Reperensiya Para sa Workbook sa Tigom nga Kinabuhi ug Ministeryo
Nobyembre 2-8
BAHANDI GIKAN SA PULONG SA DIYOS | EXODO 39-40
“Gisunod Gayod ni Moises ang Instruksiyon”
(Exodo 39:32) Busa nahuman ang tanang buluhaton para sa tabernakulo, ang tolda nga tagboanan, ug gibuhat sa mga Israelinhon ang tanang gisugo ni Jehova kang Moises. Gisunod gayod nila kon unsay gisugo.
Nailhan Ka ba ni Jehova?
13 Sa kasukwahi, si Moises “mao ang labing maaghop sa tanang tawo sa ibabaw sa nawong sa yuta.” (Num. 12:3) Gipakita niya ang iyang kaaghop ug kamapaubsanon pinaagi sa pagsunod sa instruksiyon ni Jehova. (Ex. 7:6; 40:16) Walay rekord nga si Moises kanunayng nagsupak sa kahikayan ni Jehova o napikal sa pagsunod sa Iyang mga sugo. Pananglitan, si Jehova mihatag ug detalyadong mga sugo bahin sa pagtukod sa tabernakulo, sama sa kolor sa hilo ug sa gidaghanon sa galong nga gamiton sa paggamag tabil sa tolda. (Ex. 26:1-6) Kon ang usa ka magtatan-aw sa organisasyon sa Diyos mohatag kanimog detalyado kaayong mga instruksiyon, tingali mapikal ka usahay. Apan si Jehova maoy hingpit nga magtatan-aw, nga nagdelegar sa mga buluhaton ug nagsalig sa iyang mga alagad. Dihang mohatag siyag daghang detalye, kana adunay maayong rason. Matikdi nga si Moises wala mapikal kang Jehova tungod sa paghatag ug detalyadong mga instruksiyon, nga samag si Jehova nakamenos kaniya o naghikaw sa iyang kamamugnaon o kagawasan. Hinuon, gitino ni Moises nga gisunod gayod sa mga trabahante ang mga instruksiyon sa Diyos. (Ex. 39:32) Pagkamapaubsanon ni Moises! Iyang giila nga ang buluhaton iya ni Jehova ug nga gigamit lang siya sa pagtapos niana.
(Exodo 39:43) Dihang gitan-aw ni Moises ang tanan nilang gihimo, nakita niya nga gibuhat gyod nila kini sumala sa gisugo ni Jehova; ug gipanalanginan sila ni Moises.
(Exodo 40:1, 2) Unya si Jehova miingon kang Moises: 2 “Sa unang adlaw sa unang bulan, imong ipatindog ang tabernakulo, ang tolda nga tagboanan.
(Exodo 40:16) Gibuhat ni Moises ang tanang gisugo ni Jehova kaniya. Gisunod gayod niya kon unsay gisugo.
Kasaligan Ka ba sa Tanang Butang?
3 “Si Moises ingon nga alagad nagmatinumanon [o, kasaligan],” nag-ingon ang Hebreohanon 3:5. Unsay nakapahimo kang manalagnang Moises nga kasaligan? Sa pagtukod ug pagpahimutang sa tabernakulo, “gibuhat ni Moises ang sumala sa tanan nga gisugo ni Jehova kaniya. Siya nagbuhat sa ingon gayod.” (Exodo 40:16) Ingong mga magsisimba ni Jehova, mapakita nato ang pagkakasaligan pinaagi sa masinugtanong pag-alagad kaniya. Tinong naglakip kini sa atong pagpabiling maunongon kang Jehova samtang nag-atubang ug malisod o grabeng mga pagsulay. Apan, ang kalamposan sa pagsagubang sa dagkong mga pagsulay dili mao ang pangunang butang nga magtino sa atong pagkakasaligan. “Ang tawo nga kasaligan sa labing gamay kasaligan usab sa dako,” nag-ingon si Jesus, “ug ang tawo nga dili-matarong sa gamay dili-matarong usab sa dako.” (Lucas 16:10) Kinahanglang kasaligan gayod kita bisan sa daw gagmayng mga butang.
Pagpangitag Espirituwal nga Bahandi
(Exodo 39:34) ang tabon niini nga panit sa laking karnero nga gitinag pula, ang tabon niini nga panit sa poka, ang kortina para sa tabil;
Panit sa Poka
Kon sa Unsang Paagi Nabatonan sa mga Israelinhon. Kon ang taʹchash sa Bibliya nagtumong sa usa ka matang sa poka, nan ang pangutana motungha kon sa unsang paagi nabatonan sa mga Israelinhon ang mga panit sa poka. Bisan tuod ang mga poka sagad nga nalangkit sa mga rehiyon sa Artiko ug Antartika, ang ubang mga poka mopalabi sa mas mainit nga mga klima. Sa pagkakaron ang pipila ka poka nga monk nagpuyo gihapon sa usa ka bahin sa Dagat Mediteranyo, ingon man sa ubang mas mainit nga katubigan. Latas sa kasiglohan mikunhod pag-ayo ang gidaghanon sa mga poka tungod sa tawo, ug sa kapanahonan sa Bibliya kini nga mga hayop tingali daghan diha sa Mediteranyo ug sa Pulang Dagat. Niadto lang 1832 ang usa ka Iningles nga edisyon sa Dictionary of the Holy Bible ni Calmet (p. 139) nag-ingon: “Diha sa daghang gagmayng mga pulo sa Pulang dagat, palibot sa peninsula sa Sinai, makaplagan ang mga poka.”—Tan-awa usab ang The Tabernacle’s Typical Teaching, ni A. J. Pollock, London, p. 47.
(Exodo 40:34) Ug ang panganod mitabon sa tolda nga tagboanan, ug ang himaya ni Jehova mipuno sa tabernakulo.
Hinungdanon ba Kon Kinsay Makakita sa Imong Gibuhat?
Dihang nahuman ang tabernakulo, ang panganod “mitabon sa tolda nga tagboanan, ug ang himaya ni Jehova mipuno sa tabernakulo.” (Ex. 40:34) Tin-aw gayod kanang pamatuod sa pag-uyon ni Jehova! Unsa kahay gibati ni Bezalel ug Oholiab nianang higayona? Bisag wala ikulit ang ilang mga ngalan diha sa ilang mga hinimo, sila tinong mibatig katagbawan sa pagkahibalo nga gipanalanginan sa Diyos ang ilang paningkamot. (Prov. 10:22) Paglabay sa katuigan, seguradong nalipay sila nga ang ilang mga hinimo padayong gigamit sa pag-alagad kang Jehova. Dihang banhawon si Bezalel ug Oholiab sa bag-ong kalibotan, seguradong malipay sila sa pagkahibalo nga ang tabernakulo gigamit sa matuod nga pagsimba sulod sa mga 500 ka tuig!
