Gipriso Tungod sa Ilang Relihiyon—Eritrea

Sulod sa daghang katuigan, ang gobyerno sa Eritrea nag-aresto ug nagpriso sa mga Saksi ni Jehova—apil ang mga babaye ug mga tigulang—bisag walay husay o pormal nga sumbong. Niadtong Oktubre 25, 1994, si Presidente Afwerki nagpakanaog ug presidential decree nga ang mga Saksi tangtangan sa ilang pagkalungsoranon kay sila wala moapil sa 1993 independence referendum ug midumili sa pagsundalo tungod sa konsensiya. Sa wala pa nila estriktong ipatuman ang pagsundalo, ang mga awtoridad sa Eritrea naghatag ug probisyon alang sa alternatibong serbisyo para sa komunidad. Daghang Saksi ang nakigbahin niini nga serbisyo ubos sa lainlaing administrasyon. Ang mga awtoridad nag-isyu ug “Certificates of Completed National Service,” ug sagad dayegon nila ang miapil niini nga serbisyo. Pero tungod niini nga presidential decree, ang mga polis nagpriso, nag-torture, ug naghasi sa mga Saksi ni Jehova aron pugson sila sa pagsalikway sa ilang relihiyon.

Sa pagkakaron, dunay 65 ka Saksi ni Jehova ang naa sa prisohan (38 ka lalaki ug 27 ka babaye). Mas midaghan ni niadtong Septiyembre 2024 dihang gi-raid sa mga security official ang usa ka balay diin gihimo ang usa ka malinawong relihiyosong tigom ug giaresto ang 24 ka tawo. Unya, gibuhian ang duha ka menor de edad. Human sa pipila ka adlaw, usa ka 85 anyos nga babayeng Saksi ang giaresto. Dayon, ang tanang 23 ka Saksi gibalhin sa Mai Serwa Prison. Niadtong Disyembre 7, 2024, ang usa kanila, si Saron Ghebru nga siyam ka bulan nga mabdos sa iyang panganay, gibuhian. Ug niadtong Enero 15, 2025, ang 82 anyos nga si Mizan Gebreyesus gibuhian.

Niadtong Nobyembre 1, 2024, gipuntirya na pod sa mga national security officer ang mga Saksi. Ilang gidakop ang upat ka estudyanteng Saksi nga nag-edad ug 16 ngadto sa 18. Gisukitsukit sila ug gidala dayon sa Mai Serwa Prison. Niadtong Nobyembre 22, gikuha sa mga polis ang anak nga babaye ni Almaz Gebrehiwot sa eskuwelahan ug gidala sa presinto. Pag-adto ni Almaz sa presinto aron kuhaon ang iyang anak, gipagawas sa mga polis ang iyang anak pero siya ang gipriso. Si Almaz gipriso karon sa 5th Police Station sa Asmara.

Maayo na lang kay duha pa ka babayeng piniriso ang bag-o ra nga gipagawas. Si Mikal Taddesse gibuhian gikan sa Mai Serwa Prison niadtong Pebrero 25, 2025, ug si Berekti Gebretatyos gibuhian gikan sa Adi Abeto Prison niadtong Marso 12, 2025.

Lisod Kaayo nga Kahimtang Diha sa Prisohan

Lisod kaayo ang kahimtang sa mga Saksi sa Mai Serwa ug sa ubang prisohan. Ang mga piniriso maghuot sa gagmayng selda. Gamay kaayo ang lugar maong kinahanglan silang magtakilid ug magdikit kon matulog. Walay kasilyas ug naa ray oras nga ang mga lalaki ug babaye tugotan nga mangihi ug malibang. Kaduha ra ning himoon sa usa ka adlaw ug bantayan pa gyod sila sa mga sundalo. Dili igo ang ilang madawat nga medikal nga pag-atiman, ug kulang ang suplay sa pagkaon ug tubig.

Tungod niining lisod kaayo nga kahimtang, upat ka Saksi ang namatay samtang gipriso sa Eritrea ug tulo ka tigulang nga Saksi ang namatay human sila buhii.

Niadtong 2011 ug 2012, duha ka Saksi ang namatay tungod sa pagmaltratar kanila didto sa Meitir Prison Camp. Si Misghina Gebretinsae, nga nag-edad ug 62, namatay niadtong Hulyo 2011 tungod sa grabeng kainit nga iyang nasinati diha sa dapit-silotanan nga gitawag ug “underground.” Si Yohannes Haile, nga nag-edad ug 68, namatay niadtong Agosto 16, 2012, human sa halos upat ka tuig nga pagkapriso ubos sa susamang mga kahimtang.
Tungod sa kahimtang nga giantos didto sa Meitir Camp, tulo ka tigulang nga Saksi—si Kahsai Mekonnen, Goitom Gebrekristos, ug Tsehaye Tesfamariam—ang namatay human sila buhii.
Niadtong 2018, duha ka Saksi ang namatay human sila ibalhin ngadto sa Mai Serwa Prison. Si Habtemichael Tesfamariam namatay sa edad nga 76 niadtong Enero 3, ug si Habtemichael Mekonnen namatay sa edad nga 77 niadtong Marso 6. Ang mga awtoridad sa Eritrea nagpriso niining duha ka lalaki niadtong 2008 bisag walay sumbong.

