Reperensiya Para sa Workbook sa Tigom nga Kinabuhi ug Ministeryo
© 2022 Christian Congregation of Jehovah’s Witnesses
ENERO 2-8
BAHANDI GIKAN SA PULONG SA DIYOS | 2 HARI 22-23
“Nganong Angay Tang Magpaubos?”
Ang Mapainubsanong si Josias Nakaangkon sa Pag-uyon ni Jehova
Sukad sa buntag sayo, ang mga tig-ayo sa templo makugihong nagtrabaho. Tinong mapasalamaton si Josias kang Jehova nga ang mga trabahante nagpasig-uli sa kadaot nga gihimo ngadto sa balay sa Diyos sa pipila niya ka daotang mga katigulangan. Samtang nagpadayon ang trabaho, si Safan miabot aron sa pagtaho. Apan unsa kining iyang gidala? Aw, nagdala siya ug usa ka linukot nga basahon! Iyang gisaysay nga nakaplagan sa Hataas nga Saserdote nga si Hilkias “ang basahon sa kasugoan ni Jehova nga sinulat ni Moises.” (2 Cronicas 34:12-18) Pagkatalagsaong kaplag—sa walay duhaduha ang orihinal nga kopya sa Kasugoan!
Naghinamhinam si Josias nga mamati sa matag pulong sa maong basahon. Samtang nagbasa si Safan, gisusi sa hari kon sa unsang paagi ang matag sugo mapadapat kaniya ug sa mga tawo. Ilabinang natandog siya kon sa unsang paagi ang basahon nagpasiugda sa matuod nga pagsimba ug nagtagna sa mga hampak ug sa pagkadestiyero nga mahitabo kon ang mga tawo malangkit sa bakak nga relihiyon. Kay nakaamgo nianang tungora nga dili tanan sa mga sugo sa Diyos ang gituman, gigisi ni Josias ang iyang mga besti ug gisugo si Hilkias, Safan, ug ang uban: ‘Pangutana kang Jehova bahin sa mga pulong niining basahona; kay mosilaob pag-ayo ang kasuko ni Jehova batok kanato tungod kay ang atong mga katigulangan wala magpatalinghog sa mga pulong niining basahona.’—2 Hari 22:11-13; 2 Cronicas 34:19-21.
Ang Mapainubsanong si Josias Nakaangkon sa Pag-uyon ni Jehova
Ang mga mensahero ni Josias nangadto kang Hulda ang manalagnang babaye sa Jerusalem ug mipauli nga may dalang taho. Gipasa ni Hulda ang gipamulong ni Jehova, nga nagpakita nga ang mga kalamidad nga gisulat diha sa bag-ong nakaplagang basahon mahitabo sa apostatang nasod. Apan, tungod sa iyang pagpaubos sa atubangan ni Jehova nga Diyos, si Josias dili makakita sa kalamidad. Pagatigomon siya uban sa iyang mga katigulangan ug dad-on ngadto sa iyang lubnganan diha sa kalinaw.—2 Hari 22:14-20; 2 Cronicas 34:22-28.
Espirituwal nga mga Bahandi
Magmalamposon Ka Bisan Kon Unsa pa ang Paagi sa Pagmatuto Kanimo
Bisan pa sa masakit nga mga kahimtang sayo sa iyang pagkabata, nagpadayon si Josias sa pagbuhat kon unsay maayo sa mga mata ni Jehova. Malamposon kaayo ang iyang pagmando nga ang Bibliya nagkanayon: “Walay hari nga nauna niya nga sama kaniya nga mibalik kang Jehova uban sa bug-os niyang kasingkasing ug uban sa bug-os niyang kalag ug uban sa bug-os niyang kusog, sumala sa tanang balaod ni Moises; ni sunod niya adunay usa nga mitindog nga sama kaniya.”—2 Hari 23:19-25.
Pagkamakapadasig nga panig-ingnan si Josias alang niadtong kinahanglang moagwanta sa usa ka makalilisang nga panahon sa pagkabata! Unsay atong makat-onan sa iyang panig-ingnan? Unsay nakatabang kang Josias sa pagpili sa hustong dalan ug sa pagpabilin diha niana?
ENERO 9-15
BAHANDI GIKAN SA PULONG SA DIYOS | 2 HARI 24-25
“Ayawg Wad-a ang Imong Pagbati sa Pagkadinalian”
Haduol na ang Adlaw ni Jehova sa Paghukom!