Pagbasa sa Bibliya
(Exodo 39:1-21) Naghimo silag mga besti nga maayong pagkahablon para sa pag-alagad sa balaang dapit gamit ang asul nga hilo, purpura nga delana, ug hayag-pula nga hilo. Gihimo nila ang balaang mga besti ni Aaron, sumala sa gisugo ni Jehova kang Moises. 2 Gihimo niya ang epod gamit ang bulawan, asul nga hilo, purpura nga delana, hayag-pula nga hilo, ug maayong klase nga linubid nga lino. 3 Ilang gidukdok ang mga bulawan hangtod nahimo kining nigpis nga pligo, ug gitabastabas kini ni Bezalel nga samag hilo aron gamiton uban sa asul nga hilo, sa purpura nga delana, sa hayag-pula nga hilo, ug sa maayong klase nga lino, ug gibordahan kini. 4 Naghimo silag mga hapin sa abaga para sa epod ug gisumpay kini sa duha ka tumoy sa epod. 5 Ang hinablon nga bakos, nga gitaod sa epod aron mohugot kini, parehas ug materyales sa epod: bulawan, asul nga hilo, purpura nga delana, hayag-pula nga hilo, ug maayong klase nga linubid nga lino, sumala sa gisugo ni Jehova kang Moises. 6 Unya ilang gibutang ang mga batong onyx sa mga enggaste nga bulawan, ug gikulitan nila kinig ngalan sa mga anak ni Israel, parehas sa pagkulit ug selyo. 7 Gibutang kini ni Bezalel sa mga hapin sa abaga sa epod ingong pahinumdom para sa mga anak ni Israel, sumala sa gisugo ni Jehova kang Moises. 8 Dayon gihimo ni Bezalel ang tabon sa dughan nga gibordahan sab parehas sa epod. Hinimo kini sa bulawan, asul nga hilo, purpura nga delana, hayag-pula nga hilo, ug maayong klase nga linubid nga lino. 9 Kuwadrado kini kon pil-on. Gihimo nila ang tabon sa dughan nga, kon pil-on, tag-usa ka dangaw ang gitas-on ug ang gilapdon. 10 Gibutangan nila kinig upat ka laray sa mga bato. Sa unang laray: rubi, topasyo, ug esmeralda. 11 Sa ikaduhang laray: turquesa, sapiro, ug haspe. 12 Sa ikatulong laray: batong lesh’em, agata, ug amatista. 13 Ug sa ikaupat nga laray: krisolito, onyx, ug jade. Gibutang nila kini sa mga enggaste nga bulawan. 14 Ang mga bato mitugbang sa ngalan sa 12 ka anak nga lalaki ni Israel. Ang matag ngalan gikulit nga samag selyo, nga ang matag ngalan nagrepresentar sa usa sa 12 ka tribo. 15 Unya naghimo silag kadena nga purong bulawan palibot sa tabon sa dughan, nga samag linubid nga pisi. 16 Ug naghimo silag duha ka enggaste nga bulawan ug duha ka argolya nga bulawan, ug gitaod nila ang duha ka argolya diha sa duha ka kanto sa ibabawng bahin sa tabon sa dughan. 17 Human niana ilang gitaod ang tumoy sa duha ka pisi nga bulawan diha sa duha ka argolya sa mga kanto sa ibabawng bahin sa tabon sa dughan. 18 Dayon ilang gitaod ang pikas tumoy sa duha ka pisi diha sa duha ka enggaste nga naa sa mga hapin sa abaga, sa atubangan sa epod. 19 Unya naghimo silag duha ka argolya nga bulawan ug gitaod kini sa duha ka kanto sa tabon sa dughan sa sulod nga bahin, nga nag-atubang sa epod. 20 Dayon naghimo silag duha pa ka argolya nga bulawan ug gibutang kini atubangan sa epod, ubos sa duha ka hapin sa abaga, duol sa sinumpayan sa epod, ibabaw sa hinablon nga bakos sa epod. 21 Sa kataposan, gihigtan nilag asul nga higot ang tabon sa dughan, gikan sa mga argolya niini paingon sa mga argolya sa epod. Kini ang mopugong sa tabon sa dughan nga dili maglabyoglabyog diha sa gibutangan niini ibabaw sa hinablon nga bakos, sumala sa gisugo ni Jehova kang Moises.
Nobyembre 9-15
BAHANDI GIKAN SA PULONG SA DIYOS | LEVITICO 1-3
“Ang Katuyoan sa mga Halad”
(Levitico 1:3) “‘Kon magtanyag siyag baka ingong halad nga sinunog, kini kinahanglang laki ug himsog. Kinabubut-on niya kining itanyag kang Jehova sa entrada sa tolda nga tagboanan.
(Levitico 2:1) “‘Karon kon ang usa ka tawo magtanyag kang Jehova ug halad nga lugas, kinahanglang pino nga harina ang iyang ihalad, ug buboan niya kinig lana ug butangag kamangyan.
(Levitico 2:12) “‘Mahimo ninyo kining itanyag kang Jehova ingong halad gikan sa inyong mga unang bunga, apan dili kini angayng dalhon sa halaran ingong makapalipay nga kahumot.
it-1 940
Halad
Mga halad-nga-sinunog. Ang mga halad-nga-sinunog tibuok nga itanyag ngadto sa Diyos; walay bahin sa hayop ang ibilin sa magsisimba. (Itandi ang Huk 11:30, 31, 39, 40.) Kini nagsilbing pangamuyo ngadto kang Jehova nga dawaton ang halad-sa-sala nga usahay gilakip niini. Ingong usa ka “halad-nga-sinunog” gitugyan ni Jesu-Kristo ang iyang kaugalingon ingong hingpit, bug-os nga halad.
Halad
Mga halad-nga-lugas. Ang mga halad-nga-lugas gitanyag uban sa mga halad-sa-panag-ambit, mga halad-nga-sinunog, ug mga halad-sa-sala, ug usab ingong mga unang bunga; sa ubang mga panahon kini gilain sa pagtanyag. (Ex 29:40-42; Lev 23:10-13, 15-18; Num 15:8, 9, 22-24; 28:9, 10, 20, 26-28; kap 29) Kini gihimo agig pag-ila sa pagkamanggihatagon sa Diyos sa pagtagana ug mga panalangin ug kauswagan. Kini sagad nga butangan ug lana ug kamangyan. Ang mga halad-nga-lugas nga puwedeng itanyag mao ang pinong harina, sinangag nga lugas, o siningsing nga mga tinapay o nipis nga mga tinapay nga gihurno, giluto sa kalaha, o sa kawa. Ang pipila sa halad-nga-lugas ibutang diha sa halaran sa halad-nga-sinunog, ang uban kaonon sa mga saserdote, ug sa mga halad-sa-panag-ambit ang magsisimba makigbahin niini. (Lev 6:14-23; 7:11-13; Num 18:8-11) Walay usa sa mga halad-nga-lugas ang itanyag nga adunay lebadura o “dugos” (lagmit nagpunting sa anibal sa igos o sa duga sa mga prutas) nga makapaaslom niini.—Lev 2:1-16.
(Levitico 3:1) “‘Kon magtanyag siyag halad sa panag-ambit unya baka ang iyang ihalad, laki man o baye, kinahanglang himsog ang iyang itanyag kang Jehova.
