Kon Unsaon nga Mahimong Maayong Amahan

Niining artikuloha

• Unsay papel sa amahan?

• Nganong espesyal ang papel sa amahan?

• Ang makat-onan sa anak nga babaye sa iyang amahan

• Tambag para sa mga amahan

Unsay papel sa amahan?

• Sa gimabdos pa ang inyong anak. Kon unsa ka nga klaseng bana karon magpakita kon unsa ka nga klaseng amahan sa ulahi. Ang librong Do Fathers Matter? nag-ingon:

  “Ang amahan nga motabang sa iyang mabdos nga asawa sa pagpamalit ug mga suplay, modala niya sa doktor, ug mouban sa pagpa-ultrasound aron makakita sa fetus o makadungog sa pitik sa kasingkasing niini sagad mag-atiman sa iyang asawa ug baby inigkatawo niini.”

  “Dili nako gustong bation sa akong asawa nga nag-inusara siya sa iyang pagmabdos, maong naningkamot ko nga tabangan siya. Gitabangan pa gani nako siyag andam sa kuwarto sa baby. Espesyal to nga panahon para namo samtang nangandam mi sa pagkatawo sa among anak.”—James.

  Prinsipyo sa Bibliya: “Magtan-aw dili lang sa kaugalingong kaayohan, kondili sa kaayohan sab sa uban.”—Filipos 2:4.

• Dihang matawo na ang inyong anak. Masuod ka sa imong baby kon makigdula ka niya ug imo siyang kugoson. Tabangi ang imong asawa sa pag-atiman niya. Ang imong ginahimo ingong amahan dakog epekto sa imong anak samtang magdako siya. Ang imong paningkamot nga masuod sa imong anak nagpakita nga pinangga nimo siya.

  “Himoa kon unsay ginahimo sa imong anak. Pakigdula niya. Pagkiningkoy pod. Ug dihang magdula mo, ayawg sobra ka seryoso. Hinumdomi nga ingong ginikanan, sa imo unang makakat-on ang imong anak kon unsa ang gugma.”—Richard.

  

  Prinsipyo sa Bibliya: “Ang mga anak maoy panulondon gikan ni Jehova; ang bunga sa tagoangkan maoy usa ka ganti.”—Salmo 127:3.

• Samtang magdako ang inyong anak. Gipakita sa research nga ang mga anak nga suod sa ilang amahan mas maayo sa klase, wala kaayoy problema sa emosyon, ug gamay rag posibilidad nga mag-abusog droga o mohimog krimen. Gahinig panahon ang pagpakigsuod sa imong anak.

  “Giingnan ko sa among anak nga ang iya gyong gikamingawan pagbalhin niyag puyo mao ang among mga panag-estorya dihang magbiyahe mi o manihapon. Dihay mga panahon nga wala nako damha nga maestoryahan namo ang importanteng mga butang. Nahitabo to kay daghang panahon nga nagkauban mi.”—Dennis.

  

  Prinsipyo sa Bibliya: “Pagbantay pag-ayo nga ang inyong paggawi dili sama sa dili maalamon kondili sa maalamong mga tawo, nga gamiton ang inyong panahon sa kinamaayohang paagi.”—Efeso 5:15, 16.

Nganong espesyal ang papel sa amahan?

Kasagaran, ang mga amahan gidahom nga magtagana sa materyal nga panginahanglan ug manalipod sa pamilya, samtang ang mga inahan gidahom nga mag-atiman sa emosyonal nga panginahanglan sa pamilya. (Deuteronomio 1:31; Isaias 49:15) Sa ubang pamilya, amahan ang nagahimo sa ubang responsibilidad sa inahan ug inahan ang nagahimo sa ubang responsibilidad sa amahan. Bisan pa niana, ang mga researcher nag-ingon nga ang amahan ug inahan dunay importanteng papel sa pagpadako sa ilang anak.a

Gisulti sa researcher nga si Judith Wallerstein ang iyang eksperyensiya bahin niini. Siya miingon: “Dihang ang akong 12 anyos nga anak nga babaye nabanggaan ug sakyanan, gusto niya nga ang iyang papa mouban niya sa ambulansiya kay dako siyag pagsalig nga maproteksiyonan siya sa iyang papa. Pero sa ospital, gusto niya nga tibuok adlaw kong naa sa iyang tupad aron hupayon siya.”b

“Ang mahatag sa amahan nga proteksiyon lahi ra gyod sa mahatag sa inahan. Pero ang inahan makatabang nga ang mga anak mobati nga gimahal ug nasabtan. Maong usa gyod sila ka team.”—Daniel.

Prinsipyo sa Bibliya: “Anak ko, paminawa ang disiplina sa imong amahan, ug ayawg isalikway ang gitudlo sa imong inahan.”—Proverbio 1:8.

Ang makat-onan sa anak nga babaye sa iyang amahan

Ingong amahan, matudloan nimo ang imong anak nga babaye kon sa unsang paagi siya angayng trataron sa ubang lalaki. Makakat-on siya niini sa duha ka paagi:

• Pinaagi sa pagpaniid kon giunsa nimo pagtratar ang iyang inahan. Dihang imong mahalon ug tahoron ang imong asawa, makita sa imong anak nga babaye ang mga hiyas nga importanteng iyang pangitaon sa iyang mahimong bana sa umaabot.—1 Pedro 3:7.

  

• Pinaagi sa pagpaniid kon giunsa nimo siya pagtratar. Dihang imong tahoron ang imong anak nga babaye, imo siyang gitudloan nga tahoron ang iyang kaugalingon. Ingon ana pod nga pagtratar ang iyang dahomon gikan sa ubang lalaki.

  Sa laing bahin, kon pirmeng hisgotan sa amahan ang sayop sa iyang anak nga babaye, mopabati ni sa anak nga wala siyay pulos ug basin mangita siyag laing lalaki nga mopabati niya nga naa siyay pulos—mga lalaki nga lagmit dili maayog intensiyon kaniya.

  “Ang anak nga babaye nga gimahal ug gisuportahan sa iyang papa dili daling mahigugma sa lalaki nga walay mga hiyas sa usa ka maayong bana.”—Wayne.