2 Ang pagpanagna ni Sofonias sa walay duhaduha nagpaamgo gayod sa batan-ong Josias nga kinahanglang hinloan ang Juda sa mahugaw nga pagsimba. Apan ang mga lihok sa hari sa paghinlo sa yuta sa bakak nga relihiyon wala makapapha sa tanang pagkadaotan gikan sa katawhan o makatabon sa mga sala sa iyang apohan, si Haring Manases, kinsa “nagpuno sa Jerusalem sa inosenteng dugo.” (2 Hari 24:3, 4; 2 Cronicas 34:3) Mao nga ang adlaw ni Jehova sa paghukom seguradong moabot.
Mga Haylayt Gikan sa Basahon ni Jeremias
Ang tuig maoy 607 W.K.P. Ika-11 nga tuig kadto sa pagkahari ni Zedekias. Gilikosan ni Haring Nabukodonosor sa Babilonya ang Jerusalem sulod na sa miaging 18 ka bulan. Sa ikapito ka adlaw sa ikalimang bulan sa ika-19 nga tuig sa paghari ni Nabukodonosor, si Nebuzaradan, ang pangulo sa mga guwardiya sa hari, “misulod,” o miabot, sa Jerusalem. (2 Hari 25:8) Lagmit diha sa iyang kampo sa gawas sa mga paril sa siyudad, gisusi ni Nebuzaradan ang kahimtang ug giplano niya kon unsay himoon. Tulo ka adlaw sa ulahi, sa ikanapulo ka adlaw sa bulan, siya “misulod” sa Jerusalem. Ug iyang gisunog ang siyudad.—Jeremias 52:12, 13.
Espirituwal nga mga Bahandi
Mga Haylayt Gikan sa Basahon sa Ikaduhang Hari
24:3, 4. Sanglit si Manases sad-an sa dugo, si Jehova “wala motugot sa paghatag ug kapasayloan” sa Juda. Si Jehova may pagtamod sa dugo sa mga inosente. Makasalig kita nga panimaslan ni Jehova ang dugo sa mga inosente pinaagi sa paglaglag niadtong responsable sa pag-ula niana.—Salmo 37:9-11; 145:20.
ENERO 16-22
BAHANDI GIKAN SA PULONG SA DIYOS | 1 CRONICAS 1-3
“Ang Bibliya—Basahon sa Kamatuoran, Dili Inimbento”
Tinuod ba nga mga Tawo si Adan ug Eva?
Pananglitan, tagda ang talaan sa kagikan sa mga Hudiyo nga narekord sa Bibliya sa basahon sa Unang Cronicas kapitulo 1 ngadto sa 9 ug diha sa Ebanghelyo ni Lucas kapitulo 3. Ang talaan sa kagikan diha sa basahon sa Cronicas detalyadong naghisgot sa 48 ka henerasyon sa kagikan sa mga hari ug saserdote sa nasod sa Israel, samtang ang basahon ni Lucas naghisgot sa 75 ka henerasyon sa kagikan ni Jesu-Kristo. Ang maong mga talaan naghisgot sa iladong mga tawo sama nila ni Solomon, David, Jacob, Isaac, Abraham, Noe, ug Adan. Ang tanang ngalan nga gihisgotan sa maong mga talaan maoy tinuod nga mga tawo, busa si Adan, nga maoy gigikanan sa mga tawo nga gihisgotan sa matag talaan, tinuod usab nga tawo.
Ang Asoy Bahin Kang Noe ug sa Lunop—Tinuod, Dili Tumotumo
Duha ka talaan sa kagikan diha sa Bibliya ang nagpamatuod nga si Noe naglungtad gayod. (1 Cronicas 1:4; Lucas 3:36) Si Esdras ug Lucas maampingong nagdukiduki bahin nianang maong mga talaan sa kagikan. Gisubay ni Lucas ang kagikan ni Jesu-Kristo ngadto kang Noe.
Tinuod ba nga mga Tawo si Adan ug Eva?