Halad
Mga halad-sa-panag-ambit (o mga halad-sa-pakigdait). Ang mga halad-sa-panag-ambit nga dalawaton kang Jehova nagpaila sa pakigdait uban kaniya. Ang magsisimba ug ang iyang panimalay makigbahin (diha sa sawang sa tabernakulo; sumala sa tradisyon, ang mga balongbalong ipahimutang sa palibot sulod sa kortina nga naglibot sa sawang; diha sa templo, ang mga lawak-kan-anan itagana). Ang nagadumalang saserdote makadawat ug usa ka pahat, ug laing pahat usab ang madawat sa ubang mga saserdote nga nag-alagad. Si Jehova sa ingon nakadawat sa makapahimuot nga aso sa nasunog nga tambok. Ang dugo, nga naghawas sa kinabuhi, gihatag ngadto sa Diyos ingong iyaha. Busa ang mga saserdote, ang mga magsisimba, ug si Jehova daw nagsalo sa pagkaon, nga nagpasabot sa malinawong mga relasyon. Ang tawo nga makig-ambit samtang mahugaw (sa bisan unsang kahugawan nga gihisgotan diha sa Balaod) o mokaon sa unod human nga kini lapas na sa gitagal nga panahon (sa init nga klima kini mosugod na sa pagkadunot) pagaputlon gikan sa iyang katawhan. Iyang gihugawan o gipasipalahan ang pagkaon, tungod kay siya mahugaw o kaha mikaon ug mahugaw atubangan kang Jehova nga Diyos, nga nagpakitag kawalay pagtahod sa sagradong mga butang.—Lev 7:16-21; 19:5-8.
Pagpangitag Espirituwal nga Bahandi
(Levitico 2:13) “‘Timplahig asin ang tanang halad nga lugas nga imong itanyag; ug ayawg kalimot sa pagbutang ug asin diha sa imong halad nga lugas nga magpahinumdom kanimo sa pakigsaad sa Diyos. Butangig asin ang tanan nimong halad.
(Ezequiel 43:24) Itanyag nimo kini kang Jehova, ug sabwagan kini sa mga saserdote ug asin ug itanyag nila kini ingong tibuok halad nga sinunog kang Jehova.
Pangunang mga Punto Gikan sa Basahon sa Levitico
2:13—Nganong kinahanglang asinan ang “tanan nga halad”? Wala kini himoa aron sa pagpalami sa mga halad. Sa tibuok kalibotan, ang asin gigamit ingong preserbatibo. Ang mga halad lagmit nga asinan tungod kay ang asin naghawas sa pagkadili-madunot ug pagkadili-madaot.
(Levitico 3:17) “‘Kini nga lagda magpabilin hangtod sa panahong walay tino para sa inyong mga kaliwatan, sa tanang dapit diin kamo magpuyo: Ayawg kaon ug bisan unsang tambok o bisan unsang dugo.’”
it-2 1250
Tambok
Ang katarongan niini nga balaod. Ubos sa pakigsaad sa Balaod, ang dugo ug ang tambok gilantaw nga iya ni Jehova lamang. Ang kinabuhi anaa sa dugo, nga si Jehova lamang ang makahatag; busa kini iyaha. (Lev 17:11, 14) Ang tambok giisip nga mao ang labing maayong bahin sa unod sa hayop. Ang paghalad sa tambok sa hayop dayag nga maoy pag-ila nga ang labing maayong mga bahin iya ni Jehova, nga dagayang nagatagana, ug gipasundayag niini ang tinguha sa magsisimba sa paghalad sa labing maayo ngadto sa Diyos. Tungod kay kini naglarawan sa pagpahinungod sa mga Israelinhon sa ilang labing maayo ngadto kang Jehova, giingon nga kini paasohon ibabaw sa halaran ingong “pagkaon” ug ingong “makapahupay nga alimyon” ngadto kaniya. (Lev 3:11, 16) Busa, ang pagkaon ug tambok maoy ilegal nga pagkuha sa pahat nga gibalaan alang sa Diyos, usa ka pagyatak sa mga katungod ni Jehova. Silot nga kamatayon ang ipahamtang sa pagkaon ug tambok. Apan, dili sama sa dugo, ang tambok sa usa ka hayop nga namatay rag iya o kaha gipatay sa laing mananap mahimong gamiton sa ubang katuyoan.—Lev 7:23-25.
Pangunang mga Punto Gikan sa Basahon sa Levitico
3:17. Sanglit ang tambok giisip nga ang kinamaayohan o kinalamian nga bahin, ang pagdili sa pagkaon niini nagsilsil diha sa hunahuna sa mga Israelinhon nga ang kinamaayohang bahin maoy iya ni Jehova. (Genesis 45:18) Nagpahinumdom kini kanato nga angay natong ihatag ang atong kinamaayohan kang Jehova.—Proverbio 3:9, 10; Colosas 3:23, 24.
Pagbasa sa Bibliya
(Levitico 1:1-17) Gitawag ni Jehova si Moises ug Siya misulti kaniya gikan sa tolda nga tagboanan: 2 “Ingna ang mga Israelinhon, ‘Bisan kinsa ninyo nga maghalad kang Jehova ug binuhing hayop, kinahanglan nga kini baka, kanding, o karnero. 3 “‘Kon magtanyag siyag baka ingong halad nga sinunog, kini kinahanglang laki ug himsog. Kinabubut-on niya kining itanyag kang Jehova sa entrada sa tolda nga tagboanan. 4 Ipatong niya ang iyang kamot sa ulo sa halad nga sinunog, ug dawaton kini sa Diyos aron sa pagtabon sa iyang sala. 5 “‘Dayon ang toreyong baka ihawon atubangan ni Jehova. Ug ang mga anak nga lalaki ni Aaron nga mga saserdote magtanyag sa dugo ug magwisik niini sa tanang kilid sa halaran nga naa sa entrada sa tolda nga tagboanan. 6 Ang halad nga sinunog angayng panitan ug hiwahiwaon. 7 Ang mga anak ni Aaron nga mga saserdote maghaling ug kalayo ibabaw sa halaran ug magplastar sa mga sugnod diha sa kalayo. 8 Dayon ilang iplastar ang mga hiniwa nga mga halad apil ang ulo ug ang tambok ibabaw sa nagkalayong mga sugnod diha sa halaran. 9 Ang mga tinai ug mga paa niini hugasag tubig, ug kining tanan paasohon sa saserdote diha sa halaran ingong halad nga sinunog. Halad kini nga ginasunog nga ang kahumot makapalipay kang Jehova. 10 “‘Kon magtanyag siyag nating karnero o kanding ingong halad nga sinunog, kini kinahanglang laki ug himsog. 11 Ihawon kini sa amihanang bahin sa halaran atubangan ni Jehova, ug ang mga anak ni Aaron nga mga saserdote magwisik sa dugo niini sa tanang kilid sa halaran. 12 Hiwahiwaon niya kini, ug iplastar kini sa saserdote ibabaw sa nagkalayong mga sugnod diha sa halaran, apil ang ulo ug ang tambok niini. 13 Hugasan niyag tubig ang mga tinai ug mga tiil, ug kining tanan ihalad sa saserdote ug paasohon sa halaran ingong halad nga sinunog. Halad kini nga ginasunog nga ang kahumot makapalipay kang Jehova. 14 “‘Apan kon magtanyag siyag langgam ingong halad nga sinunog para kang Jehova, ang iyang ihalad maoy tukmo o piso sa salampati. 15 Ang saserdote maghalad niini sa halaran ug iyang samaran ang liog niini ug paasohon diha sa halaran, apan ang dugo niini kinahanglang hutdon ug patulo sa kilid sa halaran. 16 Kuhaon niya ang pabalonan ug mga balhibo niini ug iitsa sa kilid sa halaran, sa sidlakang bahin, sa gibutangan sa abo. 17 Pikason niya ang langgam sa may pako niini, apan dili ilahos ang pagpikas. Unya sunogon kini sa saserdote diha sa halaran aron moaso. Kini maoy halad nga sinunog, halad nga ginasunog nga ang kahumot makapalipay kang Jehova.
