Pagdiskobre

Nagsugod ang Pagdiskobre

Sa Dominggo, Abril 1, 1945, ang mga migraduwar sa Gilead nga si Lennart ug Virginia Johnson miabot sa Ciudad Trujillo (Santo Domingo karon), ang kaulohan sa Dominican Republic. Ingong unang mga Saksi sa nasod, sila anaa sa usa ka dapit nga kanhi punog panagbangi ug panag-away.a Ang 1946 Yearbook miingon: “Pangpayunir gyod ni nga teritoryo ug kining mga migraduwar sa Gilead mao gyoy unang makasugod dinhi.” Hunahunaa lang: Walay branch office, Kingdom Hall, ug kongregasyon. Ang mga misyonaryo walay nailhan sa maong nasod, dili kaayo sila kamaong mag-Kinatsila, ug wala silay balay o bisan unsang gamit sa balay. Unsay ilang himoon?

Si Lennart miingon, “Miestar mi sa Victoria Hotel—lima ka dolyar ang adlaw para namong duha, apil na ang pagkaon. Pagkahapon nianang adlawa, nasugdan namo ang among unang Bible study. Mao niy nahitabo: Sa Brooklyn, duna miy duha ka babayeng Bible study nga taga-Dominican Republic. Ila ming gihatagag ngalan sa ilang mga paryente ug higala, usa nila mao si Dr. Green. Dihang giduaw namo siya, nahibalag pod namo ang iyang silingan nga si Moses Rollins. Pagkahibalo nila kon asa namo nakuha ang ilang mga ngalan ug numero, naminaw sila pag-ayo sa mensahe sa Gingharian ug misugot nga magpa-Bible study. Wala madugay, si Moses nahimong kinaunhang magmamantala sa maong nasod.”

Pagka-Hunyo 1945, upat pa ka misyonaryo ang miabot, ug wala madugay sila nakapahimutang ug daghang literatura ug nakasugod ug daghang Bible study. Pagka-Oktubre, nagkinahanglan na gyod ug tigomanan. Busa, giusab sa mga misyonaryo ang kosina ug sala sa ilang puy-anan aron himoong temporaryong Kingdom Hall. Mga 40 ka tawo ang nagtambongan sa mga tigom.

Usa sa mga unang midawat sa kamatuoran mao si Pablo Bruzaud, nga mas nailhang Palé. Nagdumala siyag kompaniya sa mga bus nga nagbiyahean gikan sa Santiago paingon sa Ciudad Trujillo, maong tig-adtoan siya sa kaulohan. Usa ka adlaw niana, samtang tua sa Ciudad Trujillo, naestorya siya sa mga Saksi ug midawat siyag librong “The Truth Shall Make You Free.” Sukad niadto, kada adlaw na siyang nagtuon sa Bibliya uban nila. Wala madugay, nagsugod na siyag sangyaw uban sa mga misyonaryo ug nagtaganag kasakyan para nila. Sa ulahi, iyang nakaila si Lennart Johnson ug mibiyahe sila gikan sa Ciudad Trujillo ngadto sa Santiago latas sa kabukiran paingon sa lungsod sa Puerto Plata nga duol sa dagat aron bisitahon ang mga interesado nga misulat sa world headquarters sa Brooklyn, New York.

Ang Pagbisita Nila Brader Knorr ug Brader Franz

Sa Marso 1946, si Nathan Knorr ug Frederick Franz nga gikan sa world headquarters miduaw sa Dominican Republic. Daghan ang naghinamhinam sa maong pagduaw, ug gawas sa mga igsoon, 75 ka interesado ang mitambong sa pakigpulong ni Brader Knorr. Nianang panahona, gihikay ni Brader Knorr nga matukorag branch office ang Dominican Republic.

Daghan pang misyonaryo ang miabot, ug sa hinapos sa 1946 nga tuig sa pag-alagad, diha nay 28 ka magmamantala sa nasod. Kay mao pay pagsugod sa buluhatong pagsangyaw sa maong lugar, pila ka gabiing nagplano ang mga misyonaryo kon unsaon pagkobre ang teritoryo aron maseguro nga organisado ang pagsangyaw.

Miuswag ang Buluhaton

Sa 1947, kapig 59 na ka magmamantala ang nakigbahin sa buluhatong pagsangyaw. Nianang tuiga usab, pipila ka misyonaryo gikan sa Cuba ang gibalhin sa Dominican Republic. Apil nila si Roy ug Juanita Brandt. Gitudlo si Brader Brandt ingong branch overseer ug nagpadayon niini nga asaynment sulod sa 10 ka tuig.

Sa hinapos sa 1948 nga tuig sa pag-alagad, diha nay mga 110 ka magmamantala nga nagsangyaw uban sa kugihang mga misyonaryo. Pero kadtong madasigong mga igsoon walay kalibotan nga nagsingabot ang grabeng paglutos.