Reperensiya Para sa Workbook sa Tigom nga Kinabuhi ug Ministeryo
HULYO 4-10
BAHANDI GIKAN SA PULONG SA DIYOS | 2 SAMUEL 18-19
“Barzilai—Giila ang Iyang mga Limitasyon”
Si Barzilai—Usa ka Tawong Makasaranganon
Walay duhaduha, mapasalamaton gayod si David sa tabang ni Barzilai. Lagmit dili kay gusto rang gantihan ni David si Barzilai pinaagig paghatag ug materyal nga mga butang. Wala na kana kinahanglana ni Barzilai kay adunahan man siya. Tingali gusto ni David nga adto siya papuy-on sa palasyo tungod sa iyang dalayegong mga hiyas. Ang pagpuyo sa palasyo maoy usa ka kadungganan, ug mapahimuslan usab ni Barzilai ang daghang kaayohan ingong higala sa hari.
Si Barzilai—Usa ka Tawong Makasaranganon
Ang usa ka rason sa desisyon ni Barzilai lagmit mao ang iyang pagkataas nag edad ug ang mga suliran nga dala sa pagkatigulang. Mahimong naghunahuna si Barzilai nga dili na siya magdugay sa kalibotan. (Salmo 90:10) Nahimo na niya ang iyang maarangan sa pagsuportar kang David, apan nahibalo usab siya sa mga suliran nga dala sa pagkatigulang. Busa, si Barzilai matinud-anong nakatimbangtimbang sa iyang mga katakos tungod kay siya wala maghunahuna bahin sa posisyon ug pagkainila. Dili sama sa ambisyosong si Absalom, si Barzilai maalamong nagpasundayag ug pagkamakasaranganon.—Proverbio 11:2.
Si Barzilai—Usa ka Tawong Makasaranganon
Ang asoy bahin kang Barzilai nagpasiugda nga kita kinahanglang magmakataronganon. Sa unang bahin, dili nato angayng balibaran ang usa ka pribilehiyo sa pag-alagad o likayan ang pagkab-ot ug dugang pribilehiyo tungod kay dili nato gustong mahasol o mobating dili takos nga moabaga ug kaakohan. Kita tabangan sa Diyos kon kita mosalig kaniya alang sa kusog ug kaalam.—Filipos 4:13; Santiago 4:17; 1 Pedro 4:11.
Sa laing bahin, kinahanglan kitang magmakasaranganon. Pananglitan, tingali ang usa ka Kristohanon daghan nag pribilehiyo diha sa kongregasyon. Nahibalo siya nga kon iyang dawaton ang dugang nga mga pribilehiyo, basig dili na niya matuman ang ubang Kasulatanhong mga kaakohan sama sa pagtagana sa espirituwal ug materyal nga mga panginahanglan sa iyang pamilya. Sa maong kahimtang, dili ba magpaila nga siya makasaranganon ug makataronganon kon iyang balibaran ang dugang pribilehiyo sa pag-alagad?—Filipos 4:5; 1 Timoteo 5:8.
Espirituwal nga mga Bahandi
‘Taposa ang Lumba’
19 Kon naa kay problema sa panglawas ug mibati ka nga walay nakasabot nimo, madasig tingali ka sa ehemplo ni Mepiboset. (2 Sam. 4:4) Lisod ang iyang kahimtang kay baldado siya, ug nasaypan sab siyag sabot ni Haring David. Dili sala ni Mepiboset nga nahitabo kaniya ang maong mga kalisdanan. Pero imbes mahimong negatibo, iyang giapresyar ang maayong mga butang nga nahitabo kaniya. Mapasalamaton siya sa kaayo nga gipakita ni David kaniya sa miagi. (2 Sam. 9:6-10) Busa dihang nasaypan siyag sabot ni David, gikonsiderar ni Mepiboset ang tibuok nga situwasyon. Wala siya masuko kang David tungod sa sayop niini. Ug wala niya basola si Jehova sa nahimo ni David. Si Mepiboset nagpokus sa kon unsay iyang mahimo sa pagsuportar sa hari nga gipili ni Jehova. (2 Sam. 16:1-4; 19:24-30) Giparekord ni Jehova sa Bibliya ang maayo kaayong ehemplo ni Mepiboset aron makakat-on ta.—Roma 15:4.