Pananglitan, tagda ang pagtulon-an sa Bibliya nga gituohan sa daghang debotadong tawo—ang halad-lukat. Sumala niini nga pagtulon-an, gihalad ni Jesu-Kristo ang iyang hingpit nga kinabuhi ingong lukat aron ang mga tawo mapasaylo sa ilang kasal-anan. (Mateo 20:28; Juan 3:16) Kita nahibalo nga ang lukat maoy pangtubos nga katugbang ug bili sa butang nga nawala. Mao nga gihubit sa Bibliya si Jesus ingong “katugbang nga lukat.” (1 Timoteo 2:6) Katugbang sa unsa? Ang Bibliya nagtubag: “Kay ingon nga diha kang Adan ang tanan nangamatay, sa ingon usab diha kang Kristo ang tanan pagabuhion.” (1 Corinto 15:22) Ang hingpit nga kinabuhi ni Jesus nga iyang gihalad aron sa pagluwas sa masinugtanong mga tawo maoy katugbang sa hingpit nga kinabuhi nga giwala ni Adan sa dihang siya nakasala didto sa Eden. (Roma 5:12) Dayag nga kon si Adan wala maglungtad, walay bili ang halad-lukat ni Kristo.
Espirituwal nga mga Bahandi
Talaan sa Kagikan
Ngalan sa mga Babaye. Usahay ang mga babaye gilakip diha sa mga talaan sa kagikan kon adunay makasaysayanhong katarongan sa pagbuhat sa ingon. Diha sa Genesis 11:29, 30, si Sarai (Sara) gihisgotan, kini tungod kay ang sinaad nga Binhi mogula pinaagi kaniya, dili pinaagi sa laing asawa ni Abraham. Si Milca lagmit nga ginganlan diha sa samang asoy tungod kay siya mao ang apohang babaye ni Rebeca, ang asawa ni Isaac, sa ingon nagpamatuod nga si Rebeca maoy kaliwat sa mga paryente ni Abraham, sanglit si Isaac dili gayod magkuha ug asawa gikan sa ubang kanasoran. (Gen 22:20-23; 24:2-4) Sa Genesis 25:1, gitala ang ngalan sa ulahing asawa ni Abraham nga si Ketura. Gipakita niini nga si Abraham naminyo pag-usab human mamatay si Sara ug nga ang iyang mga gahom sa pagsanay buhi pa gihapon kapin sa 40 ka tuig human nga kini milagrosong gibuhi ni Jehova. (Rom 4:19; Gen 24:67; 25:20) Dugang pa, gibutyag niini ang relasyon sa Israel uban sa Midian ug sa ubang Arabianhong mga tribo.
Si Lea, Raquel, ug ang mga puyopuyo ni Jacob, lakip ang ilang mga anak nga lalaki, ginganlan diha sa talaan. (Gen 35:21-26) Kini motabang kanato sa pagsabot sa mga pakiglabot sa Diyos niini nga mga anak sa ulahi. Sa samang mga katarongan makita usab nato ang mga ngalan sa ubang mga babaye diha sa mga talaan sa kagikan. Sa dihang gipasa ang usa ka panulondon pinaagi kanila, ang ilang mga ngalan lagmit gilakip. (Num 26:33) Siyempre, si Tamar, Rahab, ug Ruth maoy talagsaon. Sa matag kahimtang, adunay talagsaong katarongan sa pagtala niini nga mga babaye diha sa linya sa kagikan sa Mesiyas, si Jesu-Kristo. (Gen 38; Ru 1:3-5; 4:13-15; Mat 1:1-5) Ang ubang mga pananglitan bahin sa mga babaye nga natala diha sa mga talaan sa kagikan makaplagan sa 1 Cronicas 2:35, 48, 49; 3:1-3, 5.
ENERO 23-29
BAHANDI GIKAN SA PULONG SA DIYOS | 1 CRONICAS 4-6
“Unsay Gipakita sa Akong mga Pag-ampo Bahin Kanako?”
Ang “Tigpatalinghog sa Pag-ampo”
Si Jabez mainampoon nga tawo. Sa sinugdanan sa iyang pag-ampo siya naghangyo sa panalangin sa Diyos. Dayon mihangyo siyag tulo ka butang nga nagpakita sa iyang lig-ong pagtuo sa Diyos.
Una, si Jabez mihangyo: ‘Padak-a ang akong teritoryo.’ (Bersikulo 10) Kining dungganong tawo dili hakog, nga gustong mangilog sa yuta sa uban. Lagmit ang iyang hangyo maoy may kalabotan sa mga tawo, dili sa yuta. Tingali siya naghangyo nga padak-an ni Jehova ang iyang teritoryo sa malinawong paagi aron mas daghang magsisimba sa matuod nga Diyos ang makapuyo.
