Gipriso Tungod sa Ilang Relihiyon—Russia
Ang kasaysayan sa mga Saksi ni Jehova sa Russia sa modernong panahon punog pagdaogdaog ug paglutos. Sulod sa daghang katuigan sa ika-20 nga siglo, giabuso ug gimaltratar sa mga awtoridad sa Russia ang mga Saksi, bisag nailhan sila nga malinawon ug nagsunod sa balaod. Ang katuyoan sa gobyerno sa Soviet Union mao ang pagpugos nila nga modawat sa Soviet nga mga panglantaw. Gidid-an sila sa pagbaton ug Bibliya o relihiyosong mga publikasyon. Kanunay silang gibantayan ug kinahanglang himoon ang relihiyosong mga panagkatigom sa tago. Kon masakpan sila, kulatahon sila ug hatagan ug taas nga sentensiya sa pagkapriso. Linibo ang gipugos ug balhin sa gobyerno ngadto sa Siberia.
Kana nabag-o niadtong 1991 dihang legal nga giila sa gobyerno sa Russia ang mga Saksi ni Jehova ug gihatagan silag kagawasan sa pagsimba nga walay pagbabag sa mga awtoridad. Pero wala magdugay ang maong panahon sa kalinaw.
Niadtong 2009, migrabe ang pagsupak ug mga restriksiyon dihang gisuportahan sa Korte Suprema sa Russia ang desisyon sa usa ka ubos nga korte nga tawgong “ekstremista” ang kongregasyon sa mga Saksi ni Jehova. Human sa mga husay sa korte sulod sa mga katuigan, niadtong Abril 2017, midesisyon ang Korte Suprema sa Russia nga idili ang legal nga mga korporasyon sa mga Saksi tungod kuno sa ekstremista nga kalihokan. Gikompiskar dayon sa mga awtoridad sa Russia ang ilang propidad ug gipasira ang ilang mga dapit sa pagsimba, ug mideklarar sila nga “ekstremistang basahon” ang ilang relihiyosong mga publikasyon.
Dili lang kay legal nga mga korporasyon sa mga Saksi ang gipuntirya sa mga awtoridad sa Russia, kondili ang indibiduwal sab nga mga Saksi ni Jehova. Miingon sila nga ang pribadong pagsimba sa usa ka Saksi konektado sa gidili nga organisasyon. Dihang mag-raid ang mga polis sa mga balay sa mga Saksi, ila silang giabuso ug pintas nga gisukitsukit. Ang mga lalaki ug babaye, bisan unsa pay ilang edad, giaresto, gibutang sa house arrest o pretrial detention, gihukmang sad-an, ug gisentensiyahan nga prisohon.
Sukad sa pagdili niadtong Abril 2017, gatosan ka Saksi ang gisentensiyahan ug pretrial detention o pagkapriso sa kaso nga pagpakigbahin sa ekstremistang kalihokan. Niadtong Hunyo 17, 2025, miabot nag 160 ka Saksi ang napriso.
Mga Pagprotesta Batok sa Pintas nga Pagtratar sa Russia sa mga Saksi ni Jehova
Padayong gihukmang sad-an sa mga awtoridad sa Russia ang mga Saksi tungod sa ekstremista nga kalihokan bisan pa sa panawagan sa lainlaing nasod nga hunongon na sa Russia ang pintas nga paglutos niini. Gikondenar sa mga tawo ug sa mga korte gawas sa Russia nga nahibalo bahin niini ang gobyerno sa Russia tungod sa pintas niini nga paglutos sa mga Saksi ni Jehova.
