Mapait nga Pagsupak sa Amerika del Norte

100 KA TUIG

“KON ako ilang gilutos, kamo usab ilang pagalutoson.” “Kamo pagadakpon ug pagalutoson . . . Kamo pagataralon ngadto sa atubangan sa mga hari ug mga gobernador tungod sa akong ngalan . . . , ug ang pipila kaninyo ilang pagapatyon; ug kamo mahimong mga tumong sa pagdumot sa tanang tawo tungod sa akong ngalan.”—Juan 15:20; Lucas 21:12-17.

Ang mga pulong ni Jesus, nga gikutlo sa ibabaw, tin-awng nagapaila nga ang matuod niyang mga sumusunod pagalutoson. Apan ngano? Siya nagatubag: “Kon sila bahin pa sa kalibotan, ang kalibotan mahigugma kon unsay iya. Karon tungod kay kamo dili man bahin sa kalibotan, apan gipili ko kamo gikan sa kalibotan, tungod niini ang kalibotan nagadumot kaninyo.”—Juan 15:19.

Kini ba ang kahimtang niadtong mga ministro nga nagahawas sa Watch Tower Bible and Tract Society, ang mga Saksi ni Jehova? Kon mao, unsa ang mga hinungdan sila ginalutos? Kana ba tungod sa pag-apil-apil sa politika o pagkamay-gidapigan sa relihiyosong mga gubat ug mga rebolusyon? Unsay ginapaila sa talaan sa milabay nga 100 ka tuig?

Pagsupak sa Tinipong Bansa sa Unang Panahon

Sulod sa 32 ka tuig (1884-1916) ang presidente sa Watch Tower Bible and Tract Society mao si Charles Taze Russell. Siya usa ka maisogong magwawali ug magsusulat nga daghag sinulat. lyang gisaway nga maisogon ug gipanghimakak ang doktrinang Trinidad, ang dili-mamatay nga kalag ug walay-kataposang impiyernong-kalayong mga pagtulon-an. Sa usa ka panahon ang mga sermon ni Russell gipatik kada semana diha sa mga 3,000 ka peryodiko sa Tinipong Bansa, Canada ug Uropa. Ingong sangpotanan siya kanunayng giatake, ilabina pinaagi sa mga klero. Daghan sa iyang mga kaaway midangop pa sa personal nga mga pag-atake sa tinguha sa pagpakaulaw kaniya. Unsay iyang pag-isip sa maong mga mapasipalahon? Kas-a miingon siya: “Kon mohunong ka sa pagpatid sa matag iro nga mopaghot kanimo, dili ka makaabot sa layo.”

Iyang gihukom nga dili usikan ang daghang panahon ug salapi diha sa mga korte, nga makahatag lamag labawng publisidad ngadto sa iyang mga magsusupak nga klero. Siya nagtuo sa lagda nga gipahayag ni Jesus: “Kay ang maayong kahoy dili mamunga sa dunot nga bunga; unya walay dunot nga kahoy ang mamungag maayong bunga. Kay ang matag kahoy mailhan sa iyang bunga. . . . Ang usa ka maayong tawo magapagawas ug maayo gikan sa maayong bahandi sa iyang kasingkasing.” Gipalabi ni Russell nga ang maayong mga bunga sa iyang ministeryo maoy magbayaw kaniya.—Lucas 6:43-45.

“Ang Pipila Mangasuko”

Apan ang kinadak-ang pagsupak mibangon wala madugay pagkamatay ni Russell. Panahon sa iyang pagkinabuhi iyang gipatik ang serye sa mga tomo sa pagtuon ug Bibliya nga gitawag Studies in the Scriptures. Maoy iyang tuyo ang pagsulat sa ikapito ug pangataposang tomo, o, sumala pa niya, “Kon ihatag sa Ginoo ang yawi ngadto sa lain, siya makasulat niana.” Si Russell namatay sa 1916, ug ang ikapitong tomo, gitawag The Finished Mystery, natapos niadto sa mga membro sa hedkuwarter sa Brooklyn ug giluwatan sa Hulyo 1917. Sa pila ra ka bulan ang sirkulasyon niadto nakaabot sa 850,000 ka kopya.