Ikaduha, si Jabez mihangyo nga ang “kamot” sa Diyos magauban kaniya. Ang simbolikong kamot sa Diyos mao ang iyang gahom, nga gigamit niya sa pagtabang sa iyang mga magsisimba. (1 Cronicas 29:12) Aron dunggon ang iyang mga hangyo, si Jabez misalig sa Diyos kansang kamot dili mubo ngadto sa nagpasundayag ug pagtuo kaniya.—Isaias 59:1.
Ikatulo, si Jabez miampo: ‘Tipigi gayod ako gikan sa kadaotan, aron kini dili makadaot kanako.’ Ang pamulong nga “aron kini dili makadaot kanako” wala magpasabot nga buot niyang makalikay sa kadaot kondili aron maantos niya ang tanang pagkadaotan.
Ang pag-ampo ni Jabez nagpakita sa iyang pagpabili sa matuod nga pagsimba ug sa iyang pagtuo ug pagsalig sa Tigpatalinghog sa pag-ampo. Unsay sanong ni Jehova? Ang hinapos nga mga pulong niining mubong asoy nagkanayon: “Gihatag sa Diyos ang iyang gipangayo.”
Espirituwal nga mga Bahandi
Mga Haylayt Gikan sa Basahon sa Unang Cronicas
5:10, 18-22. Sa mga adlaw ni Haring Saul, gipildi sa mga tribo sa sidlakan sa Jordan ang mga Hagrihanon bisan tuod ang mga Hagrihanon kapin sa duha ka pilo sa ilang gidaghanon. Tungod kini kay ang isog nga mga lalaki niining mga triboha misalig kang Jehova ug nangayo sa iyang tabang. Magbaton kitag bug-os nga pagsalig kang Jehova samtang kita nagapadayon sa atong espirituwal nga pagpakigbugno batok sa mga kaaway nga mas daghan kay kanato.—Efeso 6:10-17.
ENERO 30–PEBRERO 5
BAHANDI GIKAN SA PULONG SA DIYOS | 1 CRONICAS 7-9
“Mahimo Nimo ang Lisod nga mga Asaynment sa Tabang ni Jehova”
Mga Haylayt Gikan sa Basahon sa Unang Cronicas
9:26, 27. Ang Levihanong mga magbalantay sa ganghaan adunay hinungdanong buluhaton. Sila gihatagan ug yawi sa ganghaan sa balaang mga dapit sa templo. Sila matinumanong nagbukas sa mga ganghaan matag adlaw. Kita gipiyalan sa responsabilidad sa pagduaw sa mga tawo sa atong teritoryo ug pagtabang kanila sa pagsimba kang Jehova. Dili ba kita angay nga magmatinumanon usab sama sa Levihanong mga magbalantay sa ganghaan?
Sundoga si Pinehas Dihang Makaatubang Kag Pagsulay
Bug-at ang responsabilidad ni Pinehas sa karaang Israel; apan uban ang kaisog, hait nga salabotan, ug pagsalig sa Diyos, siya milampos bisan pa sa mga pagsulay. Giuyonan ni Jehova ang iyang makugihong pag-atiman sa kongregasyon sa Diyos. Mga 1,000 ka tuig sa ulahi, si Esdras misulat: “Si Pinehas nga anak nga lalaki ni Eleasar mao ang pangulo ibabaw nila sa miaging panahon. Si Jehova nag-uban kaniya.” (1 Cron. 9:20) Hinaot nga tinuod usab kini sa tanang nagapanguna sa katawhan sa Diyos karon ug sa tanang maunongong Kristohanon.
Espirituwal nga mga Bahandi
Mag-awit Kang Jehova!
6 Oo, pinaagi sa iyang mga manalagna si Jehova nagsugo sa iyang mga magsisimba sa pagdayeg kaniya pinaagig awit. Ang mga mag-aawit gikan sa saserdotehanong banay gipahigawas sa mga buluhaton nga gipabuhat sa ubang Levihanon aron makagahin silag igong panahon sa pagkomposog bag-ong mga awit, ug lagmit sa pag-ensayo.—1 Cron. 9:33.
