Ang Basahon sa Job Makatabang Nimo Dihang Makaatubang Kag mga Kalisdanan

1-2. Unsa ang pipila ka rason kon nganong ang basahon sa Job nindot basahon?

NABASA na ba nimo ang basahon sa Job? Karaan na kaayo ni nga basahon kay gisulat ni mga 3,500 ka tuig kanhi. Pero usa gihapon ni sa mga kinanindotan nga basahon sa tibuok kalibotan. Gani ang usa ka reperensiya nag-ingon nga dili gyod bastabasta ang magsusulat niini, kay maayo kaayo ning pagkabalay, sayon ra sabton, ug makapatandog sa kasingkasing. Si Moises ang nagsulat niining talagsaon nga basahon, pero ang tinuod nga Awtor niini mao si Jehova nga Diyos.—2 Tim. 3:16.

² Ang basahon sa Job importante kaayo nga bahin sa Bibliya. Ngano? Kay klarong gipakita niini ang dakong isyu nga giatubang sa tanang intelihenteng linalang—ang pagbalaan sa ngalan ni Jehova. Nagtudlo pod ni nato bahin sa nindot kaayo nga mga hiyas ni Jehova, sama sa iyang gugma, kaalam, hustisya, ug gahom. Pananglitan, niini nga basahon, si Jehova 31 ka beses nga gitawag ug “Labing Gamhanan.” Kini nga titulo mas kadaghang makita dinhi nga basahon kon itandi sa ubang basahon sa Bibliya, bisag totalon pa ning tanan. Makita pod diha sa basahon sa Job ang tubag sa daghang mga pangutana bahin sa kinabuhi, apil na ang usa ka komon kaayo nga pangutana: Nganong gitugotan man sa Diyos ang pag-antos?

3. Unsay mga kaayohan kon atong tun-an ang basahon sa Job?

³ Ang basahon sa Job makatabang nato nga mas makita ang mga pagsulay sumala sa panglantaw ni Jehova, nga sama bag naa ta sa habog nga lugar diin mas klaro natong makita ang palibot. Busa atong susihon kon sa unsang paagi ang estorya sa kinabuhi ni Job nakatabang tingali sa ubang Israelinhon kaniadto. Susihon pod nato kon sa unsang paagi makatabang ni nato karon dihang makaatubang tag mga kalisdanan. Ato pong makat-onan kon unsaon nato paggamit ang basahon sa Job sa pagtabang sa uban.

GITUGOTAN SA DIYOS NGA MAG-ANTOS SI JOB

4. Nganong lahi kaayo si Job sa mga Israelinhon sa Ehipto?

⁴ Si Job nagpuyo sa yuta sa Uz, nga posibleng nahimutang sa sidlakan sa Yutang Saad ug sa amihanan sa Arabia. Niadtong panahona, ang mga Israelinhon nag-antos ingong mga ulipon sa Ehipto ug nagsimba na sa mga idolo didto. Pero lahi kaayo si Job kay matinumanon siyang nag-alagad kang Jehova. (Jos. 24:14; Ezeq. 20:8) Si Jehova miingon bahin kang Job: “Walay usa nga sama kaniya sa yuta.”a (Job 1:8) Si Job tinahod kaayo, ug siya ang kinadatoan sa tanang tawo sa Sidlakan. (Job 1:3) Puwerte gyod segurong lagota ni Satanas nga makitang nag-alagad nga matinumanon kang Jehova kining prominente ug iladong tawo.

