‘Padayon Mong Maglig-onay’

1. Sumala sa 1 Tesalonica 5:11, unsay gidasig kanato nga buhaton?

NAKASULAY ba ang inyong kongregasyon nga magtukod o mag-renovate ug Kingdom Hall? Kon oo, seguradong nakahinumdom ka sa una nimong pagtambong. Mapasalamaton kaayo ka kang Jehova. Tingali nalipay kaayo ka ug hapit kang nakahilak maong naglisod kag kanta sa pangbukas nga awit. Ang atong maayong pagkatukod nga mga Kingdom Hall makahatag ug kadayeganan kang Jehova. Pero makahatag tag mas dakong kadayeganan kaniya dihang makigbahin ta sa usa pa ka klase sa pagpanukod. Kana nga buluhaton mas importante pa kay sa pagpanukod ug mga bilding. Apil niining klaseha sa pagpanukod ang pagpalig-on sa mga tawo nga naggamit sa maong mga dapit sa pagsimba. Gani, si apostol Pablo migamit ug pulong nga puwede pong magkahulogan ug “magtukod” aron ipasabot ang ideya nga maglig-onay, nga makita sa atong temang teksto sa 1 Tesalonica 5:11.—Basaha.

2. Unsay atong hisgotan niining artikuloha?

² Si apostol Pablo nagpakitag maayo kaayong ehemplo sa pagpalig-on sa iyang mga isigkamagtutuo. Duna siyay empatiya kanila. Niining artikuloha, atong konsiderahon kon giunsa niya pagtabang ang mga igsoon nga (1) makalahutay sa mga pagsulay, (2) makigdait sa usag usa, ug (3) mapalig-on ang ilang pagtuo kang Jehova. Susihon nato kon unsaon nato siya pagsundog aron mapalig-on nato ang mga igsoon.—1 Cor. 11:1.

GITABANGAN NI PABLO ANG MGA IGSOON NGA MAKALAHUTAY SA MGA PAGSULAY

3. Giunsa pagpakita ni Pablo nga balanse siya sa iyang mga buluhaton?

³ Gimahal pag-ayo ni Pablo ang mga igsoon. Siya mismo nakasinatig mga kalisdanan, busa nakapakita siyag kaluoy ug empatiya sa mga igsoon dihang nag-atubang silag mga pagsulay. Dihay panahon nga si Pablo wala nay kuwarta, maong kinahanglan siyang manarbaho aron matagan-an ang iyang panginahanglan ug nianang sa iyang mga kauban. (Buh. 20:34) Tighimo siyag tolda. Pag-abot niya sa Corinto, nagtrabaho siya uban ni Aquila ug Priscila nga tighimo sab ug tolda. Pero sa “matag igpapahulay,” sangyawan niya ang mga Hudiyo ug Grego. Dayon, pag-abot ni Silas ug Timoteo, “si Pablo okupado kaayo sa pulong.” (Buh. 18:2-5) Wala gyod malimot si Pablo sa pangunang katuyoan sa iyang kinabuhi, ang pag-alagad kang Jehova. Tungod sa iyang pagkugi, nakadasig siya sa mga igsoon. Iyang gipahinumdoman sila nga dili tugotan ang mga kalisdanan ug ang responsibilidad sa pagtagana sa pamilya nga mahimong hinungdan nga mapasagdan ang “mas importanteng mga butang”—ang tanang bahin sa pagsimba kang Jehova.—Filip. 1:10.

