Watchtower ONLINE NGA LIBRARYA
Watchtower
ONLINE NGA LIBRARYA
Cebuano
  • BIBLIYA
  • PUBLIKASYON
  • MGA TIGOM
  • mwbr20 Enero p. 1-12
  • Reperensiya Para sa Workbook sa Tigom nga Kinabuhi ug Ministeryo

Walay video nga available.

Sorry, dunay problema sa pag-load sa video

  • Reperensiya Para sa Workbook sa Tigom nga Kinabuhi ug Ministeryo
  • Reperensiya Para sa Workbook sa Tigom nga Kinabuhi ug Ministeryo—2020
  • Sub-ulohan
  • Enero 6-12
  • Enero 13-19
  • Si Adan Naminaw sa Tingog sa Iyang Asawa
  • Enero 20-26
  • Enero 27–Pebrero 2
Reperensiya Para sa Workbook sa Tigom nga Kinabuhi ug Ministeryo—2020
mwbr20 Enero p. 1-12

Reperensiya Para sa Workbook sa Tigom nga Kinabuhi ug Ministeryo

Enero 6-12

BAHANDI GIKAN SA PULONG SA DIYOS | GENESIS 1-2

“Gilalang ni Jehova ang Kinabuhi Dinhi sa Yuta”

(Genesis 1:3, 4) Ug ang Diyos miingon: “Motungha ang kahayag.” Busa mitungha ang kahayag. 4 Unya nakita sa Diyos nga ang kahayag maayo, ug iyang gipahinabo nga dunay kahayag ug kangitngit.

(Genesis 1:6) Dayon ang Diyos miingon: “Motungha ang hawan taliwala sa katubigan, ug mabahin ang katubigan.”

(Genesis 1:9) Dayon ang Diyos miingon: “Ang mga tubig ilalom sa langit matingob sa usa ka lugar, ug motungha ang mala nga dapit.” Ug nahitabo kini.

(Genesis 1:11) Dayon ang Diyos miingon: “Moturok sa yuta ang mga sagbot, mga tanom nga magpatunghag binhi, ug mga kahoy nga ang bunga may binhi, sumala sa ilang matang.” Ug nahitabo kini.

it-2 682

Paglalang, Linalang

Sa dihang sa Unang Adlaw ang Diyos miingon, “Motungha ang kahayag,” dayag nga ang dan-ag sa hanap nga kahayag milusot sa mga lut-od sa panganod bisan tuod ang mga tinubdan niana nga kahayag dili pa makita gikan sa yuta. Mopatim-awng kini maoy inanay nga proseso, ingon sa gipakita sa maghuhubad nga si J. W. Watts: “Ug inanay nga mitungha ang kahayag.” (Gen 1:3, A Distinctive Translation of Genesis) Gipahinabo sa Diyos nga adunay panagkabahin ang kahayag ug ang kangitngit, ug gitawag ang kahayag nga Adlaw ug ang kangitngit nga Gabii. Kini nagpakita nga ang yuta nagatuyok diha sa ehe o axis niini samtang kini naglibot sa adlaw, mao nga ang mga hemispera niini, ang sidlakan ug kasadpan, makasinatig mga yugto sa kahayag ug kangitngit.​—Gen 1:3, 4.

Sa Ikaduhang Adlaw gipatungha sa Diyos ang usa ka hawan pinaagi sa pagpahinabog pagkabahin “tali sa mga tubig ug sa mga tubig.” Ang ubang tubig nagpabilin sa yuta, apan ang dakong gidaghanon sa tubig gipasaka ibabaw sa yuta, ug taliwala niining duha ka katubigan dihay usa ka hawan. Gitawag sa Diyos kini nga hawan ingong Langit, tungod kay kini nahimutang man ibabaw sa yuta, sanglit ang mga tubig nga anaa sa ibabaw sa hawan wala man hisgoti nga naglakip sa mga bituon o sa ubang mga butang sa kawanangan.​—Gen 1:6-8; tan-awa ang HAWAN, KAWANANGAN.

Sa Ikatulong Adlaw, pinaagi sa gahom sa Diyos sa pagmugnag milagro, ang mga tubig sa yuta natingob ug mitungha ang mamalang yuta, ug gitawag kini sa Diyos nga Yuta. Niini usab nga adlaw, dili kay sulagma lamang o pinaagig mga proseso sa ebolusyon, nga gibutang sa Diyos ang kinabuhi diha sa mga atomo sa materya, mao nga ang mga balili, katanoman, ug mga bungahoy mitungha. Ang matag usa niining tulo ka pamilya sa mga tanom may katakos sa pagsanay sumala sa ilang “matang.”​—Gen 1:9-13.

(Genesis 1:14) Dayon ang Diyos miingon: “Motungha ang mga banwag diha sa kalangitan aron mapalahi ang adlaw gikan sa gabii, ug kini magsilbing ilhanan sa mga panahon, mga adlaw, ug mga tuig.

(Genesis 1:20) Dayon ang Diyos miingon: “Motungha sa katubigan ang daghang buhing linalang, ug manglupad sa kalangitan ang nagalupad nga mga mananap.”

(Genesis 1:24) Dayon ang Diyos miingon: “Motungha sa yuta ang lainlaing klase sa buhing linalang, ang anad nga mga hayop, ang nagakamang nga mga mananap, ug ang ihalas nga mga mananap, sumala sa ilang matang.” Ug nahitabo kini.

(Genesis 1:27) Ug gibuhat sa Diyos ang tawo sumala sa iyang larawan, sa larawan sa Diyos iyang gibuhat siya; lalaki ug babaye iyang gilalang sila.

it-2 682-683 ¶8-11

Paglalang, Linalang

Mamatikdan usab nga sa Genesis 1:16 wala gamita ang Hebreohanong berbo nga ba·raʼʹ, nga nagkahulogang “paglalang.” Hinuon, ang gigamit mao ang Hebreohanong berbo nga ʽa·sahʹ, nga nagkahulogang “pagbuhat.” Sanglit ang adlaw, bulan, ug mga bituon maoy lakip sa “mga langit” nga gihisgotan sa Genesis 1:1, kini sila dugay nang nalalang una pa ang Ikaupat nga Adlaw. Sa ikaupat nga adlaw “gibuhat” o gipahinabo sa Diyos nga kining langitnong mga butang malangkit na sa yuta ug sa hawan ibabaw niini. Sa dihang giingon, “Gibutang kini sa Diyos diha sa hawan sa mga langit aron sa paglamdag sa yuta,” kini nagpasabot nga nianang higayona kini makita na gikan sa yuta, nga samag kini anaa sa hawan. Dugang pa, ang mga banwag “magsilbing mga ilhanan ug alang sa mga panahon ug alang sa mga adlaw ug sa mga tuig,” sa ingon kini sa ulahi naghatag sa tawo ug giya sa lainlaing mga paagi.​—Gen 1:14.