PEBRERO 6-12
BAHANDI GIKAN SA PULONG SA DIYOS | 1 CRONICAS 10-12
“Palig-ona ang Imong Tinguha nga Himoon ang Kabubut-on sa Diyos”
“Tudloi Ako sa Pagbuhat sa Imong Kabubut-on”
12 Angay usab natong sundogon ang pagpabili ni David sa mga prinsipyo sa Balaod ug ang iyang tinguha sa pagpadapat niini. Tagda ang nahitabo dihang si David miingon nga siya giuhaw sa “tubig gikan sa atabay sa Betlehem.” Tulo sa iyang mga tawo mipugos sa pagsulod sa maong siyudad—nga kaniadto sakop sa mga Filistehanon—ug nagkuhag tubig gikan didto. Apan ‘si David midumili sa pag-inom niini, ug nagbubo niini ngadto kang Jehova.’ Ngano? Siya miingon: “Maylabot sa akong Diyos, halayo ra alang kanako ang pagbuhat niini! Imnon ko ba ang dugo niining mga tawhana nga nagpameligro sa ilang mga kalag? Tungod kay sila nagdala niini nga nagpameligro sa ilang mga kalag.”—1 Cron. 11:15-19.
13 Nahibalo si David nga sa Balaod, ang dugo angayng ibubo ngadto kang Jehova ug dili kaonon. Nasabtan usab niya kon nganong ang Balaod nagsugo niini. Nasayod siya nga “ang kalag sa unod anaa sa dugo.” Apan nganong midumili man siya sa pag-inom nga unta tubig man kadto ug dili dugo? Iyang gipabilhan ang prinsipyo sa balaod bahin sa dugo. Alang kang David, ang tubig maoy sama ka bililhon sa dugo sa iyang tulo ka tawo. Busa dili gayod siya makaako sa pag-inom sa tubig, ug nakadesisyon sa pagbubo niini sa yuta.—Lev. 17:11; Deut. 12:23, 24.
Bansaya ang Imong Konsensiya Pinaagi sa mga Balaod ug Prinsipyo sa Diyos
5 Aron makabenepisyo ta sa mga balaod sa Diyos, dili lang kay basta basahon kini o mapamilyar niini. Kinahanglang molalom ang atong gugma ug pagtahod niini. Ang Pulong sa Diyos nag-ingon: “Dumti ang daotan, ug higugmaa ang maayo.” (Amos 5:15) Unsaon nato ni pagbuhat? Kinahanglan natong sundogon ang panglantaw ni Jehova. Sa pag-ilustrar: Ibutang ta nga maglisod kag tulog. Giingnan ka sa imong doktor nga kinahanglan kang mokaog sustansiyadong pagkaon, mag-ehersisyo, ug magbag-o sa imong pagkinabuhi. Human nimo ni buhata, nakita nimo nga epektibo ni! Maapresyar gyod tingali nimo ang doktor sa pagtabang nimo nga mouswag ang imong pagkinabuhi.
6 Sa susama, ang atong Maglalalang naghatag ug mga balaod nga makapanalipod nato gikan sa dili maayong resulta sa sala ug makapauswag sa atong kinabuhi. Hunahunaa lang ang benepisyo sa pagsunod sa mga balaod sa Bibliya maylabot sa pagpamakak, pagpanglimbong, pagpangawat, seksuwal nga imoralidad, kapintasan, ug espiritismo. (Basaha ang Proverbio 6:16-19; Pin. 21:8) Kon matagamtam nato ang maayong resulta sa pagsunod kang Jehova, molalom ang atong gugma ug apresasyon kaniya ug sa iyang mga balaod.
Espirituwal nga mga Bahandi
Kasingkasing
Pag-alagad Uban ang “Bug-os nga Kasingkasing.” Ang literal nga kasingkasing kinahanglang kompleto aron makaobra sa normal nga paagi, apan ang mahulagwayong kasingkasing mahimong mabahin. Si David miampo: “Bug-osa ang akong kasingkasing sa pagkahadlok sa imong ngalan,” nga nagpasabot nga ang kasingkasing sa usa ka tawo mahimong mabahin maylabot sa mga pagbati ug mga kahadlok niini. (Sal 86:11) Ang maong tawo lagmit “dili bug-os ug kasingkasing”—taphawng nagasimba sa Diyos. (Sal 119:113; Pin 3:16) Ang usa ka tawo mahimo usab nga “doble ug kasingkasing” (sa literal, may usa ka kasingkasing ug usa ka kasingkasing), nga nagtinguha sa pag-alagad sa duha ka agalon, o malimbongong nagasulti sa usa ka butang samtang nagahunahuna ug laing butang. (1Cr 12:33; Sal 12:2, ftn sa Rbi8) Gisaway pag-ayo ni Jesus ang maong dobleg-kasingkasing nga pagkasalingkapaw.—Mat 15:7, 8.