Nobyembre 16-22
BAHANDI GIKAN SA PULONG SA DIYOS | LEVITICO 4-5
“Ihatag Kang Jehova ang Imong Maarangan”
(Levitico 5:5, 6) “‘Kon sad-an siya sa usa niining mga butanga, angay niyang itug-an kon sa unsang paagi siya nakasala. 6 Magdala sab siyag halad sa pagkasad-an ngadto kang Jehova tungod sa sala nga iyang nahimo: usa ka baye nga nating karnero o baye nga nating kanding ingong halad sa sala. Dayon ang saserdote maghimog pagtabon sa sala sa maong tawo.
Halad
Mga halad-sa-pagkasad-an. Ang mga halad-sa-pagkasad-an maoy mga halad usab tungod sa sala, kay ang bisan unsang matang sa pagkasad-an naglangkit ug sala. Kini maoy alang sa linaing mga sala nga nahimo sa usa ka tawo, ug kini lahig diyutay gikan sa ubang mga halad-sa-sala tungod kay mopatim-aw nga ang katuyoan niini maoy aron mabayran o mapasig-uli ang usa ka katungod. Mahimong ang katungod ni Jehova o kaha katungod sa iyang balaang nasod ang giyatakan. Ang halad-sa-pagkasad-an maoy aron mabayran si Jehova sa katungod nga nayatakan, o aron ipasig-uli o ibalik usab ang pipila ka katungod sa pakigsaad alang sa mahinulsolong mamumuhat ug kasaypanan ug aron makalingkawas sa silot tungod sa iyang sala.—Itandi ang Isa 53:10.
(Levitico 5:7) “‘Kon wala siyay ikapalit ug karnero, magdala siyag duha ka tukmo o duha ka piso nga salampati ngadto kang Jehova ingong iyang halad sa pagkasad-an, ang usa maoy halad sa sala ug ang usa para sa halad nga sinunog.
Siya Naghatag ug Konsiderasyon sa Atong mga Limitasyon
Sa pagbanaag sa mahigugmaong konsiderasyon ni Jehova, ang Balaod nag-ingon: “Kon ugaling siya dili makaarang sa usa ka karnero, nan siya magdala ingong iyang halad-sa-pagkasad-an alang sa sala nga iyang nahimo ug duha ka tukmo o duha ka piso sa salampati ngadto kang Jehova.” (Bersikulo 7) Ang pamulong nga “kon ugaling siya dili makaarang” nagpasabot nga kon ang usa ka Israelitas kabos kaayo nga dili makapalit ug karnero, ang Diyos malipay sa pagdawat sa halad nga iyang maarangan—duha ka tukmo o duha ka salampati.
(Levitico 5:11) “‘Karon kon wala siyay ikapalit ug duha ka tukmo o duha ka piso nga salampati, magdala siyag pinong harina nga ikanapulo nga bahin sa usa ka epah ingong halad sa sala. Dili niya kini butangag lana ug kamangyan, kay kini maoy halad sa sala.
Siya Naghatag ug Konsiderasyon sa Atong mga Limitasyon
Komosta man kon dili pa gihapon siya makaarang sa pagpalit ug duha ka langgam? “Nan dad-on niya ingong iyang halad alang sa iyang sala nga nahimo ang ikanapulo sa usa ka ephah [walo o siyam ka tasa] sa pinong harina ingong halad-sa-sala,” nag-ingon ang Balaod. (Bersikulo 11) Alang niadtong kabos kaayo, si Jehova nagpakitag konsiderasyon pinaagig pagtugot kanila sa pagtanyag ug halad nga walay dugo. Sa Israel, ang kakabos dili babag aron ang usa makabaton ug kapasayloan sa iyang sala o maayong relasyon uban sa Diyos.
Pagpangitag Espirituwal nga Bahandi
(Levitico 5:1) “‘Kon ang usa ka tawo nakakita o nahibalo bahin sa usa ka sala, unya dili siya motestigo bisag nakadungog siyag panawagan sa pagtestigo bahin niini, siya makasala. Manubag siya sa iyang sayop.
Pagkat-on Gikan sa Maunongong mga Alagad ni Jehova
14 Ang kalulot makatabang nimo dihang maglisod ka pagpili kon kang kinsa magmaunongon. Pananglitan, tingali nahibalo ka nga ang usa ka igsoon nakahimog seryosong sala. Tingali gusto nimong magmaunongon kaniya, ilabina kon siya suod nimo nga higala o paryente. Pero kon imong tabonan ang iyang sala, wala ka magmaunongon sa Diyos. Siyempre, kinahanglang unahon nimo ang imong pagkamaunongon kang Jehova. Busa sama kang Natan, magmaluloton apan magmalig-on. Dasiga ang nakasala nga mangayo ug tabang sa mga ansiyano. Kon dili niya kana himoon sa igoigong panahon, ang imong pagkamaunongon sa Diyos magpalihok nimo sa pagsulti niini ngadto sa mga ansiyano. Kon imo ning himoon, ikaw nagmaunongon kang Jehova ug nagmaluloton sa imong higala o paryente, kay ang mga ansiyano magtul-id sa maong indibiduwal uban ang kalumo.—Basaha ang Levitico 5:1; Galacia 6:1.
(Levitico 5:15, 16) “Kon ang usa ka tawo nahimong dili matinumanon kay nakasala nga dili tinuyo batok sa balaang mga butang ni Jehova, magdala siyag usa ka himsog nga laking karnero ngadto kang Jehova ingong halad sa pagkasad-an; ang kantidad niini sa siklong plata maoy sumala sa opisyal nga siklo sa balaang dapit. 16 Ug bayran niya ang sala nga iyang nahimo batok sa balaang dapit ug magdugang sab siyag 20 porsiyento sa kantidad niini. Ihatag niya kini sa saserdote aron ang saserdote maghimog pagtabon sa iyang sala pinaagi sa laking karnero nga halad sa pagkasad-an, ug siya mapasaylo.
Pagkabalaan, Pagbalaan
Mga halad ug pagkaon. Ang mga halad ug mga tanyag gibalaan tungod kay kini gitanyag diha sa halaran nga gibalaan sumala sa paagi nga gilatid. (Mat 23:19) Ang laki nga panganayng anak sa mga baka, karnero, ug mga kanding giisip ingong balaan kang Jehova ug dili pagatubson. Kini igahalad, ug ang usa ka bahin niini mahiadto sa mga gibalaan nga mga saserdote. (Num 18:17-19) Ang unang mga bunga ug ang ikapulo maoy balaan, ingon man ang tanang halad ug ang tanang gasa nga gibalaan alang sa pag-alagad sa sangtuwaryo. (Ex 28:38) Ang bahin nga gidawat sa mga saserdote maoy balaan ug dili mahimong kaonon niadtong dili sakop sa saserdotehanong mga panimalay, ug bisan ang mga saserdote dili makakaon sa maong mga butang samtang sila anaa sa “mahugaw” nga kahimtang. (Lev 2:3; 7:6, 32-34; 22:1-13) Ang pasundayag nga tinapay balaan usab, gibalaan.—1Sa 21:4; Mar 2:26.