Sa Ikalimang Adlaw gilalang ang unang dili-tawhanong mga kalag sa yuta. Dili usa lamang ka linalang ang gibuhat sa Diyos aron sa ngadtongadto mahimong lain pang matang sa mga linalang, kondili sa literal mga panon sa buhing mga kalag ang gipatungha pinaagi sa Iyang gahom. Kini giingon: “Gilalang sa Diyos ang dagkong linalang sa dagat ug ang matag buhing kalag nga nagalihok, nga gipadagsang sa mga tubig sumala sa ilang mga matang, ug ang matag pak-an nga nagalupad nga linalang sumala sa iyang matang.” Kay nahimuot sa Iyang gipatungha, gipanalanginan sila sa Diyos, ug sa diwa, gisugo sila nga “magdaghan,” ug kini posible, sanglit kini nga mga linalang nga gilangkoban sa nagkalainlaing matang sa pamilya gihatagan sa Diyos ug katakos sa pagsanay “sumala sa ilang mga matang.”​—Gen 1:20-23.

Sa Ikaunom nga Adlaw “gibuhat sa Diyos ang ihalas nga mananap sa yuta sumala sa iyang matang ug ang anad nga hayop sumala sa iyang matang ug ang tanang nagalihok nga mananap sa yuta sumala sa iyang matang,” ug kini nga buhat sa paglalang maayo usab, sama sa tanang una pang mga buhat sa Diyos sa paglalang.​—Gen 1:24, 25.

Sa hinapos sa ikaunom nga adlaw sa paglalang, gipatungha sa Diyos ang usa ka lahi gayod nga matang sa linalang, kini labaw sa mga hayop apan mas ubos sa mga manulonda. Kini mao ang tawo, gilalang sumala sa larawan sa Diyos ug sumala sa iyang dagway. Samtang ang Genesis 1:27 daklit nga nag-asoy bahin sa mga tawo nga ‘gilalang sa Diyos ingong lalaki ug babaye,’ ang susamang asoy sa Genesis 2:7-9 nagpakita nga si Jehova nga Diyos nag-umol sa tawo gikan sa abog sa yuta, naghuyop sa mga buho sa iyang ilong sa gininhawa sa kinabuhi, ug ang tawo nahimong buhing kalag, ug sila gitagan-an ug paraisong puloy-anan ug pagkaon. Niining bahina gigamit ni Jehova ang mga elemento sa yuta sa paglalang, ug sa dihang naumol na ang lalaki, Iyang gilalang ang babaye ginamit ang usa sa mga gusok ni Adan. (Gen 2:18-25) Sa dihang nalalang ang babaye, ang tawo nakompleto ingong usa ka “matang.”​—Gen 5:1, 2.

Pagpangitag Espirituwal nga Bahandi

(Genesis 1:1) Sa sinugdan gibuhat sa Diyos ang langit ug ang yuta.

w15 6/1 5

Kon sa Unsang Paagi ang Siyensiya Nakaapektar Kanimo

Gidugayon sa yuta ug sa uniberso

Gibanabana sa mga siyentista nga ang yuta naglungtad nag mga 4 ka bilyong tuig ug nga ang uniberso namugna mga 13 ngadto sa 14 ka bilyong tuig kanhi. Wala hisgoti sa Bibliya ang petsa sa paglalang sa uniberso. Ug wala sab kini mag-ingon nga pipila pa lang ka libo ka tuig ang paglungtad sa yuta. Ang kinaunhang teksto sa Bibliya nag-ingon: “Sa sinugdan gilalang sa Diyos ang mga langit ug ang yuta.” (Genesis 1:1) Kana nga pahayag naghatag ug kahigayonan sa mga siyentista nga sutaon ang edad sa yuta base sa lohikal nga mga prinsipyo sa siyensiya.

(Genesis 1:26) Dayon ang Diyos miingon: “Magbuhat tag tawo sumala sa atong larawan, nga kaamgid nato, ug gamhan nila ang tibuok yuta apil ang mga isda sa dagat, ang nagalupad nga mga mananap sa kalangitan, ang anad nga mga hayop, ug ang matag nagakamang nga mananap.”

it-1 1255

Jesu-Kristo

Dili kaubang-Maglalalang. Ang Anak nakig-ambit sa mga buluhaton sa paglalang, apan kini wala maghimo kaniya nga kaubang-Maglalalang sa iyang Amahan. Ang gahom sa paglalang naggikan sa Diyos pinaagi sa iyang balaang espiritu, o aktibong puwersa. (Gen 1:2; Sal 33:6) Ug sanglit si Jehova mao ang Tuboran sa tanang kinabuhi, ang tanang buhing mga linalang, makita man ug dili makita, utangan kaniya sa ilang kinabuhi. (Sal 36:9) Nan, inay nga kaubang-Maglalalang, ang Anak mao ang ahente o instrumento nga pinaagi kaniya si Jehova, ang Maglalalang, nagbuhat. Si Jesus mismo nagpasidungog sa paglalang ngadto sa Diyos, sama sa gihimo sa tibuok Kasulatan.​—Mat 19:4-6; tan-awa ang PAGLALANG, LINALANG.