HULYO 11-17
BAHANDI GIKAN SA PULONG SA DIYOS | 2 SAMUEL 20-21
“Si Jehova Diyos sa Hustisya”
Gabaon
Latas sa kasiglohan, ang orihinal nga mga Gabaonhon nagpadayon sa paglungtad ingong usa ka katawhan, bisan tuod nga si Haring Saul naglaraw sa paglaglag kanila. Bisan pa niana, ang mga Gabaonhon mapailobong nagpaabot kang Jehova nga ibutyag ang inhustisya. Gibutyag kini ni Jehova pinaagi sa tulo ka tuig nga gutom sa panahon sa paghari ni David. Sa pagpakisayod kang Jehova ug sa pagkahibalo nga nalangkit ang pagkasad-an sa dugo, gipangutana ni David ang mga Gabaonhon aron matino kon unsay angayng buhaton aron makahimog pagtabon-sa-sala. Ang mga Gabaonhon tukmang mitubag nga kini wala maglangkit ug “plata o bulawan,” tungod kay sumala sa Balaod walay lukat nga mahimong dawaton alang sa usa ka mamumuno. (Num 35:30, 31) Nahibalo usab sila nga dili nila mahimong patyon ang usa ka tawo kon walay legal nga awtorisasyon. Busa, ayha pa sila mihangyo nga ang pito ka “anak nga lalaki” ni Saul itugyan ngadto kanila human nga si David makapangutanag dugang. Ang kamatuoran nga si Saul ug ang iyang panimalay sad-an sa dugo nagpakita nga, bisan tuod si Saul lagmit maoy nanguna sa pagbuno, ang mga “anak nga lalaki” ni Saul lagmit nakigbahin niana sa direkta o sa dili-direkta nga paagi. (2Sa 21:1-9) Kini nga hitabo dili maoy usa ka pananglitan sa mga anak nga nangamatay tungod sa kasal-anan sa ilang mga amahan (Deu 24:16) kondili naglangkit kini sa pagpahamtang ug hustisya ingong balos nga nahiuyon sa balaod nga “kalag alang sa kalag.”—Deu 19:21.
Espirituwal nga mga Bahandi
Mga Ansiyano—‘Isigkamagbubuhat Alang sa Atong Kalipay’
14 Sa tibuok kalibotan, ang katawhan ni Jehova padayong nag-alagad bisan pa sa mga pagbabag ni Satanas ug sa iyang mga sakop. Daghan kanato ang nakaatubang ug samag Goliat nga mga problema. Hinuon, nabuntog nato kana kay bug-os kitang misalig kang Jehova. Apan usahay, kita maluya ug mahigawad tungod sa kanunayng pagpakigbugno sa mga pagpit-os niining kalibotana. Kay luya na man, kita dali rang mabiktima ug mameligrong ‘mapukan’ sa mga pagpit-os nga sagad kaya ra natong mabuntog. Niining mga kahimtanga, ang pagpaluyo nga ihatag sa mga ansiyano sa hustong panahon makatabang sa pagbalik sa atong kalipay ug kadasig, sama sa nasinati sa daghang igsoon. Usa ka payunir nga mga 65 anyos miingon: “Dihay panahon nga dili maayo ang akong pamati, ug kapoyon dayon ko sa pagsangyaw. Namatikdan kini sa usa ka ansiyano ug iya kong giduol. Iya kong gidasig gamit ang Bibliya. Gipadapat nako ang iyang mga sugyot, ug nakabenepisyo ko.” Siya midugang: “Pagkamahigugmaon sa maong ansiyano. Gitabangan ko niya dihang nakamatikod siyang naluya ko!” Oo, makapalipay nga ang atong mga ansiyano mahigugmaong nagbantay ug, sama kang Abisai, andam sa ‘pagtabang kanato.’
HULYO 18-24
BAHANDI GIKAN SA PULONG SA DIYOS | 2 SAMUEL 22
“Salig sa Tabang ni Jehova”
Mahimo ba Gayod nga Ikaw ‘Makigsuod sa Diyos’?