Pagkabalaan, Pagbalaan
Mga ikapulo. Ang ikapulo sa lugas, bunga sa kahoy, ug sa panon sa mga karnero nga gilain sa mga Israelinhon giisip nga gibalaan ug dili gamiton sa ubang katuyoan. (Lev 27:30, 32) Ang usa ka pananglitan mao ang balaod bahin sa ikapulo. Kon ang usa ka tawo maggahin ug usa ka bahin ingong ikapulo, pananglitan, gikan sa iyang abot sa trigo, ug dayon siya o usa sa iyang panimalay sa dili-tinuyo magkuhag bahin niini aron gamiton sa balay, sama sa pagluto niini, ang maong tawo sad-an sa paglapas sa balaod sa Diyos labot sa balaang mga butang. Gilatid sa Balaod nga siya kinahanglang magbayad ngadto sa sangtuwaryo sa katumbas nga bili ug dugangan kini ug 20 porsiyento, gawas pa sa paghalad ug usa ka himsog nga laking karnero gikan sa panon sa kahayopan ingong halad. Busa, gihatagag dakong pagtahod ang balaang mga butang nga iya ni Jehova.—Lev 5:14-16.
Pagbasa sa Bibliya
(Levitico 4:27–5:4) “‘Kon dunay tawo sa katawhan nga makasala nga dili tinuyo kay nakahimog butang nga gidili ni Jehova, 28 o nahibaloan niya nga nakahimo siyag sala, kinahanglan siyang magdalag himsog nga bayeng nating kanding ingong halad para sa iyang sala. 29 Ipatong niya ang iyang kamot sa ulo sa halad sa sala ug ihawon ang halad sa sala sa dapit diin ginaihaw ang halad nga sinunog. 30 Ituslob sa saserdote ang iyang tudlo sa dugo niini ug butangan niyag dugo ang mga sungay sa halaran sa halad nga sinunog, ug ang tanang mahibiling dugo iyang ibubo sa tiilan sa halaran. 31 Kuhaon niya ang tanang tambok niini, parehas sa pagkuha sa tambok sa halad sa panag-ambit. Unya paasohon kini sa saserdote diha sa halaran, nga ang kahumot makapalipay kang Jehova; himoon kini sa saserdote aron matabonan ang sala sa maong tawo, ug siya mapasaylo. 32 “‘Apan kon nating karnero ang iyang itanyag ingong halad sa sala, kinahanglang himsog nga bayeng nating karnero ang iyang dad-on. 33 Ipatong niya ang iyang kamot sa ulo sa halad sa sala ug ihawon kini ingong halad sa sala sa dapit diin ginaihaw ang halad nga sinunog. 34 Ituslob sa saserdote ang iyang tudlo sa dugo sa halad sa sala ug butangan niyag dugo ang mga sungay sa halaran sa halad nga sinunog, ug ang tanang mahibiling dugo iyang ibubo sa tiilan sa halaran. 35 Kuhaon niya ang tanang tambok niini parehas sa pagkuha sa tambok sa laking nating karnero sa halad sa panag-ambit, ug paasohon kini sa saserdote diha sa halaran ibabaw sa mga halad nga ginasunog para kang Jehova. Himoon kini sa saserdote aron matabonan ang sala sa maong tawo, ug siya mapasaylo.
5 “‘Kon ang usa ka tawo nakakita o nahibalo bahin sa usa ka sala, unya dili siya motestigo bisag nakadungog siyag panawagan sa pagtestigo bahin niini, siya makasala. Manubag siya sa iyang sayop. 2 “‘O kon ang usa ka tawo makahikap ug bisan unsang butang nga hugaw, sama sa patayng lawas sa hugaw nga ihalas nga mananap, patayng lawas sa hugaw nga binuhing hayop, ug patayng lawas sa hugaw nga magpanon nga mananap, siya mahimong hugaw ug sad-an bisag wala siya mahibalo niini. 3 O kon ang usa ka tawo wala mahibalo nga nakahikap siyag tawong hugaw o bisan unsa nga makapahugaw niya, unya iya kining nahibaloan sa ulahi, siya mahimong sad-an. 4 “‘O kon ang usa ka tawo magdalidalig panumpa sa paghimog maayo o daotang butang, bisag unsa pa kini, apan naamgohan niya sa ulahi nga siya nanumpa nga dinalidali, siya mahimong sad-an.
Nobyembre 23-29
BAHANDI GIKAN SA PULONG SA DIYOS | LEVITICO 6-7
“Pagpahayag sa Pasalamat”
(Levitico 7:11, 12) “‘Karon kini ang balaod sa halad sa panag-ambit nga mahimong itanyag sa usa ka tawo kang Jehova: 12 Kon iya kining itanyag ingong pagpasalamat, ang halad sa pagpasalamat apilan niyag siningsing nga mga tinapay nga walay pangpatubo nga gisagolag lana, nigpis nga tinapay nga walay pangpatubo nga gipahirag lana, ug siningsing nga mga tinapay nga hinimo sa pinong harina, nga maayong pagkasagol ug gibasa sa lana.
Mga Leksiyon Gikan sa Levitico
9 Ikaduhang leksiyon: Nag-alagad ta kang Jehova kay mapasalamaton ta kaniya. Aron ipasiugda kini, atong hisgotan ang mga halad sa panag-ambit, nga laing importanteng bahin sa matuod nga pagsimba sa karaang Israel. Sa Levitico, atong makat-onan nga ang usa ka Israelinhon makatanyag ug halad sa panag-ambit “ingong pagpasalamat.” (Lev. 7:11-13, 16-18) Magtanyag siya niini nga halad, dili tungod kay obligado siya, kondili tungod kay gusto niya. Kinabubut-on niya kining itanyag kay gihigugma niya ang iyang Diyos, si Jehova. Ang naghalad, ang iyang pamilya, ug ang mga saserdote mokaon sa karne sa gihalad nga hayop. Pero may mga parte sa gihalad nga hayop nga para lang kang Jehova. Unsa kana?
(Levitico 7:13-15) Dugang pa, magtanyag sab siyag siningsing nga mga tinapay nga may pangpatubo uban sa halad sa pagpasalamat sa iyang mga halad sa panag-ambit. 14 Gikan sa matag halad, mokuha siyag tagsa ka tinapay ingong sagradong bahin para kang Jehova; maiya kini sa saserdote nga nagwisik sa dugo sa mga halad sa panag-ambit. 15 Ang karne sa iyang mga halad sa panag-ambit ingong halad sa pagpasalamat kaonon sa adlaw nga iya kining ihalad. Kinahanglang walay mabilin niini pagkabuntag.
Mga Halad nga Nakapahimuot sa Diyos
15 Ang laing halad nga kinabubut-ong itanyag mao ang halad sa panag-ambit, nga gihubit sa Levitico kapitulo 3. Ang ngalan mahimong hubaron usab nga “usa ka halad alang sa pakigdait.” Sa Hebreohanon, ang pulong “pakigdait” nagpasabot ug labaw pa kay sa yanong pagkawalay gubat o kagubot. “Diha sa Bibliya, mao kini ang gipasabot, ug usab sa kahimtang o relasyon sa pakigdait uban sa Diyos, kauswagan, kangaya, ug kalipay,” nag-ingon ang librong Studies in the Mosaic Institutions. Busa, ang halad sa panag-ambit itanyag, dili aron tinguhaon ang pakigdait uban sa Diyos, nga morag naglukmay kaniya, kondili sa pagpasalamat o pagsaulog sa bulahang kahimtang sa pagkaadunay pakigdait uban sa Diyos nga ginatagamtam sa mga tawo nga iyang gikahimut-an. Ang mga saserdote ug ang nagtanyag nag-ambitay sa halad human sa paghalad sa dugo ug tambok ngadto kang Jehova. (Levitico 3:17; 7:16-21; 19:5-8) Sa matahom ug sa simbolikong paagi, ang nagtanyag, ang mga saserdote, ug si Jehova nga Diyos nagsalo sa pagpangaon, nga nagsimbolo sa makigdaitong relasyon nga ilang gitagamtam.