Pagbasa sa Bibliya

(Genesis 1:1-19) Sa sinugdan gibuhat sa Diyos ang langit ug ang yuta. 2 Ang yuta walay porma ug haw-ang, ug ngitngit ang ibabaw sa lawom nga katubigan, ug ang aktibong puwersa sa Diyos nagalihok ibabaw sa katubigan. 3 Ug ang Diyos miingon: “Motungha ang kahayag.” Busa mitungha ang kahayag. 4 Unya nakita sa Diyos nga ang kahayag maayo, ug iyang gipahinabo nga dunay kahayag ug kangitngit. 5 Gitawag sa Diyos ang kahayag nga Adlaw, apan ang kangitngit iyang gitawag nga Gabii. Ug dihay kagabhion ug dihay kabuntagon, unang adlaw. 6 Dayon ang Diyos miingon: “Motungha ang hawan taliwala sa katubigan, ug mabahin ang katubigan.” 7 Unya gibuhat sa Diyos ang hawan ug gibahin ang katubigan, ang usa ka bahin magpabilin ilalom sa hawan ug ang laing bahin matigom ibabaw sa hawan. Ug nahitabo kini. 8 Gitawag sa Diyos ang hawan nga Langit. Ug dihay kagabhion ug dihay kabuntagon, ikaduhang adlaw. 9 Dayon ang Diyos miingon: “Ang mga tubig ilalom sa langit matingob sa usa ka lugar, ug motungha ang mala nga dapit.” Ug nahitabo kini. 10 Gitawag sa Diyos ang mala nga dapit nga Yuta, apan ang natingob nga mga tubig iyang gitawag nga Dagat. Ug nakita sa Diyos nga kini maayo. 11 Dayon ang Diyos miingon: “Moturok sa yuta ang mga sagbot, mga tanom nga magpatunghag binhi, ug mga kahoy nga ang bunga may binhi, sumala sa ilang matang.” Ug nahitabo kini. 12 Mitubo sa yuta ang mga sagbot, mga tanom nga magpatunghag binhi, ug mga kahoy nga ang bunga may binhi, sumala sa ilang matang. Unya nakita sa Diyos nga kini maayo. 13 Ug dihay kagabhion ug dihay kabuntagon, ikatulong adlaw. 14 Dayon ang Diyos miingon: “Motungha ang mga banwag diha sa kalangitan aron mapalahi ang adlaw gikan sa gabii, ug kini magsilbing ilhanan sa mga panahon, mga adlaw, ug mga tuig. 15 Kini magsilbing mga banwag sa kalangitan aron maghatag ug kahayag sa yuta.” Ug nahitabo kini. 16 Gibuhat sa Diyos ang adlaw ug ang bulan. Ang adlaw mohatag ug kahayag sa maadlaw ug ang bulan mohatag ug kahayag sa magabii. Siya naghimo sab ug mga bituon. 17 Gibutang kini sa Diyos diha sa kalangitan aron maghatag ug kahayag sa yuta, 18 maghatag ug kahayag sa maadlaw ug sa magabii, ug aron mabahin ang kahayag ug ang kangitngit. Unya nakita sa Diyos nga kini maayo. 19 Ug dihay kagabhion ug dihay kabuntagon, ikaupat nga adlaw.

Enero 13-19

BAHANDI GIKAN SA PULONG SA DIYOS | GENESIS 3-5

“Daotang mga Resulta sa Unang Bakak”

(Genesis 3:1-5) Sa tanang ihalas nga mananap sa yuta nga gibuhat ni Jehova nga Diyos, ang halas mao ang labing mabinantayon. Busa miingon kini sa babaye: “Tinuod ba nga miingon ang Diyos nga dili mo angayng mokaon sa bunga sa tanang kahoy sa tanaman?” 2 Ang babaye miingon sa halas: “Makakaon mi sa bunga sa mga kahoy sa tanaman. 3 Apan bahin sa kahoy nga naa sa tunga sa tanaman, ang Diyos nag-ingon: ‘Ayaw gayod ninyog kan-a o hikapa ang bunga niini, kay kon himoon ninyo kini, kamo mamatay.’” 4 Ang halas miingon sa babaye: “Dili tinuod nga mamatay mo. 5 Kay nahibalo ang Diyos nga sa mismong adlaw nga mokaon mo sa bunga niini, ang inyong mga mata mabuka ug maparehas mo sa Diyos, nga mahibalo sa maayo ug daotan.”

w17.02 5 ¶9

Matuman Gayod ang Katuyoan ni Jehova!

9 Si Satanas nga Yawa migamit ug halas sa paglimbong kang Eva aron supakon ang iyang Amahan, si Jehova. (Basaha ang Genesis 3:1-5; Pin. 12:9) Gipatungha ni Satanas ang isyu nga ang tawhanong mga anak sa Diyos wala tugoting mokaon “gikan sa tanang kahoy sa tanaman.” Sama rag siya miingon: ‘Dili diay mo makahimo kon unsay inyong gusto?’ Dayon, misulti siyag klarong bakak: “Dili gayod kamo mamatay.” Unya, iyang gikombinsir si Eva nga dili kini angayng maminaw sa Diyos: “Nasayod ang Diyos nga sa mismong adlaw nga kamo mokaon gikan niini ang inyong mga mata mangabuka.” Miingon si Satanas nga dili ipakaon ni Jehova ang bunga sa kahoy kay makahatag kini kanilag espesyal nga kahibalo. Dugang pa, si Satanas mihimog bakak nga saad: “Kamo mahisama sa Diyos, nga mahibalo sa maayo ug sa daotan.”

(Genesis 3:6) Niana nakita sa babaye nga ang bunga sa kahoy maayong kaonon ug tilinguhaon kaayo, oo, lami tan-awon. Busa siya mikuhag bunga niini ug mikaon. Dihang kauban na niya ang iyang bana, iya kining gihatagan ug mikaon sab kini.

w00 11/15 25-26

Makakat-on Kita Gikan sa Unang Tawhanong Magtiayon

Ang sala ba ni Eva dili malikayan? Malikayan gayod! Ibutang ang imong kaugalingon sa iyang dapit. Ang pangangkon sa bitin bug-os nga nagtuis sa kon unsay giingon sa Diyos ug ni Adan. Unsay imong bation sa dihang ang usa nga imong gihigugma ug gisaligan pasanginlan sa usa ka estranyo sa pagkadili-matinud-anon? Lahi gayod unta ang pagsanong ni Eva, nga magpasundayag sa kayugot ug kalagot, bisan gani sa pagsalikway sa pagpaminaw. Kon buot hunahunaon, kinsa ba ang bitin aron mokuwestiyon sa pagkamatarong sa Diyos ug sa pulong sa iyang bana? Tungod sa pagtahod sa prinsipyo sa pagkaulo, angay untang magpakitambag si Eva sa dili pa mohimog bisan unsang desisyon. Kinahanglang buhaton nato ang ingon kon ugaling tanyagan kita ug impormasyon nga supak sa hinatag-sa-Diyos nga mga instruksiyon. Apan, misalig si Eva sa mga pulong sa Manenental, nga nagtinguha nga mahimong iyang kaugalingong maghuhukom kon unsay matarong ug daotan. Sa sigeng paghunahuna niya sa ideya, dugang ug dugang nga nagkamadanihon kini alang kaniya. Pagkadakong sayop ang iyang nahimo pinaagi sa pag-abiabi sa sayop nga mga tinguha, inay kay wagtangon kana gikan sa iyang hunahuna o hisgotan ang mga butang uban sa iyang ulo sa pamilya!​—1 Corinto 11:3; Santiago 1:14, 15.

Si Adan Naminaw sa Tingog sa Iyang Asawa

Wala madugay gihaylo ni Eva si Adan sa pagduyog kaniya sa sala. Unsaon nato pagpatin-aw ang iyang huyang nga pag-uyon? (Genesis 3:6, 17) Giatubang ni Adan ang pakigbisog sa hunahuna bahin sa pagkamaunongon. Sugton ba niya ang iyang Maglalalang, kinsa mihatag kaniya sa tanang butang, lakip sa iyang hinigugmang kapikas, si Eva? Tinguhaon ba ni Adan ang pagtultol sa Diyos kon unsay iyang buhaton karon? O ang lalaki ba mohukom sa pagduyog sa iyang asawa sa pagpakasala? Nahibalo gayod si Adan nga ang gilaoman ni Eva nga mabatonan pinaagi sa pagkaon sa gidiling bunga maoy hinanduraw lamang. Si apostol Pablo gidasig sa pagsulat: “Si Adan wala malimbongi, apan ang babaye bug-os nalimbongan ug nahimong malinapason.” (1 Timoteo 2:14) Busa si Adan sa tinuyo mipili sa pagsalikway kang Jehova. Ang iyang kahadlok nga mahimulag sa iyang asawa dayag nga mas dako kay sa iyang pagtuo sa katakos sa Diyos sa pagtul-id sa kahimtang.