11 Usa ka butang ang pagbasa nga ang Diyos maoy “mabaskog sa gahom.” (Isaias 40:26) Laing butang ang pagbasa kon giunsa niya pagluwas ang Israel latas sa Pulang Dagat ug unya pagsustento ang nasod didto sa kamingawan sulod sa 40 ka tuig. Mahanduraw nimo ang pagkabahin sa nagbul-og nga katubigan. Makahulagway ka sa nasod—tingali 3,000,000 tanan—nga naglakaw sa namad-ang dagat, nga ang natibuok nga katubigan nagbarog samag nagbuntaog nga mga paril sa duha ka kiliran. (Exodo 14:21; 15:8) Imong makita ang ebidensiya sa mapanalipdanong pag-atiman sa Diyos didto sa kamingawan. Ang tubig mibuhagay gikan sa bato. Ang pagkaon, nga susamag mga puting liso, mitungha sa yuta. (Exodo 16:31; Numeros 20:11) Niini si Jehova nagpadayag dili lamang nga siya adunay gahom kondili nga gamiton niya kini sa kaayohan sa iyang katawhan. Dili ba mapasaligon ang pagkahibalong ang atong mga pag-ampo makadangat ngadto sa gamhanang Diyos nga “mao ang atong dalangpanan ug kusog, usa ka katabang nga daling hikaplagan panahon sa mga kasakitan”?—Salmo 46:1.
“Sa Maunongon Ikaw Magmaunongon”
Susihon pa natog dugang ang giingon ni David. Ang Hebreohanong pulong nga gihubad ug “maunongon” mahimo usab hubaron nga “pagpakitag mahigugmaong-kalulot.” Ang tinuod nga pagkamaunongon gipasukad sa gugma. Tungod sa gugma ni Jehova, dili gayod niya biyaan ang mga maunongon kaniya.
Matikdi usab nga ang pagkamaunongon dili lang basta pagbati; kini makita sa buhat. Si Jehova nagpasundayag ug pagkamaunongon, sama sa nasinati mismo ni David. Sa malisod kaayong mga yugto sa kinabuhi sa matinumanong hari nga si David, siya gitabangan ni Jehova pinaagi sa pagpanalipod ug paggiya kaniya. Si David mapasalamaton kang Jehova sa pagluwas kaniya ‘gikan sa kamot sa tanan niyang kaaway.’—2 Samuel 22:1.
Unsay atong makat-onan sa mga pulong ni David? Si Jehova walay pagkausab. (Santiago 1:17) Siya motuman gayod sa iyang mga saad ug dili motipas sa iyang mga sukdanan. Sa laing salmo, si David misulat: “Dili niya [Jehova] pagabiyaan ang mga maunongon kaniya.”—Salmo 37:28.
Espirituwal nga mga Bahandi
Ugmara ang Tinamdan sa Usa nga Mas Ubos
7 Dakog epekto kang David ang pagkamapainubsanon sa Diyos. Siya miawit kang Jehova: “Ihatag mo kanako ang imong taming sa kaluwasan, ug ang imong pagpaubos mao ang nagpadako kanako.” (2 Sam. 22:36) Giila ni David nga ang bisan unsang kadungganan nga iyang nabatonan sa Israel maoy tungod sa pagkamapainubsanon ni Jehova—ang pagpaubos sa Diyos aron hatagan siyag pagtagad. (Sal. 113:5-7) Dili ba sama usab niana ang atong kahimtang? Kon bahin sa atong mga hiyas, abilidad, ug pribilehiyo, unsa may atong nabatonan nga ‘wala nato madawat’ gikan kang Jehova? (1 Cor. 4:7) Ang usa nga nagagawi ingong mas ubos maoy “dako” kay siya mahimong mas bililhong alagad ni Jehova. (Luc. 9:48) Atong tan-awon kon sa unsang paagi.
HULYO 25-31
BAHANDI GIKAN SA PULONG SA DIYOS | 2 SAMUEL 23-24
“Ang Imo Bang Paghatag Matawag ug Halad?”
Arauna
Lagmit gitanyag ni Arauna nga walay bayad ang maong dapit uban sa baka ug sa mga galamitong kahoy alang sa paghalad, apan si David miinsistir sa pagbayad. Ang rekord sa 2 Samuel 24:24 nagpakita nga gipalit ni David ang giokanan ug ang baka sa 50 ka siklong plata ($110). Apan, ang asoy sa 1 Cronicas 21:25 nag-ingon nga si David nagbayad ug 600 ka siklong bulawan (mga $77,000) alang sa maong dapit. Ang magsusulat sa Ikaduhang Samuel nagtumong lamang sa pagpalit sa nahimutangan sa halaran ug sa mga materyales alang sa paghalad nga gihimo niadtong higayona, ug busa mopatim-aw nga ang bili sa pagpalit nga iyang gihisgotan maoy alang lamang niining mga butanga. Sa laing bahin, gihisgotan sa magsusulat sa Unang Cronicas ang mga butang labot sa templo nga sa ulahi gitukod sa maong dapit ug gilangkit ang pagpalit uban niana nga pagtukod. (1Cr 22:1-6; 2Cr 3:1) Sanglit dako man kaayo ang katibuk-ang luna sa templo, mopatim-aw nga ang kantidad nga 600 ka siklong bulawan nagtumong sa pagpalit niining dakong luna imbes nga sa gamayng bahin nga gikinahanglan alang sa halaran nga unang gitukod ni David.