Walay Eksaktong Gidugayon sa Sentensiya

Kadaghanan sa piniriso nga mga Saksi walay paglaom nga makagawas hangtod nga sila mamatay o himalatyon na. Kay wala silay mabatonan nga epektibong legal nga proseso o tabang, ang ilang pagkapriso sama rag life sentence.

Gipriso Tungod sa Konsensiya

Wintana Shewaseged

Si Wintana Shewaseged natawo sa Eritrea niadtong 1989 ug nabawtismohan ingong Saksi ni Jehova niadtong Agosto 5, 2007. Tungod sa iyang pagkamatinumanon sa iyang pagtuo, gipriso siya niadtong Abril 27, 2014, dihang gidakop siya panahon sa usa ka relihiyosong tigom. Sukad adto, nagpabilin siya sa prisohan ug gilahutay niya ang mga kalisdanan tungod sa iyang tinuohan.

Si Wintana nagdako sa pamilya nga usa ray ginikanan. Patay na ang iyang amahan, ug ang iyang inahan mibiya sa nasod tungod sa paglutos sa relihiyon. Sa wala pa mapriso si Wintana, siya nagtrabaho sa negosyo sa ilang pamilya; siya modisenyo, mamaligya, ug manahig mga sinina. Nakaeskuwela pod siyag accounting. Nailhan siya nga mahinatagon ug maayong modisenyo, kay sagad maghimo siyag mga regalo para sa uban ug hilig siyag lainlaing handicraft, sama sa painting.

Nailhan pod si Wintana sa iyang lig-ong pagtuo. Bisan sa mga kalisdanan nga iyang giatubang, wala siya mawad-ig paglaom ug nagpabilin siyang lig-on sa espirituwal. Importante kaayo para niya ang iyang gugma sa Bibliya, kay naghatag ni niyag kusog aron makalahutay sa prisohan. Usa sa mga teksto nga nakatabang niya mao ang 2 Corinto 4:7-9: “Hinuon, nabatonan namo kini nga bahandi diha sa mga sudlanang kulonon, aron ang gahom nga labaw sa kasarangan maggikan sa Diyos ug dili kanamo. Kami ginapiit pag-ayo sa tanang paagi, apan dili kay dili na makalihok; kami nangalibog, apan dili kay wala na gyoy kalingkawasan; kami ginalutos, apan wala biyai; kami nangatumba, apan wala malaglag.”

Wala Tagda ang Rekomendasyon sa mas Taas nga mga Organisasyon sa Tawhanong Katungod

Ang Eritrea wala gihapon magtagad sa internasyonal nga mga sukdanan sa tawhanong katungod. Ang dagkong organisasyon sa tawhanong katungod nagkondenar sa paglapas sa pangunang mga katungod ug padayong nag-awhag sa Eritrea sa pagtul-id sa maong kahimtang.

Niadtong 2016, gikompirmar sa Commission of Inquiry on Human Rights sa Eritrea nga ang mga awtoridad sa Eritrea nakahimog “krimen batok sa katawhan” kay ilang “gilutos [ang mga Saksi ni Jehova ug ang uban pa] base sa relihiyon ug rasa.”
Niadtong 2017, ang African Committee of Experts on the Rights and Welfare of the Child (ACERWC) nagpahayag sa kabalaka niini nga bisan pag dunay legal nga proteksiyon, ang “mga anak sa mga Saksi ni Jehova” wala makabenepisyo niini nga katungod ug gimaltratar hinuon. Ang ACERWC nagrekomendar nga “angayng ilhon ug bug-os nga iimplementar [sa Eritrea], nga walay diskriminasyon, ang Kagawasan sa Hunahuna, Konsensiya, ug Relihiyon sa usa ka bata.”
Niadtong 2018, girekomendar sa African Commission on Human and Peoples’ Rights nga ang Eritrea “mohimo dayog aksiyon aron sulbaron ang wala nila paghatag ug pangunang mga katungod sa tanang piniriso, apil . . . sa mga Saksi ni Jehova,” ug gipaimbestigahan niini ang gireport nga kamatayon sa pipila ka Saksi samtang naa sa prisohan. Gipasiugda sa komisyon nga kinahanglang “ibalik [sa Eritrea] ang katungod sa pagkalungsoranon” sa mga Saksi ni Jehova.
Niadtong Mayo 2019, ang UN Human Rights Committee (CCPR) nag-awhag sa Eritrea nga paneguroon nga ipatuman nila ang kagawasan sa relihiyon ug pagtuo ug “buhian ang tanang giaresto ug gidetener tungod sa paggamit sa ilang kagawasan sa relihiyon, apil na ang mga Saksi ni Jehova.” Gihangyo sab sa CCPR ang Eritrea nga “ilhon ang katungod niadtong modumili sa pagsundalo tungod sa konsensiya ug magtaganag probisyon sa alternatibong serbisyo para sa komunidad alang niadtong modumili tungod sa konsensiya.”
Sa usa ka report ngadto sa UN Human Rights Council niadtong Mayo 7, 2024, gihisgotan sa UN Special Rapporteur ang kahimtang sa tawhanong katungod didto sa Eritrea. Kini miingon: “Ang mga Saksi ni Jehova nakaatubang ug grabe ug lainlaing klase sa paglutos. Basta na lang sila idetener ug tangtangan sa ilang pagkalungsoranon. Dili sila makakuhag mga dokumento, kuhaan silag mga katungod, ug dili sila makapahimulos sa mga serbisyo sa gobyerno.” Sumala sa maong report, giobligar ang gobyerno sa Eritrea nga “buhian dayon nga walay bisan unsang kondisyones ang tanang ilegal nga gidetener” ug “hunongon na ang pagdakop ug pagdetener nga walay legal nga basehanan.”