4. Giunsa pagtabang ni Pablo ug Timoteo ang mga igsoon aron malahutay ang paglutos?

⁴ Human maporma ang kongregasyon sa Tesalonica, ang bag-ong mga magtutuo nakaatubang ug grabeng paglutos. Dihang si Pablo ug Silas wala makit-i sa pintas nga mga magsusupak, ilang gidala ang pipila sa “mga igsoon ngadto sa mga magmamando sa siyudad,” ug misinggit: “Kini silang tanan milihok nga supak sa mga mando sa Cesar.” (Buh. 17:6, 7) Ma-imagine ba nimo ang kahadlok sa bag-ong nakabig nga mga Kristohanon dihang nahibaloan nila nga gidumtan sila sa mga tawo sa siyudad? Posible nga makapaluya to nila sa pag-alagad kang Jehova, pero dili gusto ni Pablo nga mahitabo nâ. Bisag siya ug si Silas kinahanglang mobiya, gipaneguro nila nga maatiman pag-ayo ang bag-ong kongregasyon. Gipahinumdoman ni Pablo ang mga taga-Tesalonica: “Gipadala namo si Timoteo, nga atong igsoon . . . , aron palig-onon ug hupayon mo maylabot sa inyong pagtuo, aron walay maluya kaninyo sa mga kasakitan.” (1 Tes. 3:2, 3) Dakog posibilidad nga si Timoteo nakasinatig paglutos sa ilang siyudad sa Listra. Nakita niya kon giunsa pagpalig-on ni Pablo ang mga igsoon didto. Kay nakita ni Timoteo ang tabang ni Jehova, mapasaligan niya ang bag-ong mga igsoon nga moarang-arang ra ang ilang kahimtang.—Buh. 14:8, 19-22; Heb. 12:2.

5. Sa unsang paagi si Bryant nakabenepisyo sa tabang sa usa ka ansiyano?

⁵ Unsa pay gihimo ni Pablo aron palig-onon ang mga igsoon? Pagbalik ni Pablo ug Bernabe sa Listra, Iconio, ug Antioquia, “nagtudlo silag mga ansiyano alang kanila sa matag kongregasyon.” (Buh. 14:21-23) Seguradong ang maong mga ansiyano nakahatag ug paghupay sa mga kongregasyon. Ingon ana pod ang mga ansiyano karon. Matikdi ang giingon sa brader nga si Bryant: “Niadtong 15 anyos ko, gibiyaan mi ni Papa, ug si Mama na-disfellow. Mibati kong nag-inusara, ug naguol kaayo ko.” Unsay nakatabang kang Bryant? Siya miingon: “Ang ansiyano nga si Tony makig-estorya nako diha sa mga tigom ug sa ubang panahon. Iya kong giestoryahan bahin niadtong nag-atubang ug mga pagsulay pero nagmalipayon gihapon. Iyang gipabasa nako ang Salmo 27:10 ug pirme siyang maghisgot bahin kang Ezequias nga matinumanong nag-alagad kang Jehova bisag ang iyang amahan wala magmatinumanon.” Sa unsang paagi ni nakatabang kang Bryant? Siya miingon: “Tungod sa pagdasig ni Tony, misulod ko sa bug-os panahong pag-alagad ug nagmalipayon ko.” Mga ansiyano, kinahanglang abtik mo sa pagtabang niadtong, sama kang Bryant, nanginahanglag “maayong pulong” sa pagdasig.—Prov. 12:25.

6. Giunsa paggamit ni Pablo ang mga estorya sa kinabuhi aron dasigon ang mga igsoon?

⁶ Gipahinumdoman ni Pablo ang mga Kristohanon nga naay “bagang panganod sa mga saksi” nga nakalahutay sa mga kalisdanan tungod kay gihatagan sila ni Jehova ug kusog. (Heb. 12:1) Nahibalo si Pablo nga ang estorya sa kinabuhi niadtong mga nakalahutay sa tanang klase sa kalisdanan makapalig-on sa mga Kristohanon ug makatabang nila nga magpokus sa “siyudad sa buhing Diyos.” (Heb. 12:22) Tinuod pod nâ karon. Dili ba napalig-on ta dihang gibasa nato kon giunsa pagtabang ni Jehova si Gideon, Barak, David, Samuel, ug uban pa? (Heb. 11:32-35) Seguradong napalig-on pod ta sa pagtuo nga gipakita sa mga igsoon sa modernong panahon. Sa hedkuwarter, pirme tang makadawat ug sulat gikan sa mga igsoon nga napalig-on human sila makabasa bahin sa kinabuhi sa matinumanong mga alagad ni Jehova sa modernong panahon.

