Akong Himoon Aron Masuklan ang Presyur nga Makig-sex?

“Sa nag-eskuwela pa ko, kon naa gani moingon nga nakasulay na siyang makig-sex, mapresyur sab ang uban nga mosulay. Siyempre, walay gusto nga malahi sa uban.”​—Elaine, 21.

Napresyur ba ka nga makig-sex kay morag mao nay ginahimo sa tanan?

Gipresyur na ba ka sa imong uyab nga makig-sex?

Kon mao, matabangan ka niini nga artikulo nga masuklan ang presyur nga makig-sex​—gipresyur man ka sa uban o sa imong kaugalingong tinguha—​ug makahimog mas maayong desisyon.

• Dili tinuod ug tinuod

• Kon unsaon pagsukol sa presyur nga makig-sex

• Ang giingon sa ubang batan-on

Dili tinuod ug tinuod

DILI TINUOD: Nakasulay na ang tanan nga makig-sex (ako na lang ang wala).

TINUOD: Sa survey sa usa ka nasod, duha sa kada tulo ka 18 anyos nga batan-on ang miingon nga nakasulay na silang makig-sex. Pero nagpakita sab na nga daghan ang wala makig-sex, gani kapig 30 porsiyento. Busa dili “tanan” ang nagahimo niana.

DILI TINUOD: Ang pagpakig-sex makapalig-on sa relasyon.

TINUOD: Kanay isulti sa ubang lalaki aron mosugot ang babaye nga makig-sex, pero dili na tinuod. Kasagaran, bulagan sa lalaki ang babaye kon naa nay nahitabo nila​—ug makurat na lang ang babaye kay nagtuo siya nga gihigugma siya, o mobati man lag gamayng obligasyon niya ang lalaki.a

DILI TINUOD: Giingon sa Bibliya nga sayop ang sex.

TINUOD: Gipakita sa Bibliya nga dili sayop ang sex, pero angay lang kining himoon sa lalaki ug babaye nga minyo sa usag usa.​—Genesis 1:28; 1 Corinto 7:3.

DILI TINUOD: Dili nako ma-enjoy ang kinabuhi kon sundon nako ang Bibliya.

TINUOD: Kon maghulat ka nga maminyo ayha makig-sex, mas magmalipayon ka kay imong malikayan ang mga kabalaka, pagmahay, ug pagduhaduha nga sagad maoy resulta sa pagpakig-sex nga wala pay kasal.

Ang punto: Walay tawo nga nadaot ang kinabuhi tungod kay naghulat nga maminyo ayha makig-sex. Pero daghang kinabuhi ang nadaot kay nakig-sex sila una pa magminyo.

Kon unsaon pagsukol sa presyur nga makig-sex

• Palig-ona ang imong baroganan sa kon unsay maayo ug daotan. Ang Bibliya nag-ingon nga ang hamtong nga mga tawo naggamit “sa ilang mga katakos sa pagsabot, [maong] sila nahibalo kon unsaon pag-ila ang maayo ug ang daotan.” (Hebreohanon 5:14) Kombinsido sila sa gitudlo sa Bibliya, busa dili sila daling madala sa presyur.

  “Naningkamot gyod ko nga buhaton kon unsay husto ug makabaton ug maayong reputasyon, maong ginalikayan nako ang bisan unsang situwasyon nga makadaot sa akong reputasyon.”​—Alicia, 16.

  Hunahunaa kini: Unsay gusto nimong reputasyon? Okey ra ba nimo nga madaot ang imong reputasyon aron lang malipay ang uban?

• Hunahunaa ang resulta. Ang Bibliya nag-ingon: “Kon unsay gipugas sa usa ka tawo, mao pod ang iyang anihon.” (Galacia 6:7) Imadyina kon unsay mahitabo sa imong kinabuhi​—ug sa kinabuhi sa laing tawo—​kon magpadala ka sa presyur nga makig-sex.b

  “Kadtong makig-sex nga dili pa minyo sagad makonsensiya, magmahay, ug mobati pa gani nga wala sila higugmaa—ug dili lang kana, posible sab silang magmabdos o kaha matakdan ug sakit nga mapasa pinaagig sex.”​—Sienna, 16.

  Hunahunaa kini: Ang librong Sex Smart nangutana: “Kon ginapresyur ka sa imong mga higala nga mohimog mga butang nga makadaot nimo, sila ba ang maayo nimong pakig-ubanan ug pangayoag tambag bahin sa importanteng mga butang sa kinabuhi?”

• Pagbaton ug balanseng panglantaw. Dili daotan ang sex. Gani, gipakita sa Bibliya nga angayng i-enjoy sa magtiayon kining bahina sa ilang relasyon.​—Proverbio 5:18, 19.

  “Ang sex maoy nindot nga bahin sa kalalangan. Gusto sa Diyos nga i-enjoy nato kini, pero sulod lang sa iyang kahikayan sa kaminyoon.”—Jeremy, 17.

  Hunahunaa kini: Kon minyo na ka, puwede na kang makig-sex. Ug ma-enjoy gyod nimo ni, kay dili nimo maeksperyensiyahan ang negatibong mga resulta nga gihisgotan ganina.