Gikan sa Among mga Magbabasa
Paghikog sa mga Batan-on Buot kong pasalamatan kamo ug dako sa serye sa mga artikulong “Unsay Paglaom Alang sa mga Batan-on Karon?” (Septiyembre 8, 1998) Ako nakahilak. Ako misulay sa paghikog sa makadaghang higayon. Apan ako malipayon nga ako wala molampos.
A. Z., Republika sa Czech
Kini maoy masinaboton kaayong mga artikulo bahin sa sensitibong ulohan. Misulay ako sa pagtapos sa akong kinabuhi dili pa dugay niining tuiga samtang ako nagmagul-anon. Salamat niining tukma-sa-panahong ulohan. Kini nagluwas sa akong kinabuhi.
R. P., Inglaterra
Ikasubo, ako adunay duha ka klasmet nga misulay sa paghikog. Ang usa kanila mibuhat sa ingon tungod kay sa dihang iyang gipalandong ang iyang umaabot, wala siyay makita nga bisan unsang paglaom—mga kalisdanan lamang nga kinahanglang buntogon. Busa kining artikuloha maoy praktikal, kay kini nagsaysay diha sa tin-aw kaayo ug espesipikong paagi kon sa unsang paagi ang atong umaabot makabatog kahulogan.
R. D., Espanya
Ang inyong artikulo nakatandog sa akong kasingkasing. Daw sama ra nga si Jehova nakigsulti kanako ingong usa ka mahigugmaong Amahan. Sa dihang ako bata pa, ako nakaagom ug pag-abuso gikan sa akong amahan. Gibati ko ang pagkawalay-pulos ug sagad naghunahuna sa pagtapos sa akong kinabuhi. Apan karon, ingon sa gisugyot sa inyong artikulo, ako nagaugmad sa pangandoy alang “sa tinuod nga kinabuhi.”—1 Timoteo 6:19.
S. R., Brazil
Salamat, ilabina sa mga kinutlo gikan sa mga batan-on, nga daghan niana ang nasudlan ug mga solusyon sa mga problema diha lamang sa pipila ka pulong.
W. H., Alemanya
Pagpangitag Kuwarta Salamat kaayo sa paggahin ug panahon sa pagpatik sa matulon-anong artikulo nga “Mga Batan-on Nangutana . . . Sa Unsang Paagi Ako Makapangitag Kuwarta?” (Agosto 22, 1998) Nalisdan ako sa pagpangitag trabaho. Apan akong gisunod ang inyong mga sugyot ug sa kataposan nakakaplag ug trabaho!
S. D., Ghana
Senyas nga Pinulongan Human mabasa ang inyong artikulo nga “Usa ka Pinulongan nga Imong Makita!” (Septiyembre 8, 1998), kinahanglan akong mosulat ug magpasalamat kaninyo. Ang mga artikulo nga sama niini motabang kanato nga masabtan ang uban nga walay samang mga kahimtang sama sa atong napahimuslan. Aduna akoy higala nga natawong bungol, ug buot kong mokat-on ug senyas nga pinulongan. Apan ambot ba, wala gayod akoy panahon sa pagbuhat niana. Dili ko na gayod ioktaba ang pagtuon niana!
M. E., Inglaterra
Buot kong pasalamatan kamo tungod sa dakong paningkamot nga inyong gibuhat sa pagpaluyo sa mga bungol. Akong gihatod ang pipila ka kopya sa inyong artikulo ngadto sa mga opisyal sa kagamhanan. Tungod kay kadto maayo-kaayong pagkasulat, sila mihangyo ug dugang mga kopya! Ako usab nga gipakita kini sa usa ka babaye nga supak sa pagtuon ug Bibliya sa iyang bungol nga anak nga babaye uban sa mga Saksi ni Jehova. Human mabasa ang artikulo, siya mihilak sa kalipay. Siya karon nagpaluyo na sa mga paningkamot sa iyang anak sa pagtambong sa Kristohanong mga tigom ug misaad pa gani nga abagahon ang gastos sa iyang transportasyon ngadto sa usa ka Kristohanong kombensiyon!
E. R., Mexico
Kinahanglan ko kamong pahibaloon kon unsa ka dako ang akong pagpabili sa artikulo. Dihay akong tumong sa pagtuon ug American Sign Language ug pag-abag diha sa lokal nga senyas-pinulongan nga kongregasyon sa mga Saksi ni Jehova. Apan ako naluya. Ang artikulo mihatag gayod kanakog panukmod nga akong gikinahanglan sa pagkab-ot sa akong tumong!
N. D., Tinipong Bansa
Makalingaw ang pagkahibalo nga ang mga Bungol sa tinuoray naghunahuna sa ilang gisenyas nga pinulongan. Ingong usa ka tawong makadungog, mas magmahunahunaon na ako sa pagpangitag mga paagi nga makigkomunikar sa mga Bungol diha sa positibong paagi.
P. H., Tinipong Bansa