Pagkat-on Gikan sa ‘Gambalay sa Kamatuoran’
8 Ang usa ka Israelinhon boluntaryo nga makahalad kang Jehova aron magpasalamat. O siya makatanyag ug halad nga sinunog aron sa paghangyo sa pag-uyon ni Jehova. Sa maong mga kahimtang, dili lisod para niya nga pilion ang kinamaayohang hayop. Siya malipay nga ihatag kini kang Jehova. Karon, kita dili na mohimog literal nga halad segun sa giingon sa Moisesnong Balaod, apan kita mohalad gihapon pinaagi sa paggamit sa atong panahon, kusog, ug kahinguhaan sa pag-alagad kang Jehova. Gihisgotan ni apostol Pablo ang “pagpahayag sa dayag” sa atong paglaom ug ‘ang pagbuhat ug maayo ug ang pagpaambit sa mga butang ngadto sa uban’ ingong mga halad nga makapahimuot sa Diyos. (Heb. 13:15, 16) Ang atong tinamdan sa maong mga kalihokan magpadayag kon unsa ka dako ang atong pagpasalamat ug pagpabili sa tanang gihatag ni Jehova kanato. Busa sama sa mga Israelinhon, angay natong susihon ang atong tinamdan ug motibo sa pag-alagad kang Jehova.
Espirituwal nga mga Bahandi
Mga Haylayt Gikan sa Basahon sa Ikaduhang Samuel
23:15-17. Lalom kaayo ang pagtahod ni David sa balaod sa Diyos bahin sa kinabuhi ug dugo nga niining higayona, siya midumili sa pagbuhat bisan sa butang nga daw nahisama rag pagsupak niana nga balaod. Angay natong ugmaron ang ingon niana nga tinamdan sa tanang mga sugo sa Diyos.
AGOSTO 1-7
BAHANDI GIKAN SA PULONG SA DIYOS | 1 HARI 1-2
“Nakakat-on ba Ka sa Imong mga Sayop?”
Solomon
Sa pagkadungog sa tingog sa musika didto sa Gihon, nga dili kaayo halayo, ug sa pagsinggit sa katawhan: “Mabuhi si Haring Solomon,” si Adonias ug ang iyang mga kakunsabo mikalagiw tungod sa kahadlok ug kaguliyang. Gihatag ni Solomon ang usa ka pasiklap sa kalinaw nga magtimaan sa iyang pagmando pinaagi sa pagdumili nga maduhigan ang iyang paglingkod sa trono pinaagi sa pagpanimalos. Kon nabali pa ang mga panghitabo, lagmit gayod nga mamatay si Solomon. Si Adonias mikalagiw ug midangop sa sangtuwaryo, busa si Solomon nagpasugo didto ug nagpadala kang Adonias sa iyang atubangan. Gipahibalo si Adonias nga dili siya patyon gawas kon dunay makaplagan nga daotan diha kaniya, dayon gipapauli siya ni Solomon ngadto sa iyang balay.—1Ha 1:41-53.
Adonias
Ugaling, human mamatay si David, giduol ni Adonias si Bat-seba ug gikombinsir siya nga mahimong iyang tigpataliwala sa atubangan ni Solomon sa paghangyo kaniya nga mahimo unta niyang asawa si Abisag, ang batan-ong tig-alima ug kauban ni David. Ang gipamulong ni Adonias nga “ang pagkahari naakoa unta, ug ngari kanako ang tibuok Israel nagpatumong sa ilang mga nawong aron ako mahimong hari” nagpasabot nga gibati niyang gihikawan siya sa iyang katungod, bisag giila niya nga ang Diyos maoy nagpalakaw sa maong butang. (1Ha 2:13-21) Bisag ang iyang hangyo tingali gipasukad lamang sa tinguha nga makadawat ug bayad tungod kay wala maiya ang gingharian, kini nagpasabot gayod nga ang kusganong ambisyon nagpadayon diha kang Adonias, sanglit maoy lagda sa karaang Sidlakan nga ang mga asawa ug mga puyopuyo sa usa ka hari maiya lamang sa iyang legal nga manununod. (Itandi ang 2Sa 3:7; 16:21.) Gilantaw ni Solomon nga ingon niana kining hangyoa nga gipaagi sa iyang inahan ug gisugo ang pagpatay kang Adonias, nga ang maong sugo gituman dayon ni Benaias.—1Ha 2:22-25.
