Gipriso Tungod sa Ilang Relihiyon—Crimea
Ang grabeng paglutos sa mga awtoridad sa Russia batok sa mga Saksi ni Jehova nakaabot na karon sa Crimea. Wala lang idili sa gobyerno sa Russia ang legal nga mga korporasyon sa mga Saksi; klaro nga gusto sab nilang mahunong ang malinawong pagsimba sa mga Saksi. Sukad sa pagdili niadtong Abril 2017, kadaghan gi-raid sa mga awtoridad sa Russia ang tigom sa mga Saksi sa tibuok Russia. Tungod niini, daghang Saksi ang gidakop ug gipriso. Ang maong pintas nga mga taktika gigamit sab karon batok sa mga Saksi ni Jehova sa Crimea.
Ang unang dungan nga pagpang-raid sa Crimea nahitabo niadtong Nobyembre 15, 2018, sa Dzhankoy, dihang mga 200 ka polis ug special forces officer ang mi-raid sa walo ka balay diin ang gagmayng grupo sa mga Saksi nagtigom aron sa pagbasa ug paghisgot sa Bibliya. Labing menos 35 ka armado ug nag-bonnet nga mga polis ang mipugos ug sulod sa balay ni Sergey Filatov, diin nagtigom ang unom ka Saksi. Ang mga Saksi nangalisang niining grabeng pag-atake. Gipaod sa mga polis diha sa bungbong ang usa ka 78 anyos nga lalaki, gipahapa siya, giposasan, ug gikulata pag-ayo mao nga gidali siya pagdala sa ospital. Duha pa ka edarang lalaki ang na-trauma pag-ayo mao nga gidala sila sa ospital tungod sa taas kaayo nga presyur sa dugo. Makapasubo nga sa laing balay nga gi-raid, usa ka batabata pang babaye ang nakuhaan sa iyang gisabak.
Human sa pag-raid, si Sergey gipasakaan ug kriminal nga kaso ubos sa Article 282.2(1) sa Russian Criminal Code, kay nag-organisar kuno siyag kalihokan sa usa ka “ekstremistang organisasyon.” Niadtong Marso 5, 2020, gisentensiyahan sa usa ka district court si Sergey ug unom ka tuig nga pagkabilanggo diha sa usa ka general regime prison colony. Human siya masentensiyahi, gidala dayon siya sa prisohan.
Sa mga tuig human sa 2018 nga pag-raid sa Dzhankoy, ang mga special forces officer nagpadayon sa pagpang-raid. Gipugos nilag sulod ang mga balay sa mga Saksi nga ilang gisuspetsahan nga naghimog ekstremistang kalihokan. Ang kinaulahiang mga raid nahitabo niadtong Agosto 7, 2024, dihang gi-raid sa daghang armado ug nag-bonnet nga mga polis ang mga balay sa lima ka Saksi, apil ang balay sa 68 anyos nga si Tamara Brattseva sa baryo sa Razdolnoye. Si Tamara gihusay sa kaso nga pag-organisar sa mga kalihokan sa usa ekstremistang organisasyon. Niadtong Oktubre 2024, duha ka Saksi nga lalaki nga si Yuriy Gerashchenko ug Sergey Parfenovich ang gisentensiyahag unom ka tuig nga pagkapriso sa penal colony. Gihatagan sila sa miagi ug suspended sentence, pero gipangusgan sa prosekyutor nga hatagan silag mas bug-at nga silot, ug kana giaprobahan sa korte. Pagkahuman dayon sa husay, gidakop sila ug gipriso.
Human sa mga pag-raid sa balay, ang giaresto nga mga Saksi gikasohan, gihusay, ug gihukmang sad-an. Ingong resulta, sa pagkakaron, dunay 14 ka Saksi ang napriso nga may sentensiya nga hangtod sa unom ka tuig ug tunga nga pagkapriso. Giakusahan silang tanan nga nakigbahin sa mga kalihokan sa usa ka ekstremistang organisasyon.
Time Line
Hunyo 17, 2025
Sa pagkakaron, 14 ka Saksi ni Jehova sa Crimea ang gipriso.
Oktubre 3, 2024
Si Yuriy Gerashchenko ug Sergey Parfenovich gisentensiyahag unom ka tuig nga pagkapriso sa penal colony.
Agosto 7, 2024
Gi-raid sa mga polis ang lima ka balay sa mga Saksi didto sa Alushta, Razdolnoye, ug Senokosnoye. Gikasohan si Tamara Brattseva.
Agosto 5, 2021
Girekisa ang walo ka balay sa mga Saksi. Si Aleksandr Dubovenko ug Aleksandr Litvinyuk gidakop.
Oktubre 1, 2020
Siyam ka balay ang gi-raid sa Sevastopol. Giaresto si Igor Shmidt ug gidetener samtang naghulat ug husay.
Hunyo 4, 2019
Gi-raid sa mga special forces officer ang 10 ka balay sa Sevastopol. Dayon, gikasohan si Viktor Stashevskiy sa pag-organisar kuno ug ekstremista nga mga kalihokan.
Marso 20, 2019
Gi-raid sa mga special forces officer ang walo ka balay sa Alupka ug Yalta. Si Artem Gerasimov gisukitsukit ug gikasohan nga nag-organisar ug ekstremistang mga kalihokan.
Nobyembre 15, 2018
Walo ka balay ang gi-raid sa kapig 200 ka polis ug special forces officer sa Dzhankoy, apil ang balay ni Sergey Filatov.