Ang usa nga nagtinguha sa pagpahimuot sa Diyos kinahanglang dili magbaton ug dili bug-os nga kasingkasing ni doble ug kasingkasing kondili kinahanglang mag-alagad kaniya uban ang bug-os nga kasingkasing. (1Cr 28:9) Kini nagkinahanglan ug pakigbisog tungod sa pagkadesperado ug sa pagkakiling sa kasingkasing ngadto sa pagkadaotan. (Jer 17:9, 10; Gen 8:21) Ang makatabang sa paghupot ug bug-os nga kasingkasing mao kini: kinasingkasing nga pag-ampo (Sal 119:145; Lam 3:41), regular nga pagtuon sa Pulong sa Diyos (Esd 7:10; Pr 15:28), masibotong pagpakigbahin sa pagwali sa maayong balita (itandi ang Jer 20:9), ug ang pagpakig-uban niadtong kansang mga kasingkasing maoy bug-os ngadto kang Jehova.—Itandi ang 2Ha 10:15, 16.
PEBRERO 13-19
BAHANDI GIKAN SA PULONG SA DIYOS | 1 CRONICAS 13-16
“Ang Pagsunod sa Direksiyon Moresultag Kalamposan”
Mangutana Ka ba, “Hain si Jehova?”
12 Human nga ang arka sa pakigsaad gibalik ngadto sa Israel ug gitipigan didto sa Kiriat-jearim sulod sa daghang tuig, si Haring David nagtinguha sa pagbalhin niana ngadto sa Jerusalem. Iyang gikonsulta ang mga pangulo sa katawhan ug miingon nga ang Arka ibalhin ‘kon daw maayo alang kanila ug kon kini dalawaton kang Jehova.’ Apan wala gayod niya tinoa ang kabubut-on ni Jehova bahin niining butanga. Kon gibuhat pa niya kana, ang Arka dili unta ikarga sa usa ka karomata. Gipas-an unta kini sa Kohatnong mga Levihanon, nga klarong gisugo sa Diyos. Bisan tuod si David kanunay nga nagpakisayod kang Jehova, napakyas siya sa pagbuhat niana sa hustong paagi niining higayona. Ang resulta malaglagon. Si David miangkon sa ulahi: “Ang kasuko ni Jehova nga atong Diyos miulbo batok kanato, tungod kay wala man kita mangita kaniya sumala sa nabatasan.”—1 Cronicas 13:1-3; 15:11-13; Numeros 4:4-6, 15; 7:1-9.
Mangutana Ka ba, “Hain si Jehova?”
13 Sa dihang ang Arka sa kataposan gidala sa mga Levihanon gikan sa balay ni Obed-edom ngadto sa Jerusalem, usa ka awit nga gikomposo ni David ang giawit. Naglakip kini sa kinasingkasing nga pahinumdom: “Pangitaa si Jehova ug ang iyang kusog, pangitaa ang iyang nawong sa kanunay. Hinumdomi ang iyang katingalahang mga buhat nga iyang gihimo, ang iyang mga milagro ug ang hudisyal nga mga hukom sa iyang baba.”—1 Cronicas 16:11, 12.
Espirituwal nga mga Bahandi
Simbaha si Jehova, ang Hari nga Walay Kataposan
14 Gidala ni David sa Jerusalem ang arka sa pakigsaad. Niining malipayong okasyon, ang mga Levihanon miawit ug pagdayeg kang Jehova. Kini dunay hinungdanong ekspresyon nga narekord sa 1 Cronicas 16:31: ‘Isulti sa kanasoran, “Si Jehova nahimong hari!”’ Basin makapangutana ka, ‘Sanglit si Jehova mao ang Hari nga walay kataposan, sa unsang paagi siya nahimong Hari niadtong tungora?’ Si Jehova mahimong Hari dihang ipasundayag niya ang iyang awtoridad o dihang duna siyay itudlo nga magrepresentar kaniya sa usa ka partikular nga panahon o kahimtang. Kining bahina sa pagkahari ni Jehova importante kaayo. Una namatay si David, gisaaran siya ni Jehova nga ang iyang pagkahari magpadayon sa panahong walay tino: “Ako magbangon gayod sa imong binhi sunod kanimo, nga mogula gikan sa imong kahiladmang mga bahin; ug tukoron ko gayod nga malig-on ang iyang gingharian.” (2 Sam. 7:12, 13) Natuman kini nga saad dihang mitungha ang “binhi” ni David kapig 1,000 ka tuig sa ulahi. Kinsa kini, ug kanus-a siya mahimong Hari?