5. Nganong gitugotan ni Jehova nga mag-antos si Job? (Job 1:​20-22; 2:​9, 10)

⁵ Si Satanas miingon nga si Job moundang sa pagsimba kang Jehova kon mag-antos siya. (Job 1:​7-11; 2:​2-5) Kini nga akusasyon ni Satanas nagpatunghag daghang importanteng isyu, mao nga bisag gimahal kaayo ni Jehova si Job, Iyang gitugotan si Satanas nga pamatud-an ang iyang akusasyon. (Job 1:​12-19; 2:​6-8) Busa gikuha ni Satanas ang tanang nabatonan ni Job—ang iyang mga kahayopan ug ang iyang 10 ka anak. Iya pa ganing gihampak si Job ug ngutngot kaayong mga hubag, gikan sa lapalapa hangtod sa iyang alimpulo. Bangis gyod kaayo si Satanas. Pero bisan pa sa mga paningkamot ni Satanas, wala gyod wad-a ni Job ang iyang integridad. (Basaha ang Job 1:​20-22; 2:​9, 10.) Sa ngadtongadto, gipasig-uli ni Jehova ang iyang maayong panglawas, reputasyon, ug kadato. Gihatagan pa gani niya si Job ug 10 pa ka anak. Gipun-an pod ni Jehova ug 140 ka tuig ang kinabuhi ni Job, maong nakita pa niya ang iyang mga apo ug bisan ang mga apo sa iyang mga apo. (Job 42:​10-13, 16) Unsa kahay nakat-onan sa mga alagad sa Diyos kaniadto gikan sa kinabuhi ni Job, ug unsay atong makat-onan niini?

6. Unsa kahay nakat-onan sa mga Israelinhon gikan sa kinabuhi ni Job? (Tan-awa sab ang hulagway.)

⁶ Kon unsay nakat-onan sa mga Israelinhon. Dili gyod sayon ang kinabuhi sa mga Israelinhon didto sa Ehipto. Pananglitan, si Josue ug Caleb nag-antos ingong mga ulipon niadtong batan-on pa sila. Naglatagaw pa gyod silag 40 ka tuig didto sa kamingawan tungod sa pagkamasinupakon sa uban. Kon nahibalo ang mga Israelinhon bahin sa mga kalisdanan ni Job ug sa resulta sa iyang pagkamatinumanon, seguradong nakatabang to nila ug sa ilang sunod nga mga henerasyon nga masabtan kon kinsa gyoy hinungdan sa pag-antos. Nakatabang pod to nila nga masabtan kon nganong gitugotan sa Diyos ang pag-antos ug kon unsa ka dako ang iyang gugma sa iyang mga alagad nga padayong nagmatinumanon kaniya.

7-8. Sa unsang paagi ang basahon sa Job makatabang niadtong mga nag-antos? Paghatag ug pananglitan.

⁷ Kon unsay atong makat-onan. Makapaguol nga daghan karon ang nawad-ag pagtuo sa Diyos kay wala sila makasabot kon nganong nag-antos bisan ang maayong mga tawo. Konsideraha ang eksperyensiya ni Hazelb nga taga-Rwanda. Niadtong bata pa siya, nagtuo siya sa Diyos. Pero nausab ang tanan tungod sa mga panghitabo sa iyang kinabuhi. Ang iyang mga ginikanan nagbulag, ug ang iyang mama naminyog lain kinsa nagmaltratar kang Hazel. Dayon pagkatin-edyer niya, naay nanglugos niya. Dihang miadto si Hazel sa ilang simbahan, wala niya madawat ang paghupay nga iyang gikinahanglan. Sa ngadtongadto, naghimo siyag sulat para sa Diyos. Siya miingon: “Ginoo, nag-ampo man unta ko nimo, ug naningkamot man ko nga mohimog maayo. Pero nganong daotan man ang imong gibalos nako? Dili na ko nimo! Sukad karon, himoon na nako kon unsay makapalipay nako. Bahala na ka diha; biyaan na ti ka.” Sama kang Hazel, daghan karon ang nagtuo nga ang Diyos ang hinungdan sa ilang mga pag-antos. Maguol gyod kaayo ta para nila!

⁸ Pero sa atong bahin, nakat-onan nato sa basahon sa Job nga dili ang Diyos ang hinungdan sa atong mga pag-antos, kondili si Satanas. Nakat-onan pod nato nga kon ang usa nag-antos, dili ta angayng maghunahuna nga naa siyay nahimong dili maayo maong gisilotan siya. Ang Bibliya nag-ingon nga “ang panahon ug ang wala damhang panghitabo” puwedeng modangat natong tanan. (Eccl. 9:11; Job 4:​1, 8) Ato pong nahibaloan nga kon magmatinumanon ta bisan pa sa mga pagsulay, gitabangan nato si Jehova nga matubag ang akusasyon ni Satanas ug madepensahan ang Iyang reputasyon. (Job 2:3; Prov. 27:11) Gipabilhan gyod nato kini nga mga kamatuoran kay nakatabang ni nato nga mas masabtan kon nganong nag-antos ta ug ang atong mga minahal. Si Hazel, nga gihisgotan ganina, nagpa-Bible study sa mga Saksi ni Jehova. Dihang iya nang nasabtan nga dili diay ang Diyos ang hinungdan sa iyang pag-antos, siya miingon: “Miampo kog balik sa Diyos, ug akong gibawi ang akong giingon sa una nga biyaan na nako siya. Adtong panahona, wala pa man god ko makaila niya. Pero karon, nasabtan na nako nga gimahal gyod ko ni Jehova. Malipayon ug kontento na ko sa akong kinabuhi.” Sama kang Hazel, mapasalamaton gyod ta nga nasabtan nato kon nganong gitugotan sa Diyos ang pag-antos. Karon atong hisgotan kon sa unsang paagi ang basahon sa Job makatabang nato dihang makaatubang tag kalisdanan.