(Levitico 7:20) “‘Apan kon ang tawo nga hugaw mokaon sa karne sa halad sa panag-ambit nga para kang Jehova, kanang tawhana angayng patyon.
Mga Halad sa Pagdayeg nga Makapahimuot Kang Jehova
8 Komosta ang tawo nga nagtanyag sa halad? Ang Balaod nag-ingon nga ang si bisan kinsa nga moduol atubangan kang Jehova kinahanglang mahinlo ug wala mahugawi. Ang usa ka tawo nga nahugawan sa bisan unsang katarongan kinahanglang magtanyag una ug halad sa sala o halad sa pagkasad-an aron mapasig-uli ang iyang mahinlong baroganan atubangan ni Jehova aron ang iyang halad nga sinunog o halad sa panag-ambit dalawaton Kaniya. (Levitico 5:1-6, 15, 17) Busa, kita ba nagpabili sa kahinungdanon sa pagbaton sa tanang panahon ug hinlong baroganan atubangan ni Jehova? Aron ang atong pagsimba dalawaton sa Diyos, kinahanglang tul-iron dayon nato ang bisan unsang kalapasan nga mahimo diha sa balaod sa Diyos. Angayng pahimuslan dayon nato ang hinatag-sa-Diyos nga mga kasangkapan sa tabang—“ang mga ansiyano sa kongregasyon” ug ang ‘halad pasig-uli alang sa atong mga sala,’ si Jesu-Kristo.—Santiago 5:14; 1 Juan 2:1, 2.
Pagpangitag Espirituwal nga Bahandi
(Levitico 6:13) Ang kalayo sa halaran pasigaon kanunay. Kinahanglang dili kini mapalong.
it-1 1386-1387
Kalayo
Nalangkit sa tabernakulo ug sa templo. Ang kalayo nalangkit usab sa pagsimba nga gihimo didto sa tabernakulo ug sa ulahi didto sa templo. Kada buntag ug taliwala sa duha ka gabii, ang hataas nga saserdote magsunog ug insenso diha sa halaran sa insenso. (Ex 30:7, 8) Ang balaod sa Diyos nagsugo nga ang kalayo diha sa halaran sa halad-nga-sinunog pasigaon kanunay. (Lev 6:12, 13) Ang tradisyonal nga pagtuo sa mga Hudiyo nga ang Diyos maoy milagrosong naghaling ug kalayo diha sa halaran, bisan tuod gidawat sa kadaghanan, wala gayod paluyohi sa Kasulatan. Sumala sa unang mga instruksiyon ni Jehova kang Moises, ang mga anak nga lalaki ni Aaron “maghaling ug kalayo sa ibabaw sa halaran ug maghan-ay sa mga sugnod ibabaw sa kalayo” una pa ibutang ang halad diha sa halaran. (Lev 1:7, 8) Human sa pagpahiluna sa katungdanan sa Aaronikong pagkasaserdote, ug busa human sa pagtanyag sa mga halad sa pagpahiluna sa katungdanan, nga ang kalayo gikan kang Jehova, nga lagmit migula gikan sa panganod nga anaa ibabaw sa tabernakulo, nag-ut-ot sa halad nga diha sa halaran. Tungod niini, ang milagrosong kalayo nagpakita, dili aron sa pagsunog sa kahoy diha sa halaran, kondili aron sa ‘pag-ut-ot sa halad-nga-sinunog ug sa matambok nga mga bahin sa ibabaw sa halaran.’ Siyempre, ang kalayo nga niadtong higayona padayong nagsiga diha sa halaran lagmit maoy resulta sa panagsagol sa kalayo gikan sa Diyos ug sa kalayo nga diha nang daan sa halaran. (Lev 8:14–9:24) Sa susama, ang milagrosong kalayo gikan kang Jehova nag-ut-ot sa mga halad human sa pag-ampo ni Solomon sa panahon sa pagpahinungod sa templo.—2Cr 7:1; tan-awa usab ang Huk 6:21; 1Ha 18:21-39; 1Cr 21:26 alang sa ubang mga pananglitan sa paggamit ni Jehova sa milagrosong kalayo sa dihang iyang gidawat ang mga halad sa iyang mga alagad.
(Levitico 6:25) “Sultihi si Aaron ug ang iyang mga anak, ‘Kini ang balaod sa halad sa sala: Sa ihawanan sa halad nga sinunog, didto sab ihawon ang halad sa sala atubangan ni Jehova. Balaan kaayo kini nga butang.
Basahon sa Bibliya Numero 3—Levitico
15 (3) Ang halad sala kinahanglanon alang sa watuyoang mga sala, mga salang nahimo tungod sa sayop. Ang matang sa mananap nga ihalad depende kon kinsang sala ang tabonan—sa saserdote, katawhan sa kinatibuk-an, pangulo, o ordinaryong tawo. Disama sa boluntaryong halad sinunog ug komunyon alang sa indibiduwal, ang halad sala minando.—4:1-35; 6:24-30.
Pagbasa sa Bibliya
(Levitico 6:1-18) Si Jehova padayong misulti kang Moises: 2 “Kon ang usa ka tawo makasala ug wala magmatinumanon kang Jehova kay gilimbongan niya ang iyang isigkatawo labot sa usa ka butang nga gisalig o gipatagoan kaniya, o iyang gikawatan o gitikasan ang iyang isigkatawo, 3 o nakakita siyag butang nga nawala ug gilimod niya kini, ug kon siya bakak nga manumpa nga wala niya buhata ang maong sala, kini ang angay niyang buhaton: 4 Kon sad-an siya, kinahanglang iuli niya ang iyang gikawat, ang iyang gikuha pinaagig panghulga, ang iyang gikuha pinaagig panikas, ang gisalig kaniya, o ang nawalang butang nga iyang nakit-an, 5 o ang bisan unsa nga bakak niyang gipanumpaan, kinahanglang bayran niya ang tibuok kantidad niini, ug magdugang siyag 20 porsiyento sa kantidad niini. Iya kining ihatag sa tag-iya sa adlaw nga mapamatud-ang sad-an siya. 6 Ug magdala siya sa saserdote ug usa ka himsog nga laking karnero ingong iyang halad sa pagkasad-an kang Jehova, sumala sa hustong bili niini para sa halad sa pagkasad-an. 7 Ang saserdote maghimog pagtabon sa sala sa maong tawo atubangan ni Jehova, ug siya mapasaylo sa bisan unsang butang nga nakapahimo niyang sad-an.” 8 Si Jehova padayong misulti kang Moises: 9 “Sugoa si Aaron ug ang iyang mga anak nga lalaki, ‘Kini ang balaod sa halad nga sinunog: Ang halad nga sinunog magpabilin sa halaran sa tibuok gabii hangtod sa buntag, ug ang kalayo sa halaran pasigaon kanunay. 10 Isul-ob sa saserdote ang iyang opisyal nga linong besti ug ang iyang purol nga lino. Dayon kuhaon niya ang mga abo sa halad nga sinunog nga giugdaw sa kalayo diha sa halaran, ug ibutang kini tapad sa halaran. 11 Unya mag-ilis siyag besti ug dad-on niya ang mga abo ngadto sa hinlong dapit sa gawas sa kampo. 12 Ang kalayo sa halaran pasigaon kanunay. Kinahanglang dili kini mapalong. Kada buntag kining sugnoran sa saserdote, ug iyang iplastar ang halad nga sinunog ibabaw sa kalayo ug paasohon ang tambok sa halad sa panag-ambit nga gipatong niana. 13 Ang kalayo sa halaran pasigaon kanunay. Kinahanglang dili kini mapalong. 14 “‘Mao kini ang balaod sa halad nga lugas: Kamong mga anak ni Aaron ang magtanyag niini kang Jehova atubangan sa halaran. 15 Usa nila ang magkuha ug usa ka hakop sa pinong harina nga may lana ug sa tanang kamangyan gikan sa halad nga lugas. Ug kini iyang paasohon sa halaran nga ang kahumot makapalipay kang Jehova ingong halad nga pahinumdom. 16 Ang salin kaonon ni Aaron ug sa iyang mga anak. Kaonon nila kini ingong tinapay nga walay pangpatubo diha sa balaang dapit, sa hawanan sa tolda nga tagboanan. 17 Lutoon kini nga walay pangpatubo. Gihatag nako kini ingong ilang bahin gikan sa mga halad nga ginasunog para kanako. Balaan kaayo kini sama sa halad sa sala ug sa halad sa pagkasad-an. 18 Ang tanang anak nga lalaki ni Aaron mokaon niini. Kini ang ilang permanenteng bahin gikan sa mga halad nga ginasunog para kang Jehova hangtod sa tanan ninyong henerasyon. Ang tanang madapat niini mahimong balaan.’”
