Ugmara ang Pagpabili sa Dili-Hitupngang mga Hiyas ni Jehova
1 Diha sa atong ministeryo, dili lang nato tudloan ang uban sa paninugdang mga kamatuoran sa Bibliya. Atong tabangan ang mga tawo nga makaila kang Jehova ingong persona ug makaugmad sa pagpabili sa iyang dili-hitupngang mga hiyas. Sa dihang ang matinud-anog-kasingkasing nga mga tawo makakat-on sa kamatuoran bahin sa Diyos, kini adunay dako kaayong epekto kanila, nga magtukmod kanila sa paghimog mga kausaban sa ilang mga kinabuhi aron sila “magalakaw nga takos kang Jehova aron bug-os nga makapahimuot kaniya.”—Col. 1:9, 10; 3:9, 10.
2 Atong Bag-ong Tabang sa Pagtuon: Sukad sa sinugdan, ang librong Gitudlo sa Bibliya naghisgot sa mga hiyas ni Jehova. Ang unang kapitulo nagtubag sa mga pangutana: Ang Diyos tinuod bang may pagtagad kanimo?, Unsay kinaiyahan sa Diyos?, ug Posible ba nga makigsuod sa Diyos? Ang maong kapitulo nagpasiugda usab sa pagkabalaan ni Jehova (par. 10), sa iyang hustisya ug kahingawa (par. 11), sa iyang gugma (par. 13), sa iyang gahom (par. 16), ug sa iyang kaluoy, pagkamapuangoron, pagkaandam mopasaylo, pagkamapailobon, ug pagkamaunongon (par. 19). Ang parapo 20 nagsumaryo niini: “Kon ikaw mas makakat-on bahin kang Jehova, siya mahimong mas tinuod alang kanimo ug ikaw adunay mas dakong katarongan sa paghigugma ug pagpakigsuod kaniya.”
3 Unsaon nato paggamit ang librong Gitudlo sa Bibliya sa pagtabang sa mga ginatun-an sa Bibliya nga masuod kang Jehova? Human mahisgoti ang usa ka parapo nga nagpasiugda sa usa sa mga hiyas sa Diyos, mahimo natong pangutan-on ang ginatun-an, “Unsay gitudlo niini kanimo bahin sa kinaiyahan ni Jehova?” o “Sa unsang paagi gipakita niini nga ang Diyos may pagtagad kanimo?” Pinaagi sa panalagsang paggamit sa maong mga pangutana panahon sa pagtuon, atong matudloan ang atong mga ginatun-an sa pagpamalandong sa ilang nakat-onan ug matabangan sila nga maugmad ang ilang pagpabili sa dili-hitupngang mga hiyas ni Jehova.
4 Gamita ang Kahon sa Repaso: Sa kataposan sa matag kapitulo, dapita ang ginatun-an sa pagkomento sa iyang kaugalingong pulong sa matag punto diha sa kahong “Kon Unsay Gitudlo sa Bibliya.” Isentro ang pagtagad nganha sa gisitar nga mga teksto. Aron madasig ang ginatun-an sa pagpahayag kon unsay anaa sa iyang kasingkasing, makapangutana ka usahay, “Unsay imong hunahuna sa gitudlo sa Bibliya bahin niining puntoha?” Sa paghimo niana, wala lang nimo ipasiugda ang pangunang mga punto sa kapitulo kondili masabtan usab nimo kon unsa gayoy gituohan sa imong ginatun-an. Kini motabang sa ginatun-an sa pag-ugmad ug usa ka relasyon uban kang Jehova.