Gipriso Tungod sa Ilang Relihiyon—Singapore

Walo ka batan-ong lalaki nga mga Saksi ni Jehova ang gipriso sa Singapore kay midumili nga magsundalo tungod sa konsensiya. Lima kanila ang gipriso karon sa ikaduhang higayon kay wala nila usba ang ilang baroganan human ang ilang unang sentensiya. Kini nga mga batan-on dili makapangayog legal nga tabang sa Singapore, kay gipatuman sa gobyerno ang pinugos nga pagsundalo ug wala niini ilha ang katungod niadtong modumili sa pagsundalo tungod sa konsensiya.

Sa Singapore, inig-edad ug 18 sa usa ka batan-ong lalaki, kinahanglan siyang mosulod sa pagsundalo. Kon modumili siya tungod sa iyang konsensiya, idetener siya ug hangtod sa 12 ka bulan diha sa kampo sa militar. Human niana, buhian siya, dayon pasul-obon ug uniporme ug paapilon sa pagbansay sa pagsundalo. Kon modumili gihapon siya, moatubang na sab siya sa korte sa militar ug posibleng sentensiyahag hangtod sa 18 ka bulan. Busa, ang batan-ong mga Saksi nga lalaki nga modumili sa pagsundalo tungod sa konsensiya kaduha mapriso, nga tanantanan moabot ug 30 ka bulan.

Ang Singapore Wala Mosunod sa Mando sa UN

Ang United Nations dugay nang miapelar sa mga membro nga nasod nga “ang pagdumili sa pagsundalo tungod sa konsensiya angayng isipon ingong makataronganong pagpahayag sa kagawasan sa hunahuna, konsensiya ug relihiyon nga gidawat sa Universal Declaration of Human Rights.” Bisag ang Singapore membro na sa UN sukad pa niadtong 1965, gipahayag niini nga dili kini uyon sa mando sa United Nations bahin sa maong isyu. Sa sulat nga pinetsahag Abril 24, 2002, nga giadres ngadto sa UN Commission on Human Rights, ang usa ka opisyal sa gobyerno sa Singapore miingon nga “kon ang pagtuo o binuhatan sa usa supak [sa katungod nga depensahan ang nasod], ang katungod sa nasod nga panalipdan ang seguridad niini maoy unahon.” Ang opisyal klarong miingon, “Para namo, dili mapadapat ngadto sa tanang nasod ang katungod nga modumili sa pagsundalo tungod sa konsensiya.”

Gipriso Tungod sa Konsensiya

Yishuo Lin

Si Yishuo Lin naay duha ka manghod nga lalaki. Ang iyang inahan nahimong Saksi ni Jehova niadtong bata pa siya. Si Yishuo ganahan kaayong magtuon bahin sa siyensiya. Samtang nagkat-on siyag dugang bahin sa paglalang, si Yishuo nakombinsir nga tinuod ang Diyos ug nga ang Diyos mao ang Maglalalang sa tanang butang. Sa nagdako si Yishuo, gitandi niya ang iyang nakat-onan sa Bibliya ug ang mga gitudlo sa ubang relihiyon. Pinaagi niini, nakombinsir siya nga nakaplagan na niya ang kamatuoran.

Sa bata pa si Yishuo, nahibalo siya nga ang mga Kristohanon kinahanglang magpabiling neyutral, ilabina bahin sa pagsundalo. Pinaagig dugang nga pag-research ug personal nga pagtuon sa Bibliya, si Yishuo nahimong kombinsido ug determinado nga magpabiling neyutral.

Ang lawom nga pagtuon sa Bibliya nakatabang kang Yishuo nga maandam ang iyang kaugalingon sa iyang pagkapriso. Nakatabang pod ni niya nga maugmad ang Kristohanong mga hiyas, sama sa gugma sa isigkatawo ug pagpasaylo. Nangandam pod siya aron maatiman ang iyang espirituwal nga panginahanglan sa dihang mapriso na siya. Sa wala pa mapriso si Yishuo, naghimo siyag mga sulat para sa iyang kaugalingon. Gihisgotan sa maong mga sulat ang mga punto nga gibase sa Bibliya. Dayon iyang gihangyo ang iyang inahan nga, sa matag karon ug unya, padad-an siya sa maong mga sulat didto sa prisohan.

Kanunayng gihinumdoman ni Yishuo ang giingon sa Salmo 118:6: “Si Jehova dapig kanako; dili ko mahadlok. Unsay mabuhat sa tawo kanako?” Si Yishuo miingon: “Kini nga teksto nakahatag nakog kaisog ug kusog sa pag-atubang sa bisan unsang kalisdanan nga akong masinatian.”

Time Line

Hunyo 17, 2025

Tanantanan, walo ka Saksi ni Jehova ang gipriso kay midumili sa pagsundalo tungod sa konsensiya.
Abril 24, 2002

Gikompirmar sa usa ka opisyal sa gobyerno nga ang Singapore dili moila sa katungod nga modumili sa pagsundalo tungod sa konsensiya.
Pebrero 1995

Misamot ang paglutos ug pagpangdakop sa mga Saksi ni Jehova nga lungsoranon sa Singapore.
Agosto 8, 1994

Gidismis sa Taas nga Korte sa Singapore ang apelasyon sa mga Saksi.
Enero 12, 1972

Wala na itugot sa gobyerno sa Singapore nga marehistro ang mga Saksi ni Jehova ingong relihiyon.