Gipriso Tungod sa Ilang Relihiyon—South Korea

Niadtong Oktubre 26, 2020, sa unang higayon, kadtong midumili sa pagsundalo sa South Korea tungod sa ilang konsensiya gihatagag kahigayonan nga mohimog alternatibong serbisyo para sa komunidad o alternative civilian service. Pero tungod sa gidugayon ug kagrabehon sa alternative service system sa South Korea, ang mga human rights authority nag-ingon nga kini gipahamtang ingong silot ug maoy usa ka matang sa diskriminasyon. Ang alternative service himoon sulod sa 36 ka bulan. Doble nig gidugayon kon itandi sa pagserbisyo sa militar, ug supak ni sa internasyonal nga mga sukdanan. Sumala niini nga mga sukdanan, ang kinatas-ang gidugayon sa alternative service maoy usag tunga ka pilo sa gidugayon sa pagserbisyo sa militar ug kon molapas man niini, kinahanglang dunay balidong rason. Ang pipila ka South Korean nga mga Saksing lalaki wala modawat niini nga alternative service program. Ang uban mipayl ug mga reklamo ngadto sa korte. Niadtong Mayo 30, 2024, upat ka huwes ang miuyon nga dunggon ang maong mga reklamo pero lima ang miingon nga ibasura kini. Busa gibasura sa Constitutional Court sa South Korea ang tanang reklamo batok sa alternative service. Bisag managlahi ang ilang opinyon, gipasiugda sa korte nga ang alternative service gipahamtang ingong silot. Kini nag-ingon: “Ang ingon niana nga alternative service mora rag usa ka matang sa silot nga naglapas sa kagawasan niadtong midumili sa pagsundalo tungod sa konsensiya.”

Si Woo-jin Byeon, 29 anyos nga minyong lalaki, mao ang unang napriso sa South Korea kay midumili sa alternative service. Nakadesisyon siya nga dili dawaton ang alternative service ug matinahoron niya kining gibalibaran. Miingon siya nga modawat siyag alternative service kon kini dili ipahamtang ingong silot. Pero niadtong Hulyo 24, 2024, gisentensiyahan siya sa korte ug usa ka tuig ug unom ka bulan nga pagkapriso.

Sa pagkakaron, 14 ka lalaking Saksi ang midumili sa alternative service, apil si Mr. Byeon, ug 11 ka lalaki ang ginahusay pa. Depende sa resulta sa husay, posible pod silang sentensiyahan ug prisohon. Sa kasamtangan, ang kadaghanang midumili sa pagsundalo tungod sa konsensiya midesisyon sa paghimog alternative service bisag gipahamtang kini ingong silot.

Time Line

1. Hulyo 24, 2024

   Si Woo-jin Byeon gisentensiyahan ug 18 ka bulan nga pagkapriso kay midumili siya sa alternative service.

2. Nobyembre 10, 2022

   Human ipatawag aron magsundalo, si Woo-jin Byeon misulat sa Military Manpower Administration aron modumili sa pagserbisyo sa militar ug sa alternative service tungod sa iyang konsensiya.

3. Oktubre 26, 2020

   Ang gobyerno sa South Korea naghatag ug probisyon nga alternative service para sa mga midumili sa pagsundalo tungod sa konsensiya.

4. Nobyembre 1, 2018

   Sa Korte Suprema sa South Korea, 9 ka huwes ang miuyon nga dili krimen ang pagdumili nga magsundalo tungod sa konsensiya, ug 4 ka huwes ang wala mouyon niana.

5. Hunyo 28, 2018

   Ang Constitutional Court sa South Korea mideklarar nga dili subay sa balaod ang usa ka seksiyon sa Military Service Act kay kini wala maghatag ug alternative service para sa mga modumili sa pagsundalo tungod sa konsensiya.

6. Oktubre 18, 2016

   Sa unang higayon, ang Gwangju Appellate Court nagpakanaog ug desisyon nga dili sad-an ang tulo ka Saksi nga miapelar sa ilang kaso.

7. Agosto 30, 2011

   Gisuportahan pag-usab sa Constitutional Court ang balaod nga silotan ang mga modumili sa pagsundalo tungod sa konsensiya.

8. Agosto 26, 2004

   Ang Constitutional Court miuyon nga subay sa balaod ang pagsilot sa mga modumili sa pagsundalo tungod sa konsensiya.

9. 1975

   Giimplementar sa gobyerno ang balaod nga nag-obligar sa tanan nga magserbisyo sa militar.

10. 1973

    Gisugdan sa gobyerno ang pag-torture sa giprisong mga Saksi, ug nagpadayon ni hangtod sa tungatungang bahin sa katuigan sa 1990.

11. 1953

    Gipriso sa gobyerno ang unang Saksi nga midumili sa pagsundalo tungod sa iyang konsensiya.