KON SA UNSANG PAAGI ANG BASAHON SA JOB MAKATABANG NATO SA PAGLAHUTAY

9. Unsay kahimtang ni Job dihang gihampak siya ni Satanas? (Santiago 5:11)

⁹ Imadyina si Job nga naglingkod diha sa yuta. Napuno siyag ngutngot kaayong mga hubag ug nagtikuko tungod sa kasakit. Niwang na kaayo siya, ug ang iyang panit nangitom na ug nangapaksit. Iyang gikagis ang iyang kaugalingon gamit ang mga tipak sa kulon, ug nagsige siyag pahungaw sa kasakit nga iyang gibati. Morag luoy na gyod kaayong tan-awon si Job, pero ang tinuod, naningkamot siya nga molahutay. (Basaha ang Santiago 5:11.) Unsay nakatabang kang Job nga molahutay?

10. Nganong makaingon ta nga suod si Job kang Jehova?

¹⁰ Gisulti ni Job kang Jehova kon unsa gyoy naa sa iyang kasingkasing. (Job 10:​1, 2; 16:20) Pananglitan, mabasa nato sa kapitulo 3 nga gipahungaw ni Job ang kapait nga iyang gibati tungod sa mga trahedya nga nahitabo niya, nga abi niyag gikan kang Jehova. Dayon, dihang giakusahan siya sa iyang tulo ka nagpakaaron-ingnong higala, gidepensahan pag-ayo ni Job ang iyang kaugalingon, ug sagad kang Jehova pa gani siya mismo nangatarongan. Naa pa gani mga higayon nga giisip niya ang iyang kaugalingon nga mas matarong kay sa Diyos. (Job 10:​1-3; 32:​1, 2; 35:​1, 2) Pero siya miangkon nga sa iyang paningkamot nga depensahan ang iyang kaugalingon, naay mga panahon nga ‘nagpasagad na lang siyag sulti.’ (Job 6:​3, 26) Dayon sa kapitulo 31, gusto ni Job nga mosulti mismo si Jehova nga dili siya angayng makasinati sa maong mga trahedya kay wala siyay gihimong daotan. (Job 31:35) Pero siyempre, nahibalo ta nga walay katungod si Job sa paghimo adto.

11. Unsay reaksiyon ni Jehova sa gipanulti ni Job?

¹¹ Bisag ingon adto ang gipanulti ni Job, ang iyang gipang-ingon nagpakita nga determinado siya nga dili gyod mobiya kang Jehova, ug nga dako siyag pagsalig nga nakita sa Diyos ang iyang pagkamatinumanon. Ug dihang gitubag na ni Jehova si Job gikan sa unos, wala niya idetalye ang mga rason kon nganong nag-antos si Job. Wala pod niya siloti si Job tungod sa iyang mga reklamo o sa iyang balikbalik nga pagsulti nga wala siyay sala. Hinuon, samag buotang amahan, mahigugmaong gitul-id ni Jehova ang panghunahuna ni Job. Ug sakto gyod ang gihimo ni Jehova. Ingong resulta, mapainubsanong giangkon ni Job nga gamay ra gyod siyag nahibaloan, ug nagbasol siya sa iyang gipanulti. (Job 31:6; 40:​4, 5; 42:​1-6) Unsa kahay nakat-onan sa mga Israelinhon niini nga asoy, ug unsay atong makat-onan niini karon?