European Court of Human Rights: Niadtong Hunyo 7, 2022, ang European Court of Human Rights mipakanaog ug importanteng hukom batok sa Russia, nga nagkondenar sa ilang paglutos sa mga Saksi ni Jehova (Taganrog LRO and Others v. Russia, nos. 32401/10 and 19 others). Ang Korte mideklarar nga supak sa balaod ang gihimo sa Russia nga pagdili sa mga Saksi ni Jehova niadtong 2017. Gimandoan ang Russia sa “paghimo sa tanang gikinahanglang lakang aron maseguro nga matapos ang tanang pending nga kaso batok sa mga Saksi ni Jehova . . . ug buhian . . . ang [naprisong] mga Saksi ni Jehova.” Dugang pa, nagmando sab kini sa pagbalik sa tanang gikompiskar nga propidad o pagbayad ug kapin sa 60 ka milyong dolyares ingong danyos ug sa pagbayad ngadto sa mga mipetisyon ug kapin sa 3 ka milyong dolyares alang sa nonpecuniary damages (mga danyos nga walay katumbas nga kantidad).
Sulat gikan sa Secretary General sa Council of Europe: Sa sulat nga pinetsahag Disyembre 9, 2022, ngadto sa Russian Minister of Foreign Affairs, si Marija Pejčinović Burić miingon: “Sa mga kaso nga Jehovah’s Witnesses of Moscow and Others ug Krupko and Others, bahin sa pagbungkag sa relihiyosong komunidad sa applicant nga naglakip sa pagdili sa mga kalihokan niini, sa pagpaundang sa usa ka malinawong relihiyosong panagkatigom ug sa paghikaw sa kagawasan sa pipila niadtong miapil niini, ang Committee kusganong nag-awhag sa mga awtoridad nga hunongon na ang pagdili sa mga kalihokan sa tanang organisasyon sa mga Saksi ni Jehova ug ibasura ang tanang kaso batok kanila.”
Desisyon sa Committee of Ministers sa Council of Europe: Sa ilang miting niadtong Septiyembre 2023, ang Committee of Ministers [CoM] miingon nga sila “naalarma pag-ayo nga ang tin-aw nga desisyon sa [European Court of Human Rights] ubos sa Article 46 sa Convention ug ang importanteng bahin sa hukom sa Taganrog LRO and Others wala gyod sunda sa mga awtoridad sa Russia, ilabina ang bahin sa . . . pagpagawas sa naprisong mga Saksi ni Jehova.” Kay wala kini tumana sa Russia, ang CoM “midesisyon nga ipaabot kini nga mga kaso ngadto sa United Nations Human Rights Committee, sa Working Group on Arbitrary Detention of the UN Human Rights Council, ug sa ubang internasyonal nga organisasyon nga nagsunod sa mga kaso bahin sa paglutos sa mga Saksi ni Jehova sa Russian Federation. Tumong niini nga mapaneguro nga masunod ang gipakanaog nga mga desisyon.”
Mga Pananglitan sa Dili Makataronganong mga Hukom
Niadtong Marso 27, 2025, gihukmang sad-an sa Konakovo City Court sa Tver Region ang upat ka Saksing lalaki: Oleg Katamov, Aleksey Kuznetsov, Aleksandr Shchetinin, ug Aleksandr Starikov. Unsay ilang sala? Sila naghisgot bahin sa Bibliya ngadto sa ilang mga silingan ug nagdumalag malinawon nga relihiyosong mga tigom. Silang upat gisentensiyahan ug unom ka tuig nga pagkapriso ug gidetener sa korte.
Niadtong Abril 3, 2025, gihukmang sad-an sa Sovetskiy District Court sa Siyudad sa Chelyabinsk si Maksim Khamatshin ug gisentensiyahan ug unom ka tuig nga pagkapriso. Si Maksim giakusahan sa pagdumalag relihiyosong mga panagkatigom; gidetener siya sa korte.
Niadtong May 30, 2025, gisentensiyahan sa Leninskiy District Court sa Tambov ang 60 anyos nga si Oleg Sirotkin ug unom ka tuig nga pagkapriso sa penal colony. Si Oleg naminyo kang Nataliya ug duna silay duha ka anak nga babaye. Niadtong Septiyembre 2021, gi-raid sa mga polis ang ilang balay sa Tambov. Si Oleg giakusahan nga nag-organisar ug nagpakigbahin sa relihiyosong mga tigom sa mga Saksi ni Jehova, nga giisip sa mga awtoridad nga katumbas sa pagpadayon sa mga kalihokan sa usa ka ekstremistang organisasyon. Gikan sa korte, siya gidetener dayon.