Espirituwal nga mga Bahandi
Mga Haylayt Gikan sa Basahon sa Unang Hari
2:37, 41-46. Peligroso gayod ang paghunahuna nga mahimong lapason sa usa ka tawo ang balaod sa Diyos ug dili masilotan! Kadtong tinuyong motipas sa pagsubay sa ‘hagip-ot nga dalan padulong sa kinabuhi’ mag-antos sa mga sangpotanan sa maong dili-maalamong desisyon.—Mateo 7:14.
AGOSTO 8-14
BAHANDI GIKAN SA PULONG SA DIYOS | 1 HARI 3-4
“Ang Bili sa Kaalam”
Siya ba Maayong Panig-ingnan Kanimo o Usa ka Pasidaan?
4 Dihang si Solomon nahimong hari, ang Diyos nagpakita kaniya sa damgo ug giingnan siya nga mohangyo sa iyang gusto. Kay nahibalo nga kulang siyag kasinatian, si Solomon nangayog kaalam. (Basaha ang 1 Hari 3:5-9.) Ang Diyos nalipay niini, busa iyang gihatagan si Solomon dili lang sa “usa ka maalamon ug masinaboton nga kasingkasing” kondili sa “bahandi ug himaya” usab. (1 Hari 3:10-14) Si Jesus miingon nga talagsaon kaayo ang kaalam ni Solomon nga sa nadungog kini sa rayna sa Sheba, siya mipanawg layo aron makigkita kang Solomon ug maminaw sa iyang kaalam.—1 Hari 10:1, 4-9.
5 Kita dili makadahom nga milagrosong makadawat ug kaalam. Si Solomon miingon nga “si Jehova magahatag ug kaalam,” apan siya misulat nga kita angayng maningkamot aron mabatonan ang maong diyosnong hiyas: ‘Hatagig pagtagad ang kaalam pinaagi sa imong igdulungog, aron ikiling mo ang imong kasingkasing sa katakos sa pag-ila.’ Labot niana, gigamit niya ang mga ekspresyong sama sa “magasangpit” ug “magapadayon sa pagpangita” sa kaalam. (Prov. 2:1-6) Oo, mahimo natong mabatonan ang kaalam.
6 Maayong mangutana, ‘Gipabilhan ko ba ang kaalam sa Diyos sama sa gihimo ni Solomon?’ Tungod sa kalisod sa ekonomiya, daghan ang nagpokus sa ilang trabaho ug sa pagpangitag salapi o apektado ang ilang desisyon sa pagpilig edukasyon. Komosta ka ug ang imong pamilya? Ang imo bang mga desisyon nagpaila nga imong gipabilhan ug giuna ang kaalam sa Diyos? Kinahanglan ba nimong usbon ang imong prioridad o tumong aron makabatog dugang kaalam? Sa pagkatinuod, ang pagbatog kaalam maghatag ug dumalayong kaayohan. Si Solomon misulat: “Sa ingon ikaw makasabot sa pagkamatarong ug sa paghukom ug sa katul-id, ang kinatibuk-ang dalan kon unsay maayo.”—Prov. 2:9.
Espirituwal nga mga Bahandi
Si Jehova Maoy Usa ka Diyos sa mga Pakigsaad
15 Tungod sa pagkaorganisar na sa mga kaliwat ni Abraham ingong usa ka nasod ubos sa Balaod, si Jehova nagpanalangin kanila sumala sa iyang saad ngadto sa patriarka. Sa 1473 W.K.P., ang kapuli ni Moises, si Josue, maoy nanguna sa Israel ngadto sa Canaan. Ang misangpot nga pagkabahin sa yuta taliwala sa mga tribo nagtuman sa saad ni Jehova nga ang yuta ihatag ngadto sa binhi ni Abraham. Sa dihang nagmatinumanon ang Israel, si Jehova nagtuman sa iyang saad nga sila hatagan ug kadaogan batok sa ilang mga kaaway. Kini matuod ilabina panahon sa pagmando ni Haring David. Sa panahon sa anak ni David nga si Solomon, ang ikatulong bahin sa Abrahamikong pakigsaad natuman. “Ang Juda ug ang Israel maoy daghan, sama sa mga lugas sa balas nga anaa sa daplin sa dagat sa kadaghan, nga nagkaon ug nag-inom ug nagmaya.”—1 Hari 4:20.