Nobyembre 30–Disyembre 6
BAHANDI GIKAN SA PULONG SA DIYOS | LEVITICO 8-9
“Pamatuod sa Panalangin ni Jehova”
(Levitico 8:6-9) Busa gipaduol ni Moises si Aaron ug ang iyang mga anak ug giligoan sila. 7 Human niana iyang gisul-oban si Aaron sa taas nga besti, gibakos kaniya ang paha, gisul-oban siya sa besti nga walay bukton ug sa epod, ug gihugot niyag bakos kaniya ang hinablon nga bakos sa epod. 8 Dayon iyang gisul-ob kaniya ang tabon sa dughan ug gibutang ang Urim ug ang Tumim diha sa tabon sa dughan. 9 Unya iyang gibutang sa ulo ni Aaron ang turban ug gitaod sa atubangan sa turban ang sinawng plaka nga bulawan, nga mao ang balaang ilhanan sa pagkanapahinungod, sumala sa gisugo ni Jehova kang Moises.
(Levitico 8:12) Sa kataposan gibuboan niyag lana nga pangdihog ang ulo ni Aaron ug gidihogan siya aron mabalaan siya.
it-2 702
Pagpahiluna-sa-Katungdanan
Si Moises naghugas o nagligo kang Aaron ug sa mga anak nga lalaki ni Aaron nga si Nadab, Abihu, Eleasar, ug Itamar (o, siya nagsugo kanila nga maligo) diha sa dulang nga tumbaga nga anaa sa sawang ug nagsul-ob kang Aaron sa mahimayaong mga besti sa hataas nga saserdote. (Num 3:2, 3) Karon kay nagsul-ob na sa matahom nga sapot, si Aaron gitugyanan sa mga besti nga naghawas sa mga hiyas ug sa mga responsibilidad sa iyang katungdanan. Dayon gidihogan ni Moises ang tabernakulo, ang tanang kasangkapan ug mga galamiton niini, ug ang halaran sa halad-nga-sinunog, maingon man usab ang dulang ug ang mga galamiton nga gigamit labot niini. Tungod niini kining mga butanga nahimong balaan, nalain o napinig alang sa eksklusibong paggamit ug pag-alagad sa Diyos nga niana kini mahimo nang gamiton. Sa kataposan si Moises nagdihog kang Aaron pinaagi sa pagbubo ug lana sa iyang ulo.—Lev 8:6-12; Ex 30:22-33; Sal 133:2.
(Levitico 9:1-5) Sa ikawalong adlaw, gitawag ni Moises si Aaron ug ang iyang mga anak nga lalaki ug ang mga ansiyano sa Israel. 2 Giingnan niya si Aaron: “Pagkuhag himsog nga nating baka para sa imong kaugalingon ingong halad sa sala ug himsog nga laking karnero ingong halad nga sinunog, ug itanyag kini sa atubangan ni Jehova. 3 Apan sultihi ang mga Israelinhon, ‘Pagkuhag usa ka laking kanding ingong halad sa sala ug usa ka nating baka ug usa ka laking nating karnero ingong halad nga sinunog, tagsa ka tuig ang kagulangon ug himsog, 4 ug usa ka torong baka ug usa ka laking karnero ingong halad sa panag-ambit aron ihalad sa atubangan ni Jehova, ug halad nga lugas nga gisagolag lana, kay karong adlawa si Jehova magpakita kaninyo.’” 5 Busa gidala nila atubangan sa tolda nga tagboanan ang gisugo ni Moises nga ilang dad-on. Unya ang tibuok katawhan miduol ug mitindog sa atubangan ni Jehova.
Pagpahiluna-sa-Katungdanan
Sa ikawalong adlaw, nga bug-os nasangkapan ug napahiluna na sa katungdanan, ang mga saserdote moalagad (nga walay tabang ni Moises) sa unang higayon, nga maghimo sa seremonyas sa pagtabon-sa-sala alang sa nasod sa Israel, nga ilabinang nanginahanglan sa paghinlo dili lamang tungod sa ilang kinaiyanhong pagkamakasasala kondili usab tungod sa ilang bag-o pang paglapas may kalabotan sa bulawan nga nating baka, nga tungod niana napungot si Jehova. (Lev 9:1-7; Ex 32:1-10) Sa pagkatapos niining unang pag-alagad sa mga saserdote nga bag-ong napahiluna-sa-katungdanan, gipakita ni Jehova ang iyang pag-uyon ug pagkompirmar sa ilang katungdanan pinaagi sa pagpagulag milagrosong kalayo, sa walay duhaduha gikan sa haligi nga panganod nga anaa sa ibabaw sa tabernakulo, nga nagsunog sa nahibilin sa halad diha sa halaran.—Lev 9:23, 24.
(Levitico 9:23, 24) Sa ulahi si Moises ug si Aaron misulod sa tolda nga tagboanan, dayon migawas ug gipanalanginan ang katawhan. Unya ang himaya ni Jehova nagpakita sa tibuok katawhan, 24 ug may kalayo gikan kang Jehova nga misunog sa halad nga sinunog ug sa mga tambok nga bahin nga naa sa halaran. Pagkakita niini sa tanang katawhan, sila naninggit sa kalipay ug nanghapa.
Mga Leksiyon Gikan sa Levitico
13 Ikaupat nga leksiyon: Gipanalanginan ni Jehova ang yutan-ong bahin sa iyang organisasyon. Konsideraha kon unsay nahitabo niadtong 1512 B.C.E. dihang ang tabernakulo gipatindog sa tiilan sa Bukid sa Sinai. (Ex. 40:17) Gipangunahan ni Moises ang seremonyas diin giordinahan ingong mga saserdote si Aaron ug ang iyang mga anak. Ang nasod sa Israel nagtigom aron masaksihan ang pagtanyag sa mga saserdote sa ilang unang halad nga mga hayop. (Lev. 9:1-5) Giunsa pagpakita ni Jehova ang iyang pag-uyon niining bag-ong natudlo nga mga saserdote? Samtang gipanalanginan ni Aaron ug Moises ang katawhan, si Jehova nagpadalag kalayo aron bug-os nga masunog ang halad diha sa halaran.—Basaha ang Levitico 9:23, 24.