PEBRERO 20-26
BAHANDI GIKAN SA PULONG SA DIYOS | 1 CRONICAS 17-19
“Pabiling Malipayon Bisag Dili Nimo Mahimo ang Imong Gitinguha”
Ipunting ang Hunahuna Diha sa Pagkamaayo sa Organisasyon ni Jehova
SI David sa karaang Israel maoy usa sa labing inilang mga tawo nga gihisgotan sa Hebreohanong Kasulatan. Ang maong magbalantay, musikero, manalagna, ug hari may bug-os nga pagsalig kang Jehova nga Diyos. Ang dulot nga pagmahal ni David kang Jehova maoy nagpukaw sa iyang pangandoy sa pagtukod ug usa ka balay alang sa Diyos. Ang maong balay o templo mahimong sentro sa matuod nga pagsimba sa Israel. Nasayod si David nga ang templo ug ang mga kalihokan sulod niana makapalipay ug makahatag ug mga kaayohan sa katawhan sa Diyos. Busa si David miawit: “Malipayon ang tawo nga imong [Jehova] pilion ug paduolon, aron makapuyo siya diha sa imong mga sawang. Magmatagbawon gayod kami sa maayong mga butang sa imong balay, ang balaang dapit sa imong templo.”—Salmo 65:4.
Magmalipayon sa mga Pribilehiyo nga Imong Nabatonan
11 Sa susama, mapauswag nato ang atong kalipay pinaagi sa pagkugi pag-ayo sa bisan unsang asaynment nga ihatag kanato diha sa pag-alagad kang Jehova. ‘Magmaokupado pag-ayo’ sa buluhatong pagsangyaw, ug makigbahin sa bug-os sa mga buluhaton sa kongregasyon. (Buh. 18:5; Heb. 10:24, 25) Pangandam pag-ayo para sa mga tigom aron makahatag kag makapalig-ong mga komento. Seryosoha ang bisan unsang bahin sa estudyante nga ihatag kanimo panahon sa midweek nga tigom. Kon hangyoon ka sa pagtabang sa usa ka buluhaton diha sa kongregasyon, abot sa hustong oras ug ipakita nga kasaligan ka. Ayaw pakamenosa ang bisan unsang asaynment nga ihatag kanimo, nga maghunahunang dili ni nimo angayng gahinag panahon. Paningkamot nga mouswag ang imong mga kahanas. (Prov. 22:29) Kon magkugi ka pag-ayo sa imong espirituwal nga mga kalihokan ug asaynment, mas paspas ang imong pag-uswag ug mas magmalipayon ka. (Gal. 6:4) Mas sayon pod para nimo nga magmalipayon dihang ang uban makadawat ug pribilehiyo nga gusto unta nimong madawat.—Roma 12:15; Gal. 5:26.
Espirituwal nga mga Bahandi
w20.02 12, kahon
Gihigugma Nato Pag-ayo si Jehova nga Atong Amahan
Nakita ba Ko ni Jehova?
Nakapangutana ka na ba sukad, ‘Sa kadaghan sa tawo sa yuta, nganong hatagan man ko ni Jehova ug atensiyon?’ Daghang maayong tawo ang nakapangutana niana. Si Haring David misulat: “Oh Jehova, unsa ra man ang tawo nga ikaw magtagad man kaniya, ang anak sa tawo nga ikaw mamati man kaniya?” (Sal. 144:3) Masaligon si David nga si Jehova nakaila pag-ayo kaniya. (1 Cron. 17:16-18) Pinaagi sab sa iyang Pulong ug sa iyang organisasyon, gipasaligan ka ni Jehova nga iyang nakita ang imong gugma kaniya. Konsideraha ang pipila sa giingon sa Pulong sa Diyos nga makapakombinsir nimo nga tinuod kana:
• Si Jehova nakakita nimo bisan sa wala pa ka matawo.—Sal. 139:16.
• Si Jehova nahibalo kon unsay naa sa imong kasingkasing ug hunahuna.—1 Cron. 28:9.