AGOSTO 15-21
BAHANDI GIKAN SA PULONG SA DIYOS | 1 HARI 5-6
“Natukod Tungod sa Ilang Pagkugi ug Gugma”
Nahibalo Ka Ba?
Ang mga sedro sa Lebanon ilabinang nabantog tungod sa kadurable, kaanindot, ug kahumot sa kahoy niini, gawas pa sa pagkadili-daling madutlan niini sa mga insekto. Busa, gigamit ni Solomon ang labing dekalidad nga mga materyales alang sa templo. Karon, pipila na lang ang nahibilin sa mga kahoyng sedro nga kanhi milukop sa kabukiran sa Lebanon.
Sedro
Tungod sa kadaghang kahoy nga sedro nga gamiton, gikinahanglan ang pagtrabaho sa libolibo ka trabahante aron sa pagputol sa mga kahoy, ug dad-on kini ngadto sa Tiro o sa Sidon sa daplin sa baybayon sa Mediteranyo, ug himoon kining mga gakit, ug palutawon kini ngadto sa baybayon, lagmit ngadto sa Jope. Dayon kini hakoton latas sa kamad-an ngadto sa Jerusalem. Kini gihimo tungod sa kasabotan tali ni Solomon ug Hiram. (1Ha 5:6-18; 2Cr 2:3-10) Human niadto nagpadayon pagdaghan ang mga tabla, maong gikaingon nga gihimo ni Solomon ang ‘kahoyng sedro ingon kadaghan sa kahoyng sikomoro’ panahon sa iyang paghari.—1Ha 10:27; itandi ang Isa 9:9, 10.
Templo
Sa pag-organisar sa buluhaton, girekluta ni Solomon ang 30,000 ka tawo gikan sa Israel ug gipadala sila ngadto sa Lebanon nga magrelibohay, 10,000 ka tawo kada bulan, nga mopuyo sa ilang mga balay sulod sa duha ka bulan tali sa matag relibohay. (1Ha 5:13, 14) Girekluta niya ang 70,000 ka tawo gikan sa “langyawng mga pumoluyo” diha sa yuta ingong mga tigpas-an ug ang laing 80,000 ingong mga magtatabas sa bato. (1Ha 5:15; 9:20, 21; 2Cr 2:2) Nagtudlo si Solomon ug 550 ka tawo ingong mga kapatas sa buluhaton ug nagtudlo usab siya ug 3,300 ingong ilang mga luyoluyo. (1Ha 5:16; 9:22, 23) Mopatim-aw nga niining tanan 250 maoy mga Israelinhon ug 3,600 maoy “langyawng mga pumoluyo” sa Israel.—2Cr 2:17, 18.
Espirituwal nga mga Bahandi
g 5/12 17, kahon
Ang Bibliya—Basahon sa Tukmang Tagna, Bahin 1
EKSAKTONG PAGTAKDA SA PANAHON
Usa ka pananglitan kon unsa ka importante ang eksaktong pagtakda sa panahon makita diha sa 1 Hari 6:1, nga naghisgot sa panahon dihang ang templo sa Jerusalem gisugdan pagtukod ni Haring Solomon. Kini nag-ingon: “Nahitabo sa ikaupat ka gatos ug kawaloan ka tuig [bug-os nga 479 ka tuig] human sa paggula sa mga anak sa Israel gikan sa yuta sa Ehipto, sa ikaupat ka tuig [nga paghari ni Solomon], sa bulan nga Ziv, nga mao, ang ikaduha nga bulan, human si Solomon mahimong hari sa Israel, nga siya nagtukod sa balay alang kang Jehova.”
Sumala sa kronolohiya sa Bibliya ang ikaupat nga tuig sa paghari ni Solomon maoy sa 1034 B.C.E. Kon moatras tag 479 ka tuig gikan sa maong petsa motakdo kini sa 1513 B.C.E. nga maoy tuig sa pagpanggula sa Israel.