GIPAKITA NI PABLO SA MGA IGSOON KON UNSAON PAGPAKIGDAIT

7. Unsay imong nakat-onan sa tambag ni Pablo sa Roma 14:19-21?

⁷ Mapalig-on nato ang mga igsoon dihang maningkamot ta nga makaamot sa kalinaw sa kongregasyon. Dili nato tugotan nga ang atong managlahing opinyon makapabahinbahin nato. Ug dili nato ipamugos ang atong katungod kon walay nalapas nga prinsipyo sa Bibliya. Tagda ang pananglitan kaniadto sa kongregasyon sa Roma, nga may Hudiyo ug Hentil nga mga Kristohanon. Dihang giwala ang Moisesnong Balaod, dili na kinahanglang sundon ang mga balaod nga nagdili sa pipila ka pagkaon. (Mar. 7:19) Sukad adto, ang pipila ka Hudiyong Kristohanon mokaon na sa maong mga pagkaon. Pero ang ubang Hudiyong Kristohanon mahasol gihapon sa pagkaon niini. Tungod sa maong isyu, nagkabahinbahin ang mga igsoon. Busa gipasiugda ni Pablo ang kaimportante sa pagmentinar sa kalinaw. Siya miingon: “Maayo pag dili na lang mokaog karne o moinom ug bino o mohimog bisan unsa kon makapandol kini sa imong igsoon.” (Basaha ang Roma 14:19-21.) Pinaagi ana, gitabangan ni Pablo ang mga Kristohanon nga makita kon unsa ka grabe ang epekto sa maong mga panaglalis ngadto sa mga igsoon ug sa kongregasyon. Andam pod siyang mohimog mga kausaban aron dili mapandol ang uban. (1 Cor. 9:19-22) Sama kang Pablo, atong mapalig-on ang uban ug mamentinar ang kalinaw kon dili nato ipamugos ang atong gusto.

8. Unsay gihimo ni Pablo dihang ang usa ka importanteng isyu nagpameligro sa kalinaw sa kongregasyon?

⁸ Si Pablo naghatag ug maayong ehemplo sa pagpakigdait niadtong wala mouyon sa iyang panghunahuna bahin sa importanteng mga butang. Pananglitan, ang pipila ka Kristohanon sa unang siglo miingon nga kinahanglan gyong magpatuli ang kinabig nga mga Hentil, tingali aron dili sawayon sa mga Hudiyo. (Gal. 6:12) Wala gyod mouyon si Pablo niana, pero imbes ipamugos ang iyang panghunahuna, mapainubsanon niyang gidala ang isyu ngadto sa mga apostoles ug mga ansiyano sa Jerusalem. (Buh. 15:1, 2) Ingong resulta, iyang natabangan ang maong mga Kristohanon nga mamentinar ang kalipay ug kalinaw sa kongregasyon.—Buh. 15:30, 31.

9. Sa unsang paagi masundog nato ang panig-ingnan ni Pablo?

⁹ Kon motungha ang grabeng panaglalis, mamentinar nato ang kalinaw kon mangayo tag giya niadtong gitudlo ni Jehova sa pag-atiman sa kongregasyon. Sagad, ang giya nga gibase sa Bibliya makita diha sa atong mga publikasyon o sa mga guideline nga gitagana sa organisasyon. Kon magpokus ta sa pagsunod niini nga mga instruksiyon imbes ipamugos ang atong mga opinyon, makaamot ta sa kalinaw sa kongregasyon.

10. Unsa pay gihimo ni Pablo aron mamentinar ang kalinaw sa kongregasyon?

¹⁰ Nakatabang si Pablo nga mamentinar ang kalinaw pinaagi sa pagpokus sa maayong mga hiyas sa mga igsoon, dili sa ilang negatibong kinaiya. Pananglitan, sa hinapos sa iyang sulat para sa mga taga-Roma, ginganlan ni Pablo ang daghang Kristohanon didto ug nagsulti pa gyod siyag positibong detalye bahin nila. Masundog nato si Pablo kon isulti nato ang maayong mga hiyas sa atong mga igsoon. Kon ato nang himoon, makatabang ta nga mas magkasuod ug maghigugmaay ang mga igsoon, nga makapalig-on sa kongregasyon.