• Si Jehova personal nga maminaw sa tanan nimong pag-ampo.—Sal. 65:2.
• Ang imong paggawi makaapektar sa pagbati ni Jehova.—Prov. 27:11.
• Si Jehova personal nga nagkabig nimo.—Juan 6:44.
• Kon ikaw mamatay, si Jehova makabanhaw kanimo kay nakaila siya pag-ayo nimo. Hatagan ka niyag bag-ong lawas ug hunahuna nga parehas sa imong nabatonan karon ug ipasig-uli niya ang imong memorya ug personalidad.—Juan 11:21-26, 39-44; Buh. 24:15.
PEBRERO 27–MARSO 5
BAHANDI GIKAN SA PULONG SA DIYOS | 1 CRONICAS 20-22
“Tabangi ang mga Batan-on nga Molampos”
“Kining mga Butanga Ipiyal sa Matinumanong mga Tawo”
8 Basaha ang 1 Cronicas 22:5. Lagmit gibati ni David nga dili kuwalipikado si Solomon nga modumala nianang dakong proyekto. Kon buot hunahunaon, kinahanglan nga ang templo mahimong “labi gayod ka halangdon,” ug nianang panahona si Solomon “batan-on ug linghod pa.” Bisan pa niana, nahibalo si David nga tabangan ni Jehova si Solomon sa pagdumala sa maong buluhaton. Busa gihimo ni David ang tanan sa pagtabang kaniya, nga nag-andam ug daghan kaayong materyales.
“Kining mga Butanga Ipiyal sa Matinumanong mga Tawo”
7 Wala mangluod si David nga dili siya ang mapasidunggan sa pagtukod sa templo. Gani, ang tinukod nailhan ingong templo ni Solomon, dili kang David. Bisan tingalig nahigawad si David nga dili matuman ang iyang pangandoy, bug-os niyang gisuportahan ang maong proyekto. Nag-organisar dayon siyag mga grupo sa mga trabahador ug nagtigom ug puthaw, tumbaga, plata, bulawan, ug mga kahoy nga sedro. Dugang pa, gidasig niya si Solomon: “Karon, anak ko, hinaot si Jehova magauban kanimo, ug ikaw magmalamposon gayod ug magtukod sa balay ni Jehova nga imong Diyos, ingon sa iyang gisulti mahitungod kanimo.”—1 Cron. 22:11, 14-16.
Mga Ginikanan, Tabangi ang Inyong Anak nga Mokuwalipikar sa Bawtismo
14 Ingong espirituwal nga magbalantay, ang mga ansiyano makasuportar sa ginikanan pinaagi sa pagsultig positibo bahin sa espirituwal nga mga tumong. Usa ka sister nga nagpayunir sa kapig 70 ka tuig nahinumdom sa epekto sa iyang pagpakig-estorya kang Brader Charles T. Russell niadtong sayis anyos pa siya. Siya miingon, “Migahin siyag 15 minutos sa pagpakig-estorya nako bahin sa akong espirituwal nga mga tumong.” Oo, ang positibong mga pulong ug pagdasig may dumalayong epekto. (Prov. 25:11) Puwede pong iapil sa mga ansiyano ang mga ginikanan ug anak sa mga proyekto sa Kingdom Hall, ug hatagan ang mga bata ug buluhaton nga haom sa ilang edad ug abilidad.
15 Ang mga membro sa kongregasyon makatabang sab pinaagi sa pagpakitag haom nga personal nga interes sa mga bata. Apil niana ang pagkaalerto dihang makita ang ilang espirituwal nga pag-uswag. Mihatag ba ang bata ug kinasingkasing, giandam nga komento o may bahin ba siya sa midweek? Nakasukol ba ang bata sa usa ka tentasyon o naningkamot nga makasangyaw sa eskuylahan? Dayega dayon ang bata! Pangitag kahigayonan—unâ ug human sa tigom—sa pagpakig-estorya ug pagpakitag tinuod nga interes sa mga bata. Kon buhaton nato kana, bation nila nga apil sila sa “dako nga kongregasyon.”—Sal. 35:18.
Espirituwal nga mga Bahandi
Mga Haylayt Gikan sa Basahon sa Unang Cronicas
21:13-15. Gisugo ni Jehova ang manulonda nga hunongon ang hampak tungod kay Siya mahunahunaon sa pag-antos sa Iyang katawhan. Sa pagkatinuod, “daghan kaayo ang iyang mga kaluoy.”