Time Line

Hunyo 17, 2025

Tanantanan, 65 ka Saksi ang gipriso.
Nobyembre 22, 2024

Si Almaz Gebrehiwot gidakop kay dili siya moapil sa politikal nga partido sa ilang nasod.
Nobyembre 1, 2024

Upat ka estudyanteng Saksi ang giaresto ug gibalhin sa Mai Serwa Prison.
Septiyembre 27, 2024

Giaresto ang 23 ka Saksi ug gibalhin sa Mai Serwa Prison; sa ulahi gibuhian ang duha.
Pebrero 1, 2021

Tulo ka Saksi ang gipagawas sa prisohan.
Enero 29, 2021

Usa ka Saksi ang gipagawas sa prisohan.
Disyembre 4, 2020

Gibuhian ang 28 ka Saksi.
Marso 6, 2018

Namatay si Habtemichael Mekonnen, 77 anyos, human siya ibalhin sa Mai Serwa Prison.
Enero 3, 2018

Namatay si Habtemichael Tesfamariam, 76 anyos, human siya ibalhin sa Mai Serwa Prison.
Hulyo 2017

Ang tanang Saksi nga gidetener sa Meitir Camp gibalhin sa Mai Serwa Prison sa gawas sa Asmara.
Hulyo 25, 2014

Kadaghanan niadtong giaresto sa Abril 14 gibuhian, pero 20 niadtong giaresto sa Abril 27 ang gidetener gihapon.
Abril 27, 2014

Trayentay uno ka Saksi ang giaresto panahon sa tigom sa pagtuon sa Bibliya.
Abril 14, 2014

Kapig 90 ka Saksi ang giaresto panahon sa tinuig nga pagselebrar sa Memoryal sa kamatayon sa Kristo.
Agosto 16, 2012

Namatay si Yohannes Haile, 68 anyos, samtang gipriso ubos sa lisod kaayo nga mga kahimtang.
Hulyo 2011

Namatay si Misghina Gebretinsae, 62 anyos, samtang gipriso ubos sa lisod kaayo nga mga kahimtang.
Hunyo 28, 2009

Gi-raid sa mga awtoridad ang balay sa usa ka Saksi panahon sa relihiyosong serbisyo ug giaresto ang tanang 23 ka Saksi nga tua didto, gikan sa 2 ngadto sa 80 anyos.
Abril 28, 2009

Ang tanang Saksi ni Jehova, gawas sa usa, nga gipriso diha sa mga presinto sa polis gibalhin sa mga awtoridad ngadto sa Meitir Prison Camp.
Hulyo 8, 2008

Gisugdan sa mga awtoridad pag-raid ang mga balay ug trabahoan aron arestohon ang 24 ka Saksi, nga kadaghanan kanila maoy nagbuhi sa ilang pamilya.
Mayo 2002

Gipahunong sa gobyerno ang tanang relihiyosong grupo nga dili apil sa upat ka relihiyon nga giaprobahan sa gobyerno.
Oktubre 25, 1994

Tungod sa presidential decree, ang mga Saksi ni Jehova gitangtangan sa ilang pagkalungsoranon ug sa pangunang mga katungod.
Septiyembre 17, 1994

Si Paulos Eyassu, Isaac Mogos, ug Negede Teklemariam gipriso bisag walay sumbong o husay.
Katuigan sa 1950

Ang unang mga komunidad sa mga Saksi ni Jehova naestablisar sa Eritrea.