11. Sa unsang paagi mabalik nato ang kalinaw dihang motungha ang dili pagsinabtanay?

¹¹ Usahay, bisan ang hamtong nga mga Kristohanon dili magkauyon o maglalis pa gani. Nahitabo nâ kang Pablo ug sa iyang suod nga higala nga si Bernabe. Wala sila magkauyon kon paubanon ba nila si Marcos sa sunod nilang misyonaryong panaw. “Naglalis sila pag-ayo” maong wala na sila mag-uban. (Buh. 15:37-39) Pero gipaningkamotan ni Pablo, Bernabe, ug Marcos nga mabalik ang ilang maayong relasyon, nga nagpakita nga importante nila ang kalinaw ug panaghiusa sa kongregasyon. Sa ulahi, si Pablo misultig maayong mga butang bahin kang Bernabe ug Marcos. (1 Cor. 9:6; Col. 4:10) Kon naay mga igsoon nga wala nato ikasinabot, kinahanglang maningkamot ta nga husayon ang problema ug dayon magpokus sa ilang maayong mga hiyas. Nianang paagiha, mamentinar nato ang kalinaw ug panaghiusa.—Efe. 4:3.

GIPALIG-ON NI PABLO ANG PAGTUO SA MGA IGSOON

12. Unsa ang pipila ka kalisdanan nga giatubang sa mga igsoon?

¹² Mapalig-on nato ang mga igsoon kon palig-onon nato ang ilang pagtuo kang Jehova. Ang uban gibiaybiay sa ilang dili Saksing mga membro sa pamilya, katrabaho, o schoolmate. Ang uban naay grabeng sakit o naglisod pagwala sa kasakit nga ilang gibati tungod sa gihimo sa uban. Ang uban pod daghang tuig na sa kamatuoran ug dugay nang nagpaabot sa kataposan niini nga sistema sa mga butang. Kini nga mga kahimtang mahimong magsulay sa pagtuo sa mga Kristohanon karon. Ang mga Kristohanon sa unang siglo nakaatubang pod ug susamang mga kalisdanan. Giunsa pagpalig-on ni Pablo ang mga igsoon?

13. Giunsa pagtabang ni Pablo kadtong gibiaybiay tungod sa ilang mga gituohan?

¹³ Gigamit ni Pablo ang Kasulatan aron palig-onon ang pagtuo sa mga igsoon. Pananglitan, ang Hudiyong mga Kristohanon wala tingali mahibalo kon unsaon pagtubag ang ilang dili magtutuong mga membro sa pamilya nga nag-ingon nga ang Judaismo mas labaw sa Kristiyanidad. Seguradong ang sulat ni Pablo ngadto sa mga Hebreohanon nakapalig-on pag-ayo sa maong mga Kristohanon. (Heb. 1:5, 6; 2:2, 3; 9:24, 25) Puwede nilang gamiton ang iyang makapakombinsir nga mga pangatarongan aron matubag ang mga magsusupak. Karon, puwede pod natong tabangan ang gibiaybiay nga mga igsoon sa paggamit sa atong mga publikasyon nga gibase sa Bibliya aron ipatin-aw ang ilang mga gituohan. Ug kon ang mga batan-on giyagayagaan kay nagtuo sila sa paglalang, matabangan nato sila nga mag-research gamit ang mga brosyur nga Gilalang ba ang Kinabuhi? ug The Origin of Life—Five Questions Worth Asking aron mapatin-aw nila kon nganong nagtuo sila nga gilalang ang kinabuhi.