(Genesis 3:15-19) Ug akong ibutang ang panag-away tali kanimo ug sa babaye ug tali sa imong kaliwat ug sa iyang kaliwat. Dugmokon niya ang imong ulo, ug samaran nimo siya sa tikod.” 16 Sa babaye, siya miingon: “Dugangan gayod nako ang kasakit sa imong pagmabdos; sa kasakit ikaw manganak ug mga anak, ug mangandoy ka kanunay sa imong bana, ug siya magdominar kanimo.” 17 Kang Adan, siya miingon: “Kay namati ka sa imong asawa ug mikaon ka sa bunga sa kahoy nga bahin niini ako nagsugo kanimo, ‘Ayaw gayod ug kaon sa bunga niini,’ tinunglo ang yuta tungod kanimo. Sa tibuok nimong kinabuhi, maghago ka pag-ayo aron makakaon sa abot niini. 18 Tuboan kinig mga sampinit ug mga kudyapa, ug ikaw magakaon sa tanom sa kapatagan. 19 Panington ka sa kahago una ka makabaton ug pagkaon hangtod nga ikaw mobalik sa yuta, kay gikan ka sa yuta. Kay abog ka ug sa abog ka mobalik.”

w12 9/1 4 ¶2

Nahingawa ba ang Diyos sa mga Babaye?

Gitunglo ba sa Diyos ang mga babaye?

Wala. Hinunoa, “ang orihinal nga halas, ang usa nga gitawag Yawa,” mao ang ‘gitunglo’ sa Diyos. (Pinadayag 12:9; Genesis 3:14) Sa pag-ingon sa Diyos nga si Adan “magagahom” sa iyang asawa, wala niya ipakita nga iyang giuyonan nga uliponon sa lalaki ang babaye. (Genesis 3:16) Iya lang gitagna ang makapasubong resulta sa sala diha sa unang magtiayon.

w04 1/1 29 ¶2

Mga Haylayt Gikan sa Basahon sa Genesis—I

3:17—Sa unsang paagi tinunglo ang yuta, ug unsa ka dugay? Ang tunglo nga gipahayag sa yuta nagkahulogan nga ang pagtikad niana mahimong malisod na kaayo karon. Ang mga epekto sa tinunglo nga yuta, uban sa mga sampinit ug mga kudyapa niini, nabatyagan pag-ayo sa mga kaliwat ni Adan nga ang amahan ni Noe nga si Lamek naghisgot “sa kasakit sa atong mga kamot gumikan sa yuta nga gitunglo ni Jehova.” (Genesis 5:29) Human sa Lunop, gipanalanginan ni Jehova si Noe ug ang iyang mga anak nga lalaki, nga nagpahayag sa Iyang katuyoan nga ilang pun-on ang yuta. (Genesis 9:1) Ang tunglo sa Diyos sa yuta dayag nga gitangtang na.​—Genesis 13:10.

it-2 7

Kasakit sa Pagbati

Ang kasakit nga bation sa pagpanganak. Human makasala ang unang babaye nga si Eva, gipahayag sa Diyos ngadto kaniya kon unsa unya ang sangpotanan niini sa pagpanganak. Kon siya nagpabilin pa nga masinugtanon, ang panalangin sa Diyos magpadayon unta kaniya ug ang pagpanganak mahimo untang lunlon kalipay, kay, “ang panalangin ni Jehova​—mao kana ang makapadato, ug dili niya kana dugangan ug kasakit.” (Pr 10:22) Apan karon, sa kasagaran, ang dili-hingpit nga pag-obra sa lawas magpatunghag kasakit. Busa, ang Diyos nag-ingon (sanglit sagad nga ang mga butang nga iyang gitugotan giingon nga iyang gibuhat): “Dugangan ko pag-ayo ang kasakit sa imong pagmabdos; sa mga kaul-ol sa pagpanganak ikaw manganak ug mga anak.”​—Gen 3:16.

Pagpangitag Espirituwal nga Bahandi

(Genesis 4:23, 24) Si Lamek miingon sa iyang mga asawa nga si Ada ug Zila: “Pamati sa akong tingog, kamong mga asawa ni Lamek; Paminaw sa akong mga pulong: Nakapatay kog tawo kay iya kong gisamaran, Oo, usa ka batan-ong lalaki kay iya kong gibunalan. 24 Kon 7 ka beses panimaslan ang mopatay kang Cain, Nan 77 ka beses panimaslan ang mopatay kang Lamek.”

it-2 135 ¶2

Lamek

Ang balak nga gitagik ni Lamek alang sa iyang mga asawa (Gen 4:23, 24) nagpakita sa mapintas nga espiritu niadtong adlawa. Ang balak ni Lamek nag-ingon: “Patalinghogi ang akong tingog, kamong mga asawa ni Lamek; paminawa ang akong pulong: Usa ka tawo ang akong gipatay tungod sa pagsamad kanako, oo, usa ka batan-ong lalaki tungod sa paghampak kanako. Kon pito ka pilo si Cain panimaslan, nan si Lamek kapitoan ka pilo ug pito.” Dinhi dayag nga si Lamek nagpahayag ug usa ka kaso sa pagdepensa sa kaugalingon, nangatarongan nga ang iyang gihimo maoy dili-tinuyo nga pagbuno, sama sa gihimo ni Cain. Nangangkon si Lamek nga, sa pagdepensa sa iyang kaugalingon, iyang napatay ang tawo nga naghampak ug nagsamad kaniya. Busa, ang iyang balak maoy usa ka hangyo aron siya mahigawas batok niadtong nagtinguha sa pagpanimalos kaniya tungod sa iyang pagpatay sa miatake kaniya.

(Genesis 4:26) Si Set nakabaton sab ug anak nga lalaki, ug ginganlan kinig Enos. Nianang panahona ang katawhan nagsugod sa pagtawag sa ngalan ni Jehova.

it-2 858 ¶10

Pasipala

Ang “pagtawag sa ngalan ni Jehova” nga nagsugod sa panahon ni Enos sa yugto sa wala pa ang Lunop lagmit nga dili subay sa matul-id ug tukmang paagi, kay walay duhaduha nga si Abel una pa niana dugay nang nagtawag sa Diyos pinaagi sa Iyang ngalan. (Gen 4:26; Heb 11:4) Kon, sama sa gituohan sa ubang mga eskolar, kini nga pagtawag sa ngalan sa Diyos nagpasabot sa dili-hustong paggamit niini ug sa dili-tukmang pagpadapat sa ngalan ni Jehova nganha sa mga tawo o sa idolatrosong mga butang, nan kini mahimong usa ka mapasipalahong buhat.​—Tan-awa ang ENOS.