AGOSTO 22-28
BAHANDI GIKAN SA PULONG SA DIYOS | 1 HARI 7
“Ang Atong Makat-onan sa Duha ka Haligi”
‘Gikan sa mga Bukid Kamo Magmina ug Tumbaga’
Si Haring Solomon migamit ug daghang tumbaga alang sa templo sa Jerusalem. Kadaghanan niana naagaw sa iyang amahan, si David, gikan sa Sirya. (1 Cronicas 18:6-8) Ang tumbagang “inumol nga dagatdagat,” ang dakong planggana nga gigamit sa mga saserdote alang sa pagpanghugas, masudlag 66,000 litros ug lagmit mitimbang ug mga 30 toneladas. (1 Hari 7:23-26, 44-46) Unya, sa entrada sa templo dihay duha ka dagkong haligi nga tumbaga. Kini may gihabogong 8 metros, ug may ulo-ulo nga mga 2.2 metros ang gihabogon. Ang mga haligi haw-ang sa sulod, nga 7.5 sentimetros ang gibag-on, ug 1.7 metros ang diyametro. (1 Hari 7:15, 16; 2 Cronicas 4:17) Makapahingangha ang gidaghanon sa tumbaga nga gigamit sa paghimo bisan niini lang mga butanga.
it-1 431
Boaz, II
Sa duha ka dagkong mga haligi nga tumbaga nga gipatindog atubangan sa portiko sa mahimayaong templo ni Solomon, ang haligi dapit sa amihanan ginganlan ug Boaz, nga lagmit nagkahulogang “Kusganon.” Ang haligi dapit sa habagatan gitawag nga Jakin, nga nagkahulogang “Hinaot [si Jehova] Lig-ong Magatukod.” Busa, kon usahon kining duha ka kahulogan ug basahon gikan sa tuo paingon sa wala samtang ang usa moatubang sa S, kini may ideya nga ‘Hinaot [si Jehova] lig-ong magatukod [sa templo] nga kusganon.’—1Ha 7:15-21; tan-awa ang ULO-ULO.
Espirituwal nga mga Bahandi
Pagkaligo
Ang pisikal nga kahinlo gikinahanglan niadtong magasimba kang Jehova diha sa pagkabalaan ug pagkaputli. Gipadayag kini maylabot sa kahikayan sa tabernakulo ug sa pag-alagad diha sa templo sa ulahi. Sa ilang pagpahiluna-sa-katungdanan, ang Hataas nga Saserdoteng si Aaron ug ang iyang mga anak nga lalaki naligo sa wala pa nila isul-ob ang opisyal nga mga besti. (Ex 29:4-9; 40:12-15; Lev 8:6, 7) Sa paghugas sa ilang mga kamot ug mga tiil, ang mga saserdote migamit ug tubig gikan sa dulang nga tumbaga didto sa sawang sa tabernakulo ug, sa ulahi, gikan sa dakong inumol nga dagatdagat didto sa templo ni Solomon. (Ex 30:18-21; 40:30-32; 2Cr 4:2-6) Sa Adlaw sa Pagtabon-sa-Sala ang hataas nga saserdote kaduha maligo. (Lev 16:4, 23, 24) Kadtong nagdala sa kanding alang kang Azazel, sa mga nahibilin sa mga halad nga hayop, ug sa gihalad nga mapulang baka sa gawas sa kampo, kinahanglang magligo sa ilang mga unod ug maglaba sa ilang mga besti sa dili pa mosulod pag-usab sa kampo.—Lev 16:26-28; Num 19:2-10.
AGOSTO 29–SEPTIYEMBRE 4
BAHANDI GIKAN SA PULONG SA DIYOS | 1 HARI 8
“Ang Mapainubsanon, Sinserong Pag-ampo ni Solomon”
Pauswaga ang Kalidad sa Imong Pag-ampo Pinaagi sa Pagtuon sa Bibliya
9 Aron dunggon, kinahanglan nga kinasingkasing ang imong pag-ampo. Si Solomon nagtanyag ug sinserong pag-ampo, nga nasulat sa 1 Hari kapitulo 8, atubangan sa panon sa katawhan nga nagtigom sa Jerusalem alang sa inagurasyon sa templo ni Jehova niadtong 1026 W.K.P. Human ipahiluna ang arka sa pakigsaad didto sa Labing Balaang lawak ug napuno sa panganod ni Jehova ang templo, gidayeg ni Solomon ang Diyos.