12. Unsa kahay nakat-onan sa mga Israelinhon gikan sa kinabuhi ni Job?

¹² Kon unsay nakat-onan sa mga Israelinhon. Ang mga Israelinhon posibleng nakakat-on sa nahitabo kang Job. Konsideraha pananglitan si Moises. Dili sayon ang iyang responsibilidad ingong lider sa nasod sa Israel. Ang katawhan balikbalik nga misupak ug mireklamo batok kang Jehova, ug nakapaguol gyod to kang Moises. Pero dili sama nila, gisulti ni Moises kang Jehova ang iyang gibati imbes nga magsigeg bagulbol. (Ex. 16:​6-8; Num. 11:​10-14; 14:​1-4, 11; 16:​41, 49; 17:5) Ang estorya bahin kang Job nakatabang pod tingali kang Moises dihang gidisiplina siya ni Jehova. Pananglitan, dihang ang mga Israelinhon nagkampo sa Kades, tingali sa ilang ika-40 ka tuig nga paglatagaw sa desyerto, si Moises wala makapugong sa iyang kaugalingon. Nakasulti siyag dili maayo ug wala niya mahatag ang pagdayeg nga angay untang ihatag kang Jehova. (Sal. 106:​32, 33) Tungod ana, wala pasudla ni Jehova si Moises sa Yutang Saad. (Deut. 32:​50-52) Nasakitan gyod seguro si Moises sa maong disiplina, pero iya tong gidawat. Ang estorya bahin kang Job posibleng nakatabang pod sa sunod nga henerasyon sa mga Israelinhon dihang nag-atubang silag lisod nga mga kahimtang. Nakakat-on tingali sila nga isulti kang Jehova ang ilang gibati imbes magsigeg bagulbol, nga dili sobrang magpokus sa pagpamatuod nga matarong sila, ug mapainubsanong dawaton ang disiplina ni Jehova.

13. Sa unsang paagi ang estorya bahin kang Job makatabang nato sa paglahutay? (Hebreohanon 10:36)

¹³ Kon unsay atong makat-onan. Sama sa mga Israelinhon, nag-atubang tag lainlaing kalisdanan maong kinahanglan pod tang molahutay. (Basaha ang Hebreohanon 10:36.) Pananglitan, ang uban nato tingali naay sakit, depresyon, problema sa pamilya, o namatyan ug minahal. Usahay, naa pa gyoy masulti o mabuhat ang uban nga makapasamot na hinuon sa atong kasakit ug kaguol. (Prov. 12:18) Pero ang basahon sa Job nagtudlo nato nga puwede natong isulti kang Jehova ang tanan natong gibati, ug makasalig ta nga maminaw gyod siya nato. (1 Juan 5:14) Dili siya masuko nato bisan pag usahay ‘magpasagad na lang tag sulti’ diha sa atong mga pag-ampo. Hinuon, hatagan ta niyag kusog ug kaalam aron makalahutay. (2 Cron. 16:9; Sant. 1:5) Tul-iron pod ta ni Jehova kon gikinahanglan, tingali pinaagi sa iyang Pulong, iyang organisasyon, o sa hamtong nga mga higala. (Heb. 12:​5-7) Ug sama kang Job, makabenepisyo gyod ta kon molahutay ta ug mapainubsanong dawaton ang disiplina. (2 Cor. 13:11) Daghan gyod kaayo tag nakat-onan kang Job. Karon atong hisgotan kon sa unsang paagi nato magamit ang estorya bahin kang Job sa pagtabang sa uban.

GAMITA ANG BASAHON SA JOB SA PAGTABANG SA UBAN

14. Unsay usa ka paagi nga mapatin-aw nato kon nganong dunay pag-antos?

¹⁴ Kasulay na ba ka nga naay nangutana nimo kon nganong dunay pag-antos? Giunsa nimo siya pagtubag? Tingali imong gihisgotan ang giingon sa Bibliya bahin sa nahitabo sa tanaman sa Eden. Basin nagsugod kag estorya bahin kang Satanas, usa ka daotang espiritu nga namakak sa unang magtiayon maong mirebelde sila sa Diyos. (Gen. 3:​1-6) Dayon miingon tingali ka nga kay mirebelde man si Adan ug Eva, naa nay pag-antos ug kamatayon. (Roma 5:12) Ug basig gipatin-aw nimo nga gitugotan sa Diyos ang taastaas nga panahon aron pamatud-ang sayop si Satanas, ug aron masangyaw ang maayong balita nga sa umaabot ang mga tawo mabuhi na hangtod sa hangtod. (Pin. 21:​3, 4) Maayo ni nga paagi sa pagtubag ana nga pangutana, ug makatabang ni sa mga tawo nga masabtan kon nganong naay pag-antos.