Pagbasa sa Bibliya

(Genesis 4:17–5:8) Human niadto, si Cain nakigdulog sa iyang asawa, ug kini namabdos ug nanganak kang Enoc. Dayon si Cain nagtukod ug siyudad ug ginganlan kinig Enoc, base sa ngalan sa iyang anak. 18 Sa ulahi, natawo ang anak ni Enoc nga si Irad. Si Irad ang amahan ni Mehujael, si Mehujael ang amahan ni Metusael, ug si Metusael ang amahan ni Lamek. 19 Si Lamek nagkuhag duha ka asawa. Ang ngalan sa una mao si Ada, ug ang ikaduha mao si Zila. 20 Si Ada nanganak kang Jabal. Si Jabal ang unang nagpuyo sa mga tolda ug nagbuhig mga hayop. 21 Ang ngalan sa iyang igsoong lalaki mao si Jubal. Siya ang unang naggamit ug alpa ug plawta. 22 Si Zila nanganak sab kang Tubal-cain, ang tighimog lainlaing matang sa himan nga tumbaga ug puthaw. Ug ang igsoong babaye ni Tubal-cain mao si Naama. 23 Si Lamek miingon sa iyang mga asawa nga si Ada ug Zila: “Pamati sa akong tingog, kamong mga asawa ni Lamek; Paminaw sa akong mga pulong: Nakapatay kog tawo kay iya kong gisamaran, Oo, usa ka batan-ong lalaki kay iya kong gibunalan. 24 Kon 7 ka beses panimaslan ang mopatay kang Cain, Nan 77 ka beses panimaslan ang mopatay kang Lamek.” 25 Si Adan nakigdulog pag-usab sa iyang asawa, ug nanganak kinig lalaki. Ginganlan siya ni Eva ug Set, kay matod pa niya: “Gihatagan ko sa Diyos ug laing anak puli kang Abel, kay gipatay siya ni Cain.” 26 Si Set nakabaton sab ug anak nga lalaki, ug ginganlan kinig Enos. Nianang panahona ang katawhan nagsugod sa pagtawag sa ngalan ni Jehova.

5 Kini ang rekord sa mga kaliwat ni Adan. Sa adlaw nga gibuhat sa Diyos si Adan, iya siyang gibuhat nga kaamgid niya. 2 Iyang gilalang ang lalaki ug babaye. Sa adlaw nga sila gibuhat, iyang gipanalanginan sila ug gitawag nga Tawo. 3 Pag-edad ni Adan ug 130, siya nakabaton ug anak nga lalaki nga liwat niya, ug iyang ginganlan siyag Set. 4 Human matawo si Set, si Adan nabuhi pag 800 ka tuig. Ug siya nakabaton ug mga anak nga lalaki ug babaye. 5 Busa si Adan nabuhi ug 930 ka tuig, ug siya namatay. 6 Pag-edad ni Set ug 105, natawo ang iyang anak nga si Enos. 7 Human matawo si Enos, si Set nabuhi pag 807 ka tuig. Ug siya nakabaton ug mga anak nga lalaki ug babaye. 8 Busa si Set nabuhi ug 912 ka tuig, ug siya namatay.

Enero 20-26

BAHANDI GIKAN SA PULONG SA DIYOS | GENESIS 6-8

“Gisunod Gayod Niya kon Unsay Gisugo”

(Genesis 6:9) Kini ang kasaysayan ni Noe. Si Noe maoy matarong nga tawo. Kon itandi sa iyang mga katalirongan, walay ikasaway kaniya. Si Noe naglakaw uban sa matuod nga Diyos.

(Genesis 6:13) Human niana ang Diyos miingon kang Noe: “Nakahukom ko nga puohon ang tanang tawo, kay ang yuta napuno sa kapintasan tungod kanila. Busa laglagon nako sila uban sa yuta.

w18.02 4 ¶4

Sundoga ang Pagtuo ug Pagkamatinumanon ni Noe, Daniel, ug Job

4 Mga kalisdanan nga nasinati ni Noe. Panahon sa lolo sa tuhod ni Noe nga si Enoc, ang mga tawo daotan na kaayo. Misulti gani silag “makalilisang nga mga butang” batok kang Jehova. (Jud. 14, 15) Nagkagrabe ang kapintasan. Gani, sa adlaw ni Noe, “ang yuta napuno sa kapintasan.” Ang daotang mga anghel nagsul-ob ug lawas sa tawo, nangasawa, ug nanganak ug bayolenteng mga higante. (Gen. 6:2-4, 11, 12) Pero lahi kaayo si Noe. “Si Noe nakakaplag ug pabor sa mga mata ni Jehova. . . . Siya walay-ikasaway taliwala sa iyang mga katalirongan. Si Noe naglakaw uban sa matuod nga Diyos.”​—Gen. 6:8, 9.

(Genesis 6:14-16) Paghimog arka gamit ang kahoyng tagokon. Paghimog mga kuwarto sa arka ug buliti kinig alkitran sa sulod ug gawas. 15 Kini ang imong himoon: Ang arka kinahanglang 300 ka maniko ang gitas-on, 50 ka maniko ang gilapdon, ug 30 ka maniko ang gihabogon. 16 Maghimo kag bentana aron may kahayag sa arka, usa ka maniko gikan sa ibabaw. Butangig pultahan ang kilid sa arka, ug ang arka kinahanglang tulo ka andana.

w13 4/1 14 ¶1

Siya “Naglakaw Uban sa Matuod nga Diyos”

Ang buluhaton gidangtag mga dekada, tingali 40 ngadto sa 50 ka tuig. Kini naglakip sa pagpamutol ug kahoy, paghakot sa mga troso, ug paghimog mga sagbayan. Ang arka himoon nga may tulo ka andana, daghang lawak, ug may pultahan sa kilid. Dayag nga kini may mga bentana sa ibabaw, ug atop nga handag ug diyutay aron daling moagos ang ulan.​—Genesis 6:14-16.