10 Tun-i ang pag-ampo ni Solomon, ug matikdi ang paghisgot niana sa kasingkasing. Giila ni Solomon nga si Jehova lamang ang nahibalo sa kasingkasing sa tawo. (1 Hari 8:38, 39) Ang maong pag-ampo nagpakita nga adunay paglaom alang sa nakasala nga ‘mobalik sa Diyos sa bug-os niyang kasingkasing.’ Kon mabihag sa mga kaaway ang katawhan sa Diyos, dunggon ang ilang mga pangaliyupo kon bug-os ang ilang kasingkasing ngadto kang Jehova. (1 Hari 8:48, 58, 61) Nan, angayan gayod nga kinasingkasing ang imong mga pag-ampo.
Iisa ang Maunongong mga Kamot Diha sa Pag-ampo
7 Kita man nag-ampo sa publiko o sa pribado, ang hinungdanong Kasulatanhong prinsipyo nga hinumdoman mao nga kinahanglang ipasundayag nato ang mapainubsanong tinamdan diha sa atong mga pag-ampo. (2 Cronicas 7:13, 14) Si Haring Solomon nagpasundayag ug pagkamapainubsanon diha sa iyang publikong pag-ampo panahon sa pagpahinungod sa templo ni Jehova sa Jerusalem. Bag-o pang nakompleto ni Solomon ang usa sa labing halangdong mga tinukod nga natukod sukad sa yuta. Bisan pa niana, siya mapainubsanong nag-ampo: “Tinuod ba gayod nga ang Diyos mopuyo dinhi sa yuta? Tan-awa! Ang mga langit, oo, ang langit sa mga langit, mismo dili makaigo kanimo; nan, unsa pa kaha ka labing ubos kining balay nga akong gitukod!”—1 Hari 8:27.
8 Sama kang Solomon, kinahanglang magmapainubsanon kita sa dihang nagahawas sa uban diha sa publikong pag-ampo. Bisan tuod kinahanglan natong likayan nga magpakaaron-ingnong balaan, ang pagkamapainubsanon ikapakita pinaagi sa tono sa atong tingog. Ang mapainubsanong mga pag-ampo dili mapahitas-on o tigpakaaron-ingnon. Kini nagdani sa pagtagad, dili sa tawo nga nag-ampo, kondili ngadto sa Usa nga giampoan. (Mateo 6:5) Ang pagkamapainubsanon ikapakita usab pinaagi sa atong giingon diha sa pag-ampo. Kon kita mapainubsanong mag-ampo, dili kita morag nangayo nga buhaton sa Diyos ang pipila ka butang sa atong paagi. Hinunoa, mangaliya kita nga si Jehova molihok sa paagi nga kaharmonya sa iyang balaang kabubut-on. Ang salmista naghatag ug panig-ingnan sa hustong tinamdan sa dihang nangamuyo siya: “Ah, karon, Jehova, luwasa, palihog! Ah, karon, Jehova, ihatag ang kalamposan, palihog!”—Salmo 118:25; Lucas 18:9-14.
Espirituwal nga mga Bahandi
Langit
Si Solomon, ang magtutukod sa templo sa Jerusalem, nag-ingon nga ang “mga langit, oo, ang langit sa mga langit” dili makaigo sa Diyos. (1Ha 8:27) Ingong Maglalalang sa mga langit, ang posisyon ni Jehova mas labaw pa kaayo niining tanan, ug “ang iyang ngalan lamang maoy hataas uyamot. Ang iyang dignidad maoy labaw pa sa yuta ug sa langit.” (Sal 148:13) Si Jehova nagsukod sa pisikal nga kalangitan nga ingon ka sayon sa pagdangaw sa usa ka tawo sa usa ka butang aron kini mahiluna tali sa tumoy sa iyang kumagko ug kumingking. (Isa 40:12) Ang gipahayag ni Solomon wala magpasabot nga ang Diyos walay tinong pinuy-anang dapit. Ni kini nagpasabot nga siya maoy omnipresente, sa diwa nga siya literal nga anaa sa bisan asa nga dapit ug anaa sa bisan unsa nga butang. Kini nga ebidensiya makita tungod kay si Solomon naghisgot usab nga si Jehova naminaw “gikan sa mga langit, ang imong pihong dapit nga puloy-anan,” sa ato pa, ang mga langit nga dominyo sa mga espiritu.—1Ha 8:30, 39.