Gikan sa Among mga Magbabasa

Abuno sa Dugo

Akong nabasa ang inyong ulahing isyu bahin sa pag-abuno sa dugo. (Disyembre 8, 1984 sa Cebuano) Ang Buhat 15:29 nagasugo kanato sa paglikay sa dugo, pero dayag ang dugo nagatumong sa dugo sa mga hayop nga patay nga gigamit sa pagsimbag diyosdiyos. Ang pag-ingong buot sa Diyos nga kita molikay sa pagbuhi sa usa ka tawo nga tinong mamatay kon walay dugo maoy pagbuno.

B. B., Texas

Dili kapamatud-ang mamatay ang pasyente tungod sa pagdumilig dugo o nga siya mabuhi tungod sa pagpaabuno niana. Ang pila ka pasyente mamatay bisan pag giabunohan sa dugo o bisan tungod niana. Ang uban nabuhi bisan pag wala abunohi o tungod sa paglikay. Matuod nga sa Buhat 15:29 ang mga Kristohanon gisugo sa paglikay sa mga linuok, nga nagpasabot sa patayng hayop nga anaa ra ang dugo niana. Apan unya kini nagasugo sa paglikay sa dugo nga walay restriksiyon. Ug sa Levitico 17:10 ang sugo maoy batok sa pagkaon sa “bisan unsang matang sa dugo.” Ang pagkaon sa dugo dili mahimong mas dalawaton tungod kay ang naghatag maoy tawo inay hayop ni tungod kay ang naghatag nagapadayong buhi inay namatay.—ED.

Pagkawalay-Trabaho

Tapos mawad-an sa akong trabaho duha ka tuig nga milabay may diyutayng kabalaka kon unsaon ko pagbuhi sa akong pamilya. Ako may trabaho sulod sa 18 anyos sa usa ka dapit una kana magsira. Gisulayan ko nga wala molampos ang pagpangitag trabaho. Dayon akong gisulayan ang pipila ka sugyot nga natala sa inyong magasin. (Disyembre 22, 1984 sa Cebuano) Milampos kanako ang pagmugna sa akong kaugalingong trabaho.

T. H., Illinois

Wala pa gayod ako makabasa sukad sa hamili nga asoy sa kasinatian sa pagkawalay-trabaho. Inay mosentro sa sayop ug pagkanegatibo, ang inyong magasin nag-asoy sa unsang paagi ang usa makahanaw sa iyang suliran samtang mahuptan ang garbo ug dignidad.

M. Y., Michigan

Ang inyong artikulo basin moagak sa mga tawo sa paglapas sa balaod. Ang usa tingali maghunahunang ang iyang balay magamit alang sa mga kalihokang inyong gitala sa panid 10. Ang matuod mao nga halos ang tanan nianang kalihokana dili legal gawas ang imong balay anaa sa komersiyal o industriyal nga sona o nahatag ang usa ka kausaban.

H. G., New Jersey

Dili na mistil isulti pa nga ang usa ka tawo angay mangutana sa lokal nga mga awtoridad bahin sa mga ordinansiya sa sona, mga kalagdaan sa negosyo, mga kinahanglanon sa edukasyon o lisensiya o ubang legal nga kinahanglanon. Sama rang maayong mangutana ang usa ka tawo kon unsang edukasyonal nga mga serbisyo ang ginatagana sa lokal nga mga gobyerno nga makatabang kaniya sa pagkahimong epektibo kutob sa mahimo diha sa iyang kaugalingong panarbaho diha sa balay.—ED.