Ang libro maoy masakit nga pagyagyag sa klero nga matang sa Kakristiyanohan ug sa politikanhong pagmaneobra sa patriotismo sa pagpakamatarong sa masa nga pagpamatay sa duha ka kiliran diha sa gubat sa kalibotan. Ang pasiuna sa libro mipahayag: “Ang pipila magbagulbol ug mangitag sayop niining libroha; ang pipila mangasuko, ug ang pipila mokuyog sa mga maglulutos.” Ang atake nga nahitabo sa Watch Tower Bible and Tract Society maoy grabe kaayo: Sa unsang paagi nahitabo kadto?

Sa Abril 1917 ang Tinipong Bansa mideklarar ug gubat batok sa Alemanya ug sa ingon nahimong aktibong entrante sa Gubat sa Kalibotan I. Ang Britanikong Imperyo, apil ang Canada, nahibuylog na nianang gubata. Kining kombinasyon sa mga hitabo duyog sa pila ka parapo diha sa The Finished Mystery mihatag sa klero ug higayon sa pagsulay pagdugmok sa maong Sosyedad sa Bibliya.

Sa Pebrero 12, 1918, ang Canadianong gobyerno nagdili sa Watch Tower Society! Unsa kaha ang hinungdan? Usa ka dispatso sa prensa misaysay: “Ang Sekretaryo sa Estado, ilalom sa mga lagda sa pagsensura sa prensa, miluwat sa mga balaod nga nagdili sa pagbaton diha sa Canada sa ubay-ubay nga basahon, nga apil niana mao ang librong gipatik sa International Bible Students Association [ang ngalan sa sanga sa Watch Tower Society sa Canada], nga nag-ulohang ‘STUDIES IN THE SCRIPTURES—The Finished Mystery.’ . . . Ang pagbaton sa bisan unsang gidili nga mga libro magpailalom sa nagbaton sa multa nga dili mokapin sa $5,000 ug lima ka tuig sa prisohan.”—Italiko amoa.

Kinsay Nagpaluyo sa Atake?

Sa kaulahian, ang Winnipeg, Canada, Tribune miingon: “Ang mga pagkutlo gikan sa usa sa labing bag-ong mga isyu sa ‘The Bible Students Monthly’ gisaway gikan sa pulpito sa pila ka semana nga miagi ni Rev. Charles G. Paterson, Pastor sa St. Stephen’s Church. Human niadto si Abogado Heneral Johnson nagpasugo ngadto kang Rev. Paterson sa usa ka kopya sa basahon. Ang mando sa tig-sensura gituohan nga mao ang laktud nga resulta.” (Italiko amoa.) Lagmit ang pila ka patriotikong klerigo ang nagpasiugda sa maong atake.

Sa Tinipong Bansa, ang usa ka distritong korte sa New York miluwat sa usa ka mandamento de aresto sa bag-ong presidente sa Watch Tower Society, si J. F. Rutherford, ug sa pito niya ka suod nga kauban. Gisumbong sila sa “sala nga supak-balaod, malapason ug tinuyong pagpahinabog pagkadili-masinugtanon, pagkadili-maunongon ug pagdumili sa katungdanan diha sa militaryo ug naval nga mga kusog sa Tinipong Bansa sa America . . . [pinaagi sa] pagpanagtag ug dayag nga pagpasirkular sa tibuok Tinipong Bansa sa Amerika sa usa ka librong gitawag ‘Volume VII. Bible Studies. The Finished Mystery.’”

Sa taliwala sa kasibot sa gubat ug mainitong patriotismo, ang walo nga gikiha gipailalom sa kataw-anang mga palakaw sa korte nga natapos nga ang pito kanila, apil ang abogadong si Rutherford, nga ang matag usa gisentensiyahan sa upat ka dungang mga tagal sa 20 ka tuig nga pagkapriso. Ang ika-walo nga gikiha gisentensiyahan sa 10 ka tuig. Sanglit gihimo na ang mga apelasyon, gihangyo ang piyansa. Ang Katolikong Huwes Manton nagdumili sa ilang hangyo.

