Alkoholikong Ilimnon—Unsay Buhaton Aron Makontrolar ang Imong Pag-inom?
Ang pipila mas daghag mainom dihang sila ma-stress, maguol, o mobatig kalaay. Mas daghan ba ang imong ginainom karon? Kon mao, unsay imong buhaton aron dili ka masobrahag inom o maadik sa alkoholikong ilimnon? Tagda ang pipila ka praktikal nga impormasyon nga makatabang nimo nga makontrolar ang imong pag-inom.
Unsay ipasabot sa igoigo lang nga pag-inom?
Ang giingon sa Bibliya: “Likayi nga maapil ka niadtong sobrang moinom ug bino.”—Proverbio 23:20.
Konsideraha ni: Wala idili sa Bibliya ang igoigo lang nga pag-inom. (Ecclesiastes 9:7) Pero gihisgotan niini ang kalainan tali sa igoigo nga pag-inom, pagpalabig inom, ug paghuboghubog. (Lucas 21:34; Efeso 5:18; Tito 2:3) Bisan pag dili ka mahubog, ang pagpalabig inom makaapektar sa imong katakos sa paghimog desisyon ug makadaot sa imong panglawas o sa imong relasyon sa uban.—Proverbio 23:29, 30.
Giila sa daghang awtoridad ang kalainan tali sa low-risk ug high-risk nga pag-inom, ug sagad ila ning kalkulahon base sa gidaghanon sa kasarangang tagay nga mainom sa usa ka tawo kada adlaw ug kon pila ka adlaw siya moinom sa usa ka semana.a Pero lainlain ang epekto sa alkoholikong ilimnon sa kada tawo, ug may mga higayon nga mas maayong dili na lang gyod moinom. Sumala sa World Health Organization:
“Bisan ang usa o duha ka tagay, mahimong sobra na kaayo—pananglitan:
Dihang magdrayb o mag-operit ug makina.
Dihang mabdos o magpasuso.
Dihang dunay gitomar nga mga tambal.
Kon duna kay sakit.
Kon dili ka makakontrolar sa pag-inom.”
Mga ilhanan nga naadik ka na sa alkoholikong ilimnon
Ang giingon sa Bibliya: “Atong susihon pag-ayo ang atong mga dalan.”—Lamentaciones 3:40.
Konsideraha ni: Maprotektahan nimo ang imong kaugalingon batok sa makadaot nga mga epekto sa alkoholikong ilimnon kon regular nimong susihon ang imong batasan sa pag-inom ug usbon kana kon gikinahanglan. Aron mahibaloan nimo kon kontrolado pa ba nimo ang imong pag-inom, matikdi kining mosunod nga mga ilhanan:
Ang imong kalipay nagdepende sa alkoholikong ilimnon. Gibati nimo nga kinahanglan kang moinom aron marelaks, malipay uban sa mga higala, o malingaw. Moinom ka aron malimtan ang imong mga problema.
Mas daghan ang imong ginainom karon. Mas kadaghan ka nang moinom. Mas isog na ang imong ilimnon ug kinahanglang moinom ka ug daghan para matagbaw.
Ang imong pag-inom miresultag mga problema diha sa balay o sa trabahoan. Pananglitan, mas dako na kag gasto sa ilimnon bisag dili kaya sa imong badyet.
Nakahimo kag peligrosong mga desisyon human moinom, sama sa pagdrayb, pag-swimming, o pag-operit ug makina.
Ang uban nabalaka na sa imong pag-inom. Kon sultihan ka nila, masuko ka o mangrason. Magtagotago ka kon moinom, o dili ka motug-an kon unsa ka daghan ang imong giinom.
Naglisod kag hunong. Gisulayan nimo nga mamenosan ang imong pag-inom o dili na moinom, pero dili nimo kaya.
Lima ka sugyot nga makatabang nimo nga makontrolar ang imong pag-inom
1. Pagplano.
Ang giingon sa Bibliya: “Ang mga plano sa kugihan moresulta gyod ug kalamposan.”—Proverbio 21:5.
Sulayi kini: Pagpilig mga adlaw sa semana nga moinom ka. Pagtakdag kasarangang gidaghanon sa imong imnon nianang mga adlawa. Ug pagpilig labing menos duha ka adlaw kada semana nga dili ka moinom.
“Ang dili pag-inom matag karon ug unya mao ang labing maayong paagi nga malikayan nga maadik sa ilimnon,” miingon ang usa ka alcohol education charity sa U.K.
2. Himoa ang imong giplano.
Ang giingon sa Bibliya: “Taposa ... ang inyong nasugdan.”—2 Corinto 8:11.
Sulayi kini: Sayra kon unsa ang kasarangang tagay aron sakto nimong masukod ug maihap ang imong giinom. Pangitag makapahimsog, dili alkoholikong mga ilimnon nga gusto nimo, ug pagpondo niana.
“Ang ginagmayng kausaban dakog mahimo aron mamenosan ang posibilidad nga magkaproblema ka tungod sa ilimnon,” miingon ang National Institute on Alcohol Abuse and Alcoholism sa U.S.
3. Barogi ang imong desisyon.
Ang giingon sa Bibliya: “Himoa ang inyong ‘Oo’ nga oo, ug ang inyong ‘Dili,’ dili.”—Santiago 5:12.
Sulayi kini: Magmaandam sa pag-ingog “Dili” sa matinahoron pero makapakombinsir nga paagi kon dunay mo-offer nimog ilimnon nga makadaot sa imong plano.
“Kon mobalibad dayon ka, mas gamayg purohan nga madala ka,” miingon ang National Institute on Alcohol Abuse and Alcoholism sa U.S.
4. Magpokus sa mga benepisyo sa imong desisyon.
Ang giingon sa Bibliya: “Mas maayo pa ang kataposan sa usa ka butang kay sa sinugdanan niini.”—Ecclesiastes 7:8.
Sulayi kini: Ilista ang mga rason kon nganong gusto nimong kontrolahon ang imong pag-inom. Iapil ang mga butang sama sa maayong pagkatulog, panglawas, pagdumala sa kuwarta, ug relasyon. Kon isulti nimo sa uban ang imong desisyon, pagpokus sa mga benepisyo imbes sa mga kalisdanan.
5. Pangayog tabang sa Diyos.
Ang giingon sa Bibliya: “Naa koy kusog sa pag-atubang sa tanang butang tungod kaniya nga naghatag nakog gahom.”—Filipos 4:13.
Sulayi kini: Kon nabalaka ka sa imong batasan sa pag-inom, pag-ampo sa Diyos alang sa tabang. Hangyoa siya nga hatagan kag kusog ug pagpugong sa kaugalingon.b Ug sayra kon unsay giingon sa iyang Pulong, ang Bibliya, nga makatabang nimo. Sa tabang sa Diyos, makontrolar nimo ang imong pag-inom.
a Pananglitan, ang Department of Health and Human Services sa U.S. nag-ingon nga ang high-risk nga pag-inom mao “ang pag-inom ug 4 o kapin pa sa usa ka adlaw o 8 o kapin pa sa usa ka semana para sa mga babaye ug 5 o kapin pa sa usa ka adlaw o 15 o kapin pa sa usa ka semana para sa mga lalaki.” Ang sukod sa kasarangang tagay lainlain sa kada nasod, busa pangutan-a ang imong health-care provider aron maseguro kon unsang low-risk nga pag-inom ang haom nimo.
b Kon dili nimo makontrolar ang imong pag-inom, basin nagkinahanglan kag propesyonal nga tabang.