Nahinumdom Ka Ba?

Nabasa ba nimog maayo ang mga isyu sa Ang Bantayanang Torre niining tuiga? Sulayi kon makatubag ka sa mosunod nga mga pangutana:

Nganong gihimaya nato si Jehova?

Gihimaya nato si Jehova kay gitahod ug gimahal nato siya pag-ayo. Gusto pod nato nga mailhan siya sa uban.—w25.01, p. 3.

Kon naay makapasakit nato, unsay makatabang nato nga makapasaylo?

Siyempre, dili nato balewalaon ang atong gibati. Pero angay natong wad-on ang atong kasuko ug pagdumot, kay makatabang ni aron maulian ang kasakit nga atong gibati ug mabalik ang atong kalipay.—w25.02, p. 15-16.

Nganong ang tinun-ang si Marcos maayong ehemplo para sa mga batan-ong brader?

Si Marcos kinabubut-ong midawat ug asaynment sa pag-alagad. Bisag naay nahitabo nga posibleng nakapasakit ug nakapaguol niya, wala siya moundang. Nakigsuod siya kang Pablo ug sa hamtong nga mga igsoon.—w25.04, p. 27.

Unsay gipasabot ni Jesus dihang siya miampo: “Akong gipaila kanila ang imong ngalan”? (Juan 17:26)

Ang mga tinun-an ni Jesus nahibalo na daan sa ngalan sa Diyos. Pero gipaila ni Jesus kanila kon unsay girepresentahan nianang ngalana—pananglitan, kon unsay katuyoan sa Diyos, Iyang mga hiyas, mga gibuhat, ug pagabuhaton.—w25.05, p. 20-21.

Kon mapainubsanon ta, unsay angay natong ilhon?

Angay natong ilhon ug dawaton nga naay mga butang nga wala nato mahibaloi. Pananglitan, wala ta mahibalo kon kanus-a moabot ang kataposan ug kon unsa gyoy buhaton ni Jehova nianang panahona. Wala pod ta mahibalo kon unsay mahitabo sa sunod nga mga adlaw o kon unsa ka lalom ang pagkaila ni Jehova kanato.—w25.06, p. 15-18.

Unsay makatabang nato nga makabenepisyo sa usa ka artikulo o pakigpulong publiko?

Puwede natong pangutan-on ang atong kaugalingon: ‘Unsang makapakombinsir nga pamatuod ang gigamit niini nga artikulo o pakigpulong? Naa bay epektibong ilustrasyon nga puwede nakong magamit sa pagtudlo niini ngadto sa uban? Kinsa kahay mainteres niini nga topiko?’—w25.07, p. 19.

Unsay atong makat-onan bahin kang Jehova dihang iyang gipasaylo si David?

Si David nakahimog grabe kaayong mga sala. Pero kay sinsero man siyang naghinulsol, gipasaylo siya ni Jehova. (1 Hari 9:​4, 5) Dihang mopasaylo si Jehova, dili na ta niya silotan tungod sa nangaging sala o paninglan niini sa umaabot.—w25.08, p. 17.

Kon ang imong gidumalahag pagtuon sa Bibliya nalisdag sabot sa usa ka punto, unsay puwede nimong himoon?

Kon nalisdan gihapon siyag sabot sa usa ka punto bisag klaro na nimo ning gipatin-aw gikan sa Bibliya, mas maayo nga balikan na lang ninyo nig hisgot sa sunod nga higayon.—w25.09, p. 24.

Ang Bibliya nag-ingon nga ang sala naay “malimbongong gahom.” (Heb. 3:13) Unsay gipasabot niini?

Ang atong makasasalang kahimtang magdani nato sa paghimog daotan. Mao pod ni ang hinungdan kon nganong magduhaduha ta usahay kon gimahal ba gyod ta ni Jehova.—w25.10, p. 16.

Unsang tulo ka butang ang makatabang aron mahimong mas sinsero ang atong mga pag-ampo?

(1) Puwede natong pamalandongon ang mga hiyas ni Jehova. (2) Hunahunaon nato kon unsay atong giatubang ug iapil nato ni sa atong pag-ampo, sama pananglitan kon naa ba tay kinahanglang pasayloon. (3) Mogahin tag taas nga panahon sa pag-ampo aron mas masulti gyod nato ang atong gibati.—w25.10, p. 19-20.

Unsaon nato pagtabang ang mga tigulang?

Puwede natong bisitahon o tawagan ang mga tigulang, o ubanan sila sa ilang mga check up. Puwede pod tang makig-uban nila sa ministeryo.—w25.11, p. 6-7.

Unsay angayng himoon sa kaslonon aron ang ilang kasal makapasidungog kang Jehova?

Sunda ang mga balaod sa inyong lugar bahin sa kasal. Seguroa nga mapakita ang bunga sa balaang espiritu panahon sa seremonya ug sa reception. Ayaw pagpalabi sa inyong isul-ob ug likayi ang dili Kasulatanhong mga kostumbre. Importante pod ang maayong komunikasyon dihang magplano sa kasal.—w25.12, p. 21-24.