(Genesis 6:22) Ug gibuhat ni Noe ang tanang gisugo sa Diyos kaniya. Gisunod gayod niya kon unsay gisugo.

w11 9/15 18 ¶13

Dagana nga Malahutayon ang Lumba

13 Sa unsang paagi nakalahutay ug milampos sa lumba ang maong mga alagad ni Jehova? Matikdi ang gisulat ni Pablo bahin kang Noe. (Basaha ang Hebreohanon 11:7.) Si Noe wala pa makakitag lunop nga naglaglag sa tanang tawo ug hayop. (Gen. 6:17) Kana wala pa sukad mahitabo. Apan wala kana isipa ni Noe nga imposible. Ngano? Kay siya may pagtuo nga kon unsay isulti ni Jehova, kana iyang tumanon. Si Noe wala mobati nga lisod kaayo ang gisugo ni Jehova kaniya. Hinunoa, “gibuhat niya ang ingon gayod.” (Gen. 6:22) Si Noe daghag buluhaton​—pagtukod sa arka, pagtigom sa mga hayop, pagpondog pagkaon para sa mga tawo ug hayop, pagpasidaan bahin sa Lunop, ug paglig-on sa espirituwalidad sa iyang pamilya. Dili gayod kadto sayon! Apan tungod sa pagtuo ug pagkamalahutayon ni Noe, siya ug ang iyang pamilya naluwas ug gipanalanginan.

Pagpangitag Espirituwal nga Bahandi

(Genesis 7:2) Pagdalag tinagpito sa matag matang sa hinlong mananap, laki ug baye; ug usa ka paris sa matag matang sa dili hinlong mananap, laki ug baye;

w04 1/1 29 ¶7

Mga Haylayt Gikan sa Basahon sa Genesis—I

7:2—Unsay gigamit nga pasikaranan sa paghimog kalainan tali sa mahinlo ug mahugaw nga mga mananap? Ang pasikaranan sa kalainan dayag nga nagtumong sa paggamit ug mga halad sa pagsimba ug wala magtumong sa kon unsay mahimong kaonon o dili. Ang mga tawo wala mokaon ug karne sa hayop sa wala pa ang Lunop. Ang mga terminong “hinlo” ug “mahugaw” alang sa pagkaon makita lamang diha sa Balaod ni Moises, ug ang maong mga pagdili natapos sa dihang giwagtang kini. (Buhat 10:9-16; Efeso 2:15) Dayag nga nahibalo si Noe kon unsay angayng ihalad diha sa pagsimba kang Jehova. Sa dihang mibiya siya sa arka, siya “nagtukod ug halaran kang Jehova ug nagkuhag pipila sa tanang mahinlo nga mananap ug sa tanang mahinlong naglupad nga mga linalang ug nagtanyag ug mga halad-nga-sinunog diha sa halaran.”​—Genesis 8:20.

(Genesis 7:11) Sa ika-600 nga tuig sa kinabuhi ni Noe, sa ika-17 nga adlaw sa ikaduhang bulan, mibuhagay ang tanang tubig sa langit ug nabuksan ang mga ganghaan sa tubig sa langit.

w04 1/1 30 ¶1

Mga Haylayt Gikan sa Basahon sa Genesis—I

7:11—Diin gikan ang tubig nga nagpahinabo sa tibuok-kalibotang Lunop? Sulod sa ikaduhang yugto sa paglalang, o “adlaw,” sa dihang gihimo ang “hawan” sa atmospera sa yuta, dihay mga tubig sa ‘ilalom sa hawan’ ug mga tubig sa ‘ibabaw sa hawan.’ (Genesis 1:6, 7) Ang mga tubig sa ‘ilalom’ mao kanang anaa na sa yuta. Ang mga tubig sa ‘ibabaw’ mao ang daghan kaayong kaumog nga anaa sa ibabaw sa yuta, nga nagporma ug usa ka “dakong halawom nga katubigan.” Kining mga tubiga mibuhagay sa yuta sa adlaw ni Noe.

Pagbasa sa Bibliya

(Genesis 6:1-16) Dihang midaghan ang mga tawo sa yuta ug nanganak silag mga babaye, 2 nakita sa mga anak sa matuod nga Diyos nga guwapa ang mga anak sa mga tawo. Busa ilang gipangasawa ang tanan nilang nagustohan. 3 Unya si Jehova miingon: “Dili ko magpailob sa mga tawo hangtod sa hangtod, kay sila makasasala. Gikan karon 120 ka tuig na lang silang mabuhi.” 4 Niadtong panahona ug sa misunod nga mga tuig, naay mga Nepilim sa yuta. Kay kaniadto ang mga anak sa matuod nga Diyos nakigdulog sa mga anak nga babaye sa mga tawo, ug nanganak silag mga lalaki. Sila ang kusgan kaayo kaniadto, ang bantogang mga lalaki. 5 Nakita ni Jehova nga grabe na ang pagkadaotan sa mga tawo sa yuta ug daotan kanunay ang naa sa ilang hunahuna ug kasingkasing. 6 Nagbasol si Jehova nga iyang gihimo ang mga tawo sa yuta, ug naguol ang iyang kasingkasing. 7 Busa si Jehova miingon: “Akong paphaon sa yuta ang mga tawo nga akong gibuhat, apil ang binuhing mga hayop, nagakamang nga mga mananap, ug nagalupad nga mga mananap sa kalangitan, kay nagbasol ko nga gihimo nako sila.” 8 Apan si Noe nakabaton sa pag-uyon ni Jehova. 9 Kini ang kasaysayan ni Noe. Si Noe maoy matarong nga tawo. Kon itandi sa iyang mga katalirongan, walay ikasaway kaniya. Si Noe naglakaw uban sa matuod nga Diyos. 10 Paglabay sa panahon, si Noe nakabaton ug tulo ka anak nga lalaki, si Sem, Ham, ug Japet. 11 Apan sa panan-aw sa matuod nga Diyos ang yuta nadaot, ug napuno kini sa kapintasan. 12 Oo, nakita sa Diyos nga nadaot ang yuta; ang tanang tawo sa yuta daotan kaayo. 13 Human niana ang Diyos miingon kang Noe: “Nakahukom ko nga puohon ang tanang tawo, kay ang yuta napuno sa kapintasan tungod kanila. Busa laglagon nako sila uban sa yuta. 14 Paghimog arka gamit ang kahoyng tagokon. Paghimog mga kuwarto sa arka ug buliti kinig alkitran sa sulod ug gawas. 15 Kini ang imong himoon: Ang arka kinahanglang 300 ka maniko ang gitas-on, 50 ka maniko ang gilapdon, ug 30 ka maniko ang gihabogon. 16 Maghimo kag bentana aron may kahayag sa arka, usa ka maniko gikan sa ibabaw. Butangig pultahan ang kilid sa arka, ug ang arka kinahanglang tulo ka andana.