14. Bisag busy si Pablo sa pagsangyaw ug pagpanudlo, unsa pay iyang gihimo?

¹⁴ Gidasig ni Pablo ang mga igsoon nga magpakitag gugma pinaagig “maayong mga buhat.” (Heb. 10:24) Iyang gitabangan sila, dili lang pinaagi sa iyang gisulti, kondili sa iya pong gibuhat. Pananglitan, dihang ang mga igsoon sa Judea nakasinatig kagutom, apil si Pablo sa nagdalag hinabang para nila. (Buh. 11:27-30) Gani, bisag busy si Pablo sa pagsangyaw ug pagpanudlo, kanunay siyang nangitag paagi aron tabangan kadtong nanginahanglag tabang. (Gal. 2:10) Pinaagi niana, iyang gipalig-on ang pagsalig sa mga igsoon nga dili sila pasagdan ni Jehova. Karon, mapalig-on sab nato ang pagtuo sa mga igsoon kon gamiton nato ang atong panahon, kusog, ug kahanas sa pagboluntaryo sa pagpanghatag ug hinabang. Mahimo sab nato nâ pinaagi sa regular nga paghatag ug donasyon para sa tibuok kalibotang buluhaton. Niini ug sa uban pang paagi, matabangan nato ang mga igsoon nga mosalig nga dili gyod sila pasagdan ni Jehova.

15-16. Sa unsang paagi matabangan nato ang mga igsoon nga mihuyang ang pagtuo?

¹⁵ Wala mohunong si Pablo sa pagtabang niadtong mihuyang ang pagtuo. Nagpakita siyag kaluoy kanila ug nakigsulti kanila sa makapadasig nga paagi. (Heb. 6:9; 10:39) Pananglitan, sa tibuok niyang sulat para sa mga Hebreohanon, kadaghan niyang gigamit ang pulong ‘kita’ ug “nato,” nga nagpakita nga kinahanglan pod niyang ipadapat ang iyang tambag. (Heb. 2:1, 3) Sama kang Pablo, dili pod ta mohunong sa pagtabang sa mga igsoon nga mihuyang ang pagtuo. Hinuon, palig-onon nato sila pinaagi sa pagpakitag tinuod nga interes kanila. Pinaagi niini, atong gipakita nga gimahal nato sila. Kon makig-estorya ta nila sa buotan ug lumo nga paagi, madasig ug mapalig-on nato sila.

¹⁶ Gipasaligan ni Pablo ang mga igsoon nga si Jehova nahibalo sa ilang maayong mga buhat. (Heb. 10:32-34) Masundog nato si Pablo dihang tabangan nato ang mga igsoon nga mihuyang ang pagtuo. Puwede nato silang pangutan-on kon sa unsang paagi sila nakakat-on sa kamatuoran, o dasigon sila nga hinumdoman ang mga panahon nga gitabangan sila ni Jehova. Dayon, pasaligan nato sila nga wala malimot si Jehova sa gugma nga ilang gipakita ug nga dili sila biyaan ni Jehova. (Heb. 6:10; 13:5, 6) Pinaagi niini, tingali madasig ang maong minahal nga mga igsoon nga mopadayon sa pag-alagad.

“PADAYON MONG MAGDINASIGAY”

17. Sa unsang paagi mahimo tang mas epektibo sa pagpalig-on sa uban?

¹⁷ Sama nga mapauswag sa usa ka construction worker ang iyang mga kahanas paglabay sa panahon, naa pod tay mahimo aron mas epektibo natong mapalig-on ang uban. Matabangan nato ang uban nga molig-on ug makalahutay sa mga pagsulay pinaagi sa paggamit sa ehemplo niadtong mga nakalahutay. Makaamot ta sa kalinaw kon isulti nato ang maayong mga hiyas sa uban, kon dili nato ipamugos ang atong kaugalingong mga opinyon, ug kon maningkamot ta nga mabalik ang maayong relasyon dihang motungha ang dili pagsinabtanay. Ug padayon natong mapalig-on ang pagtuo sa mga igsoon pinaagi sa pagpahinumdom nila sa importanteng mga kamatuoran sa Bibliya, paghatag ug praktikal nga tabang, ug pagdasig niadtong naluya sa espirituwal.

18. Unsay determinado nimong himoon?

¹⁸ Kadtong miboluntaryo sa atong mga proyekto sa pagpanukod mibatig kalipay ug katagbawan. Kita sab mobatig kalipay ug katagbawan dihang makigbahin ta sa espirituwal nga pagpanukod—ang pagpalig-on sa pagtuo sa mga igsoon. Dili sama sa mga bilding nga sa kadugayan maguba ra, ang resulta sa atong buluhaton molungtad hangtod sa hangtod! Hinaot nga magmadeterminado ta nga ‘padayong magdinasigay ug maglig-onay.’—1 Tes. 5:11.