Pagpangitag Espirituwal nga Bahandi
(Levitico 8:6) Busa gipaduol ni Moises si Aaron ug ang iyang mga anak ug giligoan sila.
Kon Nganong Angay Kitang Magmabalaan
6 Ang kinahanglanon nga magmahinlo sa pisikal ang mga saserdote sa Israel dunay dakong kahulogan sa mga alagad ni Jehova karon. Ang atong mga gitun-an sa Bibliya sagad makamatikod sa kahinlo sa atong mga dapit sa pagsimba ug sa atong pamesti. Apan, ang kahinlo sa mga saserdote makatabang kanato sa pagkaamgo nga si bisan kinsa nga gustong mosaka sa hataas nga bukid sa pagsimba ni Jehova kinahanglang may ‘hinlo nga kasingkasing.’ (Basaha ang Salmo 24:3, 4; Isa. 2:2, 3.) Ang atong sagradong pag-alagad sa Diyos kinahanglang himoon uban ang hinlong hunahuna ug kasingkasing, maingon man ang hinlong lawas. Nagkinahanglan kinig kanunayng pagsusi sa kaugalingon, diin human niana ang pipila kinahanglang mohimog dagkong kausaban aron sila mahimong balaan. (2 Cor. 13:5) Pananglitan, angayng pangutan-on sa usa ka bawtismadong alagad nga nagatan-awg pornograpiya ang iyang kaugalingon, ‘Gipamatud-an ba nako nga ako balaan?’ Dayon, angay siyang mangayog tabang aron mabuntog ang maong daotang buhat.—Sant. 5:14.
(Levitico 8:14-17) Dayon gidala niya ang baka nga halad sa sala, ug gipatong ni Aaron ug sa iyang mga anak ang ilang kamot sa ulo sa baka nga halad sa sala. 15 Giihaw kini ni Moises ug gituslob ang iyang tudlo sa dugo ug gipahid kini sa tanang sungay sa halaran, ug giputli niya ang halaran gikan sa sala. Apan ang salin sa dugo iyang gibubo sa tiilan sa halaran aron mabalaan kini ug mahinloan. 16 Human niana iyang gikuha ang tanang tambok sa mga tinai, ang tambok sa atay, ang duha ka amimislon ug ang tambok niini, ug gipaaso kini ni Moises sa halaran. 17 Unya gisunog niya sa gawas sa kampo ang nahibiling parte sa baka, ang panit, unod, ug tai niini, sumala sa gisugo ni Jehova kang Moises.
Moises
Gihimo sa Diyos si Moises ingong tigpataliwala sa pakigsaad sa Balaod uban sa Israel, usa ka suod nga posisyon nga wala gayod sukad mahupti ni bisan kinsang tawo sa atubangan sa Diyos gawas kang Jesu-Kristo, ang Tigpataliwala sa bag-ong pakigsaad. Pinaagi sa dugo sa mga halad nga hayop giwisikan ni Moises ang basahon sa pakigsaad, nga naghawas kang Jehova ingong usa ka “hingtungdan” o partido sa pakigsaad, ug ang katawhan (walay duhaduha ang hawas nga mga ansiyano) ingong ang lain nga “hingtungdan.” Iyang gibasa ang basahon sa pakigsaad ngadto sa katawhan, kinsa mitubag, “Kami andam nga mobuhat ug magmasinugtanon sa tanang gisulti ni Jehova.” (Ex 24:3-8; Heb 9:19) Sa iyang katungdanan isip tigpataliwala, nakapribilehiyo si Moises sa pagdumala sa pagtukod sa tabernakulo ug sa paghimo sa mga kasangkapan niini, nga ang sumbanan niini gihatag sa Diyos kaniya, ug sa pagtudlo sa katungdanan sa pagkasaserdote, sa pagdihog sa tabernakulo ug kang Aaron nga hataas nga saserdote pinaagi sa lana nga may linaing sambog. Dayon iyang gidumala ang unang opisyal nga mga pag-alagad sa bag-ong napahinungod nga mga saserdote.—Ex kap 25-29; Lev kap 8, 9.
Pagbasa sa Bibliya
(Levitico 8:31–9:7) Unya si Moises miingon kang Aaron ug sa iyang mga anak: “Lat-i ang karne sa entrada sa tolda nga tagboanan, ug kan-a ninyo kini didto uban sa tinapay nga naa sa basket nga gigamit para sa pag-ordinar sa pagkasaserdote, sumala sa gisugo kanako, ‘Kaonon kini ni Aaron ug sa iyang mga anak.’ 32 Ang mabilin sa karne ug sa tinapay inyong sunogon. 33 Ayaw mog gawas sa entrada sa tolda nga tagboanan sulod sa pito ka adlaw, hangtod matapos ang mga adlaw sa pag-ordinar sa pagkasaserdote, kay moabot ug pito ka adlaw ang pag-ordinar kaninyo ingong mga saserdote. 34 Gisugo ni Jehova nga himoon nato ang atong gibuhat niining adlawa alang sa pagtabon sa inyong sala. 35 Magpabilin mo sa entrada sa tolda nga tagboanan adlaw ug gabii sulod sa pito ka adlaw, ug tumana ang inyong obligasyon kang Jehova aron dili mo mamatay; kay kini ang gisugo kanako.” 36 Gibuhat ni Aaron ug sa iyang mga anak ang tanang gisugo ni Jehova pinaagi kang Moises.
9 Sa ikawalong adlaw, gitawag ni Moises si Aaron ug ang iyang mga anak nga lalaki ug ang mga ansiyano sa Israel. 2 Giingnan niya si Aaron: “Pagkuhag himsog nga nating baka para sa imong kaugalingon ingong halad sa sala ug himsog nga laking karnero ingong halad nga sinunog, ug itanyag kini sa atubangan ni Jehova. 3 Apan sultihi ang mga Israelinhon, ‘Pagkuhag usa ka laking kanding ingong halad sa sala ug usa ka nating baka ug usa ka laking nating karnero ingong halad nga sinunog, tagsa ka tuig ang kagulangon ug himsog, 4 ug usa ka torong baka ug usa ka laking karnero ingong halad sa panag-ambit aron ihalad sa atubangan ni Jehova, ug halad nga lugas nga gisagolag lana, kay karong adlawa si Jehova magpakita kaninyo.’” 5 Busa gidala nila atubangan sa tolda nga tagboanan ang gisugo ni Moises nga ilang dad-on. Unya ang tibuok katawhan miduol ug mitindog sa atubangan ni Jehova. 6 Si Moises miingon: “Kini ang gisugo ni Jehova nga inyong buhaton aron ipakita ni Jehova kaninyo ang iyang himaya.” 7 Dayon si Moises miingon kang Aaron: “Duol sa halaran ug itanyag ang imong halad sa sala ug ang imong halad nga sinunog, ug himoa ang pagtabon sa sala para sa imong kaugalingon ug sa imong panimalay; ug itanyag ang halad sa katawhan ug himoa ang pagtabon sa sala alang kanila, sumala sa gisugo ni Jehova.”