Padayon sa Pag-uswag Ingong Magsasangyaw
1. Unsay mga pananglitan sa unang siglo ang nagpakita nga angay tang mouswag ingong magsasangyaw?
1 Ang mga Kristohanon angayng mouswag ingong mga magsasangyaw. Mao nga gibansay ni Jesus ang iyang mga sumusunod aron sila mahanas. (Luc. 9:1-5; 10:1-11) Kana sab ang rason nga giuban ni Aquila ug Priscila si Apolos ug “gipatin-aw kaniya ang dalan sa Diyos sa mas husto nga paagi.” (Buh. 18:24-26) Gidasig sab ni Pablo ang ebanghelisador nga si Timoteo nga magmakugihon sa iyang pagpanudlo aron ang iyang pag-uswag “madayag sa tanan nga mga tawo.” (1 Tim. 4:13-15) Bisag unsa na kita ka dugay nga nagpaulipon sa Ginoo ingong mga magmamantala sa maayong balita, kinahanglang padayon natong pauswagon ang atong kahanas sa pagsangyaw.
2. Unsaon nato pagkat-on gikan sa uban?
2 Pagkat-on Gikan sa Uban: Usa ka paagi sa pagpauswag sa atong kahanas ang pagkat-on gikan sa uban. (Prov. 27:17) Busa pamati dihang magsangyaw ang imong partner. Pangayog sugyot sa hanas nga mga magmamantala, ug paminaw pag-ayo sa ilang isulti. (Prov. 1:5) Naglisod ba ka sa pagbalikduaw, pagsugod ug Bible study, o sa ubang bahin sa ministeryo? Pangayog tabang sa inyong magtatan-aw sa grupo o sa usa ka hanas nga magmamantala. Hinumdomi sab nga ang balaang espiritu ni Jehova makatabang sa pagpauswag sa atong mga katakos, busa regular kining iampo.—Luc. 11:13.
3. Unsay angay natong reaksiyon kon makadawat tag tambag o sugyot, bisag wala kini pangayoa?
3 Ayawg kahiubos kon makadawat kag tambag o sugyot, bisag wala nimo kana pangayoa. (Eccl. 7:9) Sama kang Apolos, mapaubsanon kanang dawata ug pasalamati kana. Maalamon ka kon imo nang buhaton.—Prov. 12:15.
4. Sumala ni Jesus, nganong importanteng mouswag ingong magsasangyaw?
4 Ang Atong Pag-uswag Maghimaya sa Diyos: Pinaagig ilustrasyon, gidasig ni Jesus ang iyang mga sumusunod nga mouswag ingong mga magsasangyaw. Gipakasama niya ang iyang kaugalingon sa paras ug ang iyang dinihogang mga sumusunod sa mga sanga. Siya miingon nga hinloan sa iyang Amahan ang matag sanga nga dunay bunga “aron nga kini mamunga ug daghan pa.” (Juan 15:2) Samag tag-iyag parasan nga gustong mas magmabungahon ang iyang parasan, gusto sab ni Jehova nga padayong mouswag ang atong katakos sa pagpatunghag “bunga sa mga ngabil.” (Heb. 13:15) Unsay resulta kon mouswag ta ingong magsasangyaw? Si Jesus mitubag: “Ang akong Amahan mahimaya niini, nga kamo magpadayon sa pagpamungag daghan.”—Juan 15:8.