15. Unsay laing paagi nga mapatin-aw nimo kon nganong dunay pag-antos? (Tan-awa sab ang mga hulagway.)

¹⁵ Naa pay laing paagi nga mapatin-aw nimo kon nganong dunay pag-antos. Puwede nimong hisgotan ang nahitabo kang Job. Una, pasalamati ang imong kaestorya sa iyang pangutana. Dayon hisgoti nga ang matinumanong tawo nga si Job nakapangutana pod ana tungod sa grabeng pag-antos nga iyang naagian. Nagtuo pa gani si Job nga ang Diyos ang hinungdan sa iyang pag-antos. (Job 7:​17-21) Basig mainteres ang imong kaestorya kon mahibaloan niya nga sukad pa diay sa una, naa na ni nga pangutana. Dayon puwede nimong ipatin-aw nga dili ang Diyos ang hinungdan sa pag-antos ni Job, kondili si Satanas. Gihimo to ni Satanas kay gusto niyang pamatud-an nga ang mga tawo nagsimba lang sa Diyos tungod sa hakog nga mga motibo. Puwede pod nimong ipatin-aw nga bisag dili ang Diyos ang hinungdan sa pag-antos ni Job, iya ning gitugotan kay dako siyag pagsalig sa mga tawo. Nahibalo si Jehova nga kayang pamatud-an sa matinumanong mga tawo nga sayop si Satanas. Dayon sultihi ang imong kaestorya nga sa ngadtongadto, gipanalanginan sa Diyos si Job kay nagpabilin siyang matinumanon. Kon atong pasaligan ang mga tawo nga dili si Jehova ang hinungdan sa pag-antos, mahupay gyod nato sila.

16. Paghatag ug pananglitan kon sa unsang paagi ang basahon sa Job makatabang niadtong mga nag-antos.

¹⁶ Konsideraha kon sa unsang paagi ang basahon sa Job nakatabang sa usa ka lalaki nga ginganlag Mario. Usa ka adlaw niadtong 2021, naay sister nga nag-telephone witnessing, ug naestorya niya si Mario. Sa una nilang tawag, ang sister nagbasag teksto ug iyang gipatin-aw nga ang Diyos maminaw sa atong mga pag-ampo ug naghatag natog maayong kaugmaon ug paglaom. Dihang gipangutana sa sister si Mario kon unsay iyang hunahuna bahin sa teksto, miingon si Mario nga nianang tungora mismo nga nanawag ang sister, naghimo siyag sulat kay gusto siyang magpakamatay. Siya miingon, “Nagtuo man ko sa Diyos, pero morag wala ra man siyay pakabana nako.” Sa sunod nilang tawag, naghisgot ang sister bahin sa pag-antos ni Job. Nainteres si Mario, ug gusto niyang basahon ang tibuok estorya ni Job. Maong gihatagan siya sa sister ug link sa Bag-ong Kalibotang Hubad sa Balaang Kasulatan. Unsay resulta? Nagpa-Bible study si Mario, ug nalipay siyang makakat-on bahin sa mahigugmaong Diyos nga nagpakitag interes niya.

17. Nganong mapasalamaton ka kang Jehova nga giapil niya ang basahon sa Job diha sa Bibliya? (Job 34:12)

¹⁷ Ang Pulong sa Diyos dako gyog tabang sa mga tawo, ilabina niadtong mga nag-antos. (Heb. 4:12) Mapasalamaton gyod ta nga giapil ni Jehova ang estorya ni Job diha sa Bibliya. (Job 19:​23, 24) Ang basahon sa Job nagpasalig nato nga “ang Diyos dili [gyod] mobuhat ug daotan.” (Basaha ang Job 34:12.) Nagtudlo pod ni nato kon nganong gitugotan sa Diyos ang pag-antos ug kon unsay atong mahimo aron makalahutay. Ug makatabang ni nato nga hupayon kadtong mga nag-antos. Ang sunod nga artikulo maghisgot kon unsay atong makat-onan sa basahon sa Job kon bahin sa paghatag ug maayong tambag.