Tapos sa siyam ka bulan sa Atlanta penitentiary, ang opisyales sa Watch Tower sa kataposan gibuhian pinasukad sa piyansa samtang nagpaabot sa ilang apelasyon. Sa kaulahian gipakitang ang orihinal nga paghusay nasudlan sa labing menos 125 ka sayop, nga niana pila ra ang gikinahanglan aron sa pagbalit-ad sa sayop nga mga paghukom. Sa ingon si J. F. Rutherford ug iyang mga kauban napahigawas sa sala. Ngani, siya nagpraktis pa sa pagkaabogado atubangan sa Korte Suprema sa Tinipong Bansa, nga imposible unta kon siya nahukmang sad-an sa bisan unsang krimen.

Ang Klero ug Kapintas sa Panong Manggugubot

Ugaling, kadtong mga hitaboa nagpagawas sa sunodsunod nga paglutos nga maikagong gisugnoran sa klero. Ania na ang ilang higayon, nga mipasangil sa pagkapatriotiko, sa pagdugmok sa Watch Tower Bible and Tract Society sa bug-os gayod, sila naghunahuna.

Usa ka taho nagpahibalo kanato: “Sa usa ka lungsod sa Estado sa Oregon ang Alkalde ug duha ka klerigo miorganisar sa usa ka magubotong panon, nga naggukod sa usa sa mga mamumulong sa [International Bible Students] Association pagawas sa siyudad ug nagsunod kaniya hangtod sa nait nga lungsod. Nakaeskapo ang mamumulong, pero nasakpan sa panon ang higala nga mikuyog kaniya ug ilang gibulitan siya sa grasa ug alkitran. . . .

“Sa Los Angeles ang mga klerigo nanghambog nga ang mga Estudyante sa Bibliya pagadakpon ug prisohon nga walay piyansa. Ang pipila niadtong mga klerigoha nangadto sa mga tag-iya sa mga apartment ug mingsulay sa pagdani sa mga tag-iya nga papahawaon ang mga nangabang nga mga sakop sa International Bible Students Association. . . .

“Abril 22, 1918, sa Wynnewood, Oklahoma, si Claud Watson sa primero gipriso ug dayon tinuyong gibuhian nga gihatag ngadto sa usa ka magubotong panon nga nalangkoban sa mga magwawali, mga negosyante ug pila nga uban nga nagkulata kaniya, nagpalatigo kaniya pinaagi sa usa ka negro ug, sa dihang siya naulian ug diyutay, gilapdosan na usab siya. Unya ilang gibuboan siyag alkitran ug balhibo sa tibuok lawas.”

Apan kadto bang nagkahiusang pagsupak sa relihiyoso ug politikanhong mga elemento nagtapos sa Watch Tower Bible and Tract Society? Sa kasukwahi. Sa Septiyembre 1919, unom ka bulan tapos si J. F. Rutherford ug iyang mga kauban gibuhian sa prisohan, ang usa ka heneral nga kombensiyon sa mga Estudyante sa Bibliya gihimo sa Cedar Point, Ohio. Didto gipahibalo ni J. F. Rutherford ang pagpatik sa usa ka bag-ong magasin nga tawgong The Golden Age. Latas sa katuigan, kanang basahona maisogong nagyagyag “sa diyos niining sistema sa mga butang,” si Satanas, ug sa iyang tulo-ka-pilong instrumento sa pag-ulipon sa katawhan—ang bakak nga relihiyon, mananapong politika ug dakong negosyo. Ang The Golden Age (nga sa ulahi ginganlang Consolation) mipunting sa Gingharian sa Diyos pinaagi ni Kristo ingong bugtong angayang kagamhanan alang sa tanang katawhan.—2 Corinto 4:4.

Karong adlawa kanang mao mismong magasin gitawag Awake!, ang basahon mismong imong ginabasa. Kini karon may sirkulasyon diha sa 54 ka pinulongan nga may halos 9 milyong kopya matag gula. Ang iyang kauban, ang The Watchtower, nga gidili diha sa daghang kanasoran panahon sa lisod nga katuigan sa Gubat sa Kalibotan II, karon dunay aberids nga imprenta nga 10,200,000 ka kopya sa total nga 102 ka pinulongan! Kana ang labing-daghag pinulongan nga pagpanagtag sa bisan unsang magasin sa kalibotan. Kining mga kamatuorana maoy pamatuod nga tapos sa 100 ka tuig nga pagpatik ug paglutos, ang Watch Tower Bible and Tract Society mas lig-on kay sukad masukad!

[Letrato sa panid 10]

Ang klero migamit sa librong “The Finished Mystery” sa pagpukaw sa paglutos