Ang “Bag-ong Moralidad”—Nagaani sa Gipugas?
“GIPULIHAN sa Diyos sa AIDS ang kalayo ug asupre,” misulat ang usa ka suko nga magbabasa ngadto sa New York Post. Susamang gibati sa daghan nga ang epidemyang pagtubo sa AIDS, herpes ug sa ubang STD labaw pa kay sa pagkabunga sa gitawag seksuwal nga pagbag-o. Ilang gisabot nga kini silot sa Diyos tungod sa kahilayan.
Ang epidemya sa STD, sa tino, makahahadlok nga landong. Apan ang Bibliya wala magpasabot nga ang Diyos karong adlawa nagagamit sa sakit ingong silot sa malapasong kagawian. Ang sakit ug balatian mao ang dili-kalikayang sangpotanan sa napanunod nga salang nagaapektar sa tanang tawo. (Roma 5:12) Busa bisan ang mahadlokon-sa-Diyos, matarong-ug-kinabuhing katawhan usahay mahimong mga biktima sa malaglagong sakit.
Bisan pa niana, ang usa sagad makapauswag sa kahimtang niya sa kinabuhi—apil ang iyang panglawas—pinaagi sa pagsunod sa diyosnong mga sukdanan. Pananglitan, ang Bibliya nagasaway sa pag-inom nga hinobra sa alkoholikong ilimnon. (1 Corinto 6:9, 10; 1 Timoteo 3:8) Ang Proverbio 23:29-34 nagapunting sa pipila sa mga katarongan nganong kining baroganana maoy maalamon:
“Kinsa man ang may kasakit? Kinsa man ang dili mahimutang? Kinsa man ang may mga samad sa walay hinungdan? Kinsa man ang may lubog nga mga mata? Kadtong nagapabilin sa hataas nga panahon uban sa bino . . . Sa tumoy niini kini mopaak sama gayod sa bitin, ug kini nagapagulag hilo sama gayod sa halas nga bahion. Ang imong mga mata makakita sa mga butang katingalahan, ug ang imong kasingkasing mismo mosultig tinuis nga mga butang. Ug ikaw mahisama gayod sa usang nagahigda sa kataliwad-an sa dagat, bisan sama sa usang nagahigda sa palo sa sakayan.”
Mga samad, nadaot nga panglawas, mga handurawan—ngatanan mangil-ad nga mga epekto sa pagkahubog. Ang Diyos, hinuon, dili kapasanginlan niining mga sakita. Ang indibiduwal, tungod sa dili pagpanumbaling sa mga sukdanan sa Diyos, nagadala niana sa iyang kaugalingon. Sa Galacia 6:7, 8 ang Bibliya nagaingon: “Ayaw pagpalimbong. Ang Diyos dili mabiaybiay. Kay bisan unsa ang ginapugas sa usa ka tawo, kini usab ang iyang pagaanihon; tungod kay siya nga nagapugas nga nagahunahuna sa iyang unod magaani sa kadunotan gikan sa iyang unod.”
Ang samang prinsipyo matuod kon bahin sa seksuwal nga moralidad. Sa 1 Corinto 6:18 ang Bibliya nagapasidaan: “Kalagiw kamo sa pakighilawas. . . . Siya nga nagabatasan sa pakighilawas nagapakasala batok sa iyang kaugalingong lawas.” Ang “pakighilawas” nagasakop sa daghang seksuwal nga mga sala, apil ang una-kaminyoon nga sekso ug homoseksuwalidad. Matikding kini maoy sala batok sa lawas sa usa. “Karon ang lawas dili man alang sa pakighilawas,” nagingon si Pablo. (1 Corinto 6:13) Ang mga gahom sa pagsanay sa tawo gidesinyo alang sa sagradong katuyoan: sa pagpapuyo sa yuta sa matarong nga mga anak. (Genesis 1:28) Ang relasyon sa sekso magasilbi usab nga tinubdan sa mutuwal nga kahimuot alang sa minyong mga parisan.—1 Corinto 7:3-5; Proverbio 5:18-20.
