Seksuwal nga Pag-abuso sa Bata—Mangil-ad nga Damgo sa Tanang Inahan
ALANG sa batan-ong inahan, kadto maoy usa ka mangil-ad nga damgo nga nahimong tinuod. Sa dihang nagreklamo ang iyang kuwatro-anyos nga anak nga babaye sa sakit sa pus-on, iyang gidala siya aron matan-aw sa doktor. Ang doktor, human sa bug-os nga pag-eksamin, masulob-ong misulti sa inahan nga ang iyang batang babaye maoy biktima sa seksuwal nga pag-abuso. Gilugos siya. Gipahibalo sa inahan ang mga awtoridad sa New York City, kinsa nakatino dayon nga nahitabo ang pag-abuso sa day-care center sa Bronx, New York.
Makalilisang ang mga resulta sa mga imbestigasyon sa sentro. Una, dayon dihay lain, ug lain pa gayod nga bata ang mitug-an nga sila, usab, giabusohan. Labing menos 30 ka bata sa ulahi miangkon nga sila giabusohan nianang sentroha. Ang usa kanila adunay gonorea. Mitungha ang mga taho nga ginaabusohan ang mga bata sa laing day-care center. Dayon aduna pa gayoy lain. Sa kataposan pito ka sentro sa day-care ang giimbestigar diha lamang sa New York City.
Samtang gipublikar ang matag bag-ong kaso, ang mga taho sa pag-abuso sa bata misugod sa pagpangabot gikan sa ubang bahin sa nasod. Mikaylap ang iskandalo. Ang mga ginikanan nagpangutan-anay sa usag usa: “Unsay nagakahitabo?” Unsa gayod! Usa ba lamang kini ka tagsaong pagdagsang sa mga hitabo sa pag-abuso? O usa ba kini ka kaylap nga butang nga karon lamang namatikdan?
Usa ka Kaylap nga Suliran
Ang kamatuoran mao, dugay na ang mga hitabo sa seksuwal nga pag-abuso sa mga bata ug karon kaylap na kini. Sa 1983, ang pangulo sa Advisory Task Force sa New York City mitaho ug ‘dramatikong pagsulbong sa gidaghanon sa mga bata nga nahimong mga biktima sa panglugos, seksuwal nga relasyon sa suod nga kabanay, ug ubang porma sa seksuwal nga pag-abuso.’ Si Dr. David Finkelhor sa Family Violence Research Program sa University of New Hampshire mihimog masangkarong pagtuon sa maong ulohan. Iyang nakita nga ang mga bata sa 9 porsiento sa mga ginikanan nga giinterbiyo nakaagig seksuwal nga pag-abuso. Kinse porsiento sa mga babaye ug 6 porsiento sa mga lalaki mismo naabusohan sa sekso sa bata pa!
Walay eksaktong ihap ang makita. Sa Tinipong Bansa, ang National Center on Child Abuse and Neglect nakarekord ug 55,399 ka kaso sa mga batang giabusohan sa sekso sa usa ka tuig. Apan kini maoy mga kaso lamang sa pag-abuso sa sekso sa suod nga kabanay. Ang pag-abuso sa mga higala, sa mga silingan, mga magtutudlo, ug uban pa—maingon man usab sa mga estranghero—mopauswag nianang gidaghanona sa usa ka dakong sukod. Ug ang tigpamaba sa Child Welfare of America misugilon sa Pagmata! nga “ang mga numero nga among nabatonan wala ra sa kumingking.”
Ang magasing Ladies Home Journal nagbanabana: “Ang seksuwal nga pag-abuso sa mga batang babaye maoy upat ka pilo nga mas komun kay sa panglugos sa edad-edarang kababayen-an. Taliwala sa panuigong singko ug 13 anyos, usa sa upat ka batang babaye nahimong mga biktima sa usa ka porma sa seksuwal nga pag-abuso sa mga edad-edaran—kon kini ba pinaagi sa malaw-ayng pagladlad sa kaugalingon, dili angayng paghikaphikap, panglugos, o seksuwal nga relasyon sa suod nga kabanay. Bisag mga batang babaye ang kasagarang mga biktima, 20 ngadto sa 25 porsiento niadtong gipang-atake maoy mga batang lalaki.”
Ang mga doktor kombinsido sa makadaot ug taas-ug-sukod nga mga epekto sa maong pag-abuso. Busa, matingala ang mga ginikanan: ‘Nameligro ba ang akong mga anak? Unsang mga lakang ang akong mahimo sa pagpanalipod kanila? Unsang matang sa tawo ang mosulay sa pagdaot kanila?’