Nahibalo Ka Ba?
Nganong maayo nga parehong gidawat ni Jehova ang tukmo ug ang salampati ingong halad?
SA Balaod, ang tukmo ug ang salampati parehong gidawat ni Jehova ingong halad. Sa mga balaod bahin sa paghalad, kining duha ka langgam pirmeng hisgotan nga magkauban. Ang tukmo puwedeng pulihan ug salampati, ug ang salampati puwedeng pulihan ug tukmo. (Lev. 1:14; 12:8; 14:30) Nganong maayo ni? Ang usa ka rason mao nga usahay walay tukmo. Ngano man?
Tukmo
Sa Israel, naay mga tukmo sa init nga mga bulan. Kada Oktubre, mamalhin sila pahabagatan ngadto sa init nga mga nasod ug mamalik sa Israel sa tingpamulak. (Awit 2:11, 12; Jer. 8:7) Busa sa karaang Israel, lisod para sa mga Israelinhon nga maghalad ug tukmo sa tingtugnaw.
Salampati
Pero, ang mga salampati sagad magpondo ra sa Israel sa tibuok tuig. Gawas pa, ang mga Israelinhon nagbuhig salampati. (Itandi ang Juan 2:14, 16.) Ang librong Bible Plants and Animals nag-ingon nga “sa tanang baryo ug lungsod sa Palestina, naay binuhing mga salampati. Kada balay naay lungag diha sa bungbong, o balaybalay, nga kapuy-an sa salampati.”—Itandi ang Isaias 60:8.
Salampati diha sa balaybalay
Gipakita ani nga si Jehova mahigugmaon ug makataronganon kay iyang gidawat ingong halad ang mga langgam nga naa sa Israel sa lainlaing bulan sa tuig.