Ang mga Saksi ni Jehova ba mga Zionista?

Dili. Ang mga Saksi ni Jehova maoy mga Kristohanon nga nagbase sa ilang pagtulon-an sa Kasulatan. Samtang ang pipila ka relihiyon nagtudlo nga ang pagtigom sa mga Hudiyo sa Palestina nalangkit sa Kasulatanhong tagna, ang mga Saksi ni Jehova wala magtudlo niana. Sila dili motuo nga kini nga politikal nga kalihokan gitagna sa Kasulatan. Sa pagkatinuod, ang Kasulatan wala magduso ug usa ka tawhanong gobyerno ni magtuboy ug usa ka etnikong grupo o rasa. Ang opisyal nga magasin sa mga Saksi ni Jehova nga Ang Bantayanang Torre, tin-awng nag-ingon: “Wala paluyohi sa Kasulatan ang politikal nga Zionismo.”

Ang Encyclopædia Britannica naghubit sa Zionismo ingong “nasyonalistang kalihokan sa mga Hudiyo nga ang tumong mao ang pagtukod ug pagpaluyo sa usa ka Hudiyohanon nga nasodnong estado sa Palestina.” Kini gipasukad sa relihiyon ug politika. Ang mga Saksi ni Jehova wala magduso sa Zionismo ingong relihiyosong doktrina, ug sila bug-os nga neyutral sa politikal nga Zionismo.

Ang mga Saksi ni Jehova maoy usa ka relihiyosong organisasyon ug kini wala gayod magduso ug bisan unsang politikal nga kahikayan, lakip na ang Zionismo. Ang pagkaneyutral sa mga Saksi ni Jehova sa politika napamatud-an na, ug sa pipila ka kayutaan ang mga Saksi nag-antos sa grabeng paglutos inay ikompromiso ang ilang neyutralidad. Kami kombinsido nga ang langitnong Gingharian sa Diyos mao lamang ang magdalag dumalayong kalinaw sa yuta; walay tawhanong gobyerno o kalihokan ang makahimo niini.

Ang pangunang prinsipyo sa pagtulon-an sa mga Saksi ni Jehova, bisag asa sila nagpuyo, mao ang pagkamasinundanon sa balaod sa sekular nga mga gobyerno. Dili sila morebelde batok sa kagamhanan o moapil sa gubat.