moises, bisan tuod mapainubsanon siya, sa daklit nawad-an niini nga panglantaw. Ang mga Israelinhon “naghagit sa iyang kasuko ug siya misugod sa pagpamulong nga walay-paghunahuna pinaagi sa iyang mga ngabil.” (Salmo 106:33) Ang Diyos wala gayod mahimuot niining sayop nga pagtratar sa Iyang panon, bisan tuod sad-an sila. (Numeros 20:2-12) Sa dihang mag-atubang ug susamang mga paghagit karon, ang mga ansiyano kinahanglang maningkamot sa pagtudlo ug paghatag ug instruksiyon uban ang hait nga panabot ug kalulot. Ang atong mga igsoon labing maayong mosanong kon sila trataron uban ang konsiderasyon ug ingong mga indibiduwal nga nanginahanglag tabang, dili ingon niadtong dili na maulian. Ang mga ansiyano kinahanglang maghupot ug positibong panglantaw nga nabatonan ni Pablo sa dihang siya miingon: “Kami adunay pagsalig diha sa Ginoo maylabot kaninyo, nga kamo nagabuhat ug padayong magabuhat sa mga butang nga among gisugo.”​—2 Tesalonica 3:4.

Masanongon sa Ilang mga Panginahanglan

18, 19. (a) Sa unsang paagi kita mosanong sa mga panginahanglan sa mga estudyante sa Bibliya nga dunay limitadong mga katakos? (b) Sa unsang paagi tingali nato matabangan ang mga estudyante nga nalisdan sa espesipikong mga butang?

¹⁸ Ang epektibong magtutudlo andam nga mopasibo sa mga katakos ug mga limitasyon sa iyang mga estudyante. (Itandi ang Juan 16:12.) Sa sambingay ni Jesus sa mga talento, ang agalon naghatag ug mga pribilehiyo “sa matag usa sumala sa iyang kaugalingong katakos.” (Mateo 25:15) Masundog nato ang susamang sumbanan sa dihang magdumala ug mga panagtuon sa Bibliya. Siyempre, maayo nga makobrehan ang binase-sa-Bibliya nga publikasyon sa igoigong mubo nga yugto sa panahon. Apan, angayng ilhon nga dili ang tanan dunay maayong mga kahanas sa pagbasa o katakos sa pagsagop dayon ug bag-ong mga ideya. Busa, ang salabotan gikinahanglan bahin sa kon kanus-a mobalhin gikan sa usa ka punto ngadto sa lain diha sa pagtuon kon ang masanongong mga indibiduwal malisdan pagnunot sa paspas nga pagkobre. Labi pang hinungdanon kay sa pagkobre sa materyal sa tinong gikusgon mao ang pagtabang sa mga estudyante nga makasabot sa ilang gitun-an.​—Mateo 13:51.

¹⁹ Ang susama ikaingon alang sa mga estudyante sa Bibliya nga naglisod sa espesipikong mga butang, sama sa Trinidad o relihiyosong mga pangilin. Bisan tuod kasagarang dili-kinahanglanon nga ilakip ang binase-sa-Bibliya nga gidukiduking materyal diha sa atong mga pagtuon, usahay buhaton nato kana kon tataw nga mapuslanon kini. Ang maayong panghukom kinahanglang gamiton aron mapugngan ang wala-kinahanglanang pagpahinay sa pag-uswag sa estudyante.

Magmadasigon!

20. Sa unsang paagi nagpakita ug panig-ingnan si Pablo sa pagpasundayag ug kadasig ug hugot nga pagtuo diha sa iyang pagpanudlo?

²⁰ “Magmainiton sa espiritu,” miingon si Pablo. (Roma 12:11) Oo, nagdumala man kita ug panagtuon sa Bibliya sa balay o nakig-ambit kita sa usa ka bahin sa tigom sa kongregasyon, kinahanglang buhaton nato kana uban ang kasibot ug kadasig. Giingnan ni Pablo ang mga taga-Tesalonica: “Ang maayong balita nga among giwali wala makaplagi taliwala kaninyo uban ang mga sulti lamang apan usab uban ang gahom ug uban ang balaang espiritu ug hugot nga pagtuo.” (1 Tesalonica 1:5) Sa ingon gihatag ni Pablo ug sa iyang mga kauban “dili lamang ang maayong balita sa Diyos, apan usab ang [ilang] kaugalingong mga kalag.”​—1 Tesalonica 2:8.

21. Sa unsang paagi mahuptan nato ang madasigong tinamdan ngadto sa atong mga asaynment sa pagpanudlo?

²¹ Ang tinuod nga kadasig naggikan sa hugot nga pagtuo nga ang atong mga estudyante sa Bibliya nagkinahanglang makadungog kon unsay atong isulti. Dili gayod nato lantawon ang bisan unsang asaynment sa pagtudlo ingong rutina. Ang eskriba nga si Esdras tinong naghatag ug pagtagad sa iyang pagpanudlo niining bahina. Iyang “giandam ang iyang kasingkasing sa pagkonsulta sa balaod ni Jehova ug sa pagbuhat niana ug pagtudlo sa Israel.” (Esdras 7:10) Kinahanglang buhaton nato ang susama pinaagi sa bug-os nga pag-andam ug pagpamalandong sa kahinungdanon sa materyal. Mag-ampo kita kang Jehova nga hupngon kita sa pagtuo ug kombiksiyon. (Lucas 17:5) Ang atong kadasig makatabang sa mga estudyante sa Bibliya sa pag-ugmad ug tinuod nga gugma alang sa kamatuoran. Siyempre, ang paghatag ug pagtagad sa atong pagpanudlo mahimong maglangkit usab sa paggamit ug espesipikong mga pamaagi sa pagpanudlo. Ang among sunod nga artikulo maghisgot sa pipila niini.

[Footnote]

Mahinumdom Ka Ba?

◻ Nganong ang hanas nga Kristohanong mga magtutudlo gikinahanglan karon?

◻ Unsang maayong mga batasan sa pagtuon ang atong maugmad?

◻ Nganong ang gugma ug pagtahod alang niadtong atong gitudloan hinungdanon kaayo?

◻ Sa unsang paagi makasanong kita sa mga panginahanglan sa atong mga estudyante sa Bibliya?

◻ Nganong ang kadasig ug hugot nga pagtuo hinungdanon sa dihang magtudlo sa uban?

[Hulagway sa panid 10]

Ang maayong mga magtutudlo sa ilang kaugalingon maoy mga estudyante sa Pulong sa Diyos

[Hulagway sa panid 13]

Pagbaton ug personal nga kaikag sa mga estudyante sa Bibliya