Ang mahilayon nga sekso nagabiaybiay niining gipanalanginan nga kahikayan. Busa kini daotan sa moral, nga nagahimo sa usa nga hugaw sa mga mata sa Diyos. Sa kataposan mosangko kini sa paghukom nga gibatbat sa 1 Corinto 6:9, 10: “Ang mga makihilawason, o mga tigsimbag diyosdiyos, o mga mananapaw, o mga lalaking gihuptan alang sa mga katuyoang dili kinaiyanhon, o mga lalaking modulog sa mga lalaki . . . dili magapanunod sa gingharian sa Diyos.” Hinuon, ang usa nga ‘nagapakasala batok sa iyang lawas’ tingali usab ‘mag-ani sa iyang gipugas’ sa lawasnon ug emosyonal nga diwa. Ang mga sakit nga gipasa sa sekso maoy bahin lamang sa kapid-ang mga suliran nga mahibalag sa mahilayon: nagkabulag o walay-kasegurohan nga mga panagtiayon, balikbalik nga kaguol, kahadlok sa pagmabdos, pagkawalay-pagsalig sa uban. Ang mga homoseksuwal, usab, ‘nagadawat sa ilang kaugalingon sa bug-os nga balos, nga angay sa ilang kasal-anan’ nag-ingon ang Bibliya. (Roma 1:27) Ang ilang malaw-ay sa hilabihang seksuwal nga buhat—kon kaha buhaton uban sa daghang paris o “uban sa usa ka paris”—maoy “supak sa kinaiyahan.” (Roma 1:26) Nan, angay ba nga kita matingala nga ang daghang lawasnong suliran nagaduyog sa ilang paagi sa pagkinabuhi?
Dili Gratis nga Pagsakay
Busa ang sakit-nagdagsang sa STD dako pag nahimo kay sa gipahinabo sa pila ka tawo ang lawasnong kaalingasa. Kini nagpaduhaduha sa dalan sa kinabuhi nga nanaad ug kagawasan, apan nga alang sa daghan walay gihatag gawas lamang sa kaguol ug kasakitan. Ang ideya nga tungod sa “ang pildora” ug penicillin ang usa makapahimulos sa mahilayong sekso nga walay sangpotanan napamatud-ang kataw-anan. Siempre, ang mga Kristohanon dili gayod magkalipay sa mga pag-antos sa uban. Hinuon sila nagalaom nga kadtong nalit-agan sa “dalang matulin” sa pagkamahilayon seryosong magapalandong sa ilang dalan sa kinabuhi ug kon unsay resulta niana. Dili pa kaayo ulahi—o lisod kaayo—nga sila mohimog gikinahanglang kausaban. Ang mga Kristohanon sa karaang mga panahon milampos sa pag-ikyas sa lit-ag sa seksuwal nga imoralidad. Ug sa modernong mga panahon ang mga Saksi ni Jehova nakatabang sa kaliboan sa pagbuhat sa sama.—1 Corinto 6:9-11.
Ugaling, makapasubong isulti, ang kinabag-an mopatim-awng determinado sa pagpadayon sa ilang mahakogon nga dalan. Ang kahadlok nga makakuhag STD sa kadugayan dili gayod lagmit mopausbaw sa kaputli sama rang ang kahadlok sa mga bomba nukleyar mopausbaw sa kalinaw. Mipahayag ang usa ka estudyante sa kolehiyo: “Ako nagtuo nga ang AIDS ug herpes tinong anaa sa mga hunahuna sa katawhan. Apan sa akong hunahuna sila sa bisan unsang paagi wala makapugong sa seksuwal nga pagbag-o taliwala sa kadaghanang tawo sama nakog panuigon.”
Busa bisan kon ang AIDS, herpes o ilang ubang makadaot nga kauban mopadayon sa ilang pagtubong epidemiko o moyuhot ra sa pagkawala walay labot sa ulohan. Sa bisan unsang paagi ang kadaot ngadto sa masilakong dagway sa “bag-ong moralidad” nahimo na nga dili mapala. Kini nayagyag ingong walay-bunga, dili-mabungahon ug peligrosong paagi sa kinabuhi. Ang mga tigpaluyo sa ‘libreng gugma’ sa ingon nakadiskobre, sa ilang kahiubos, nga ang supak-kasugoang “gugma” dili gayod “libre.”
Sa pagkamatuod, dako kaayo ang bayad niana.