Enero 27–Pebrero 2

BAHANDI GIKAN SA PULONG SA DIYOS | GENESIS 9-11

“Ang Tibuok Yuta May Usa Lang ka Pinulongan”

(Genesis 11:1-4) Karon ang tibuok yuta may usa lang ka pinulongan ug sinultihan. 2 Samtang nagpanaw sila pasidlakan, nakakita silag patag nga lugar sa Sinar, ug didto sila mipuyo. 3 Ug sila miingon sa usag usa: “Dali! Maghimo tag mga tisa ug lutoon nato kini sa kalayo aron mogahi.” Busa migamit silag tisa imbes bato, ug aspalto ingong pangtapot. 4 Dayon sila miingon: “Magtukod tag atong siyudad nga ang torre sangko sa langit, aron kita mainila ug dili magkatibulaag sa tibuok yuta.”

it-1 521-522

Dakong Babilonya

Mga Kinaiyahan sa Karaang Babilonya. Ang pagpundar sa siyudad sa Babilonya didto sa Kapatagan sa Sinar maoy dungan sa pagsulay sa pagtukod sa Torre sa Babel. (Gen 11:2-9) Ang popular nga kawsa sa pagtukod sa torre ug sa siyudad mao ang ‘paghimog bantog nga ngalan’ alang sa mga magtutukod niini, dili ang pagbayaw sa ngalan sa Diyos. Ang mga torre nga ziggurat, o pormag piramide nga mga torre, nga nadiskobrehan dili lamang sa mga kagun-oban sa karaang Babilonya kondili sa ubang dapit usab sa Mesopotamia mopatim-awng magpamatuod sa relihiyoso kaayong kinaiyahan sa orihinal nga torre, bisan unsa pay porma o estilo niini. Ang tinong aksiyon nga gihimo ni Jehova nga Diyos sa pagpahunong sa pagtukod sa templo tin-awng nagkondenar niini ingong naggikan sa bakak nga relihiyon. Bisan tuod ang Hebreohanong ngalan nga gihatag sa siyudad, ang Babel, nagkahulogang “Kalibog,” ang Sumerianhong ngalan (Ka-dingir-ra) ug ang Akadianhong ngalan (Bab-ilu) parehong nagkahulogang “Ganghaan sa Diyos.” Busa ang nahibiling mga molupyo sa siyudad nag-usab sa porma sa ngalan niini aron sa paglikay sa orihinal nga kahulogan niini ingong hinukman, apan ang bag-o o gihulip nga ngalan nagpaila gihapon sa siyudad sa pagkalangkit niini sa relihiyon.

it-2 908 ¶5

Pinulongan

Ang asoy sa Genesis naghubit sa paghiusa sa pipila ka bahin sa tawhanong banay human sa Lunop diha sa usa ka proyekto nga supak sa kabubut-on sa Diyos ingon sa gipahayag ngadto kang Noe ug sa iyang mga anak. (Gen 9:1) Inay nga mokaylap ug ‘pun-on ang yuta,’ sila determinado sa paghiusa sa tawhanong katilingban, nga maghugop sa pagpuyo diha sa usa ka dapit nga sa ulahi nailhan ingong Kapatagan sa Sinar sa Mesopotamia. Dayag nga kini usab mahimong usa ka relihiyosong sentro, nga may usa ka relihiyosong torre.​—Gen 11:2-4.

(Genesis 11:6-8) Unya si Jehova miingon: “Kini nga katawhan nagkahiusa sa pagbuhat niini kay usa lang ang ilang pinulongan. Mahimo nila ang bisan unsa nga gusto nilang buhaton. 7 Manaog ta ug atong libogon ang ilang pinulongan aron dili na sila magkasinabot.” 8 Busa gikan didto gipatibulaag sila ni Jehova sa tibuok yuta, ug anam-anam nilang gibiyaan ang pagtukod sa siyudad.

it-2 908-909 ¶6

Pinulongan

Gisanta sa Labing Gamhanang Diyos ang ilang mapangahasong proyekto pinaagi sa pagbungkag sa ilang hiniusang lihok, nga naghimo niini pinaagi sa paglahugay sa ilang komon nga pinulongan. Kini nagpakyas sa bisan unsang hiniusang buluhaton bahin sa ilang proyekto ug misangpot sa ilang pagkatibulaag ngadto sa tanang bahin sa kalibotan. Ang paglahugay sa ilang pinulongan makababag o makapahinay usab sa ilang umaabot nga pag-uswag diha sa sayop nga direksiyon, usa ka direksiyon nga batok sa Diyos, sanglit kini maglimite sa katakos sa katawhan sa pagkombinar sa ilang intelektuwal ug pisikal nga mga gahom alang sa ambisyosong mga laraw ug magpalisod usab kanila sa paggamit sa natigom nga kahibalo sa lainlaing mga grupo sa pinulongan nga naporma​—kahibalo nga dili gikan sa Diyos kondili nabatonan tungod sa tawhanong kasinatian ug pagpanukiduki. (Itandi ang Ecc 7:29; Deu 32:5.) Busa, bisan tuod kini nagpahinabog dakong panagkabahin sa tawhanong katilingban, ang paglahugay sa tawhanong pinulongan sa pagkatinuod nakahatag ug kaayohan sa tawhanong katilingban nga mababagan ang pagkab-ot sa peligroso ug makadaot nga mga tumong. (Gen 11:5-9; itandi ang Isa 8:9, 10.) Kon hunahunaon sa usa ang pipila ka kaugmaran sa atong kapanahonan mismo, tungod sa natigom nga sekular nga kahibalo ug sa sayop nga paggamit sa tawo niini, siya makaamgo gayod kon unsay nakita nang daan sa Diyos dugay na kanhi nga mahitabo kon ang paningkamot didto sa Babel gitugotang magpadayon.

(Genesis 11:9) Mao nga gitawag kinig Babel, kay didto gilibog ni Jehova ang pinulongan sa tibuok yuta, ug gikan didto gipatibulaag sila ni Jehova sa tibuok yuta.

it-2 433

Nasod

Nagkabulag na nianang higayona tungod kay wala na magkasinabot, ang matag grupo sa pinulongan nakaugmad ug kaugalingong kultura, arte, mga kostumbre, kinaiya, ug relihiyon​—ang tagsatagsa may kaugalingong mga paagi sa pagbuhat sa mga butang. (Lev 18:3) Kay nahimulag na gikan sa Diyos, ang lainlaing mga katawhan nagmugna ug daghang idolo sa ilang tinumotumong mga bathala.​—Deu 12:30; 2Ha 17:29, 33.

Pagpangitag Espirituwal nga Bahandi

(Genesis 9:20-22) Karon si Noe nanguma ug nananom ug mga ubas. 21 Dihang miinom siyag bino, siya nahubog ug naghubo sulod sa iyang tolda. 22 Nakita ni Ham, nga amahan ni Canaan, ang kahubo sa iyang amahan ug gisulti niya kini sa iyang duha ka igsoon didto sa gawas.

