Gikan sa Among mga Magbabasa
Giya sa Kamamugnaon
Gikahimut-an ko ang mga isyu sa inyong magasin sa miaging tuig nga dili ikabatbat sa mga pulong. Ingong komersiyal nga magsusulat, ako kanunay makakitag giya sa pagkamamugnaon diha sa inyong magasin. Apan labing hinungdanon, bisan kon kinsa o kon diin ka, bisan kon unsa ang imong kahimtang—matag panahong ikaw mobasa sa kinaulahiang isyu kini nahisamag kini gisulat alang gayod kanimo!
L. H., Canada
Tabang sa Buluhaton sa Tunghaan
Karong bag-o ako giasayn sa pagdukiduki bahin sa magasing komiks, ug giingnan ako sa akong magtutudlo sa pag-adto sa publikong librarya. Ako ug usa ka higala miadto didto, apan kami giingnang walay ingong materyal didto. Ako mipauli sa balay nga mabalak-on, apan sa dako kong kahupayan gihatagan ako sa akong inahan sa usa ka kopya sa Italyanong edisyon sa inyong magasin nga may mga artikulo bahin sa mga magasing komiks (Sa Ingles, Hunyo 22, 1983) Didto akong nakuha ang impormasyong akong gikinahanglan. Sa sunod adlaw gisultihan sa akong magtutudlo ang tibuok klase nga ang akong pagdukiduki bahin sa maong asaynment maoy talagsaon, ug iyang gibasa ang akong materyal ngadto sa tibuok klase. Sa pagkahuman niyag basa, ang tanan namakpak sa ilang mga kamot. Salamat sa kahibulongang mga magasin.
S. T., Italya
Ang Papa Nagsigig Lakaw
Kinahanglang ako magsulat kaninyo ug magtanyag sa pahalipay bahin sa nindot kaayong artikulo nga inyong gisulat bahin sa Papa. (Mayo 8, 1984) Ang kalibotan dili hingpit ug dili gayod mahingpit, apan ang pagpakita sa iyang nawong sa tibuok kalibotan motabang ug diyutay. Karon pahisgota ako bahin sa hinungdanong bahin sa akong sulat. Lagmit kamo wala mahigugma sa inyong inahan. Binuang paminawon, apan kana ang inyong ginaingon. Kamo nahibalo nga ang atong Ginoo NAHIGUGMA sa iyang inahan. Sa namatay siya sa krus siya milantaw sa ubos ug naghunahuna bahin sa iyang inahan.
R. A. D., Illinois
Kami nahigugma gayod sa among mga inahan, sumala sa ginatudlo sa Bibliya. (Exodo 20:12; Proverbio 6:20) Si Jesus may dakong gugma alang sa iyang inahan, apan wala niya dasiga ang uban sa pagpakitag pagpalabi kaniya. Sa may misulti kaniya: “Ang imong inahan ug imong mga igsoon atua sa gawas nagatindog nga buot makigkita kanimo,” si Jesus mitubag: ‘Ang akong inahan ug akong mga igsoon mao kini sila nga nagapatalinghog sa pulong sa Diyos ug nagabuhat niini.’ (Lucas 8:20, 21) Matuod, sa nag-antos si Jesus nga nagbitay sa kahoy sa pagsakit, iyang gipakita ang mahigugmaong paghunahuna alang sa iyang inahan, nga gitugyan ang pag-atiman kaniya ngadto sa usa ka minahal nga tinun-an. (Juan 19:26, 27) Apan samtang siya hapit nang mamatay ang iyang mga hunahuna naliso ngadto sa iyang amahan, kay siya miingon: “Amahan, sa imong mga kamot akong gitugyan ang akong espiritu.” (Lucas 23:46) Siya wala magdasig kanato sa pagsimba kang Maria.—ED.