Mga Paningkamot Aron Matapos ang Dili Makataronganong mga Pagbilanggo
Ang mga Saksi ni Jehova sa tibuok kalibotan naguol pag-ayo sa pintas nga pagtratar sa Russia ngadto sa ilang mga isigkamagtutuo. Minilyong Saksi sa tibuok kalibotan ang nagpadalag mga sulat ngadto sa mga opisyales sa gobyerno sa Russia aron mohangyo alang sa naprisong mga Saksi. Ang mga abogado sa gipriso nga mga Saksi mipayl ug mga apelasyon sa matag level sa mga korte sa Russia ug daghang aplikasyon ngadto sa European Court of Human Rights. Ang mga Saksi ni Jehova mipayl sab ug mga reklamo sa UN Human Rights Committee ug sa UN Working Group on Arbitrary Detention ug naghatag ug mga report ngadto sa internasyonal nga mga organisasyon nga nagmonitor sa mga pag-abuso sa tawhanong katungod. Ipadayon sa mga Saksi ni Jehova ang paghimo sa tanang paagi nga mapahibalo ang kahimtang sa ilang mga isigkamagtutuo sa Russia aron matapos kining grabe nga relihiyosong paglutos.
Time Line
Hunyo 17, 2025
Tanantanan, 160 ka Saksi ang gipriso.
Marso 6, 2025
Ang European Court of Human Rights (ECHR) nagpakanaog ug hukom bahin sa kaso sa Loginov and Others v. Russia, nga nag-ingon nga gilapas sa Russia ang mga katungod sa siyam ka Saksing lalaki nga ilegal nga gidetener (pito nila ang gi-torture) human gi-raid ang ilang mga balay sa Surgut niadtong Pebrero 15, 2019.
Oktubre 24, 2023
Ang UN Human Rights Committee (CCPR) nag-release ug duha ka Views bahin sa Elista ug Abinsk Local Religious Organizations. Sa maong mga kaso, ang CCPR mihinapos nga gilapas sa Russia ang mga katungod sa mga Saksi ubos sa Article 18.1 (“katungod sa kagawasan sa hunahuna, konsensiya ug relihiyon”) ug Article 22.1 (“katungod sa kagawasan sa pagpakig-uban”) sa International Covenant on Civil and Political Rights. Ang maong mga desisyon nagkompirmar nga ang ilang relihiyosong mga literatura wala magpasiugdag pagdumot o kapintasan.
Hunyo 7, 2022
Ang ECHR nagpakanaog ug importante kaayong hukom sa kaso sa Taganrog LRO and Others v. Russia, nga nagkondenar sa Russia sa dili maayong pagtratar niini sa mga Saksi ni Jehova.
Enero 12, 2022
Gidugang sa Ministry of Justice of the Russian Federation ang JW Library nga application ngadto sa Federal List of Extremist Materials. Kini ang kinaunhan ug nag-inusara nga app nga gidili sa Russia ingong ekstremista.
Septiyembre 27, 2021
Gibasura sa Saint Petersburg City Court ang apelasyon batok sa desisyon niadtong Marso 31, 2021, nga nagdeklarar nga ekstremista ang JW Library app ug nagdili sa paggamit niini sa tibuok Russian Federation ug Crimea. Gipatuman dayon ang orihinal nga desisyon sa korte.
Abril 26, 2019
Nakita sa UN Working Group on Arbitrary Detention nga gilapas ang mga katungod ni Dmitriy Mikhailov ug gisaway niini ang paglutos sa Russia sa mga Saksi ni Jehova.
Abril 20, 2017
Ang Korte Suprema sa Russian Federation midesisyon nga ipasira ang national office ug ang 395 ka Local Religious Organization sa mga Saksi ni Jehova.