(Genesis 9:24, 25) Dihang nakamata ug nahuwasan na si Noe sa iyang kahubog ug nahibaloan niya ang gibuhat kaniya sa iyang kamanghorang anak, 25 siya miingon: “Matinunglo si Canaan. Mahimo siyang kinaubsang ulipon sa iyang mga igsoon.”

it-1 971 ¶5

Ham

Malagmit nga si Canaan mismo ang direktang nalangkit sa maong panghitabo apan ang iyang amahan nga si Ham napakyas sa pagtul-id kaniya. O si Noe, nga matagnaong namulong ubos sa pagdasig sa Diyos, nakakita nang daan nga ang daotang kiling ni Ham, nga tingali mitumaw na diha sa iyang anak nga si Canaan, mapanunod sa mga kaliwat ni Canaan. Ang tunglo sa bahin natuman sa dihang ang mga Canaanhon gisakop sa Semitikanhong mga Israelinhon. Kadtong wala malaglag (pananglitan, ang mga Gabaonhon [Jos 9]) nahimong mga ulipon sa Israel. Kasiglohan sa ulahi, ang tunglo dugang pang natuman sa dihang ang mga kaliwat sa anak ni Ham nga si Canaan nailalom sa pagmando sa Japetikanhong mga gahom sa kalibotan, ang Medo-Persia, Gresya, ug Roma.

(Genesis 10:9, 10) Siya nahimong banggiitang mangangayam nga supak kang Jehova. Mao nga dunay ekspresyon: “Sama siya kang Nimrod, usa ka banggiitang mangangayam nga supak kang Jehova.” 10 Ang iyang gingharian nagsugod sa Babel, Erek, Acad, ug Calne, sa yuta sa Sinar.

it-2 469

Nimrod

Ang sinugdanan sa gingharian ni Nimrod naglakip sa mga siyudad sa Babel, Erek, Acad, ug Calne, ang tanan diha sa yuta sa Sinar. (Gen 10:10) Busa lagmit nga ubos sa iyang pagdumala nga ang pagtukod sa Babel ug sa torre niini nagsugod. Kini nga panghinapos uyon usab sa tradisyonal nga Hudiyohanong opinyon. Misulat si Josephus: “Sa ngadtongadto gihimo [ni Nimrod] ang mga kalihokan sa estado nga usa ka pagpanglupig, nga naghunahunang ang bugtong paagi nga mawala diha sa mga tawo ang pagkahadlok sa Diyos mao ang paghimo kanila nga padayong magasalig sa iyang kaugalingong gahom. Siya nanghulga nga siya manimalos sa Diyos kon Iyang palunopan pag-usab ang yuta; kay siya magtukod ug usa ka torre nga ang gitas-on dili masanapan sa tubig ug manimalos sa kalaglagan sa ilang mga katigulangan. Ang mga tawo maikagon sa pagsunod sa laraw ni [Nimrod], nga giisip nga pagpaulipon ang pagpasakop sa Diyos; busa ilang gisugdan ang pagtukod sa torre . . . ug kini daling natukod nga labaw pa sa gidahom.”​—Jewish Antiquities, I, 114, 115 (iv, 2, 3).

Pagbasa sa Bibliya

(Genesis 10:6-32) Ang mga anak nga lalaki ni Ham mao si Cus, Mizraim, Put, ug Canaan. 7 Ang mga anak nga lalaki ni Cus mao si Seba, Havila, Sabta, Raama, ug Sabteca. Ang mga anak nga lalaki ni Raama mao si Sheba ug Dedan. 8 Si Cus ang amahan ni Nimrod. Si Nimrod mao ang unang gamhanang tawo sa yuta. 9 Siya nahimong banggiitang mangangayam nga supak kang Jehova. Mao nga dunay ekspresyon: “Sama siya kang Nimrod, usa ka banggiitang mangangayam nga supak kang Jehova.” 10 Ang iyang gingharian nagsugod sa Babel, Erek, Acad, ug Calne, sa yuta sa Sinar. 11 Gikan nianang yutaa, siya miadto sa Asirya ug gitukod ang Nineve, Rehobot-Ir, Cala, 12 ug Resen, taliwala sa Nineve ug Cala: Mao kini ang bantogang siyudad. 13 Si Mizraim ang amahan ni Ludim, Anamim, Lehabim, Naptuhim, 14 Patrusim, Casluhim (nga maoy gigikanan sa mga Filistehanon), ug Captorim. 15 Si Canaan ang amahan ni Sidon, nga iyang panganay, ug ni Het, 16 ingon man sa mga Jebusihanon, Amorihanon, Girgasihanon, 17 Hivihanon, Arkihanon, Sinihanon, 18 Arvadnon, Zemarihanon, ug Hamatihanon. Sa ulahi, ang mga pamilya sa mga Canaanhon mikaylap sa ubang dapit. 19 Busa ang utlanan sa mga Canaanhon maoy gikan sa Sidon hangtod sa Gerar, duol sa Gaza, ug hangtod sa Sodoma, Gomora, Adma, ug Zeboiim, duol sa Lasa. 20 Mao kini ang mga kaliwat ni Ham sumala sa ilang banay, pinulongan, yuta nga gipuy-an, ug nasod. 21 Si Sem nakabaton sab ug mga anak. Siya ang katigulangan sa tanang anak ni Eber ug ang igsoon ni Japet nga kamagulangan. 22 Ang mga anak nga lalaki ni Sem mao si Elam, Asur, Arpaksad, Lud, ug Aram. 23 Ang mga anak nga lalaki ni Aram mao si Uz, Hul, Geter, ug Mas. 24 Si Arpaksad ang amahan ni Sela, ug si Sela ang amahan ni Eber. 25 Si Eber may duha ka anak nga lalaki. Ang ngalan sa usa mao si Peleg, kay sa iyang panahon ang yuta nabahin. Ang ngalan sa iyang igsoon mao si Joktan. 26 Si Joktan ang amahan ni Almodad, Selep, Hazarmavet, Jera, 27 Hadoram, Uzal, Dikla, 28 Obal, Abimael, Sheba, 29 Opir, Havila, ug Jobab. Silang tanan ang mga anak nga lalaki ni Joktan. 30 Ang lugar nga ilang gipuy-an maoy gikan sa Mesa hangtod sa Separ, ang kabukiran sa Sidlakan. 31 Mao kini ang mga kaliwat ni Sem sumala sa ilang banay, pinulongan, yuta nga gipuy-an, ug nasod. 32 Kini sila ang mga kaliwat sa mga anak ni Noe, sumala sa ilang banay ug nasod. Gikan kanila ang mga nasod nga mikaylap sa yuta human sa Lunop.

    Cebuano Publications (1983-2025)
    Log Out
    Log In
    • Cebuano
    • Ipasa
    • Setting
    • Copyright © 2025 Watch Tower Bible and Tract Society of Pennsylvania
    • Kondisyones sa Paggamit
    • Polisa sa Pribasiya
    • Mga Setting sa Pribasiya
    • JW.ORG
    • Log In
    Ipasa